ಅಭಿಮಾನಿಗಳ ಹಬ್ಬದಂದು ಊರ್ವಶಿ ಥಿಯೇಟರ್‌ನಲ್ಲಿ ಉಪೇಂದ್ರ ನಿರ್ದೇಶನದ UI ಟೀಸರ್ ರಿಲೀಸ್
Sep 11, 2023 10:39 AM IST
Share
ಸೆಪ್ಟೆಂಬರ್‌ 18, ಉಪೇಂದ್ರ ಹುಟ್ಟುಹಬ್ಬದಂದು UI ಟೀಸರ್ ರಿಲೀಸ್
ಅಂತೂ ಉಪೇಂದ್ರ ತಮ್ಮ ಹುಟ್ಟುಹಬ್ಬದಂದು UI ಚಿತ್ರದ ಟೀಸರ್ ರಿಲೀಸ್ ಮಾಡುತ್ತಿರುವುದಾಗಿ ಮಾಹಿತಿ ನೀಡಿದ್ದಾರೆ. ಸೆಪ್ಟೆಂಬರ್‌ 18, ಮಧ್ಯಾಹ್ನ 3 ಗಂಟೆಗೆ ಊರ್ವಶಿ ಥಿಯೇಟರ್‌ನಲ್ಲಿ UI ಚಿತ್ರದ ಟೀಸರ್ ಮೊದಲು ಪ್ರದರ್ಶನವಾಗಲಿದೆ.
ಉಪೇಂದ್ರ ನಿರ್ದೇಶನ ಮಾಡುವ ಸಿನಿಮಾಗಳ ಚಿತ್ರಕಥೆ, ಟೈಟಲ್‌ ಸದಾ ವಿಭಿನ್ನವಾಗಿರುತ್ತದೆ ಎಂದು ಸಿನಿಪ್ರಿಯರಿಗೆ ತಿಳಿದ ವಿಚಾರ. ಬಹಳ ವರ್ಷಗಳ ನಂತರ ಮತ್ತೆ ನಿರ್ದೇಶನಕ್ಕೆ ಇಳಿದಿರುವ ಉಪೇಂದ್ರ ತಮ್ಮ ಚಿತ್ರಕ್ಕೆ 'UI' ಎಂದು ನಾಮಕರಣ ಮಾಡಿ ಈಗಾಗಲೇ ಸಿನಿಪ್ರಿಯರ ತಲೆಗೆ ಕೆಲಸ ಕೊಟ್ಟಿದ್ಧಾರೆ. ಇದುವರೆಗೂ ಉಪ್ಪಿ ಚಿತ್ರದ ಟೈಟಲ್‌ ಅರ್ಥವನ್ನು ಮಾತ್ರ ವಿವರಿಸಿಲ್ಲ. ಆದರೆ ಈಗ ತಮ್ಮ ಚಿತ್ರದ ಟೀಸರ್ ಅಪ್‌ಡೇಟ್‌ ಕೊಟ್ಟು ಅಭಿಮಾನಿಗಳಿಗೆ ಗುಡ್‌ ನ್ಯೂಸ್‌ ಕೊಟ್ಟಿದ್ಧಾರೆ.
ವಿಭಿನ್ನ ವಿಡಿಯೋ ಮೂಲಕ ಟೀಸರ್ ಅಪ್‌ಡೇಟ್‌ ನೀಡಿದ ಉಪ್ಪಿ
ಸೆಪ್ಟೆಂಬರ್‌ 11 ಬೆಳಗ್ಗೆ 10 ಗಂಟೆಗೆ ನಮ್ಮ ಚಿತ್ರದ ಟೀಸರ್ ಅಪ್‌ಡೇಟ್‌ ನೀಡುವುದಾಗಿ ಉಪೇಂದ್ರ ಅನೌನ್ಸ್‌ ಮಾಡಿದ್ದರು. ಅದರಂತೆ ತಮ್ಮ ಚಿತ್ರದ ಟೀಸರ್ ಅಪ್‌ಡೇಟ್‌ ನೀಡಿದ್ದಾರೆ. ಇದಕ್ಕೆ ಉಪೇಂದ್ರ ವಿಭಿನ್ನ ರೀತಿಯ ಪ್ರೋಮೋ ಶೂಟ್‌ ಮಾಡಿದ್ದಾರೆ. ಆಗಸ್ಟ್‌ 28 ರಂದು ಉಪೇಂದ್ರ ವಿಭಿನ್ನ ಬಗೆಯ ವಿಡಿಯೋವೊಂದನ್ನು ಹಂಚಿಕೊಂಡು ಶೀಘ್ರದಲ್ಲೇ ತಮ್ಮ ಚಿತ್ರದ ಟೀಸರ್ ಅಪ್‌ಡೇಟ್‌ ನೀಡುವುದಾಗಿ ಹೇಳಿಕೊಂಡಿದ್ದರು. ಚಿತ್ರದ ನಿರ್ಮಾಪಕರಾದ ಶ್ರೀಕಾಂತ್‌ ಹಾಗೂ ನವೀನ್‌ ಮನೋಹರನ್‌ ಜೊತೆ 1:44 ನಿಮಿಷದ ವಿಡಿಯೋದಲ್ಲಿ ಕಾಣಿಸಿಕೊಂಡಿದ್ದು ಚಿತ್ರದ ಟೀಸರ್ ಬಗ್ಗೆ ಮಾತನಾಡಿದ್ದರು. ಇದೀಗ ಈ ವಿಡಿಯೋ ಮುಂದುವರೆದ ಭಾಗವನ್ನು ರಿಲೀಸ್ ಮಾಡಿದ್ದು ಕೊನೆಗೂ ಬಹಳಷ್ಟು ಕಾಯಿಸಿ ಟೀಸರ್ ರಿಲೀಸ್ ಅಪ್‌ಡೇಟ್‌ ನೀಡಿದ್ದಾರೆ.
ಸೆಪ್ಟೆಂಬರ್‌ 18ಕ್ಕೆ UI ಟೀಸರ್ ರಿಲೀಸ್
ಉಪೇಂದ್ರ ಮನೆ ಬಳಿ ಅಭಿಮಾನಿಗಳು ಜಮಾಯಿಸಿ ಟೀಸರ್‌ಗೆ ಬೇಡಿಕೆ ಇಡುತ್ತಾರೆ. ''ನಾನು ಇದುವರೆಗೂ ಚಿತ್ರದ ಒಂದು ತುಣುಕು ಬಿಡದಿರಲು ಕಾರಣ ನೀವೇಲ್ಲಾ ಥಿಯೇಟರ್‌ನಲ್ಲಿ ಕುಳಿತು ತಲೆಎತ್ತಿ ಸಿನಿಮಾ ನೋಡಬೇಕೆಂಬ ಕಾರಣಕ್ಕೆ. ತಲೆ ತಗ್ಗಿಸಿಕೊಂಡು ಮೊಬೈಲ್‌ನಲ್ಲಿ ಚಾಟ್‌ ಮಾಡೊದಿಕ್ಕಲ್ಲ. ನೀವೆಲ್ಲಾ ಸಿನಿಮಾ ಟೀಸರ್ ನೋಡಿದ ನಂತರವೇ ಸಿನಿಮಾ ನೋಡುವುದೋ , ಬಿಡುವುದೋ ಎಂದು ನಿರ್ಧರಿಸಿದ್ದೀರಾ? ಸರಿ ಹಾಗಾದರೆ ಇದೇ ಸೆಪ್ಟೆಂಬರ್‌ 18 ರಂದು ಅಭಿಮಾನಿಗಳ ಹಬ್ಬದ ದಿನ ಊರ್ವಶಿ ಥಿಯೇಟರ್‌ನಲ್ಲಿ UI ಚಿತ್ರದ ಟೀಸರನ್ನು ತಲೆ ಎತ್ತಿ ನೋಡುತ್ತೀರ'' ಎಂದು ಉಪೇಂದ್ರ ಚಿತ್ರದ ಟೀಸರ್ ಅಪ್‌ಡೇಟ್‌ ನೀಡಿದ್ದಾರೆ.
ಊರ್ವಶಿ ಥಿಯೇಟರ್‌ನಲ್ಲಿ ಬಿಡುಗಡೆ ಆಗಲಿರುವ ಟೀಸರ್
ಇತ್ತ ಮರೆಯಲ್ಲಿ ಎಲ್ಲವನ್ನೂ ನಿಂತು ಗಮನಿಸುವ ನಿರ್ಮಾಪಕರಾದ ಶ್ರೀಕಾಂತ್‌ ಹಾಗೂ ನವೀನ್‌ ಮನೋಹರನ್‌ ನಮ್ಮ ಐಡಿಯಾ ಸಕ್ಸಸ್‌ ಆಯ್ತು ಎಂದು ಖುಷಿ ಪಡುತ್ತಾರೆ. ಈಗಿನ ಸ್ಟಾರ್‌ಗಳು ದೇವರ ಮಾತನ್ನು ಕೇಳುತ್ತಾರೋ ಇಲ್ಲವೋ ಅಭಿಮಾನಿ ದೇವರುಗಳ ಮಾತನ್ನು ಮಾತ್ರ ಕೇಳೇ ಕೇಳ್ತಾರೆ ನಡೀರಿ ಸರ್‌ ಎನ್ನುತ್ತಾ ಅಲ್ಲಿಂದ ಹೊರಡುತ್ತಾರೆ. ಅಂತೂ ಉಪೇಂದ್ರ ತಮ್ಮ ಹುಟ್ಟುಹಬ್ಬದಂದು UI ಚಿತ್ರದ ಟೀಸರ್ ರಿಲೀಸ್ ಮಾಡುತ್ತಿರುವುದಾಗಿ ಮಾಹಿತಿ ನೀಡಿದ್ದಾರೆ. ಸೆಪ್ಟೆಂಬರ್‌ 18, ಮಧ್ಯಾಹ್ನ 3 ಗಂಟೆಗೆ ಊರ್ವಶಿ ಥಿಯೇಟರ್‌ನಲ್ಲಿ UI ಚಿತ್ರದ ಟೀಸರ್ ಮೊದಲು ಪ್ರದರ್ಶನವಾಗಲಿದ್ದು ನಂತರ ಲಹರಿ ಯೂಟ್ಯೂಬ್‌ ಚಾನೆಲ್‌ನಲ್ಲಿ ರಿಲೀಸ್ ಮಾಡಲಾಗುವುದು.