ಕೆಂಪೇಗೌಡರ ತವರಲ್ಲಿ ಸರಿಗಮಪ, ಡ್ರಾಮಾ ಜೂನಿಯರ್ಸ್‌ ಮಹಾಸಂಗಮ; ಮನರಂಜನೆಯ ರಸದೌತಣಕ್ಕೆ ಸಜ್ಜಾದ ಮಾಗಡಿ
Jan 23, 2024 12:15 PM IST
Share
ಕೆಂಪೇಗೌಡರ ತವರಲ್ಲಿ ಸರಿಗಮಪ, ಡ್ರಾಮಾ ಜೂನಿಯರ್ಸ್‌ ಮಹಾಸಂಗಮ; ಮನರಂಜನೆಯ ರಸದೌತಣಕ್ಕೆ ಸಜ್ಜಾದ ಮಾಗಡಿ
- ನಾಡಪ್ರಭು ಕೆಂಪೇಗೌಡರ ತವರೂರು ಮಾಗಡಿಯಲ್ಲಿ ಈ ಸಲ ಡ್ರಾಮಾ ಜೂನಿಯರ್ಸ್‌ ಸೀಸನ್ 5 ಮತ್ತು ಸರಿಗಮಪ ಸೀಸನ್ 20ರ ಮಹಾಸಂಗಮಕ್ಕೆ ವೇದಿಕೆ ಸಿದ್ಧವಾಗಿದೆ.
Saregamapa 20 Drama Juniors 5 Mahasangama: ಮನೆಮನೆಗೆ ಮನರಂಜನೆಯನ್ನು ಪ್ರತಿದಿನ ತಪ್ಪದೆ ತಲುಪಿಸುತ್ತಿರುವ, ಜೀ ಕನ್ನಡ, ಇದೀಗ ಮತ್ತೆ ತನ್ನ ಅಭಿಮಾನಿಗಳನ್ನು ಹುಡುಕಿಕೊಂಡು ಮಾಗಡಿಗೆ ಬರುತ್ತಿದೆ. ಮಂಗಳವಾರ 23 ನೇ ತಾರೀಖು ಸಂಜೆ 5 ಗಂಟೆಗೆ ಮಾಗಡಿಯ ಕೆಎಸ್‌ಆರ್‌ಟಿಸಿ ಬಸ್‌ ನಿಲ್ದಾಣದ ಎದುರಿರುವ ಕೋಟೆ ಮೈದಾನದಲ್ಲಿ ತನ್ನ ಎರಡು ಹಿಟ್‌ ರಿಯಾಲಿಟಿ ಶೋಗಳಾದ ಡ್ರಾಮಾ ಜೂನಿಯರ್ಸ್‌ ಸೀಸನ್-5 ಮತ್ತು ಸರಿಗಮಪ ಸೀಸನ್-20ರ ಮಹಾಸಂಗಮ ನಡೆಯಲಿದೆ.
ಸಂಗೀತ ಮತ್ತು ನಾಟಕಗಳಿಗೆ ಸದಾ ಪ್ರೋತ್ಸಾಹ ನೀಡುವ, ಕನ್ನಡ ಚಿತ್ರರಂಗಕ್ಕೆ ಸಾಕಷ್ಟು ಹಿಟ್‌ ನಿರ್ದೇಶಕರನ್ನು ಮತ್ತು ಕಲಾವಿದರನ್ನು ಕೊಡುಗೆಯಾಗಿ ಕೊಟ್ಟಿರುವ ಕೆಂಪೇಗೌಡರ ತವರೂರು ಮಾಗಡಿಯಲ್ಲಿ ಈ ಬಾರೀ ಜೀ ಕನ್ನಡದ ಮಹಾಸಂಗಮವನ್ನು ನಡೆಸಲು ನಿರ್ಧರಿಸಿದೆ. ಮನೆಮಂದಿಯೆಲ್ಲ ಟಿವಿ ಮುಂದೆ ಕೂತು ನೋಡುತ್ತಿದ್ದ, ರಿಯಾಲಿಟಿ ಶೋಗಳ ಸ್ಪರ್ಧಿಗಳ ಪ್ರತಿಭೆಯನ್ನು, ನೇರವಾಗಿ ನೋಡುವ ಸದಾವಕಾಶವನ್ನು ಈ ಮಹಾಸಂಗಮ ಮಾಡಿಕೊಡುತ್ತಿದೆ.
ಮನರಂಜನೆಯ ರಸದೌತಣ
ಕರುನಾಡಿನ ಮೂಲೆ ಮೂಲೆಯಿಂದ ಹೆಕ್ಕಿತಂದ ಡ್ರಾಮಾ ಜೂನಿಯರ್ಸ್‌ ಮಕ್ಕಳ ಜೊತೆ, ಈ ಬಾರಿ ದೇಶವಿದೇಶದ ಪ್ರತಿಭೆಗಳನ್ನು ಒಗ್ಗೂಡಿಸಿದ ಸರಿಗಮಪ ಸೀಸನ್-20ರ ಗಾಯಕ ಗಾಯಕಿಯರ ಜೊತೆಗೂಡಿ ಮನೋರಂಜನೆ ನೀಡಲು ಜೀ ಕನ್ನಡ ವಾಹಿನಿ ಮುಂದಾಗಿದೆ. ಡ್ರಾಮಾ ಮಕ್ಕಳಿಂದ ಸಂತ ಶಿಶುನಾಳ ಶರೀಫ, ಹಾಗೂ ಉತ್ತರ ಕರ್ನಾಟಕದ ವಿಶೇಷ ಕಲಾ ಪ್ರಕಾರವಾದ ದೊಡ್ಡಾಟದ ಜೊತೆಗೆ ಹಾಸ್ಯ ನಾಟಕಗಳು ಮನರಂಜನೆಯ ರಸದೌತಣ ಬಡಿಸಲಿವೆ. ಎಂದಿನಂತೆ ಸರಿಗಮಪ ಸ್ಪೂಫ್‌ ಇರದೆ ಮಹಾಸಂಗಮ ಅಪೂರ್ಣ ಹಾಗಾಗಿ, ಸರಿಗಮಪ ಸೀಸನ್-20ರ ಅದ್ಬುತ ಅನುಕರಣೆಯು ಮಹಾಸಂಗಮದ ಮುಖ್ಯ ಆಕರ್ಷಣೆಯಾಗಿರಲಿದೆ.
ಮಹಾಸಂಗಮದಲ್ಲಿ ತಾರೆಗಳ ಸಂಗಮ
ಮಹಾಸಂಗಮಕ್ಕಾಗಿ ಸ್ಯಾಂಡಲ್‌ವುಡ್‌ನ ಹಿಟ್‌ ಹಾಡುಗಳನ್ನು ಪ್ರಸ್ತುತ ಪಡಿಸಲು ಸರಿಗಮಪ ಸ್ಪರ್ಧಿಗಳು ತಯಾರಿ ನಡೆಸಿಕೊಂಡಿದ್ದಾರೆ. ಈ ಎಲ್ಲಾ ಪ್ರತಿಭೆಗಳ ಜೊತೆ ನಿಮ್ಮ ನೆಚ್ಚಿನ ತೀರ್ಪುಗಾರರಾದ ನಾದಬ್ರಹ್ಮ ಹಂಸಲೇಖ, ಕ್ರೇಜಿಸ್ಟಾರ್‌ ರವಿಚಂದ್ರನ್‌, ಲಕ್ಷ್ಮೀ, ರಚಿತಾರಾಮ್‌, ವಿಜಯ್‌ ಪ್ರಕಾಶ್‌ ಮತ್ತು ಅರ್ಜುನ್‌ ಜನ್ಯ ಕಾರ್ಯಕ್ರಮದಲ್ಲಿ ಭಾಗವಹಿಸಲ್ಲಿದ್ದು, ಈ ಎರಡು ರಿಯಾಲಿಟಿ ಶೋಗಳನ್ನು ಖ್ಯಾತ ನಿರೂಪಕರಾದ ಅನುಶ್ರೀ ಮತ್ತು ಮಾಸ್ಟರ್‌ ಆನಂದ್‌ ಜಂಟಿಯಾಗಿ ನಿರೂಪಣೆ ಮಾಡಲ್ಲಿದ್ದಾರೆ.
ಎಲ್ಲರಿಗೂ ಉಚಿತ ಪ್ರವೇಶ
ಮನರಂಜನೆಯ ಎರಡು ಮಜಲುಗಳಾದ ಸಂಗೀತ ಮತ್ತು ನಾಟಕ ಈ ಬಾರಿ ಮತ್ತೆ ಒಂದಾಗಿದೆ ಎಂದ ಮೇಲೆ ಮನೋರಂಜನೆಗೆ ಎಲ್ಲೆ ಇಲ್ಲ ಎನ್ನಬಹುದಾಗಿದೆ. ಈ ನಿಟ್ಟಿನಲ್ಲಿ ಜೀ ಕನ್ನಡ ವಾಹಿನಿಯು ಕಾರ್ಯಕ್ರಮಕ್ಕೆ ಆಗಮಿಸುವ ಅಭಿಮಾನಿಗಳು ಮತ್ತು ವೀಕ್ಷಕರಿಗಾಗಿ ಸೂಕ್ತ ತಯಾರಿ ಮಾಡಿಕೊಂಡಿದ್ದು, ಎಂದಿನಂತೆ ಈ ಕಾರ್ಯಕ್ರಮಕ್ಕೆ ಯಾವುದೇ ಶುಲ್ಕವನ್ನು ಕೂಡ ತೆಗೆದುಕೊಳ್ಳತ್ತಿಲ್ಲ ಎಂಬುದನ್ನು ಜೀ ಕನ್ನಡ ಸ್ಪಷ್ಟಪಡಿಸಿದೆ.