ನವೆಂಬರ್‌ನಲ್ಲಿ ತೆರೆಗೆ ಬರ್ತಿದೆ ನಾ ನಿನ್ನ ಬಿಡಲಾರೆ ಸಿನಿಮಾ; ಇದು ಅನಂತ್‌ನಾಗ್‌, ಲಕ್ಷ್ಮೀ ಅಭಿನಯದ ಸಿನಿಮಾವಲ್ಲ
Oct 26, 2024 03:14 PM IST
Share
ನವೆಂಬರ್‌ 29ಕ್ಕೆ ಬಿಡುಗಡೆ ಆಗುತ್ತಿರುವ ನಾ ನಿನ್ನ ಬಿಡಲಾರೆ ಸಿನಿಮಾದಲ್ಲಿ ನಾಯಕಿ ಅಂಬಾಲಿ ಭಾರತಿ
1979ರಲ್ಲಿ ತೆರೆ ಕಂಡ ಅನಂತ್‌ ನಾಗ್‌-ಲಕ್ಷ್ಮೀ ಅಭಿನಯದ ನಾ ನಿನ್ನ ಬಿಡಲಾರೆ ಆ ಸಮಯಕ್ಕೆ ದೊಡ್ಡ ಹಿಟ್‌ ಆಗಿತ್ತು. ಈಗ ಇದೇ ಟೈಟಲ್‌ ಇಟ್ಟುಕೊಂಡು ಹೊಸ ಸಿನಿಮಾ ತಯಾರಾಗಿದ್ದು ನವೆಂಬರ್‌ನಲ್ಲಿ ಸಿನಿಮಾ ತೆರೆಗೆ ಬರುತ್ತಿದೆ.
80-90 ದಶಕದಲ್ಲಿ ತೆರೆ ಕಂಡ ಬಹಳಷ್ಟು ಸಿನಿಮಾ ಹೆಸರುಗಳನ್ನು ಈಗ ಮತ್ತೆ ಬಳಸಿಕೊಳ್ಳುವುದು ಟ್ರೆಂಡ್‌ ಆಗುತ್ತಿದೆ. ನಾಗರಹಾವು, ಚಕ್ರವ್ಯೂಹ, ಯಜಮಾನ ಸೇರಿದಂತೆ ಅನೇಕ ಸಿನಿಮಾಗಳ ಟೈಟಲ್‌ ಮತ್ತೆ ರಿಪೀಟ್‌ ಆಗಿವೆ. ಈಗ ನಾ ನಿನ್ನ ಬಿಡಲಾರೆ ಎಂಬ ಟೈಟಲ್‌ ಇಟ್ಟುಕೊಂಡು ತಯಾರಾಗಿರುವ ಸಿನಿಮಾ ತೆರೆಗೆ ಬರಲು ಸಿದ್ಧವಾಗಿದೆ.
1979ರಲ್ಲಿ ತೆರೆ ಕಂಡಿದ್ದ ನಾ ನಿನ್ನ ಬಿಡಲಾರೆ ಸಿನಿಮಾ
ವಿಜಯ್‌ ನಿರ್ದೇಶನದಲ್ಲಿ ಲಕ್ಷ್ಮೀ, ಅನಂತ್‌ನಾಗ್‌ ಹಾಗೂ ಇನ್ನಿತರರು ನಟಿಸಿದ್ದ ನಾ ನಿನ್ನ ಬಿಡಲಾರೆ ಸಿನಿಮಾ 1979ರಲ್ಲಿ ತೆರೆ ಕಂಡಿತ್ತು. ಚಿತ್ರದ ನಟನೆಗಾಗಿ ಎವರ್‌ಗ್ರೀನ್‌ ಹೀರೋ ಅನಂತ್‌ನಾಗ್‌, ಅತ್ಯುತ್ತಮ ನಟ ವಿಭಾಗದಲ್ಲಿ ಬೆಸ್ಟ್‌ ಫಿಲ್ಮ್‌ಫೇರ್‌ ಪ್ರಶಸ್ತಿ ಪಡೆದಿದ್ದರು. ಈ ಸಿನಿಮಾದ ಬಿಡೆನು ನಿನ್ನ ಪಾದ... ಹಾಡಂತೂ ಎಲ್ಲರಿಗೂ ಫೇವರೆಟ್. ಚಾಮುಂಡೇಶ್ವರಿ ಸ್ಟುಡಿಯೋ ಬ್ಯಾನರ್ ಅಡಿಯಲ್ಲಿ ಸಿ ಜಯರಾಮ್‌ ಈ ಚಿತ್ರವನ್ನು ನಿರ್ದೇಶನ ಮಾಡಿದ್ದರು. ಚಿತ್ರದ ಹಾಡುಗಳಿಗೆ ರಾಜನ್‌ ನಾಗೇಂದ್ರ ಸಂಗೀತ ನೀಡಿದ್ದರು. ಈಗ ಸುಮಾರು 45 ವರ್ಷಗಳ ನಂತರ ಈ ಸಿನಿಮಾ ಹೆಸರನ್ನೇ ಬಳಸಿಕೊಂಡು ಹೊಸ ಸಿನಿಮಾ ರೆಡಿಯಾಗಿದ್ದು ತೆರೆಗೆ ಬರಲು ರೆಡಿ ಆಗುತ್ತಿದೆ.
ಹೊಸಬರ ತಂಡ ತಯಾರಿಸುವ ನಾ ನಿನ್ನ ಬಿಡಲಾರೆ
ಈ ಕಾಲಕ್ಕೆ ತಕ್ಕ ಸಸ್ಪೆನ್ಸ್ ಥ್ರಿಲ್ಲರ್ ಕಂಟೆಂಟ್‌ ಜೊತೆಗೆ ಹೊಸ ತಂಡ ಹೊಸ ಆಯಾಮದೊಂದಿಗೆ ಕನ್ನಡ ಪ್ರೇಕ್ಷಕರೆದುರಿಗೆ ಬರುತ್ತಿದೆ. ಈ ಚಿತ್ರತಂಡ ಸಿಂಗಲ್ ಟೀಸರ್‌ನಿಂದಲೇ ನಿರೀಕ್ಷೆ ಹುಟ್ಟಿಸಿತ್ತು. ಇದೀಗ ಪ್ರೇಕ್ಷಕರ ಎದುರು ಬರಲು ದಿನಾಂಕ ನಿಗದಿ ಮಾಡಿದೆ. ಇದೇ ನವೆಂಬರ್‌ 29 ಕ್ಕೆ ನಾನಿನ್ನ ಬಿಡಲಾರೆ ಸಿನಿಮಾ ಪ್ರೇಕ್ಷಕರೆದುರಿಗೆ ಬರುತ್ತಿದೆ. ಲೈಲಾಕ್ ಎಂಟರ್‌ಟೈನ್ಮೆಂಟ್‌ನ ಹೇಮಂತ್ ಈ ಚಿತ್ರವನ್ನು ರಾಜ್ಯಾದ್ಯಂತ ವಿತರಿಸಿದ್ದಾರೆ. ಕಮಲ ಉಮಾ ಭಾರತಿ ಪ್ರೊಡಕ್ಷನ್ಸ್ ಬ್ಯಾನರ್ ಅಡಿಯಲ್ಲಿ, ಅಂಬಾಲಿ ಭಾರತಿ ನಾಯಕಿಯಾಗಿ ನಟಿಸಿ ನಿರ್ಮಿಸಿರುವ ನಾ ನಿನ್ನ ಬಿಡಲಾರೆ ಸಿನಿಮಾವನ್ನು ನವೀನ್ ಜಿಎಸ್ ನಿರ್ದೇಶಿಸಿದ್ದಾರೆ. ಈ ಚಿತ್ರಕ್ಕೆ ವೀರೇಶ್ ಎಸ್ ಛಾಯಾಗ್ರಹಣ, ಎಮ್‌ಎಸ್ ತ್ಯಾಗರಾಜು ಸಂಗೀತವಿದ್ದು ದೀಪಕ್ ಜಿಎಸ್ ಸಂಕಲನವಿದೆ.
ಸಿನಿಮಾ ಪ್ರಚಾರ ಕಾರ್ಯ ಆರಂಭ
ಅಂಬಾಲಿ ಭಾರತಿ ಜೊತೆಯಾಗಿ ಪಂಚಿ, ಸೀರುಂಡೆ ರಘು, ಕೆಎಸ್‌ ಶ್ರೀಧರ್, ಮಹಾಂತೇಶ್, ಶ್ರೀನಿವಾಸ್ ಪ್ರಭು, ಹರಿಣಿ, ಲಕ್ಷ್ಮೀ ಸಿದ್ದಯ್ಯ, ಮಂಜುಳಾ ರೆಡ್ಡಿ ಹಾಗೂ ಇನ್ನಿತರರು ನಾ ನಿನ್ನ ಬಿಡಲಾರೆ ಸಿನಿಮಾದಲ್ಲಿ ನಟಿಸಿದ್ದಾರೆ. ನಾ ನಿನ್ನ ಬಿಡಲಾರೆ ಚಿತ್ರತಂಡ ಪ್ರಚಾರ ಕಾರ್ಯ ಆರಂಭಿಸಿದೆ. ಶೀಘ್ರದಲ್ಲೇ 2 ಹಾಡುಗಳನ್ನು ರಿಲೀಸ್‌ ಮಾಡುವ ಸಾಧ್ಯತೆ ಇದೆ. ಜೊತೆಗೆ ಟ್ರೈಲರ್‌ ರಿಲೀಸ್‌ ಮಾಡುವ ಪ್ಲ್ಯಾನ್‌ನಲ್ಲಿದೆ.