Shahid Kapoor on KGF Star Yash:'ನನ್ನ ಪ್ರಕಾರ ಯಶ್ ಬಾಲಿವುಡ್‌ನ ನಂ.1 ಹೀರೋ'; ಶಾಹಿದ್‌ ಕಪೂರ್‌ ಕಡೆಯಿಂದ ಹೀಗೊಂದು ಸ್ಟೇಟ್‌ಮೆಂಟ್‌!
Aug 26, 2022 12:36 PM IST
Share
'ನನ್ನ ಪ್ರಕಾರ ಯಶ್ ಬಾಲಿವುಡ್‌ನ ನಂ.1 ಹೀರೋ'; ಶಾಹಿದ್‌ ಕಪೂರ್‌ ಕಡೆಯಿಂದ ಹೀಗೊಂದು ಸ್ಟೇಟ್‌ಮೆಂಟ್‌!
- ಕಾಫಿ ವಿಥ್‌ ಕರಣ್ ಶೋದ ಇತ್ತೀಚಿನ ಏಪಿಸೋಡ್‌ನಲ್ಲಿ ನಟ ಶಾಹಿದ್‌ ಕಪೂರ್‌ ಮತ್ತು ಕಿಯಾರಾ ಅಡ್ವಾಣಿ ಭಾಗವಹಿಸಿದ್ದರು. ಕಾಫಿ ವಿಥ್‌ ಕರಣ್ ಶೋ ಅಂದರೆ ಅಲ್ಲಿ ಒಂದಷ್ಟು ಕಾಂಟ್ರವರ್ಸಿಯಲ್‌ ಹೇಳಿಕೆಗಳು, ಮುಜುಗರಕ್ಕೀಡು ಮಾಡುವ ಪ್ರಶ್ನೆಗಳು ಎದುರಾಗುವುದು ಸಹಜ. ಇದೀಗ ಕಬೀರ್‌ ಸಿಂಗ್‌ ಖ್ಯಾತಿಯ ಜೋಡಿಗೂ ಒಂದಷ್ಟು ಪ್ರಶ್ನೆಗಳನ್ನು ಕೇಳಿದ್ದಾರೆ ಕರಣ್.
ಬೆಂಗಳೂರು: ಪ್ರಶಾಂತ್‌ ನೀಲ್‌ ನಿರ್ದೇಶನದ "ಕೆಜಿಎಫ್‌ ಚಾಪ್ಟರ್‌ 2" ಸಿನಿಮಾ ಸೃಷ್ಟಿಸಿದ ಮೋಡಿ ಎಂಥದ್ದು ಎಂದು ಎಲ್ಲರಿಗೂ ಗೊತ್ತಿದೆ. ಮುಟ್ಟಿದ್ದೆಲ್ಲ ಚಿನ್ನ ಅನ್ನೋ ಮಾತಿನಂತೆ, ದಾಖಲೆಗಳ ಮೇಲೆ ದಾಖಲೆ ಬರೆಯತ್ತ ಹಲವು ದಾಖಲೆಗಳನ್ನು ಈ ಸಿನಿಮಾ ತನ್ನ ವಶಕ್ಕೆ ಪಡೆದಿದೆ. ಬಾಲಿವುಡ್ ಮಂದಿಗೂ ಕೆಜಿಎಫ್‌ ಆರ್ಭಟ ಶಾಕ್‌ ನೀಡಿತ್ತು. ಬಾಕ್ಸ್‌ ಆಫೀಸ್‌ನಲ್ಲಿ 1300 ಕೋಟಿ ರೂ. ಅಧಿಕ ಗಳಿಕೆ ಮಾಡಿ ಹೊಸ ದಾಖಲೆ ಬರೆದಿತ್ತು. ಬಾಲಿವುಡ್‌ನಲ್ಲಿ ಬೇರಾವ ಹೀರೋ ಮಾಡದ ಕಲೆಕ್ಷನ್‌ ಅನ್ನು ಕೆಜಿಎಫ್‌ ಸಿನಿಮಾ ಮಾಡಿತ್ತು. ಈಗ್ಯಾಕೆ ಕೆಜಿಎಫ್‌ ವಿಚಾರ ಅಂದುಕೊಂಡ್ರಾ? ಅದಕ್ಕೂ ಉತ್ತರ ಇಲ್ಲಿದೆ.
ಕಾಫಿ ವಿಥ್‌ ಕರಣ್ ಶೋದ ಇತ್ತೀಚಿನ ಏಪಿಸೋಡ್‌ನಲ್ಲಿ ನಟ ಶಾಹಿದ್‌ ಕಪೂರ್‌ ಮತ್ತು ಕಿಯಾರಾ ಅಡ್ವಾಣಿ ಭಾಗವಹಿಸಿದ್ದರು. ಕಾಫಿ ವಿಥ್‌ ಕರಣ್ ಶೋ ಅಂದರೆ ಅಲ್ಲಿ ಒಂದಷ್ಟು ಕಾಂಟ್ರವರ್ಸಿಯಲ್‌ ಹೇಳಿಕೆಗಳು, ಮುಜುಗರಕ್ಕೀಡು ಮಾಡುವ ಪ್ರಶ್ನೆಗಳು ಎದುರಾಗುವುದು ಸಹಜ. ಇದೀಗ ಕಬೀರ್‌ ಸಿಂಗ್‌ ಖ್ಯಾತಿಯ ಜೋಡಿಗೂ ಒಂದಷ್ಟು ಪ್ರಶ್ನೆಗಳನ್ನು ಕೇಳಿದ್ದಾರೆ ಕರಣ್.
ಆ ಪೈಕಿ ಬಾಲಿವುಡ್‌ನ ನಂ.1 ಹೀರೋ ಮತ್ತು ಹೀರೋಯಿನ್‌ ಯಾರು ಎಂದು ಶಾಹಿದ್‌ಗೆ ಕರಣ್ ಪ್ರಶ್ನೆ ಕೇಳಿದ್ದಾರೆ. ಅದಕ್ಕೆ ಉತ್ತರಿಸಿದ ಶಾಹಿದ್‌, ನನ್ನ ಪಕ್ಕದಲ್ಲಿರುವ ಈ ನಟಿಯೇ ನಂಬರ್‌ 1 ಎಂದಿದ್ದಾರೆ. ಹೀರೋ ಬಗ್ಗೆ ಒಂದಷ್ಟು ಚರ್ಚೆ ಮಾಡಬೇಕು.. ಆದರೂ ನನ್ನ ಪ್ರಕಾರ ರಾಕಿಭಾಯ್‌ ನಂ.1 ನಟ ಎಂದಿದ್ದಾರೆ. ಕೊನೆಗೆ ಕರಣ್ ರಾಕಿ ಭಾಯ್‌ ಯಶ್ ಎಂದು ಮರು ಉತ್ತರಿಸಿದ್ದಾರೆ.
ಎಲ್ಲ ಅಂದುಕೊಂಡಂತೆ ಆಗಿದ್ದರೆ, ಏ.14ರಂದು ಯಶ್ ನಟನೆಯ ಕೆಜಿಎಫ್‌ ಚಾಪ್ಟರ್‌ 2 ಮತ್ತು ಶಾಹಿದ್‌ ಕಪೂರ್‌ ಅವರ ಜೆರ್ಸಿ ಸಿನಿಮಾ ಒಂದೇ ದಿನ ತೆರೆಕಾಣಬೇಕಿತ್ತು. ಬಾಲಿವುಡ್‌ನಲ್ಲಿ ಕೆಜಿಎಫ್‌ ಹವಾ ಕಂಡು ಒಂದು ವಾರ ತಮ್ಮ ಚಿತ್ರವನ್ನು ಶಾಹಿದ್‌ ಮುಂದೂಡಿದರು. ಅಂದರೆ, ಏ. 14ರ ಬದಲು ಏ 21ಕ್ಕೆ ಸಿನಿಮಾ ಬಿಡುಗಡೆ ಆಯಿತು. ಇಷ್ಟಾದರೂ ಜೆರ್ಸಿ ಸಿನಿಮಾ ಉತ್ತಮ ಕಲೆಕ್ಷನ್‌ ಮಾಡಲು ವಿಫಲವಾಯಿತು.
ಲೇಟ್‌ ಆದರೂ ಲೇಟೆಸ್ಟ್‌ ಆಗಿಯೇ ಬರಲಿದ್ದಾರಾ ಯಶ್?
ರಾಕಿಭಾಯ್‌ ಏಕೆ ಇನ್ನೂ ಹೊಸ ಸಿನಿಮಾ ಅನೌನ್ಸ್‌ ಮಾಡುತ್ತಿಲ್ಲ. ಎಂಬುದೇ ಅಭಿಮಾನಿಗಳ ದೊಡ್ಡ ಪ್ರಶ್ನೆಯಾಗಿದೆ. ಆದರೆ ಲೇಟ್‌ ಆದ್ರೂ ಲೇಟೆಸ್ಟ್‌ ಆಗಿ ಬಂದ್ರು ಎಂಬಂತೆ ಯಶ್ ದೊಡ್ಡ ಚಿತ್ರ ನಿರ್ಮಾಣ ಸಂಸ್ಥೆ ಮೂಲಕವೇ ಮತ್ತೆ ಹೊಸ ಸಿನಿಮಾ ಮಾಡುತ್ತಿದ್ದಾರೆ ಎನ್ನಲಾಗುತ್ತಿದೆ. ಅದರ ಬಗ್ಗೆ ಅವರು ಕೊಂಚವೂ ಸುಳಿವು ಬಿಟ್ಟುಕೊಡಲು ತಯಾರಿಲ್ಲ. ಇಷ್ಟಿದ್ದರೂ ಮೂಲಗಳ ಪ್ರಕಾರ ಯಶ್ ಹೊಸ ಸಿನಿಮಾ ಸೆಪ್ಟೆಂಬರ್‌ನಲ್ಲಿ ಆರಂಭವಾಗಲಿದೆ ಎಂಬ ಮಾಹಿತಿ ದೊರೆತಿದೆ. ಶೀಘ್ರದಲ್ಲ್ ಯಶ್ ಹೊಸ ಸಿನಿಮಾವನ್ನು ಅನೌನ್ಸ್‌ ಕೂಡಾ ಮಾಡಲಿದ್ದಾರಂತೆ.
ಈ ಸುದ್ದಿ ಕೇಳಿ ಅಭಿಮಾನಿಗಳಿಗೆ ಸ್ವಲ್ಪ ರಿಲಾಕ್ಸ್‌ ಅನಿಸಿದೆ. ಯಶ್ ತಮ್ಮ ಮುಂದಿನ ಸಿನಿಮಾಗಾಗಿ ಈಗಾಗಲೇ ತಯಾರಿ ನಡೆಸಿದ್ದಾರಂತೆ. ಜಿಮ್‌ನಲ್ಲಿ ವರ್ಕೌಟ್‌ ಕೂಡಾ ಶುರು ಮಾಡಿದ್ದಾರಂತೆ. ಸೆಪ್ಟೆಂಬರ್‌ 2 ರಂದು ಮುಹೂರ್ತ ಆಚರಿಸಿ, ಅದೇ ದಿನ ಚಿತ್ರೀಕರಣ ಕೂಡಾ ಆರಂಭಿಸಲಿದ್ದಾರಂತೆ. ಕನ್ನಡದ ಖ್ಯಾತ ಚಿತ್ರ ನಿರ್ಮಾಣ ಹಾಗೂ ಡಿಸ್ಟ್ರಿಬ್ಯೂಷನ್‌ ಸಂಸ್ಥೆಯಾದ ಕೆವಿಎನ್‌ ಪ್ರೊಡಕ್ಷನ್ಸ್‌ ಬ್ಯಾನರ್‌, ಯಶ್ ಹೊಸ ಚಿತ್ರವನ್ನು ನಿರ್ಮಿಸುತ್ತಿದೆಯಂತೆ. ಆದರೆ ನಿರ್ದೇಶಕ ಯಾರು ಅನ್ನೋದರ ಬಗ್ಗೆ ನಿಖರ ಮಾಹಿತಿ ಇಲ್ಲ. ಒಟ್ಟಿನಲ್ಲಿ ಯಶ್, ತಮ್ಮ ಹೊಸ ಸಿನಿಮಾವನ್ನು ಅಧಿಕೃತವಾಗಿ ಘೋಷಣೆ ಮಾಡೋವರೆಗೂ ಈ ಅಂತೆ ಕಂತೆ, ಅನುಮಾನಗಳು ಅಭಿಮಾನಿಗಳ ತಲೆಯಲ್ಲಿ ಸುತ್ತುತ್ತಲೇ ಇರುತ್ತವೆ.