Sanjay Dutt: ಬಾಲಿವುಡ್‌ ಬಿಟ್ಟು ಸೌತ್‌ನಲ್ಲೇ ಠಿಕಾಣಿ ಹೂಡಿದ ಬಾಬಾ!; ಡಬಲ್‌ ಇಸ್ಮಾರ್ಟ್‌ ಮೂಲಕ ಮತ್ತೆ ದಕ್ಷಿಣದತ್ತ ಸಂಜಯ್‌ ದತ್‌

Sanjay Dutt: ಬಾಲಿವುಡ್‌ ನಟ ಸಂಜಯ್‌ ದತ್‌ಗೆ ದೊಡ್ಡ ಮಟ್ಟದ ಸಕ್ಸಸ್‌ ತಂದು ಕೊಟ್ಟ ಇತ್ತೀಚಿನ ಸಿನಿಮಾ ಎಂದರೆ ಅದು ಕೆಜಿಎಫ್‌ ಚಾಪ್ಟರ್‌ 2. ಆ ಸಿನಿಮಾದಲ್ಲಿ ಖಳನಟ ಅಧೀರನಾಗಿ ಅಬ್ಬರಿಸಿ ಎಲ್ಲರಿಂದ ಮೆಚ್ಚುಗೆ ಪಡೆದುಕೊಂಡಿದ್ದಲ್ಲದೆ, ತಮ್ಮ ಸಿನಿಮಾ ಟ್ರ್ಯಾಕ್‌ಗೆ ಬಲ ತುಂಬಿದರು ಸಂಜಯ್‌. ಅದರ ಪರಿಣಾಮ, ಸಾಲು ಸಾಲು ಸಿನಿಮಾಗಳಲ್ಲಿ ಸಂಜು ಬಾಬಾ ಬಿಜಿಯಾದರು. ಅದರಲ್ಲೂ ಸೌತ್‌ ಸಿನಿ ದುನಿಯಾದ ಫೇವರಿಟ್‌ ಖಳನಾಯಕನಾಗಿ ಬದಲಾದರು. ಕನ್ನಡದಲ್ಲಿ ಪ್ರೇಮ್‌ ನಿರ್ದೇಶನದ ಕೆಡಿ, ತಮಿಳಿನ ವಿಜಯ್‌ ನಟನೆಯ ಲಿಯೋ ಹೀಗೆ ಸಾಲು ಸಾಲು ದಕ್ಷಿಣದ ಸಿನಿಮಾಗಳನ್ನು ಒಪ್ಪಿಕೊಳ್ಳುತ್ತಿರುವ ಸಂಜಯ್‌ ದತ್‌ ಬತ್ತಳಿಕೆಗೆ ಇದೀಗ ಇನ್ನೊಂದು ಸಿನಿಮಾ ಸೇರಿಕೊಂಡಿದೆ.

ಇದು ಪುರಿ ಜಗನ್ನಾಥ್‌ ಸಿನಿಮಾ

ಈಗಾಗಲೇ ತಮ್ಮ ನಿರ್ದೇಶನದ ಮೂಲಕವೇ ಖ್ಯಾತಿ ಪಡೆದ ನಿರ್ದೇಶಕ ಪುರಿ ಜಗನ್ನಾಥ್‌, ತೆಲುಗಿನಲ್ಲಷ್ಟೇ ಅಲ್ಲದೆ ಹಲವು ಭಾಷೆಗಳಲ್ಲಿ ಸ್ಟಾರ್‌ ಕಲಾವಿದರಿಗೆ ಆಕ್ಷನ್‌ ಕಟ್‌ ಹೇಳಿದ್ದಾರೆ ಈ ನಿರ್ದೇಶಕ. ಸರಣಿ ಹಿಟ್‌ ಕೊಟ್ಟು ಟಾಪ್‌ ನಿರ್ದೇಶಕ ಎಂದೂ ಕರೆಸಿಕೊಂಡಿದ್ದಾರೆ. ಆದರೆ, ವಿಜಯ್‌ ದೇವರಕೊಂಡ ಜತೆಗೆ ಲೈಗರ್‌ ಸಿನಿಮಾದ ಹೀನಾಯ ಸೋಲಿನ ಬಳಿಕ ಪುರಿ ಜಗನ್ನಾಥ್‌ ಯಾವ ಸಿನಿಮಾ ಕೈಗೆತ್ತಿಕೊಳ್ಳುತ್ತಾರೆ ಎಂಬ ಕುತೂಹಲವಿತ್ತು. ಅದಕ್ಕೆ ಉತ್ತರವೆಂಬಂತೆ ಇಸ್ಮಾರ್ಟ್‌ ಶಂಕರ್‌ ಸಿನಿಮಾದ ಸೀಕ್ವೆಲ್‌ ಶುರು ಮಾಡಿದ್ದಾರೆ. ಅದಕ್ಕೆ ಡಬಲ್‌ ಇಸ್ಮಾರ್ಟ್‌ ಎಂಬ ಶೀರ್ಷಿಕೆಯೂ ಫಿಕ್ಸ್‌ ಆಗಿದೆ.

ರಾಮ್‌ ಎದುರು ಸಂಜಯ್‌ ದತ್‌ ಖಳ!

ಈಗ ವಿಚಾರ ಏನೆಂದರೆ, ಇದೇ ಡಬಲ್‌ ಇಸ್ಮಾರ್ಟ್‌ ಸಿನಿಮಾದಲ್ಲಿ ನಟ ರಾಮ್‌ ಪೋತಿನೇನಿ ಎದುರು ಖಳನಾಗಿ ಸಂಜಯ್‌ ದತ್ತ ಅಬ್ಬರಿಸಲಿದ್ದಾರೆ. ಜೂನ್‌ನಲ್ಲಿ ಸೆಟ್ಟೇರಿದ್ದ ಈ ಸಿನಿಮಾ ಸದ್ಯ ಶೂಟಿಂಗ್‌ನಲ್ಲಿಯೂ ಬಿಜಿಯಾಗಿದೆ. ಹೀಗಿರುವಾಗ ಈ ಸಿನಿಮಾದ ಖಳನ ಪಾತ್ರದ ಮೊದಲ ಲುಕ್‌ ಅನ್ನು ಚಿತ್ರತಂಡ ಬಿಡುಗಡೆ ಮಾಡಿದೆ. ಬಿಗ್‌ ಬುಲ್‌ ಹೆಸರಿನಲ್ಲಿಯೇ ಸಂಜು ಬಾಬಾ ಅವರ ಖಡಕ್‌ ಲುಕ್‌ ಅನಾವರಣಗೊಂಡಿದ್ದು, ಕುತೂಹಲ ಮೂಡಿಸಿದೆ. ಅಭಿಮಾನಿ ವಲಯದಿಂದಲೂ ಮೊದಲ ಲುಕ್‌ಗೆ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.

ಇಲ್ಲೂ ಒಂದಾದ ಚಾರ್ಮಿ ಕೌರ್‌

ಕಳೆದ ವರ್ಷ ಬಹುಭಾಷೆಗಳಲ್ಲಿ ನಿರ್ಮಾಣವಾಗಿದ್ದ ವಿಜಯ್‌ ದೇವರಕೊಂಡ ಅವರ ಲೈಗರ್‌ ಸಿನಿಮಾಕ್ಕೆ ಚಾರ್ಮಿ ಕೌರ್‌ ಬಂಡವಾಳ ಹೂಡಿ ಪಾಲುದಾರರಾಗಿದ್ದರು. ಇದೀಗ ಡಬಲ್‌ ಇಸ್ಮಾರ್ಟ್‌ ಸಿನಿಮಾಕ್ಕೂ ಅವರ ಎಂಟ್ರಿಯಾಗಿದೆ. ಪುರಿ ಕನೆಕ್ಟ್ಸ್ ಬ್ಯಾನರ್‌ನಡಿ ಪುರಿ ಜಗನ್ನಾಥ್ ಹಾಗೂ ಚಾರ್ಮಿ ಕೌರ್ ಅದ್ಧೂರಿಯಾಗಿ ಈ ಸಿನಿಮಾ ನಿರ್ಮಾಣ ಮಾಡುತ್ತಿದ್ದಾರೆ. ಈ ಚಿತ್ರವೂ ಹಲವು ಭಾಷೆಗಳಲ್ಲಿ ಬಿಡುಗಡೆ ಆಗಲಿದೆ.

ಹೇಗಿದೆ ಬಿಗ್ ಬುಲ್ ಲುಕ್‌

ಸೌತ್‌ ಸಿನಿಮಾಗಳಲ್ಲಿ ಖಳನಾಯಕರ ಲುಕ್‌ ಬಗ್ಗೆ ಹೇಳುವ ಮಾತೇ ಬೇಡ. ಒಂದಕ್ಕಿಂತ ಒಂದು ವಿಭಿನ್ನ. ಆ ವಿಭಿನ್ನತೆ ಸಂಜಯ್‌ ದತ್‌ ವಿಚಾರದಲ್ಲೂ ಮುಂದುವರಿದಿದೆ. ಬಿಗ್‌ ಬುಲ್‌ ಹೆಸರಿಗೆ ತಕ್ಕಂತೆ, ಅವರ ಹುಟ್ಟುಹಬ್ಬಕ್ಕೆ ಡಬಲ್‌ ಇಸ್ಮಾರ್ಟ್‌ ತಂಡ ಸ್ಪೆಷಲ್‌ ಪೋಸ್ಟರ್‌ ರಿಲೀಸ್‌ ಮಾಡಿದೆ. ಗಡ್ಡ ಬಿಟ್ಟು ಸ್ಟೈಲಿಶ್ ಲುಕ್‌ನಲ್ಲಿ ಸಿಗಾರ್ ಸೇದುತ್ತಾ ರಗಡ್ ಆಗಿಯೇ ಖದರ್‌ ತೋರಿಸಿದ್ದಾರೆ ಸಂಜಯ್‌ ದತ್.‌

ಪುರಿ ಜಗನ್ನಾಥ್ ನಿರ್ದೇಶಿಸುತ್ತಿರುವ ಈ ಚಿತ್ರಕ್ಕೆ ಹಾಲಿವುಡ್ ಗಿಯಾನಿ ಜಿಯಾನೆಲ್ಲಿ ಅವರ ಛಾಯಾಗ್ರಹಣ ಇರಲಿದೆ. ಲೈಗರ್ ಸಿನಿಮಾದಲ್ಲಿ ಖಳನಾಯಕ ಘರ್ಜಿಸಿದ್ದ ವಿಷು ರೆಡ್ಡಿ, ಪುರಿ ಕನೆಕ್ಟ್ ಬ್ಯಾನರ್‌ನ ಸಿಇಒ ಆಗಿ ಕೆಲಸ ಮಾಡುತ್ತಿದ್ದಾರೆ. ಕೋಟಿ ಕೋಟಿ ವೆಚ್ಚದಲ್ಲಿ ನಿರ್ಮಾಣವಾಗಲಿರುವ ಈ ಸಿನಿಮಾ 2024ರ ಮಾರ್ಚ್‌ 8ರ ಶಿವರಾತ್ರಿಗೆ ತೆರೆಗೆ ಬರಲಿದೆ. ತೆಲುಗು, ತಮಿಳು, ಕನ್ನಡ, ಹಿಂದಿ ಹಾಗೂ‌ ಮಲಯಾಳಂ ಭಾಷೆಯಲ್ಲಿ ಈ ಸಿನಿಮಾ ರಿಲೀಸ್‌ ಆಗಲಿದೆ.

ಮನರಂಜನೆ ಕುರಿತ ಮತ್ತಷ್ಟು ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್‌ ಮಾಡಿ