ಭರ್ಜರಿ ಬ್ಯಾಚುಲರ್ಸ್‌ ವೇದಿಕೆ ಮೇಲೆಯೇ ಪ್ರೇಯಸಿ ಜತೆ ಜಗ್ಗಪ್ಪನ ನಿಶ್ಚಿತಾರ್ಥ! ಅಚ್ಚರಿಯ ವಿಚಾರ ರಿವೀಲ್‌ ಮಾಡಿದ ಜೀ ಕನ್ನಡ

Bharjari bachelors: ಇದೇ ಭಾನುವಾರ ಬ್ಯಾಚುಲರ್ಸ ಎಲಿಜಿಬಿಲಿಟಿ ಟೆಸ್ಟ್ ನಡೆಯಲಿದೆ. ಅಂದರೆ ಕಳೆದ 4 ತಿಂಗಳುಗಳಿಂದ ಬ್ಯಾಚುಲರ್ಸಗಳ ಜೀವನವನ್ನು ನ್ಯಾಚುರಲ್ ಆಗಿ ತೋರಿಸಿ ಅವರನ್ನು ಎಲಿಜಿಬಲ್ ಬ್ಯಾಚುಲರ್ ಮಾಡೋ ಪ್ರಯತ್ನವನ್ನು ಎಳೆಎಳೆಯಾಗಿ ಬಿಚ್ಚಿಟ್ಟಿದ್ದ ಭರ್ಜರಿ ಬ್ಯಾಚುಲರ್ಸ್ ರಿಯಾಲಿಟಿ ಶೋ, ಇದೀಗ ಕೊನೇ ಹಂತಕ್ಕೆ ಬಂದು ನಿಂತಿದೆ.

ಕನ್ನಡ ಕಿರುತೆರೆಯಲ್ಲಿ ತಮ್ಮದೆ ಆದ ಛಾಪು ಮೂಡಿಸಿದ 10 ಯುವಕರನ್ನು ಒಂದೆಡೆ ಸೇರಿಸಿ ಅವರಿಗೆ ಮಾರ್ಗದರ್ಶನ ಮಾಡಲು ಏಂಜಲ್‌ಗಳನ್ನು ಮೆಂಟರ್‌ಗಳಾಗಿ ನೀಡಿ, ಬ್ಯಾಚುಲರ್‌ಗಳನ್ನು ಪ್ರತಿ ಹಂತದಲ್ಲೂ ಮಾರ್ಗದರ್ಶನ ಮಾಡುವ ಕೆಲಸವನ್ನು ಈ ಕಾರ್ಯಕ್ರಮದಲ್ಲಿ ಮಾಡಲಾಯಿತು.

ಇದನ್ನೂ ಓದಿ: ಮೇಘನಾ ರಾಜ್‌ ಪುತ್ರ ರಾಯನ್‌ ಬರ್ತ್‌ಡೇ ಸಂಭ್ರಮ; ಅಣ್ಣನಿಗೆ ವಿಶ್‌ ಮಾಡಿದ ಧ್ರುವ ಸರ್ಜಾ ಪುತ್ರಿ

ಬ್ಯಾಚುಲರ್‌ಗಳ ಜೀವನವನ್ನು ಹಾಸ್ಯದ ಲೇಪನದೊಂದಿಗೆ ವಿಭಿನ್ನ ಟಾಸ್ಕ್‌ ನೀಡಿ ಅದನ್ನು ಮಾನಿಟರ್ ಮಾಡುವ ಜವಾಬ್ದಾರಿ ಹೊತ್ತವರು ಕರುನಾಡಿನ ಕ್ರೇಜಿ ಸ್ಟಾರ್ ರವಿಚಂದ್ರನ್. ಪಡ್ಡೆಗಳ ಹಾಟ್ ಫೇವರೆಟ್ ರಚಿತಾ ರಾಮ್ ಹುಡುಗರು ಲಯ ತಪ್ಪಿದ್ದಾಗ ಕಿವಿ ಹಿಂಡುವ ಟೀಚರ್ ಆಗಿ ಕಾಣಿಸಿಕೊಂಡು ಶಿಸ್ತಿನ ಚಾಟಿ ಬೀಸಿ ಹುಡುಗರನ್ನು ಹದ್ದುಬಸ್ತಿನಲ್ಲಿ ಇಡುವ ಕೆಲಸವನ್ನ ಮಾಡಿದರು. ನಿರೂಪಕ ಅಕುಲ್ ಬಾಲಾಜಿ ನಿರೂಪಣೆಯ ಜವಾಬ್ದಾರಿಯನ್ನು ಅಚ್ಚುಕಟ್ಟಾಗಿ ನಿರ್ವಹಿಸಿದರು.

ಪ್ರತಿ ಬಾರಿ ಬ್ಯಾಚುಲರ್ಸಗಳ ಸಾರ್ಮಥ್ಯವನ್ನು ಓರೆಗೆ ಹಚ್ಚಲು ಕೊಡುತ್ತಿದ್ದ ವಿಭಿನ್ನ ಟಾಸ್ಕ್‌ ಈ ಬಾರಿ ನಿರ್ವಹಿಸಲು ಆಯ್ದುಕೊಂಡಿದ್ದು ಮಲೇಷ್ಯವನ್ನು. ಸುಮಾರು 50ಕ್ಕೂ ಹೆಚ್ಚು ತಂತ್ರಜ್ಞರು 10 ಜೋಡಿಗಳನ್ನು ಒಳಗೊಂಡ ದೊಡ್ಡ ತಂಡ ವಿದೇಶಿ ನೆಲದಲ್ಲಿ ಟಾಸ್ಕ್ ರೂಪಿಸಿ, ಅದನ್ನು ಪೂರ್ಣಗೊಳಿಸುವ ಜವಾಬ್ದಾರಿಯನ್ನು ಬ್ಯಾಚುಲರ್ಸ್ ಮತ್ತು ಏಂಜಲ್‌ಗಳಿಗೆ ನೀಡಿ, ಇಡೀ ಸಂಚಿಕೆಯನ್ನು ಯಶಸ್ವಿಯಾಗಿ ಮುಗಿಸಿದೆ. ವಿದೇಶಿ ನೆಲದಲ್ಲಿ ತನ್ನ ಸಂಚಿಕೆಯನ್ನು ಚಿತ್ರೀಕರಿಸಿದ ಮೊದಲ ಕನ್ನಡದ ವಾಹಿನಿ ಎಂಬ ಹೆಗ್ಗಳಿಕೆಯನ್ನೂ ಈ ರಿಯಾಲಿಟಿ ಶೋನ ಮೂಲಕ ಜೀ ಕನ್ನಡ ತನ್ನ ಮುಡಿಗೇರಿಸಿಕೊಂಡಿತು.

ದಾಂಪತ್ಯ ಕಾಲಿಡಲಿದೆ ಈ ಜೋಡಿ

ಸ್ಪರ್ಧಿಯಾಗಿ ಶೋ ಪ್ರವೇಶ ಮಾಡಿದ 10 ಯುವಕರ ಪೈಕಿ ಒಬ್ಬ ಸ್ಪರ್ಧಿ ಅಧಿಕೃತವಾಗಿ ದಾಂಪತ್ಯ ಜೀವನಕ್ಕೆ ಕಾಲಿಡಲು ಮುಂದಾಗಿದ್ದಾರೆ. ಎರಡು ಕುಟುಂಬ ಸದಸ್ಯರ ಸಮ್ಮುಖದಲ್ಲಿ ಈ ಜೋಡಿಯ ನಿಶ್ಚಿತಾರ್ಥಕ್ಕೆ ಜೀ ಕನ್ನಡದ ಭರ್ಜರಿ ಬ್ಯಾಚುಲರ್ಸ್ ಗ್ರಾಂಡ್ ಫಿನಾಲೆ ವೇದಿಕೆ ಸಾಕ್ಷಿಯಾಯಿತು. ಆ ಸ್ಫರ್ಧಿ ಯಾರು ? ಅವರ ಕೈ ಹಿಡಿದ ಆ ಹುಡುಗಿ ಯಾರು? ಎಂಬ ಪ್ರಶ್ನೆಗೂ ಇತ್ತರ ಸಿಕ್ಕಿದೆ. ಭರ್ಜರಿ ಬ್ಯಾಚುಲರ್ಸ್‌ ಶೋನ ಜಗ್ಗಪ್ಪ ಹಾಗೂ ಕಿರುತೆರೆ ನಟಿ ಸುಶ್ಮಿತಾ ಜೋಡಿಯ ನಿಶ್ಚಿತಾರ್ಥ ವೇದಿಕೆ ಮೇಲೆಯೇ ನೆರವೇರಿದೆ. ರವಿಚಂದ್ರನ್‌ ಅವರಿಂದ ಆಶೀರ್ವಾದವೂ ಸಿಕ್ಕಿದೆ. ರಚಿತಾ ಅವರ ಹಾರೈಕೆಯೂ ಸಂದಾಯವಾಗಿದೆ. ಹಾಗಾದರೆ, ಭರ್ಜರಿ ಬ್ಯಾಚುಲರ್ಸ್‌ ಪಟ್ಟ ಗೆದ್ದ ಜೋಡಿ ಯಾವುದು ಎಂಬುದಕ್ಕೆ ಭಾನುವಾರ ಸಂಜೆ 7 ಗಂಟೆಗೆ ಜೀ ಕನ್ನಡದಲ್ಲಿ ಉತ್ತರ ದಕ್ಕಲಿದೆ.