Kichcha Sudeep: ಕಿಚ್ಚನಿಗೆ ಆವಾಜ್‌ ಹಾಕಿ ಜಗಳಕ್ಕೆ ಇಳಿದ ತೆಲುಗು ನಿರ್ಮಾಪಕ! ಹರಿದಾಡುತ್ತಿರುವ ವಿಡಿಯೋ ಅಸಲಿಯತ್ತೇನು? VIDEO

Kichcha Sudeep: ಟಾಲಿವುಡ್‌ ಚಿತ್ರೋದ್ಯಮದಲ್ಲಿ ನಿರ್ಮಾಪಕ ದಿಲ್‌ ರಾಜು ಅವರದ್ದು ದೊಡ್ಡ ಹೆಸರು. ಹೈ ಬಜೆಟ್‌ನ ಸಾಲು ಸಾಲು ಸಿನಿಮಾಗಳನ್ನು ನಿರ್ಮಾಣ ಮಾಡಿರುವ ದಿಲ್‌ ರಾಜು, ತೆಲುಗು ಚಿತ್ರೋದ್ಯಮದ ನಿರ್ಮಾಪಕರ ಸಂಘದ ಅಧ್ಯಕ್ಷರಾಗಿಯೂ ಕಾರ್ಯ ನಿರ್ವಹಿಸುತ್ತಿದ್ದಾರೆ. 2003ರಲ್ಲಿ ದಿಲ್‌ ಸಿನಿಮಾ ಮೂಲಕ ನಿರ್ಮಾಪಕರಾಗಿ ಎಂಟ್ರಿ ಕೊಟ್ಟಿದ್ದ ರಾಜು, ಮೊದಲ ಸಿನಿಮಾದ ಹೆಸರನ್ನು ತಮ್ಮ ಹೆಸರಿನ ಜತೆ ಸೇರಿಸಿಕೊಂಡು ಇಂದಿಗೂ ಚಿತ್ರರಂಗದಲ್ಲಿ ಸಕ್ರಿಯರಾಗಿದ್ದಾರೆ. ಹೀಗಿರುವ ಇದೇ ನಿರ್ಮಾಪಕ ಇದೀಗ ಕಿಚ್ಚ ಸುದೀಪ್‌ಗೆ ಆವಾಜ್‌ ಹಾಕಿದ್ದಾರೆ!?

ಸೋಷಿಯಲ್‌ ಮೀಡಿಯಾದಲ್ಲಿ ಹೀಗೊಂದು ವಿಡಿಯೋ ವೈರಲ್‌ ಆಗುತ್ತಿದೆ. ಸಿನಿಮಾ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ವೇಳೆ ನಿರ್ಮಾಪಕ ದಿಲ್‌ ರಾಜು, ಮಾಧ್ಯಮದ ಕೆಲವರ ಜತೆಗೆ ಜಗಳಕ್ಕೆ ನಿಂತಿದ್ದರು. ಇದಕ್ಕೆ ಕಾರಣ ಅವರ ಕುರಿತಾಗಿ ಹರಿದಾಡಿದ ಸುಳ್ಳು ಸುದ್ದಿ. ತೆಲುಗಿನ ಕೆಲವು ಸುದ್ದಿ ವೆಬ್‌ಸೈಟ್‌ಗಳಲ್ಲಿ ದಿಲ್‌ರಾಜು ಕುರಿತಾಗಿ ಸುದ್ದಿಗಳು ಬಿತ್ತರವಾಗಿದ್ದವು. ತಮಿಳಿನ ಎರಡು ಸಿನಿಮಾಗಳನ್ನು ವಿತರಣೆ ಮಾಡುತ್ತಿರುವ ಹಿನ್ನೆಲೆಯಲ್ಲಿಈ ಶುಕ್ರವಾರ (ಜ. 12) ರಿಲೀಸ್‌ ಆಗಲಿರುವ ಹನುಮಾನ್‌ ಸಿನಿಮಾವನ್ನು ತಡೆಯಲು ಪ್ರಯತ್ನಿಸುತ್ತಿದ್ದಾರೆ ಎಂದು ಸುದ್ದಿ ಹಬ್ಬಿಸಿದ್ದರು.

ಇದನ್ನೂ ಓದಿ: ಈ ಕನ್ನಡ ಚಿತ್ರರಂಗಕ್ಕೆ ಏನಾಗಿದೆ? ಸಂಕ್ರಾಂತಿಗೆ ಬಿಡುಗಡೆಯಾಗ್ತಿಲ್ಲ ಒಂದೂ ಸಿನಿಮಾ, ಕಟ್ಟೆಯೊಡೆದ ಆಕ್ರೋಶ

ಹೀಗೆ ಸುದ್ದಿ ಹಬ್ಬಿದ ಹಿನ್ನೆಲೆಯಲ್ಲಿ ಈ ಬಗ್ಗೆ ಸ್ಪಷ್ಟನೆ ನೀಡಿದ ದಿಲ್‌ ರಾಜು, ನಾನು ಯಾವುದೇ ಸಿನಿಮಾ ತಡೆಯುತ್ತಿಲ್ಲ. ಸಂಕ್ರಾಂತಿಯೆಂದು ಸಾಕಷ್ಟು ಸಿನಿಮಾಗಳು ತೆರೆಗೆ ಬರುತ್ತಿವೆ.. ಹನುಮಾನ್‌ ಸಿನಿಮಾ ಎರಡು ದಿನ ಮುಂದಕ್ಕೆ ಅಂದರೆ, ಜ. 14ರಂದು ಬಿಡುಗಡೆ ಮಾಡುವಂತೆ ಕೋರಿದ್ದೇನೆ. ಅದನ್ನು ಹೊರತುಪಡಿಸಿ ನಾನು ಯಾವುದೇ ತಮಿಳು ಸಿನಿಮಾ ವಿತರಣೆ ಮಾಡುತ್ತಿಲ್ಲ" ಎಂದು ಸ್ಪಷ್ಟನೆ ನೀಡಿದ್ದಾರೆ. ಈ ವಿಚಾರವಾಗಿಯೇ ಸುದ್ದಿ ಬರೆದವರನ್ನು ಸಿನಿಮಾ ಕಾರ್ಯಕ್ರಮದಲ್ಲಿಯೇ ನೇರವಾಗಿ ತರಾಟೆಗೆ ತೆಗೆದುಕೊಂಡಿದ್ದಾರೆ ದಿಲ್‌ ರಾಜು. ಪಕ್ಕದಲ್ಲಿಯೇ ಸುದೀಪ್‌ ಥರದ ವ್ಯಕ್ತಿಯೂ ಕಾಣಿಸಿದ್ದಾರೆ!

ಗಲಾಟೆಗೂ ಸುದೀಪ್‌ಗೂ ಏನು ಸಂಬಂಧ?

ಅಂದಹಾಗೆ, ನಿರ್ಮಾಪಕರು ಮತ್ತು ಕೆಲ ಡಿಜಿಟಲ್‌ ಮಾಧ್ಯಮದವರ ನಡುವಿನ ಮಾತಿನ ಸಮರದ ವಿಡಿಯೋ ವೈರಲ್‌ ಆಗಿದೆ. ಅದರ ನಡುವೆಯೇ ಥೇಟ್‌ ಸುದೀಪ್‌ ಅವರನ್ನೇ ಹೋಲುವ ವ್ಯಕ್ತಿಯೊಬ್ಬರು ಕಾಣಿಸಿದ್ದಾರೆ. ಆ ವ್ಯಕ್ತಿಯ ಮೇಲೂ ನಿರ್ಮಾಪಕ ದಿಲ್‌ ರಾಜು ಕೊಂಚ ಗರಂ ಆಗಿಯೇ ಮಾತನಾಡಿದ್ದಾರೆ. ಈ ವಿಡಿಯೋ ಎಲ್ಲೆಡೆ ಹರಿದಾಡುತ್ತಿದ್ದಂತೆ, ಸತ್ಯಾಸತ್ಯತೆ ಗಮನಿಸದ ಕೆಲ ನೆಟ್ಟಿಗರು, ಸುದೀಪ್‌ ಅವರ ಬಗ್ಗೆ ಕೆಟ್ಟದಾಗಿ ಪೋಸ್ಟ್‌ ಹಾಕುತ್ತಿದ್ದಾರೆ. ಸೋಷಿಯಲ್‌ ಮೀಡಿಯಾದಲ್ಲಿ ಈ ವಿಡಿಯೋ ನೋಡಿದ ಇನ್ನು ಕೆಲವರು ಇದು ಸುದೀಪ್‌ ಅಲ್ಲ, ಸುದೀಪ್‌ ತರ ಕಾಣ್ತಿದ್ದಾರೆ ಎಂದಿದ್ದಾರೆ.

ಇದನ್ನೂ ಓದಿ: ಗುಂಟೂರು ಖಾರಂಗೂ ವಿಷ್ಣುವರ್ಧನ್‌ ಕೊನೆಯ ಸಿನಿಮಾಕ್ಕೂ ಲಿಂಕ್‌ ಇರುವುದೇ? ಮಹೇಶ್‌ ಬಾಬು ಸಿನಿಮಾದ ಕುರಿತು ಹೀಗೊಂದು ಗುಸುಗುಸು

ಮ್ಯಾಕ್ಸ್‌ ಕ್ಲೈಮ್ಯಾಕ್ಸ್‌ ಚಿತ್ರೀಕರಣದಲ್ಲಿ ಸುದೀಪ್‌ ಬಿಜಿ

ಅಂದಹಾಗೆ, ಚೆನ್ನೈನ ಮಹಾಬಲಿಪುರಂನಲ್ಲಿ ನಟ ಕಿಚ್ಚ ಸುದೀಪ್‌ ಮ್ಯಾಕ್ಸ್‌ ಸಿನಿಮಾ ಕೆಲಸಗಳಲ್ಲಿ ಬಿಜಿಯಾಗಿದ್ದಾರೆ. ಕ್ಲೈಮ್ಯಾಕ್ಸ್‌ ಚಿತ್ರೀಕರಣ ನಡೆಯುತ್ತಿದ್ದು, ಆ ಸಿನಿಮಾ ಚಿತ್ರೀಕರಣದಲ್ಲಿ ತೊಡಗಿಸಿಕೊಂಡಿದ್ದರ ಬಗ್ಗೆ ಸ್ವತಃ ಸುದೀಪ್‌ ಹೇಳಿಕೊಂಡಿದ್ದರು. ಪ್ಯಾನ್‌ ಇಂಡಿಯಾ ಮಟ್ಟದಲ್ಲಿ ನಿರ್ಮಾಣವಾಗುತ್ತಿರುವ ಮ್ಯಾಕ್ಸ್‌ ಸಿನಿಮಾ ಇದೇ 2024ರಲ್ಲಿ ತೆರೆಗೆ ಬರಲಿದೆ. ವಿಜಯ್‌ ಕಾರ್ತಿಕೇಯ ಈ ಸಿನಿಮಾ ನಿರ್ದೇಶನ ಮಾಡುತ್ತಿದ್ದು, ಕಲೈಪುಲಿ ದಾನು ನಿರ್ಮಾಣ ಮಾಡುತ್ತಿದ್ದಾರೆ.