ದರ್ಶನ್‌ ಬಗ್ಗೆ ಮಾತಾಡಿ ಅಂದ್ರೆ, ‘ಅಷ್ಟು ಎತ್ತರಕ್ಕೆ ನಾನಿನ್ನು ಬೆಳೆದಿಲ್ಲ’ ಎಂದು ಕೈ ಮುಗಿದ ಸಂಜು ವೆಡ್ಸ್‌ ಗೀತಾ 2 ನಿರ್ದೇಶಕ ನಾಗಶೇಖರ್‌

Sanju weds Geetha 2: ನಿರ್ದೇಶಕ ನಾಗಶೇಖರ್ ನಿರ್ದೇಶನದ ಸಂಜು ವೆಡ್ಸ್ ಗೀತಾ 2 ಶುರುವಾದಾಗಿನಿಂದಲೂ ಸದ್ದು ಮಾಡುತ್ತಿದೆ. ಈ ಹಿಂದಿನ ಸಿನಿಮಾಗಿಂಗ ಇಲ್ಲಿ ಭಿನ್ನ ಕಥೆಯನ್ನು ತೆರೆಮೇಲೆ ತರಲು ನಿರ್ದೇಶಕರು ಪ್ಲಾನ್‌ ಮಾಡಿದ್ದಾರೆ. ಈ ಸಲ ರೇಷ್ಮೆ ಬೆಳೆಗಾರರ ಹೋರಾಟದ ಹಿನ್ನೆಲೆಯಲ್ಲಿ ಸಿನಿಮಾ ಮಾಡಿದ್ದಾರೆ ನಿರ್ದೇಶಕ ನಾಗಶೇಖರ್.‌ ಮೊದಲ ಭಾಗದಲ್ಲಿ ಶ್ರೀನಗರ ಕಿಟ್ಟಿಗೆ ರಮ್ಯಾ ಜೋಡಿಯಾಗಿದ್ದರು. ಇದೀಗ ಆ ಸ್ಥಾನಕ್ಕೆ ರಚಿತಾ ರಾಮ್‌ ಎಂಟ್ರಿಯಾಗಿದ್ದಾರೆ. ಇತ್ತೀಚೆಗಷ್ಟೇ ಚಿತ್ರದ ಪ್ರೀ ಕ್ಲೈಮ್ಯಾಕ್ಸ್ ಚಿತ್ರೀಕರಣ ಕಂಠೀರವ ಸ್ಟುಡಿಯೋದಲ್ಲಿ ನಡೆಯಿತು. ಬಳಿಕ ಸಿನಿಮಾ ಬಗ್ಗೆ ಎಲ್ಲರೂ ತಮ್ಮ ಅನಿಸಿಕೆ ಅಭಿಪ್ರಾಯವನ್ನು ಹಂಚಿಕೊಂಡರು.

ಚಿತ್ರದ ಪ್ರಿ ಕ್ಲೈಮ್ಯಾಕ್ಸ್ ಸೀನ್ ಶೂಟಿಂಗ್‌

"ಈಗಾಗಲೇ ಚಿತ್ರದ ಬಹುತೇಕ ಚಿತ್ರೀಕರಣ ಮುಗಿದಿದೆ. ಇದು ಚಿತ್ರದ ಪ್ರಿ ಕ್ಲೈಮ್ಯಾಕ್ಸ್ ಸೀನ್. ಇದರ ನಂತರ ನೆದರ್‌ಲೆಂಡ್‌ನಲ್ಲಿ ಚಿತ್ರೀಕರಣ ನಡೆಯಲಿದೆ. ನಿರ್ಮಾಪಕ ಕುಮಾರ್ ಅವರ ಸಹಕಾರದಿಂದ ಚಿತ್ರದ ಚಿತ್ರೀಕರಣ ಅಂದುಕೊಂಡ ಪ್ಲಾನ್ ಪ್ರಕಾರ ಸರಾಗವಾಗಿ ಮುಗಿಯುತ್ತಿದೆ. ಹನ್ನೆರಡು ಕೋಟಿ ಅಂದುಕೊಂಡ ಬಜೆಟ್ ಈಗ ಹದಿನೈದು ಕೋಟಿಯಾಗಿದೆ. ಶೂಟಿಂಗ್ ಜೊತೆಗೇ ಎಡಿಟಿಂಗ್ ಸೇರಿದಂತೆ ಚಿತ್ರದ ಪೋಸ್ಟ್‌ ಪ್ರೊಡಕ್ಷನ್ ಕೆಲಸಗಳೂ ಸಹ ಬಹುತೇಕ ಮುಗಿದಿವೆ‌ ಎಂದಿದ್ದಾರೆ ನಾಗಶೇಖರ್.‌

ಇದನ್ನೂ ಓದಿ: ಕರ್ಮ ಯಾರನ್ನೂ ಬಿಡಲ್ಲ! ಡಿವೋರ್ಸ್‌ ಬಳಿಕ ಟ್ರೂ ಲವ್‌ ಹುಡುಕಾಟದಲ್ಲಿದ್ದೇನೆ; ಕಾಮಿಡಿ ಕಿಲಾಡಿಗಳು ನಿರೂಪಕಿ ಚೈತ್ರಾ ವಾಸುದೇವನ್‌

ದರ್ಶನ್‌ ಬಗ್ಗೆ ಕೇಳಿದ್ದಕ್ಕೆ ಕೈ ಮುಗಿದ ನಾಗಶೇಖರ್...

ಕೊಲೆ ಪ್ರಕರಣದಲ್ಲಿ ನಟ ದರ್ಶನ್‌ ಬಂಧನವಾಗ್ತಿದ್ದಂತೆ ಸಾಕಷ್ಟು ಮಂದಿ ಸೆಲೆಬ್ರಿಟಿಗಳು ಪ್ರತಿಕ್ರಿಯೆ ನೀಡಿದ್ದಾರೆ. ಇನ್ನು ಕೆಲವರು ತುಟಿ ಬಿಚ್ಚಿಲ್ಲ. ಈ ನಡುವೆ ಇದೇ ದರ್ಶನ್‌ ಪ್ರಕರಣದ ಬಗ್ಗೆ ನಿಮ್ಮ ಅಭಿಪ್ರಾಯವೇನು ಎಂದು ನಾಗಶೇಖರ್‌ಗೂ ಪ್ರಶ್ನೆ ಎದುರಾಗಿತ್ತು. ಹೆಚ್ಚು ಮಾತನಾಡದೇ ಕೈ ಮುಗಿದು ಅದು ಬೇಡದ ವಿಷಯ ಎಂದರು. " ಚಿತ್ರರಂಗದಲ್ಲಿನ ಬೆಳವಣಿಗೆಗಳ ಬಗ್ಗೆ ಮಾತನಾಡುವುದಕ್ಕೆ, ಅಷ್ಟು ಎತ್ತರಕ್ಕೆ ನಾನು ಬೆಳೆದಿಲ್ಲ. ನಾನೊಬ್ಬ ಸಣ್ಣ ಮನುಷ್ಯ" ಎಂದಷ್ಟೇ ಹೇಳಿ ಕೈ ಮುಗಿದರು.

ಇದನ್ನೂ ಓದಿ: ಬದುಕು ಬಾಡಿಸದಿರಲಿ ಸಿನಿಮಾ ಕನಸು; ಸಿನಿ ನಿರ್ದೇಶನ, ನಿರ್ಮಾಣದ ಕನಸು ಹೊತ್ತವರು ಕಲಿಯಬೇಕಾದ ಪಾಠವಿದು; ಕುಸುಮಾ ಆಯರಹಳ್ಳಿ ಬರಹ

ದಸರಾ ವೇಳೆಗೆ ಸಿನಿಮಾ ರಿಲೀಸ್‌ ಪ್ಲಾನ್‌..

“ಈಗಾಗಲೇ ನಾವು ಶೂಟಿಂಗ್ ಕೊನೇ ಹಂತಕ್ಕೆ ಬಂದಿದ್ದೇವೆ. ಅಂದುಕೊಂಡ ಹಾಗೆ ಚಿತ್ರ ಮೂಡಿಬರುತ್ತಿದೆ. ಒಂದು ಅದ್ಭುತ ದೃಶ್ಯಕಾವ್ಯವಾಗಿ ಸಂಜು ವೆಡ್ಸ್ ಗೀತಾ ಚಿತ್ರ ಮೂಡಿಬರಬೇಕು ಎನ್ನುವುದೇ ನಮ್ಮ ಉದ್ದೇಶ. ದಸರಾ ವೇಳೆಗೆ ಸಿನಿಮಾ ರಿಲೀಸ್‌ ಪ್ಲಾನ್‌ ಇದೆ” ಎಂದು ನಿರ್ಮಾಪಕ ಛಲವಾದಿ ಕುಮಾರ್ ಹೇಳಿದರು. ಪವಿತರ ಇಂಟರ್ ನ್ಯಾಷನಲ್ ಮೂವೀಮೇಕರ್ಸ್ ಅಡಿಯಲ್ಲಿ ಅದ್ದೂರಿ ಬಜೆಟ್‌ನಲ್ಲಿ ಈ ಸಿನಿಮಾ ನಿರ್ಮಾಣವಾಗುತ್ತಿದೆ.

ಶ್ರೀಧರ ವಿ ಸಂಭ್ರಮ್ ಸಂಗೀತದಲ್ಲಿ 5 ಹಾಡುಗಳು ಮೂಡಿಬಂದಿವೆ. ಆ ಹಾಡುಗಳಿಗೆ ಸೋನು ನಿಗಮ್, ಶ್ರೇಯಾ ಘೋಷಾಲ್, ಮಂಗ್ಲಿ ದನಿಯಾಗಿದ್ದಾರೆ. ರಾಗಿಣಿ ದ್ವಿವೇದಿ, ಚೇತನ್ ಚಂದ್ರ, ರಂಗಾಯಣ ರಘು, ಸಾಧು ಕೋಕಿಲ, ತಬಲಾನಾಣಿ, ಗಿಚ್ಚಿಗಿಲಿಗಿಲಿ ವಿನೋದ್, ಖಳನಟ ಸಂಪತ್ ಕುಮಾರ್ ಸೇರಿ ಕಲಾವಿದರ ದಂಡೇ ಈ ಸಿನಿಮಾದಲ್ಲಿದೆ.

ಇದನ್ನೂ ಓದಿ: ಟಿವಿಯಲ್ಲಿ ನೋಡಿಯೇ ನನ್ನನ್ನು ಮನೆ ಸೊಸೆ ಅನ್ಕೊಂಡಿತ್ತು ಆ ತಮಿಳು ಕುಟುಂಬ, ಕೊನೆಗೆ ಅವ್ರ ಮನೆಯನ್ನೇ ಸೇರಿದೆ; ನಟಿ ಸ್ನೇಹಾ ಮದುವೆ ಕಥೆ