Tollywood News: ಸಮಂತಾ ಕುರಿತು, ಕರ್ಮ ಯಾರನ್ನೂ ಬಿಡುವುದಿಲ್ಲ ಎಂದ ಮಹೇಶ್‌ ಬಾಬು ಅಭಿಮಾನಿಗಳು; ಖುಷಿ ಸಿನಿಮಾ ನಟಿ ಮಾಡಿದ್ದಾದ್ರೂ ಏನು?
Jul 13, 2023 06:08 PM IST
Share
ಸಮಂತಾ , ಮಹೇಶ್‌ ಬಾಬು
ಇನ್ನೂ ಬಿಡುಗಡೆ ಆಗದ ತೆಲುಗು ಚಿತ್ರದ ಪೋಸ್ಟರ್‌ ಒಂದನ್ನು ನೋಡಿದೆ, ಅದು ಅತಿರೇಖ'' ಎಂದು ಕಾಮೆಂಟ್‌ ಮಾಡಿದ್ದರು. ಆದರೆ ಸಮಂತಾ ಯಾವುದೇ ಸಿನಿಮಾ ಹೆಸರನ್ನು ಉಲ್ಲೇಖಿಸಿರಲಿಲ್ಲ.
ಟಾಲಿವುಡ್ ನಟಿ ಸಮಂತಾ ಬ್ಯಾಕ್‌ ಟು ನಾರ್ಮಲ್‌ ಲೈಫ್‌ ಎನ್ನುವಂತೆ ಜೀವನದಲ್ಲಾದ ಕಹಿ ಘಟನೆಗಳನ್ನು ಮರೆತು ಮೊದಲಿನಂತೆ ಜೀವನ ಸಾಗಿಸುತ್ತಿದ್ದಾರೆ. ಸಾಲು ಸಾಲು ಸಿನಿಮಾಗಳಲ್ಲಿ ಅವಕಾಶ ಗಳಿಸುತ್ತಿದ್ದಾರೆ. 'ಶಾಕುಂತಲಂ' ಸೋಲಿನ ನಂತರ ಈಗ ಅವರು 'ಖುಷಿ' ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಈ ನಡುವೆ ಸಮಂತಾ ಮಾಡಿದ್ದ ಹಳೆಯ ಟ್ವೀಟ್‌ ಒಂದು ಮತ್ತೆ ಚರ್ಚೆ ಆಗುತ್ತಿದೆ.
ಖುಷಿ ಚಿತ್ರದ ಎರಡನೇ ಹಾಡು ರಿಲೀಸ್
ವಿಜಯ್‌ ದೇವರಕೊಂಡ ಹಾಗೂ ಸಮಂತಾ ನಟನೆಯ 'ಖುಷಿ' ಚಿತ್ರದ ಎರಡನೇ ಹಾಡು ರಿಲೀಸ್ ಆಗಿದೆ. ಆರಾಧ್ಯ.. ಎಂಬ ಹಾಡು ಸಿನಿಪ್ರಿಯರಿಗೆ ಸಂಗೀತ ಪ್ರಿಯರಿಗೆ ಬಹಳ ಇಷ್ಟವಾಗಿದೆ. ಶಿವ ನಿರ್ವಾಣ ಈ ಹಾಡಿಗೆ ಸಾಹಿತ್ಯ ಬರೆದಿದ್ದು ಸಿದ್‌ ಶ್ರೀರಾಮ್‌ ಹಾಗೂ ಚಿನ್ಮಯಿ ಶ್ರೀಪಾದ ಈ ಹಾಡಿಗೆ ದನಿಯಾಗಿದ್ದಾರೆ. ಚಿತ್ರದ ಹಾಡುಗಳಿಗೆ ಹಶೀಮ್‌ ಅಬ್ದುಲ್‌ ವಹಾಬ್‌ ಸಂಗೀತ ನೀಡಿದ್ದಾರೆ. ಈ ಹಾಡಿನಲ್ಲಿ ವಿಜಯ್‌ ದೇವರಕೊಂಡ ತನ್ನ ಕಾಲ ಬಳಿ ಕುಳಿದು ಏನೋ ಬರೆಯುತ್ತಿರುವ ಸಮಂತಾ ತೋಳಿನ ಮೇಲೆ ಕಾಲು ಇರಿಸಿದ್ದಾರೆ. ಈ ಸ್ಕ್ರೀನ್‌ ಶಾಟ್‌ ಈಗ ವೈರಲ್‌ ಆಗುತ್ತಿದ್ದು ಸಮಂತಾ ಕುರಿತು ಮಹೇಶ್‌ ಬಾಬು ಅಭಿಮಾನಿಗಳು ''ಕರ್ಮ ಯಾರನ್ನೂ ಬಿಡುವುದಿಲ್ಲ'' ಎಂದು ಕಾಮೆಂಟ್‌ ಮಾಡುತ್ತಿದ್ದಾರೆ. ಅಷ್ಟಕ್ಕೂ ಪ್ರಿನ್ಸ್‌ ಮಹೇಶ್‌ ಬಾಬು ಅಭಿಮಾನಿಗಳು ಹೀಗೆ ಕಾಮೆಂಟ್‌ ಮಾಡಲು ಒಂದು ಫ್ಲಾಷ್‌ ಬ್ಯಾಕ್‌ ಇದೆ.
ಮಹೇಶ್‌ ಬಾಬು ಸಿನಿಮಾ ಬಗ್ಗೆ ಕಾಮೆಂಟ್‌ ಮಾಡಿದ್ರಾ ಸಮಂತಾ?
2014 ರಲ್ಲಿ ಮಹೇಶ್‌ ಬಾಬು ಹಾಗೂ ಕೃತಿ ಸನೊನ್‌ ಅಭಿನಯದ 'ಒನ್‌ ನೆನೊಕ್ಕಡೇನೇ' ಸಿನಿಮಾ ಬಿಡುಗಡೆ ಆಗಿತ್ತು. ಈ ಚಿತ್ರದ ಹಾಡೊಂದರಲ್ಲಿ ಮಹೇಶ್‌ ಬಾಬು ಬೀಚ್‌ ಬಳಿ ಚಪ್ಪಲಿ ಹಿಡಿದು ನಡೆಯುತ್ತಿದ್ದರೆ ನಾಯಕಿ ಕೃತಿ ಸನೊನ್‌ ಆತನನ್ನು ಅಂಬೆಗಾಲು ಇಡುತ್ತಾ ಹಿಂಬಾಲಿಸಿ ಬರುವ ಪೋಸ್ಟರ್‌ ರಿಲೀಸ್ ಆಗಿತ್ತು. ಇದೇ ಸಮಯಕ್ಕೆ ಸಮಂತಾ ಟ್ವೀಟ್‌ ಮಾಡಿ, ''ಇನ್ನೂ ಬಿಡುಗಡೆ ಆಗದ ತೆಲುಗು ಚಿತ್ರದ ಪೋಸ್ಟರ್‌ ಒಂದನ್ನು ನೋಡಿದೆ, ಅದು ಅತಿರೇಖ'' ಎಂದು ಕಾಮೆಂಟ್‌ ಮಾಡಿದ್ದರು. ಆದರೆ ಸಮಂತಾ ಯಾವುದೇ ಸಿನಿಮಾ ಹೆಸರನ್ನು ಉಲ್ಲೇಖಿಸಿರಲಿಲ್ಲ. ಮಹೇಶ್‌ ಬಾಬು ಅಭಿಮಾನಿಗಳು ಮಾತ್ರ ಇದು 'ಒನ್‌ ನೆನೊಕ್ಕಡೇನೇ' ಚಿತ್ರದ ಬಗ್ಗೆಯೇ ಸಮಂತಾ ಹೇಳಿದ್ದು ಎಂದು ವಾದಿಸಿದ್ದರು.
ಕರ್ಮ ಹಿಂಬಾಲಿಸುತ್ತದೆ ಎಂದ ಮಹೇಶ್‌ ಬಾಬು ಫ್ಯಾನ್ಸ್
ಇದೀಗ ಆ ಟ್ವೀಟ್‌ ಮತ್ತೆ ವೈರಲ್‌ ಆಗುತ್ತಿದೆ. ಆ ಟ್ವೀಟ್‌ ಸ್ಕ್ರೀನ್‌ ಶಾಟ್‌ ಹಾಗೂ ಖುಷಿ ಚಿತ್ರದ ಸ್ಕ್ರೀನ್‌ ಶಾಟ್‌ ಎರಡನ್ನೂ ಹೋಲಿಸಿರುವ ಮಹೇಶ್‌ ಬಾಬು ಅಭಿಮಾನಿಗಳು ''ಕರ್ಮ ಸುತ್ತುತ್ತಲೇ ಇರುತ್ತದೆ, ಅದು ಯಾರನ್ನೂ ಬಿಡುವುದಿಲ್ಲ, ಮಹೇಶ್‌ ಬಾಬು ಚಿತ್ರದ ಪೋಸ್ಟರ್‌ ಬಗ್ಗೆ ಮಾತನಾಡಿದ್ದ ನಿಮಗೆ ಈಗ ಆಗುತ್ತಿರುವುದು ಏನು'' ಎಂದು ಪ್ರಶ್ನಿಸುತ್ತಿದ್ದಾರೆ. ಆದರೆ ಸಮಂತಾ ನಿಜವಾಗಿ ಮಾತನಾಡಿದ್ದು ಮಹೇಶ್‌ ಬಾಬು ಸಿನಿಮಾ ಪೋಸ್ಟರ್‌ ಬಗ್ಗೆಯೋ ಅಥವಾ ಯಾವ ತೆಲುಗು ಸಿನಿಮಾ ಬಗ್ಗೆ ಅನ್ನೋದು ಅವರಿಗೇ ಗೊತ್ತು ಅಷ್ಟೇ.
ಇದನ್ನು ಹೊರತುಪಡಿಸಿ ಸಮಂತಾ 'ಸಿಟಾಡೆಲ್‌' ವೆಬ್‌ ಸೀರೀಸ್‌ ಹಾಗೂ 'ಚೆನ್ನೈ ಸ್ಟೋರಿ' ಸಿನಿಮಾಗಳಲ್ಲಿ ನಟಿಸುತ್ತಿದ್ದಾರೆ. ಇತ್ತ ಮಹೇಶ್‌ ಬಾಬು 'ಗುಂಟೂರು ಕಾರಂ' ಸಿನಿಮಾದಲ್ಲಿ ಬ್ಯುಸಿ ಇದ್ದಾರೆ.