ಬಿಗ್‌ಬಾಸ್‌ ಮನೆಗೆ ಬೆಂಕಿ: ಹಿಂದಿ, ಕನ್ನಡ ಬಿಗ್‌ಬಾಸ್‌ ಮತ್ತು ಬಿಗ್‌ಬ್ರದರ್‌ ಮನೆಯಲ್ಲಿ ಬೆಂಕಿ ಆಕಸ್ಮಿಕದ ಕಹಿನೆನಪುಗಳು
Oct 19, 2023 11:00 AM IST
Share
ಹಿಂದಿ, ಕನ್ನಡ ಬಿಗ್‌ಬಾಸ್‌ ಮತ್ತು ಬಿಗ್‌ಬ್ರದರ್‌ ಮನೆಯಲ್ಲಿ ಬೆಂಕಿ ಆಕಸ್ಮಿಕದ ಕಹಿನೆನಪುಗಳು
- Bigg Boss News: 2018ರಲ್ಲಿ ಬಿಗ್‌ಬಾಸ್‌ ಕನ್ನಡ ಮನೆಗೆ ಬೆಂಕಿ ಬಿದ್ದಿತ್ತು. 2022ರಲ್ಲಿ ಬಿಗ್‌ಬಾಸ್‌ ಸೀಸನ್‌ 15ರ ಮನೆಗೂ ಬೆಂಕಿ ಬಿದ್ದಿತ್ತು. ಆಸ್ಟ್ರೇಲಿಯಾದ ಬಿಗ್‌ ಬ್ರದರ್‌ ಮನೆಗೂ 2019ರಲ್ಲಿ ಬೆಂಕಿ ಬಿದ್ದಿತ್ತು.
ಬೆಂಗಳೂರು: ಭಾರತದಲ್ಲಿ ಹಲವು ವರ್ಷಗಳಿಂದ ನಿರಂತರವಾಗಿ ಬಿಗ್‌ಬಾಸ್‌ ಸ್ಪರ್ಧೆ ನಡೆಯುತ್ತಿದೆ. ಜಾಗತಿಕ ಮಟ್ಟದಲ್ಲಿ ಬಿಗ್‌ಬ್ರದರ್‌ ನಡೆಯುತ್ತದೆ. ಬಿಗ್‌ಬಾಸ್‌ ಮನೆಗೆ ಸಂಬಂಧಪಟ್ಟ ಸಾಕಷ್ಟ ಅವಘಡಗಳು ಈ ಹಿಂದೆ ನಡೆದಿದ್ದವು. ಈ ಲೇಖನದಲ್ಲಿ ಬಿಗ್‌ಬಾಸ್‌ ಮನೆಯಲ್ಲಿ ಈ ಹಿಂದೆ ನಡೆದ ಅಗ್ನಿ ಆಕಸ್ಮಿಕ ಘಟನೆಗಳನ್ನು ನೆನಪಿಸಿಕೊಳ್ಳೋಣ. ಕನ್ನಡ ಬಿಗ್‌ಬಾಸ್‌ ಮಾತ್ರವಲ್ಲದೆ, ಹಿಂದಿ ಬಿಗ್‌ಬಾಸ್‌ ಮನೆಯಲ್ಲೂ ಬೆಂಕಿ ಆಕಸ್ಮಿಕ ಸಂಭವಿಸಿತ್ತು. ಹಿಂದಿ ಮಾತ್ರವಲ್ಲದೆ ಜಾಗತಿಕ ಮಟ್ಟದ ಬಿಗ್‌ಬ್ರದರ್‌ನಲ್ಲೂ ಬೆಂಕಿ ಅನಾಹುತ ಸಂಭವಿಸಿತ್ತು.
ಕನ್ನಡ ಬಿಗ್‌ಬಾಸ್‌ ಮನೆಗೆ ಬೆಂಕಿ
ಈ ಘಟನೆ 2018ರಲ್ಲಿ ನಡೆದಿತ್ತು. ರಾಮನಗರದ ಬಿಡದಿಯಲ್ಲಿರುವ ಇನ್ನೋವೇಟಿವ್‌ ಫಿಲ್ಮ್‌ ಸಿಟಿಯ ಆವರಣದ ಒಳಗಡೆ ಇದ್ದ ಬಿಗ್‌ಬಾಸ್‌ ಮನೆಗೆ ಬೆಂಕಿ ಬಿದ್ದು, ಸಂಪೂರ್ಣವಾಗಿ ಸುಟ್ಟು ಕರಕಲಾಗಿತ್ತು. ಮೊದಲ ಸೀಸನ್‌ ನಡೆದ ನಂತರ ಎರಡನೇ ಸೀಸನ್‌ಗಾಗಿ ಫಿಲ್ಮ್‌ ಸಿಟಿಯಲ್ಲಿ ಹಲವು ಕೋಟಿ ಖರ್ಚು ಮಾಡಿ ಈ ಮನೆ ನಿರ್ಮಿಸಲಾಗಿತ್ತು. ಎಂಟು ಸಾವಿರ ಚದರಡಿಯ ವ್ಯಾಪ್ತಿಯಲ್ಲಿ ಈ ಸೆಟ್‌ ಹಾಕಲಾಗಿತ್ತು.
ಬಿಗ್‌ಬಾಸ್‌ ಹಿಂದಿ ಸೆಟ್‌ಗೂ ಬೆಂಕಿ
ಮುಂಬೈನ ಗೋರೆಗಾಂವ್‌ ಫಿಲ್ಮ್‌ ಸಿಟಿಯ ಬಿಗ್‌ಬಾಸ್‌ ಹಿಂದಿ ಸೀಸನ್‌ 15ರ ಸೆಟ್‌ಗೆ ಕಳೆದ ವರ್ಷ ಫೆಬ್ರವರಿಯಲ್ಲಿ ಬೆಂಕಿ ಬಿದ್ದಿತ್ತು. ತಕ್ಷಣ ಅಗ್ನಿಶಾಮಕ ವಾಹನಗಳು ಬಂದು ಬೆಂಕಿ ನಂದಿಸಿದ್ದವು. ಇದೇ ಸೆಟ್‌ನಲ್ಲಿ ಜನವರಿ 30ರಂದು ಬಿಗ್‌ಬಾಸ್‌ ಸೀಸನ್‌ 15ರ ಫಿನಾಲೆ ನಡೆದಿತ್ತು. ತೇಜಸ್ವಿ ಪ್ರಕಾಸ್‌ ವಿನ್ನರ್‌ ಆಗಿದ್ದರು. ಈ ಘಟನೆ ನಡೆದು ಕೆಲವೇ ದಿನಗಳಲ್ಲಿ ಬೆಂಕಿ ಆಕಸ್ಮಿಕ ಸಂಭವಿಸಿತ್ತು.
ಬಿಗ್‌ಬ್ರದರ್‌ ಮನೆಗೂ ಬೆಂಕಿ
ಆಸ್ಟ್ರೇಲಿಯಾ ರಿಯಾಲಿಟಿ ಶೋ ಬಿಗ್‌ ಬ್ರದರ್‌ ಆಸ್ಟ್ರೇಲಿಯಾದ ಗೋಲ್ಡ್‌ ಕೋಸ್ಟ್‌ನ ಸೆಟ್‌ಗೆ ಬೆಂಕಿ ತಗುಲಿ ಸಂಪೂರ್ಣವಾಗಿ ಹಾನಿಗೀಡಾಗಿತ್ತು. ಈ ಘಟನೆ 2019ರಲ್ಲಿ ನಡೆದಿತ್ತು. ಡ್ರೀಮ್‌ವರ್ಲ್ಡ್‌ ಥೀಮ್‌ಪಾರ್ಕ್‌ ಬೆಂಕಿ ಆಕಸ್ಮಕ ಘಟನೆಗೆ ಸಂಬಂಧಪಟ್ಟಂತೆ ಆರು ಮಕ್ಕಳನ್ನು ಬಂಧಿಸಲಾಗಿತ್ತು. ಇಲ್ಲಿ 2001ರಿಂದ ಒಟ್ಟು 11 ಬಿಗ್‌ ಬ್ರದರ್‌ ಶೋಗಳನ್ನು ಆಯೋಜಿಸಲಾಗಿತ್ತು. 2014ರಿಂದ ಈ ಸೆಟ್‌ನಲ್ಲಿ ಶೋ ನಡೆಸುತ್ತಿರಲಿಲ್ಲ. ಹೀಗೆ, ಬಿಗ್‌ಬಾಸ್‌ ಮನೆಗಳಲ್ಲಿ ಕೆಲವೊಂದು ಬೆಂಕಿ ಆಕಸ್ಮಿಕ ಘಟನೆಗಳು ಈ ಹಿಂದೆ ವರದಿಯಾಗಿದ್ದವು.
ಹೊಸ ಮನೆಯಲ್ಲಿ ಕನ್ನಡ ಬಿಗ್‌ಬಾಸ್‌
ಇಲ್ಲಿಯವರೆಗೆ ಇನ್ನೋವೇಟಿವ್‌ ಫಿಲ್ಮ್‌ ಸಿಟಿಯಲ್ಲಿರುವ ಬಿಗ್‌ಬಾಸ್‌ ಮನೆಯಲ್ಲಿ ಕನ್ನಡ ಬಿಗ್‌ಬಾಸ್‌ ಶೋ ನಡೆಯುತ್ತಿತ್ತು. ಈ ವರ್ಷ ಅಂದರೆ ಬಿಗ್‌ಬಾಸ್‌ ಕನ್ನಡ ಸೀಸನ್‌ 10ಕ್ಕೆ ಹೊಸ ಮನೆ ನಿರ್ಮಿಸಲಾಗಿದೆ. ಬೆಂಗಳೂರಿನ ದೊಡ್ಡ ಆಲದ ಮರದ ಬಳಿ ಹೊಸ ಮನೆ ನಿರ್ಮಿಸಿ ಆ ಮನೆಯಲ್ಲಿ ಈಗ ಬಿಗ್‌ಬಾಸ್‌ ಆಟ ನಡೆಸಲಾಗುತ್ತಿದೆ. ಇದು ಭಾರತದ ಅತಿದೊಡ್ಡ ಬಿಗ್‌ಬಾಸ್‌ ಮನೆ ಎನ್ನುವ ಖ್ಯಾತಿಗೆ ಪಾತ್ರವಾಗಿದೆ.