BBK: ಕಾರು ಏರಿ ಬಿಗ್‌ಬಾಸ್‌ ಮನೆಯಿಂದ ಹೊರನಡೆದ ಮೈಕಲ್‌, ಅವಿನಾಶ್‌; ಇವರಿಬ್ಬರಲ್ಲಿ ವಾಪಸ್‌ ಬರೋರು ಯಾರು? ಇಲ್ಲಿದೆ ವಿವರ
Dec 25, 2023 09:27 AM IST
Share
ಅವಿನಾಶ್‌ ಶೆಟ್ಟಿ ಮತ್ತು ಮೈಕಲ್‌ ಅಜಯ್‌
- Bigg boss kannada 10 elimination today: ಬಿಗ್‌ಬಾಸ್‌ ಕನ್ನಡ ಸೀಸನ್‌ 10 ಈ ವಾರದ ಸಂಚಿಕೆಯಲ್ಲಿ ಮೈಕಲ್‌ ಅಜಯ್‌ ಮತ್ತು ಅವಿನಾಶ್‌ ಶೆಟ್ಟಿ ಅವರು ಕಾರಿನಲ್ಲಿ ಮನೆಯಿಂದ ಹೊರಕ್ಕೆ ಹೋಗಿದ್ದಾರೆ. ಇವರಿಬ್ಬರಲ್ಲಿ ಒಬ್ಬರ ಆಟ ಈ ವಾರಕ್ಕೆ ಕೊನೆಗೊಳ್ಳುತ್ತಿದೆ.
ಬಿಗ್‌ಬಾಸ್‌ ಕನ್ನಡ ಸೀಸನ್‌ 10ನಲ್ಲಿ ಈ ವಾರ ಎಲಿಮಿನೇಷನ್‌ ಪ್ರಕ್ರಿಯೆ ವಿನೂತನವಾಗಿತ್ತು. ನಿನ್ನೆಯ ಸಂಚಿಕೆಯಲ್ಲಿ ಬಿಗ್‌ಬಾಸ್‌ ಮನೆಯೊಳಗೆ ಎರಡು ಕಾರುಗಳು ಬಂದು ಇಬ್ಬರು ಸ್ಪರ್ಧಿಗಳನ್ನು ಎತ್ತಿಕೊಂಡು ಹೊರಕ್ಕೆ ಹೋಗಿವೆ. ಇವರಲ್ಲಿ ಒಬ್ಬರು ಎಲಿಮಿನೇಷನ್‌ನಿಂದ ಸೇಫ್‌ ಆಗಿದ್ದಾರೆ ಎನ್ನಲಾಗಿದೆ. ಮೈಕಲ್‌ ಅಜಯ್‌ ಮತ್ತು ಅವಿನಾಶ್‌ ಶೆಟ್ಟಿ ಕಾರಿನಲ್ಲಿ ಬಿಗ್‌ಬಾಸ್‌ ಮನೆಯಿಂದ ಹೊರಕ್ಕೆ ಹೋಗಿದ್ದಾರೆ. ಇನ್ನೊಂದು ಕಾರು ಮತ್ತೆ ಮನೆಯೊಳಗೆ ಬಂದು ಇಬ್ಬರಲ್ಲಿ ಒಬ್ಬರನ್ನು ಪಾರು ಮಾಡುವ ಸೂಚನೆಯಿದೆ.
ಹೀಗಿತ್ತು ಈ ವಾರದ ಎಲಿಮಿನೇಷನ್‌
ಬಿಗ್‌ಬಾಸ್‌ ಮನೆಗೆ ಈ ಶನಿವಾರ ಸುದೀಪ್‌ ಬಂದಿರಲಿಲ್ಲ. ಸುದೀಪ್‌ ಇಲ್ಲದೆ ಹೊಸ ರೀತಿಯಲ್ಲಿ ಎಲಿಮಿನೇಷನ್‌ ಪ್ರಕ್ರಿಯೆ ಮಾಡಲಾಯಿತು. ಸುದೀಪ್‌ ಬದಲು ಶೈನ್‌ ಶೆಟ್ಟಿ, ಶುಭಾ ಪೂಂಜಾ ಆಗಮಿಸಿದ್ದರು. ಈ ವಾರ ಮನೆಯಿಂದ ಹೊರಹೋಗುವವರ ಪಟ್ಟಿಯಲ್ಲಿ ಅವಿನಾಶ್‌ ಶೆಟ್ಟಿ, ಮೈಕಲ್‌ ಅಜಯ್‌, ಸಿರಿ, ಡ್ರೋನ್‌ ಪ್ರತಾಪ್‌, ವರ್ತೂರು ಸಂತೋಷ್‌, ಸಂಗೀತ ಶೃಂಗೇರಿ ಇದ್ದರು. ಅಂತಿಮವಾಗಿ ಮನೆಯಿಂದ ಹೊರಕ್ಕೆ ಹೋಗುವವರ ಲಿಸ್ಟ್‌ನಲ್ಲಿ ಅವಿನಾಶ್‌, ಸಿರಿ, ಮೈಕಲ್‌ ಇದ್ದರು.
ಕ್ರಿಸ್‌ಮಸ್‌ ಹಬ್ಬದ ಸಮಯದಲ್ಲಿ ಬಿಗ್‌ಬಾಸ್‌ ಮನೆಗೆ ಮೂರು ಕೇಕ್‌ಗಳನ್ನು ತರಲಾಗಿತ್ತು. ಈ ಕೇಕ್‌ ಸಾಮಾನ್ಯ ಕೇಕ್‌ ಆಗಿರಲಿಲ್ಲ. ಈ ಕೇಕ್‌ನ ಕೆಳಗೆ ನಾಮಿನೇಷನ್‌ ಪ್ರಕ್ರಿಯೆಯಲ್ಲಿ ಸೇಫ್‌ ಆಗಿರುವ ಸ್ಪರ್ಧಿಗಳು ಹೆಸರು ಇತ್ತು. ಈ ಮೂರು ಸ್ಪರ್ಧಿಗಳು ತಮ್ಮ ಪಾಲಿಗೆ ಬಂದ ಕೇಕ್‌ ತಿನ್ನ ತೊಡಗಿದರು. ಸಿರಿ ತಿಂದ ಕೇಕ್‌ನಡಿಯಲ್ಲಿ ಅವರ ಹೆಸರಿತ್ತು. ಹೀಗಾಗಿ, ಸಿರಿ ಈ ವಾರ ಸೇಫ್‌ ಆದರು. ಆದರೆ, ಮೈಕಲ್‌, ಅವಿನಾಶ್‌ ಶೆಟ್ಟಿ ತಿಂದ ಕೇಕ್‌ನಲ್ಲಿ ಅವರಿಬ್ಬರ ಹೆಸರು ಇರಲಿಲ್ಲ.
ಬಿಗ್‌ಬಾಸ್‌ ಮನೆಯೊಳಗೆ ಬಂದ ಕಾರುಗಳು
ಬಿಗ್‌ಬಾಸ್‌ ಕನ್ನಡದ ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ದೊಡ್ಡಮನೆಯೊಳಗೆ ಎರಡು ಕಾರುಗಳು ಬಂದವು. ಮಧ್ಯರಾತ್ರಿ ಬಂದ ಈ ಕಾರುಗಳು ಗಾರ್ಡನ್‌ ಏರಿಯಾದಲ್ಲಿ ರೌಂಡ್‌ ಹೊಡೆದವು. ಬಳಿಕ ಇಬ್ಬರನ್ನು ಕರೆದುಕೊಂಡು ಹೋದವು. ಈ ಮೂಲಕ ಮೈಕಲ್‌ ಮತ್ತು ಅವಿನಾಶ್‌ ಮನೆಯಿಂದ ಹೊರಕ್ಕೆ ಹೋಗಿದ್ದಾರೆ ಎಂಬ ಸಂದೇಶವನ್ನು ನೀಡಲಾಯಿತು. ಆದರೆ, ಇವೆರಡು ಕಾರುಗಳಲ್ಲಿ ಒಂದು ಕಾರು ವಾಪಸ್‌ ಬರಬಹುದು ಎಂಬ ನಿರೀಕ್ಷೆಯಿದೆ. ಈ ವಿವರ ಇಂದಿನ ಎಪಿಸೋಡ್‌ನಲ್ಲಿ ಗೊತ್ತಾಗಲಿದೆ. ಇದನ್ನು ಓದಿ: ರೇಖಾ ಜತೆಗೆ ಅಮಿತಾಬ್‌ ಬಚ್ಚನ್‌ ಪ್ರೇಮ ಕಹಾನಿ; ಬಿಗ್‌ಬಿ ನೆನಪಿನಲ್ಲಿ ಒಂಟಿಯಾಗಿಯೇ ಉಳಿದ ಬಾಲಿವುಡ್ ನಟಿ
ಮೈಕಲ್‌ ಸೇಫ್‌ ಎಂದ ನೆಟ್ಟಿಗರು
ಸೋಷಿಯಲ್‌ ಮೀಡಿಯಾದಲ್ಲಿ ಈಗಾಗಲೇ ಮೈಕಲ್‌ ಸೇಫ್‌ ಎಂಬ ವಿವರ ಲಭ್ಯವಾಗಿದೆ. ಆದರೆ, ಈ ಕುರಿತು ಕಲರ್ಸ್‌ ಕನ್ನಡ ಅಥವಾ ಜಿಯೋಸಿನಿಮಾ ಕಡೆಯಿಂದ ಯಾವುದೇ ಮಾಹಿತಿ ಹೊರಬಂದಿಲ್ಲ. ಆದರೆ, ಸಿರಿ ಅವರು ಲೈವ್‌ನಲ್ಲಿ ಮಾತನಾಡಿದ ಸಂಗತಿಯೊಂದನ್ನು ನೋಡಿದರೆ ಮೈಕಲ್‌ ಸುರಕ್ಷಿತವಾಗಿದ್ದಾರೆ ಎನ್ನುವುದನ್ನು ಗಮನಿಸಬಹುದು. ಈ ವಾರ ಪಾತ್ರೆ ತೊಳೆಯೋರು ಯಾರು ಎಂಬ ಪ್ರಶ್ನೆಗೆ ಸಿರಿ ಅವರು ಮೈಕಲ್‌ ಹೆಸರು ಹೇಳಿದ್ದಾರೆ. ಹೀಗಾಗಿ, ಮೈಕಲ್‌ ಸೇಫ್‌ ಆಗಿದ್ದಾರೆ ಎಂದುಕೊಳ್ಳಬಹುದು.