ಶಾರುಖ್‌ ಖಾನ್‌ಗೆ ಮತ್ತೆ ಮಗ್ಗಲು ಮುಳ್ಳಾಗಲು ಹೊರಟ ಹೊಂಬಾಳೆ ಫಿಲಂಸ್! ಹೀಗಿದೆ ಅಸಲಿ ಕಾರಣ
Sep 25, 2023 09:39 PM IST
Share
ಶಾರುಖ್‌ ಖಾನ್‌ಗೆ ಮತ್ತೆ ಮಗ್ಗಲು ಮುಳ್ಳಾಗಲು ಹೊರಟ ಹೊಂಬಾಳೆ ಫಿಲಂಸ್! ಹೀಗಿದೆ ಅಸಲಿ ಕಾರಣ
- ಶಾರುಖ್‌ ಖಾನ್‌ ಸಿನಿಮಾ ವಿರುದ್ಧ ಸೆಣೆಸಲು ಮತ್ತೆ ಮುಂದಾಗಿದೆ ಹೊಂಬಾಳೆ ಫಿಲಂಸ್. 2018ರಲ್ಲಿ ಜೀರೋ ಸಿನಿಮಾ ಎದುರು ಕೆಜಿಎಫ್‌ ಚಿತ್ರ ಬಿಡುಗಡೆ ಮಾಡಿದ್ದ ನಿರ್ಮಾಪಕರು, ಇದೀಗ ಡಂಕಿ ಎದುರುಗಡೆ ಸಲಾರ್ ಸಿನಿಮಾ ರಿಲೀಸ್‌ ಮಾಡಲು ಸಿದ್ಧತೆ ನಡೆಸಿದ್ದಾರೆ.
Salaar Vs Dunki: ಅದು 2018ರ ಡಿಸೆಂಬರ್‌ 21. ಸ್ಯಾಂಡಲ್‌ವುಡ್‌ನಲ್ಲಿ ಯಶ್‌ ನಟನೆಯ ಕೆಜಿಎಫ್‌ ಚಾಪ್ಟರ್‌ 1 ಸಿನಿಮಾ ರಿಲೀಸ್‌ ಆಗಿತ್ತು. ಕನ್ನಡ ಮಾತ್ರವಲ್ಲದೆ, ತೆಲುಗು, ತಮಿಳು, ಹಿಂದಿ, ಮಲಯಾಳಂ ಭಾಷೆಯಲ್ಲೂ ರಿಲೀಸ್‌ ಆಗಿ ದೊಡ್ಡ ಮಟ್ಟದಲ್ಲಿ ಸದ್ದು ಮಾಡಿತ್ತು. ನಟ ಯಶ್‌ಗೆ ಪ್ಯಾನ್‌ ಇಂಡಿಯಾ ಸ್ಟಾರ್‌ ಪಟ್ಟವೂ ಒಲಿದಿತ್ತು. ಮತ್ತೊಂದು ಬದಿಯಲ್ಲಿ ಅದೇ ದಿನ ಬಾಲಿವುಡ್ ಬಾದ್ಶಾ ಶಾರುಖ್‌ ಖಾನ್‌ ಅಭಿನಯದ ಜೀರೋ ಸಿನಿಮಾ ಸಹ ರಿಲೀಸ್‌ ಆಗಿತ್ತು. ಆದರೆ, ಕೆಜಿಎಫ್‌ ಮುಂದೆ ಜೀರೋ ಆಟ ನಡೆಯಲಿಲ್ಲ! ಹೀನಾಯ ಸೋಲನುಭವಿಸಿತ್ತು ಶಾರುಖ್‌ ಜೀರೋ.
ಇದೀಗ ಇಂಥದ್ದೇ ಮತ್ತೊಂದು ಬಾಕ್ಸ್‌ ಆಫೀಸ್‌ ಕದನಕ್ಕೆ ವೇದಿಕೆ ಸಿದ್ಧವಾಗುತ್ತಿದೆ. ಈ ಸಲ ಅದು ಸಲಾರ್ ವಸರ್ಸ್‌ ಡಂಕಿ! ಹೌದು, ಸಲಾರ್ ಸಿನಿಮಾ ಎಲ್ಲ ಅಂದುಕೊಂಡಂತೆ ಆಗಿದ್ದರೆ, ಇದೇ ಸೆ. 28ರಂದು ವಿಶ್ವದಾದ್ಯಂತ ರಿಲೀಸ್‌ ಆಗಬೇಕಿತ್ತು. ಆದರೆ, ಒಂದಷ್ಟು ಕೆಲಸಗಳ ಹಿನ್ನೆಲೆಯಲ್ಲಿ ಚಿತ್ರ ಬಿಡುಗಡೆ ಅನಿರೀಕ್ಷಿತವಾಗಿ ಮುಂದೂಡಲ್ಪಟ್ಟಿತ್ತು. ಇತ್ತ ಪ್ರಭಾಸ್ ಅವರನ್ನು ಮಾಸ್‌ ಅವತಾರದಲ್ಲಿ ತೆರೆಮೇಲೆ ನೋಡಬೇಕೆಂಬ ಅಭಿಮಾನಿ ಆಸೆಯೂ ಈಡೇರಲಿಲ್ಲ. ಹಾಗಾದರೆ, ಮುಂದೂಡಲ್ಪಟ್ಟ ಸಲಾರ್ ಬಿಡುಗಡೆ ಯಾವಾಗ?
ಸಲಾರ್ Vs ಡಂಕಿ
2023 ಶಾರುಖ್‌ ಖಾನ್‌ ಪಾಲಿಗೆ ಸಕ್ಸಸ್‌ ಜತೆಗೆ ಖುಷಿಕೊಟ್ಟ ವರ್ಷ. ಪಠಾಣ್‌ ಹಿಟ್‌ ಬಳಿಕ ಇದೀಗ ಜವಾನ್‌ ಮೇನಿಯಾ ಶುರುವಾಗಿದೆ. ಬಾಕ್ಸ್‌ ಆಫೀಸ್‌ನಲ್ಲಿ ಸಾವಿರ ಪ್ಲಸ್‌ ಕೋಟಿ ಗಳಿಕೆ ಕಂಡು ಮುನ್ನುಗ್ಗುತ್ತಿದೆ ಈ ಸಿನಿಮಾ. ಈ ಮೂಲಕ ಕಿಂಗ್‌ ಖಾನ್‌ ಮತ್ತೆ ಹಳೇ ಲಯಕ್ಕೆ ಮರಳಿದ್ದಾರೆ. ಬಾಕ್ಸ್‌ ಆಫೀಸ್‌ ಶೇಕ್‌ ಮಾಡುತ್ತಿದ್ದಾರೆ. ಜವಾನ್‌ ಮೂಲಕ ಹತ್ತು ಹಲವು ದಾಖಲೆಗಳನ್ನೂ ತಮ್ಮ ತೆಕ್ಕೆಗೆ ಹಾಕಿಕೊಳ್ಳುತ್ತಿದ್ದಾರೆ.
ಇದೆಲ್ಲದರ ನಡುವೆ ಇದೇ ವರ್ಷದ ಡಿಸೆಂಬರ್‌ನಲ್ಲಿ ಶಾರುಖ್‌ ಖಾನ್‌ ಅವರ ಮತ್ತೊಂದು ಸಿನಿಮಾ ತೆರೆಗೆ ಬರಲಿದೆ. ಅದೇ ರಾಜ್‌ಕುಮಾರ್‌ ಹಿರಾನಿ ನಿರ್ದೇಶನದ ಡಂಕಿ. ಡಂಕಿ ಚಿತ್ರಕ್ಕೆ ಈಗಾಗಲೇ ರಿಲೀಸ್‌ ದಿನಾಂಕವೂ ಫಿಕ್ಸ್‌ ಆಗಿದೆ. ಡಿ. 22ರಂದು ಕ್ರಿಸ್‌ಮಸ್‌ ರಜೆ ಮೇಲೆ ಕಣ್ಣಿಟ್ಟು ಕುಳಿತಿದೆ ಚಿತ್ರತಂಡ. ಇದೀಗ ಅದೇ ದಿನಾಂಕದಂದೇ ಹೊಂಬಾಳೆ ಫಿಲಂಸ್ ನಿರ್ಮಾಣ ಮಾಡಿರುವ ಸಲಾರ್ ಸಿನಿಮಾ ಸಹ ಬಿಡುಗಡೆ ಆಗಲಿದೆ. ಈ ಮೂಲಕ 2018ರಲ್ಲಿ ಶಾರುಖ್‌ ನಟನೆಯ ಜೀರೋ ಸಿನಿಮಾಕ್ಕೆ ಮಗ್ಗಲು ಮುಳ್ಳಾಗಿದ್ದ ಕೆಜಿಎಫ್‌ ಚಾಪ್ಟರ್‌ 1 ಸಿನಿಮಾ, ಇದೀಗ ಸಲಾರ್ ಮೂಲಕ ಡಂಕಿ ಎದುರು ಶಕ್ತಿ ಪ್ರದರ್ಶನಕ್ಕಿಳಿಯಲಿದೆ.
ಸೆ. 29ರಂದು ಅಧಿಕೃತ ಘೋಷಣೆ
ಈ ವಿಚಾರವನ್ನು ಬಾಲಿವುಡ್ ಟ್ರೇಡ್‌ ವಿಮರ್ಶಕ ತರಣ್‌ ಆದರ್ಶ್‌ ತಮ್ಮ X ವೇದಿಕೆಯಲ್ಲಿ ಈ ವಿಚಾರವನ್ನು ಹೇಳಿಕೊಂಡಿದ್ದಾರೆ. "ಹೌದು.. ಇದು ನಿಜ. ಈ ಸಲದ ಕ್ರಿಸ್‌ಮಸ್‌ಗೆ ಎಸ್‌ಆರ್‌ಕೆ ವರ್ಸಸ್‌ ಪ್ರಭಾಸ್.. ಡಂಕಿ ವರ್ಸಸ್‌ ಸಲಾರ್. ಡಿಸೆಂಬರ್‌ 22ಕ್ಕೆ ಸಲಾರ್ ಸಿನಿಮಾ ರಿಲೀಸ್‌ ಆಗಲಿದೆ. ಈ ವಿಚಾರವನ್ನು ಹೊಂಬಾಳೆ ಫಿಲಂಸ್ ಸೆ. 29ರಂದು ಅಧಿಕೃತವಾಗಿ ಘೋಷಣೆ ಮಾಡಲಿದೆ. ಶಾರುಖ್‌ ಜತೆಗೆ ಹೊಂಬಾಳೆ ಫಿಲಂಸ್‌ನ ಎರಡನೇ ಸಲದ ಕ್ಲಾಷ್‌ ಇದಾಗಿದೆ. ಈ ಹಿಂದೆ ಜೀರೋ ಸಿನಿಮಾ ಎದುರು ಕೆಜಿಎಫ್‌ ಚಿತ್ರ ರಿಲೀಸ್‌ ಆಗಿತ್ತು" ಎಂದು ಬರೆದುಕೊಂಡಿದ್ದಾರೆ.
ಮನರಂಜನೆ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್‌ ಮಾಡಿ