ಚಾನ್ಸ್‌ ಸಿಕ್ಕರೆ ಕೊಹ್ಲಿ ಬಯೋಪಿಕ್‌ನಲ್ಲಿ ನಾನೇ ವಿರಾಟ್‌ ಕೊಹ್ಲಿ ಆಗುವೆ ಎಂದ ನಟ ರಾಮ್‌ ಪೋತಿನೇನಿ

Ram Pothineni: ಭಾರತೀಯ ಸಿನಿಮಾಗಳಲ್ಲಿ ಸಾಕಷ್ಟು ಕ್ರೀಡೆ ಆಧರಿತ ಬಯೋಪಿಕ್‌ಗಳು ನಿರ್ಮಾಣವಾಗಿ ಹಿಟ್‌ ಆದ ಉದಾಹರಣೆಗಳಿವೆ. ಅದರಲ್ಲೂ ಕ್ರಿಕೆಟ್‌ ಆಧರಿಸಿದ ಬಯೋಪಿಕ್‌ ಸಿನಿಮಾಗಳೂ ನೋಡುಗರನ್ನು ಸೆಳೆದಿವೆ. ಆದರೆ, ಇತ್ತೀಚಿನ ಕೆಲ ವರ್ಷಗಳಲ್ಲಿ ಕ್ರಿಕೆಟ್‌ಗೆ ಸಂಬಂಧಿಸಿದ ಯಾವುದೇ ಸಿನಿಮಾ, ಬಯೋಪಿಕ್ ಸುದ್ದಿಯ ಸುಳಿವಿಲ್ಲ.‌ ಇದೀಗ ಎಲ್ಲರ ಚಿತ್ತ ನೆಟ್ಟಿರುವುದು, ಬೇಡಿಕೆ ಇಟ್ಟಿರುವುದು ವಿರಾಟ್‌ ಕೊಹ್ಲಿ ಅವರ ಜೀವನ ಕುರಿತ ಸಿನಿಮಾ ಬಗ್ಗೆ. ಆಗಾಗ ಸೋಷಿಯಲ್‌ ಮೀಡಿಯಾದಲ್ಲಿ ಈ ವಿಚಾರ ಸದ್ದು ಮಾಡುತ್ತದೆಯಾದರೂ, ತಾರ್ಕಿಕ ಫಲಿತಾಂಶ ಮಾತ್ರ ಶೂನ್ಯ. ಇದೀಗ ಟಾಲಿವುಡ್‌ ನಟ, ಚಾನ್ಸ್‌ ಸಿಕ್ಕರೆ ವಿರಾಟ್‌ ಕೊಹ್ಲಿ ಬಯೋಪಿಕ್‌ನಲ್ಲಿ ನಟಿಸುವ ಇಂಗಿತವನ್ನು ಹೇಳಿಕೊಂಡಿದ್ದಾರೆ.

ತೆಲುಗು ನಟ ರಾಮ್‌ ಪೋತಿನೇನಿ ಥೇಟ್‌ ವಿರಾಟ್‌ ಕೊಹ್ಲಿಯನ್ನೇ ಹೋಲುತ್ತಾರೆ. ಈ ಹಿಂದೆಯೇ ಒಂದು ವೇಳೆ ವಿರಾಟ್‌ ಕೊಹ್ಲಿ ಬಯೋಪಿಕ್‌ ಮಾಡಿದರೆ, ಅದಕ್ಕೆ ರಾಮ್‌ ಪೋತಿನೇನಿಯೇ ಸೂಕ್ತ ನಟ ಎಂದು ನೆಟ್ಟಿಗರು ಮೆಚ್ಚುಗೆ ಸೂಚಿಸಿದ್ದರು. ಇದೀಗ ಇದೇ ಸೆ. 28ಕ್ಕೆ ರಾಮ್‌ ಅಭಿನಯದ ಸ್ಕಂದ ಸಿನಿಮಾ ಬಹುಭಾಷೆಗಳಿಗೆ ಡಬ್‌ ಆಗಿ ರಿಲೀಸ್‌ ಆಗುತ್ತಿದೆ. ಈ ಸಿನಿಮಾ ಪ್ರಚಾರದಲ್ಲಿ ತೊಡಗಿಸಿಕೊಂಡಿರುವ ರಾಮ್‌ಗೆ, ಕೊಹ್ಲಿ ಬಯೋಪಿಕ್‌ ಕುರಿತ ಪ್ರಶ್ನೆ ಎದುರಾಗಿದೆ. ಅದಕ್ಕೆ ಅಷ್ಟೇ ಖುಷಿಯಿಂದಲೇ ಉತ್ತರ ನೀಡಿದ್ದಾರೆ.

ಇದನ್ನೂ ಓದಿ: ವಿನೋದ್‌ ಪ್ರಭಾಕರ್‌ ಫೈಟರ್‌ ಚಿತ್ರಕ್ಕೆ ಬೆಂಬಲ ಸೂಚಿಸಿದ ಕನ್ನಡಪರ ಹೋರಾಟಗಾರರು

ಮಾಸ್ ಡೈರೆಕ್ಟರ್ ಬೋಯಪತಿ ಶ್ರೀನು ನಿರ್ದೇಶನದ ಸ್ಕಂದ ಸಿನಿಮಾದಲ್ಲಿ ರಾಮ್ ಪೋತಿನೇನಿ ನಾಯಕನಾಗಿ ನಟಿಸಿದ್ದಾರೆ. ಶ್ರೀಲೀಲಾ ಮತ್ತು ಸಾಯಿ ಮಂಜ್ರೇಕರ್ ನಾಯಕಿಯರಾಗಿ ನಟಿಸಿದರೆ, ಊರ್ವಶಿ ರೌಟೇಲಾ ಐಟಂ ಹಾಡಿಗೆ ಹೆಜ್ಜೆಹಾಕಿದ್ದಾರೆ. ಈ ಚಿತ್ರ ಸೆಪ್ಟೆಂಬರ್ 28 ರಂದು ತೆಲುಗು, ಹಿಂದಿ, ತಮಿಳು, ಕನ್ನಡ ಮತ್ತು ಮಲಯಾಳಂ ಭಾಷೆಗಳಲ್ಲಿ ವಿಶ್ವದಾದ್ಯಂತ ಬಿಡುಗಡೆಯಾಗಲಿದೆ.

"ನೀವು ಥೇಟ್‌ ವಿರಾಟ್ ಕೊಹ್ಲಿಯಂತೆ ಕಾಣುತ್ತೀರಿ ಎಂದು ಸೋಷಿಯಲ್‌ ಮೀಡಿಯಾದಲ್ಲಿ ಸಾಕಷ್ಟು ಮಂದಿ ಹೇಳುತ್ತಾರೆ. ಒಂದು ವೇಳೆ ಅವರ ಬಯೋಪಿಕ್‌ನಲ್ಲಿ ನಟಿಸುವ ಅವಕಾಶ ಸಿಕ್ಕರೆ ಮಾಡುತ್ತೀರಾ? ಎಂದು ಸಂದರ್ಶಕ ಕೇಳಿದ್ದಾರೆ. ಅದಕ್ಕೆ ಉತ್ತರಿಸಿದ ರಾಮ್‌, "ಇಸ್ಮಾರ್ಟ್ ಶಂಕರ್ ಸಿನಿಮಾ ಲುಕ್‌ವೊಂದನ್ನು ಈ ಹಿಂದೆ ಸೋಷಿಯಲ್‌ ಮೀಡಿಯಾದಲ್ಲಿ ಶೇರ್‌ ಮಾಡಿದ್ದೆ. ಅಂದಿನಿಂದ ವಿರಾಟ್ ಕೊಹ್ಲಿ ಜೊತೆ ಹೋಲಿಕೆ ಶುರುವಾಗಿದೆ. ಕೊಹ್ಲಿ ಬಯೋಪಿಕ್ ಇದ್ದರೆ ಖಂಡಿತ ಮಾಡುತ್ತೇನೆ. ಅದೊಂದು ರೀತಿ ಎಕ್ಸೈಟಿಂಗ್ ಅಲ್ಲವೇ? ಅದಕ್ಕಾಗಿ ಕ್ರಿಕೆಟ್ ಕೂಡ ಕಲಿಯುತ್ತೇನೆ: ಎಂದು ರಾಮ್ ಪೋತಿನೇನಿ ಹೇಳಿಕೊಂಡಿದ್ದಾರೆ.

ಶಾರುಖ್‌ ಖಾನ್‌ ಭೇಟಿ

ಇದೇ ಸಂದರ್ಶನದಲ್ಲಿ ತಮ್ಮ ನೆಚ್ಚಿನ ಬಾಲಿವುಡ್ ಹೀರೋಗಳ ಬಗ್ಗೆ ಕೇಳಿದಾಗ, "ನನಗೆ ಶಾರುಖ್ ಖಾನ್, ಸಲ್ಮಾನ್ ಖಾನ್, ಅಮೀರ್ ಖಾನ್, ಹೃತಿಕ್ ರೋಷನ್ ಇಷ್ಟ. ಇತರ ಹೀರೋಗಳಲ್ಲಿ ನನಗೆ ರಣಬೀರ್ ಕಪೂರ್ ಇಷ್ಟ. ಇತ್ತೀಚೆಗಷ್ಟೇ ಶಾರುಖ್ ಖಾನ್ ಅವರನ್ನು ಭೇಟಿಯಾಗಿದ್ದೇನೆ" ಎಂದು ರಾಮ್ ಹೇಳಿದ್ದಾರೆ. ತಮಿಳು ನಿರ್ದೇಶಕ ಅಟ್ಲಿ ಮತ್ತು ಅವರ ಪತ್ನಿ ಪ್ರಿಯಾ ನನಗೆ ಆತ್ಮೀಯ ಸ್ನೇಹಿತರು" ಎಂದೂ ಹೇಳಿಕೊಂಡಿದ್ದಾರೆ.