Chandramukhi 2: ಚಂದ್ರಮುಖಿ 2 ಟ್ರೈಲರ್ ಬಿಡುಗಡೆ; ಕಂಗನಾ ನೋಟ, ರಾಘವ ಲಾರೆನ್ಸ್ ಅವತಾರಗಳಿಗೆ ಫ್ಯಾನ್ಸ್ ಫಿದಾ VIDEO

ಕಂಗನಾ ರಣಾವತ್ ಮತ್ತು ರಾಘವ ಲಾರೆನ್ಸ್ ಅಭಿನಯದ ಬಹುನೀರಿಕ್ಷಿತ ಚಂದ್ರಮುಖಿ 2 ಸಿನಿಮಾದ ಟ್ರೈಲರ್ ರಿಲೀಸ್​ ಆಗಿದೆ. ಕಂಗನಾ ನೋಟ ಮತ್ತು ರಾಘವ ಲಾರೆನ್ಸ್ ಅವರ ಎರಡು ಅವತಾರಗಳಿಗೆ ಫ್ಯಾನ್ಸ್ ಫಿದಾ ಆಗಿದ್ದು, ಚಿತ್ರದ ಮೇಲೆ ನಿರೀಕ್ಷೆ ಮತ್ತಷ್ಟು ಹೆಚ್ಚಾಗಿದೆ.

ಇಂದು (ಸೆಪ್ಟೆಂಬರ್​ 3, ಭಾನುವಾರ) ಚೆನ್ನೈನಲ್ಲಿ ನಡೆದ ಕಾರ್ಯಕ್ರಮದಲ್ಲಿ ತಮಿಳು, ಹಿಂದಿ ಮತ್ತು ತೆಲುಗು ಭಾಷೆಗಳಲ್ಲಿ ಚಂದ್ರಮುಖಿ 2 ಟ್ರೈಲರ್ ಬಿಡುಗಡೆ ಮಾಡಲಾಯಿತು. ಕಂಗನಾ ಅವರು ರಾಜನ ಆಸ್ಥಾನದಲ್ಲಿ ನರ್ತಕಿಯ ಪಾತ್ರಧಾರಿಯಾಗಿ ಕಾಣಿಸುತ್ತಾರೆ. ರಾಘವ ಲಾರೆನ್ಸ್ ಒಮ್ಮೆ ರೌಡಿಗಳ ಜೊತೆ ಫೈಟ್​ ಮಾಡುವ ಹಾಗೂ ಇನ್ನೊಮ್ಮೆ ರಾಜನಂತೆ ಮೆರೆಯುವ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಇದೇ ಮೊದಲ ಬಾರಿಗೆ ಕಂಗನಾ ಹಾರರ್​ ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದಾರೆ.

ರಾಜಾಧಿ ರಾಜ, ರಾಜ ಗಂಭೀರ ಎಂಬ ಘೋಷಣೆಯೊಂದಿಗೆ ಆರಂಭವಾಗುವ ಟ್ರೈಲರ್​ನಲ್ಲಿ ದೊಡ್ಡ ಅವಿಭಕ್ತ ಕುಟುಂಬವೊಂದು ದೊಡ್ಡ ಬಂಗಲೆಗೆ ಬಂದು ಸಮಸ್ಯೆಗೆ ಸಿಲುಕುವುದು, ಆ ಬಂಗಲೆಯೆ ಒಂದು ಕೋಣೆಗೆ ಯಾರಿಗೂ ಪ್ರವೇಶಿಸದಂತೆ ಸೂಚಿಸುವುದು ಕಂಡು ಬರುತ್ತದೆ.

ಪಿ ವಾಸು ನಿರ್ದೇಶನದ ಚಂದ್ರಮುಖಿ 2 ಚಿತ್ರದಲ್ಲಿ ಕಂಗನಾ ರಣಾವತ್ ಮತ್ತು ರಾಘವ ಲಾರೆನ್ಸ್ ಜೊತೆ ವಡಿವೇಲು, ರಾಧಿಕಾ ಶರತ್‌ಕುಮಾರ್, ಲಕ್ಷ್ಮಿ ಮೆನನ್, ಮಿಥುನ್ ಶ್ಯಾಮ್, ಮಹಿಮಾ ನಂಬಿಯಾರ್, ರಾವ್ ರಮೇಶ್, ವಿಘ್ನೇಶ್, ರವಿ ಮರಿಯಾ, ಸುರೇಶ್ ಮೆನನ್, ಟಿ.ಎಂ. ಕಾರ್ತಿಕ್ ಮತ್ತು ಸುಭಿಕ್ಷಾ ಕೃಷ್ಣನ್ ನಟಿಸಿದ್ದಾರೆ. ಆಸ್ಕರ್ ಪ್ರಶಸ್ತಿ ವಿಜೇತ ಸಂಗೀತ ಸಂಯೋಜಕ ಎಂಎಂ ಕೀರವಾಣಿ ಈ ಚಿತ್ರಕ್ಕೆ ಸಂಗೀತ ಸಂಯೋಜಿಸಿದ್ದಾರೆ.

ಚಂದ್ರಮುಖಿ ಸೀಕ್ವೆಲ್​

ಇದು ರಜಿನಿಕಾಂತ್ ಮತ್ತು ಜ್ಯೋತಿಕಾ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ ತಮಿಳಿನ ಹಾರರ್ ಕಾಮಿಡಿ ಚಂದ್ರಮುಖಿ (2005) ಚಿತ್ರದ ಸೀಕ್ವೆಲ್​ ಆಗಿದೆ. ಚಂದ್ರಮುಖಿ ಸಿನಿಮಾವು ಗಲ್ಲಾಪೆಟ್ಟಿಗೆಯಲ್ಲಿ ಬ್ಲಾಕ್ಬಸ್ಟರ್ ಆಗಿತ್ತು. ರಜನಿಕಾಂತ್‌ ಅವರು ಲಕ ಲಕ ಲಕ ಡೈಲಾಗ್‌ ಮೂಲಕ ಮೋಡಿ ಮಾಡಿದ್ದರು. ಚಂದ್ರಮುಖಿ 2 ಚಿತ್ರದಲ್ಲಿಯೂ ರಜಿನಿಕಾಂತ್ ನಟಿಸಬೇಕಾಗಿತ್ತು, ಆದರೆ ರಾಘವ ಲಾರೆನ್ಸ್ ನಟಿಸಿದ್ದಾರೆ. 18 ವರ್ಷಗಳ ಬಳಿಕ ಚಂದ್ರಮುಖಿ 2 ಬಂದಿದೆ.

ಸೆಪ್ಟೆಂಬರ್ 15ಕ್ಕೆ ಸಿನಿಮಾ ರಿಲೀಸ್​

ಲೈಕಾ ಪ್ರೊಡಕ್ಷನ್ಸ್ ಮತ್ತು ಸುಬಾಸ್ಕರನ್ ನಿರ್ಮಾಣದ ಈ ಚಿತ್ರವು ಗಣೇಶ ಚತುರ್ಥಿಯ ಸಂದರ್ಭದಲ್ಲಿ ಜನರನ್ನು ಮನರಂಜಿಸಲಿದೆ. ಈ ಪ್ಯಾನ್​ ಇಂಡಿಯಾ ಚಿತ್ರವು ಸೆಪ್ಟೆಂಬರ್ 15 ರಂದು ತಮಿಳು, ತೆಲುಗು, ಹಿಂದಿ, ಮಲಯಾಳಂ ಮತ್ತು ಕನ್ನಡದಲ್ಲಿ ಬಿಡುಗಡೆಯಾಗಲಿದೆ.

ಇದನ್ನೂ ಓದಿ: ‘ಖುಷಿ’ಯ ಅಲೆಯ ನಡುವೆ ರಕ್ಷಿತ್‌ ಶೆಟ್ಟಿಯ ಸಪ್ತ ಸಾಗರದಾಚೆ ಎಲ್ಲೋ ಚಿತ್ರದ ಖಜಾನೆಗೆ ಬಂದ ಹಣವೆಷ್ಟು?