Dacchu Kiccha Fans Demand: ದಚ್ಚು-ಕಿಚ್ಚ ಅಭಿಮಾನಿಗಳ ಹೊಸ ಅಭಿಯಾನ..'ಕ್ರಾಂತಿ' ಟ್ರೇಲರ್‌ ರಿಲೀಸ್‌ಗೆ ಗೆಸ್ಟ್‌ ಆಗಿ ಬರ್ತಿದ್ದಾರಾ ಕಿಚ್ಚ?
Dec 22, 2022 03:42 PM IST
Share
ದರ್ಶನ್‌, ಸುದೀಪ್‌ ಅಭಿಮಾನಿಗಳ ಹೊಸ ಬೇಡಿಕೆ
- ದರ್ಶನ್‌ ಅವರ 'ಕ್ರಾಂತಿ' ಚಿತ್ರದ ಟ್ರೇಲರ್‌ ಬಿಡುಗಡೆ ಕಾರ್ಯಕ್ರಮಕ್ಕೆ ಸುದೀಪ್‌, ಅತಿಥಿ ಆಗಿ ಬರಬೇಕು ಎಂದು ಅಭಿಮಾನಿಗಳು ಪ್ರೀತಿಯ ಮನವಿ ಮಾಡುತ್ತಿದ್ದಾರೆ. ಇದೇ ವಿಚಾರವಾಗಿ ಹೊಸ ಅಭಿಯಾನ ಕೂಡಾ ಶುರು ಮಾಡಿದ್ದಾರೆ.
ಕನ್ನಡ ಚಿತ್ರಂಗದಲ್ಲಿ ಸದ್ಯಕ್ಕೆ ಹೊಸಪೇಟೆ ಘಟನೆ ಬಗ್ಗೆ ಜೋರು ಚರ್ಚೆ ನಡೆಯುತ್ತಲೇ ಇದೆ. ಭಾನುವಾರ ದರ್ಶನ್‌ ಮೇಲೆ ಕಿಡಿಗೇಡಿಯೊಬ್ಬ ಚಪ್ಪಲಿ ಎಸೆದ ವಿಡಿಯೋ ವೈರಲ್‌ ಆಗುತ್ತಿದ್ದಂತೆ ಸ್ಯಾಂಡಲ್‌ವುಡ್‌ನ ಅನೇಕ ಮಂ‍ದಿ ಘಟನೆಯನ್ನು ಖಂಡಿಸಿದ್ಧಾರೆ. ಎಲ್ಲರೂ ದರ್ಶನ್‌ ಪರ ನಿಂತಿದ್ದಾರೆ.
ಸುಮಲತಾ ಅಂಬರೀಶ್‌, ಶಾಸಕ ಜಮೀರ್‌ ಅಹ್ಮದ್‌, ಝೈದ್‌ ಖಾನ್‌, ಪ್ರಣಿತಾ ಸುಭಾಷ್‌, ಪ್ರಿಯಾಂಕಾ ಉಪೇಂದ್ರ, ನಿರ್ಮಾಪಕ ಗುರು ದೇಶಪಾಂಡೆ, ನಟ ಪ್ರೇಮ್‌, ನಿರ್ದೇಶಕ ಮಂಸೋರೆ, ಶಿವರಾಜ್‌ ಕೆಆರ್‌ಪೇಟೆ, ಶಿವರಾಜ್‌ಕುಮಾರ್‌ ಹಾಗೂ ಇನ್ನಿತರರು ಟ್ವೀಟ್‌ ಮಾಡಿ, ನಾವು ನಿಮ್ಮ ಪರ ಇದ್ದೇವೆ ಎಂದಿದ್ದರು. ದರ್ಶನ್‌ ಕೂಡಾ ತಮ್ಮ ಪರ ನಿಂತವರಿಗೆ ಧನ್ಯವಾದಗಳನ್ನು ಅರ್ಪಿಸಿದ್ದರು. ಆದರೆ ಇಲ್ಲಿ ಗಮನ ಸೆಳೆದದ್ದು ಹಾಗೂ ಎಲ್ಲರಿಗೂ ಆಶ್ಚರ್ಯ ಎನಿಸಿದ್ದು ಸುದೀಪ್‌ ಅವರ ಟ್ವೀಟ್‌. ಕೆಲವು ದಿನಗಳ ಹಿಂದಷ್ಟೇ ದರ್ಶನ್‌, 'ಕ್ರಾಂತಿ' ಚಿತ್ರದ ಇಂಟರ್‌ವ್ಯೂ ಒಂದರಲ್ಲಿ ರಚಿತಾ ರಾಮ್‌, ಸುದೀಪ್‌, ಶಿವಣ್ಣ ಅವರಂತ ದೊಡ್ಡ ಸ್ಟಾರ್‌ ನಟರೊಂದಿಗೆ ನಟಿಸಿದ್ದಾರೆ ಎಂದು ಸುದೀಪ್‌ ಹೆಸರನ್ನು ಸಂಬೋಧಿಸಿದ್ದರು. ಈ ವಿಡಿಯೋ ವೈರಲ್‌ ಆಗಿತ್ತು.
ಭಾನುವಾರ ಹೊಸಪೇಟೆ ಘಟನೆ ನಂತರ ಸುದೀಪ್‌ ಕೂಡಾ ಘಟನೆಯನ್ನು ಖಂಡಿಸಿ ದರ್ಶನ್‌ ಪರ ಟ್ವೀಟ್‌ ಮಾಡಿದ್ದರು. ''ದರ್ಶನ್‌ ಕನ್ನಡ ಚಿತ್ರರಂಗಕ್ಕೆ ಹಾಗೂ ಕನ್ನಡ ಭಾಷೆಗೆ ತಮ್ಮದೇ ಆದ ಕೊಡುಗೆ ನೀಡಿದ್ದಾರೆ. ಅವರ ಮೇಲೆ ಈ ಈ ರೀತಿಯ ಕೃತ್ಯ ಮಾಡಿರುವುದು ಸರಿಯಲ್ಲ. ದ್ವೇಷವೇ ಎಲ್ಲದಕ್ಕೂ ಉತ್ತರವಲ್ಲ'' ಎಂದು ಸುದೀರ್ಘವಾಗಿ ಬರೆದು ಟ್ವೀಟ್‌ ಮಾಡಿದ್ದರು. ಇದರ ಬೆನ್ನಲ್ಲೇ ದರ್ಶನ್‌ ಕೂಡಾ ಸುದೀಪ್‌ ಟ್ವೀಟ್‌ಗೆ ಪ್ರತಿಕ್ರಿಯಿಸಿ ''ನಿಮ್ಮ ಪ್ರೀತಿಯ ಸಾಲುಗಳಿಗೆ ಧನ್ಯವಾದಗಳು'' ಎಂದು ಬರೆದಿದ್ದರು. ಇದೀಗ ಇವರಿಬ್ಬರ ಟ್ವೀಟ್‌ ಸ್ಯಾಂಡಲ್‌ವುಡ್‌ನಲ್ಲಿ ಹಾಟ್‌ ಟಾಪಿಕ್‌ ಆಗಿದೆ.
ದರ್ಶನ್‌ ಹಾಗೂ ಸುದೀಪ್‌ ಅಭಿಮಾನಿಗಳು ಈ ಟ್ವೀಟನ್ನು ಸಂಭ್ರಮಿಸಿದ್ದಾರೆ. ಕೆಲವು ವರ್ಷಗಳ ಹಿಂದೆ ಬಹಳ ಆತ್ಮೀಯರಾಗಿದ್ದ ದರ್ಶನ್‌ ಹಾಗೂ ಸುದೀಪ್‌ ಕಾರಣಾಂತರಳಿಂದ ಮಾತು ಬಿಟ್ಟಿದ್ದರು. ಆದರೆ ಇದೀಗ ಬಹಳ ವರ್ಷಗಳ ನಂತರ ಈಗ ಟ್ವೀಟ್‌ ಮೂಲಕ ಇಬ್ಬರೂ ಮತ್ತೆ ಸುದ್ದಿಯಾಗಿದ್ದಾರೆ ಆದರೆ ಇವರಿಬ್ಬರೂ ನೇರವಾಗಿ ಮುಖಾಮುಖಿ ಆಗಬೇಕೆಂಬುದು ಅಭಿಮಾನಿಗಳ ಕನಸು. ಆದ್ದರಿಂದ ಅಭಿಮಾನಿಗಳು ಈಗ ಹೊಸ ಬೇಡಿಕೆಯೊಂದನ್ನು ಇಟ್ಟಿದ್ದಾರೆ. ದರ್ಶನ್‌ ಅವರ 'ಕ್ರಾಂತಿ' ಚಿತ್ರದ ಟ್ರೇಲರ್‌ ಬಿಡುಗಡೆ ಕಾರ್ಯಕ್ರಮಕ್ಕೆ ಸುದೀಪ್‌, ಅತಿಥಿ ಆಗಿ ಬರಬೇಕು ಎಂದು ಅಭಿಮಾನಿಗಳು ಪ್ರೀತಿಯ ಮನವಿ ಮಾಡುತ್ತಿದ್ದಾರೆ. ಇದೇ ವಿಚಾರವಾಗಿ ಹೊಸ ಅಭಿಯಾನ ಕೂಡಾ ಶುರು ಮಾಡಿದ್ದಾರೆ. ಆದರೆ ಇದೆಲ್ಲವೂ ಸಾಧ್ಯ ಆಗುತ್ತಾ ಅನ್ನೋದು ಇನ್ನು ಕೆಲವೇ ದಿನಗಳಲ್ಲಿ ತಿಳಿಯಲಿದೆ.
ಹುಬ್ಬಳ್ಳಿಯಲ್ಲಿ 'ಕ್ರಾಂತಿ' ಚಿತ್ರದ ಮೂರನೇ ಹಾಡು ರಿಲೀಸ್‌
'ಕ್ರಾಂತಿ' ಸಿನಿಮಾ ಮುಂದಿನ ವರ್ಷ (2023) ಜನವರಿ 26 ರಂದು ತೆರೆ ಕಾಣುತ್ತಿದೆ. ಪ್ರಮೋಷನ್‌ ಕೆಲಸಗಳಲ್ಲಿ ಬ್ಯುಸಿ ಇರುವ ಚಿತ್ರತಂಡ ಈಗಾಗಲೇ 2 ಹಾಡುಗಳನ್ನು ಬಿಡುಗಡೆ ಮಾಡಿದೆ. ಮೊದಲ ಹಾಡನ್ನು ಮೈಸೂರಿನಲ್ಲಿ ಬಿಡುಗಡೆ ಮಾಡಲಾಗಿತ್ತು. ಸಾಮಾನ್ಯ ಮಹಿಳೆಯೊಬ್ಬರಿಂದ ದರ್ಶನ್‌ ಈ ಹಾಡನ್ನು ಬಿಡುಗಡೆ ಮಾಡಿಸಿದ್ದರು. ಎರಡನೇ ಹಾಡು ಬಳ್ಳಾರಿಯ ಹೊಸಪೇಟೆಯಲ್ಲಿ ನಡೆದಿತ್ತು. ಇದೀಗ ಮೂರನೇ ಹಾಡು ಹುಬ್ಬಳ್ಳಿಯ ಚನ್ನಮ್ಮ ವೃತ್ತದಲ್ಲಿ ಬಿಡುಗಡೆ ಆಗಲಿದೆ ಎನ್ನಲಾಗಿದೆ. ಡಿಸೆಂಬರ್‌ 25 ರಂದು ಮೂರನೇ ಹಾಡನ್ನು ಹೊರತರಲು ಚಿತ್ರತಂಡ ಸಕಲ ಸಿದ್ಧತೆ ನಡೆಸುತ್ತಿದೆ.