ವ್ಹೀಲ್‌ ಚೇರ್‌ನಲ್ಲಿ ಕುಳಿತ ಬ್ರಹ್ಮಾನಂದಂ, ಜೊತೆಗೆ ಯೂರಿನ್‌ ಬ್ಯಾಗ್;‌ ಕಾಮಿಡಿ ಕಿಂಗ್‌ಗೆ ಏನಾಯ್ತು!?

ಟಾಲಿವುಡ್‌ ನಟ ಬ್ರಹ್ಮಾನಂದಂ ಎಂದರೆ ತೆಲುಗು ಜನರಿಗೆ ಮಾತ್ರವಲ್ಲ ಕನ್ನಡಿಗರಿಗೂ ಇಷ್ಟ. ತಮ್ಮ ವೃತ್ತಿ ಜೀವನದಲ್ಲಿ 1000ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸುವ ಮೂಲಕ ಕಾಮಿಡಿ ಕಿಂಗ್‌ ದಾಖಲೆ ಬರೆದಿದ್ದಾರೆ. ಬ್ರಹ್ಮಾನಂದಂ ಇದ್ದರೆ ಆ ಸಿನಿಮಾದಲ್ಲಿ ಭರಪೂರ ಕಾಮಿಡಿ ಇದೇ ಎಂದು ಅರ್ಥ. ಅವರು ಒಮ್ಮೆ ವಕ್ರವಾಗಿ ಮುಖ ಮಾಡಿದರೆ, ನಕ್ಕರೆ ಸಾಕು ಸಿನಿಮಾಭಿಮಾನಿಗಳು ಹೊಟ್ಟೆ ಹುಣ್ಣಾಗುವಂತೆ ನಗುತ್ತಾರೆ.

ಬಹುಮುಖ ಪ್ರತಿಭೆ ಬ್ರಹ್ಮಾನಂದಂ

ಬ್ರಹ್ಮಾನಂದಂ ಎಂದರೆ ಸಿನಿಪ್ರಿಯರಿಗೆ ಮಾತ್ರವಲ್ಲ ಸೆಲೆಬ್ರಿಟಿಗಳಿಗೂ ಇಷ್ಟ. ಅವರೆಂದರೆ ಬಹಳ ಗೌರವ. ಬ್ರಹ್ಮಾನಂದಂ ಬಹುಮುಖ ಪ್ರತಿಭೆ. ತಮ್ಮ ಸೆನ್ಸ್‌ ಆಫ್‌ ಹ್ಯೂಮರ್‌ನಿಂದ ಜನರನ್ನು ನಕ್ಕು ನಗಿಸುವುದು ಮಾತ್ರವಲ್ಲದೆ ಅದ್ಭುತ ಪೇಂಟಿಂಗ್‌ನಿಂದ ಕೂಡಾ ಜನರ ಮನಸ್ಸು ಗೆದ್ದಿದ್ದಾರೆ. ತಾವು ಬರೆದಿರುವ ಪೆನ್ಸಿಲ್‌ ಸ್ಕೆಚ್‌ ಫೋಟೋಗಳನ್ನು ಬ್ರಹ್ಮಾನಂದಂ ಸೋಷಿಯಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ತಿರುಪತಿ ವೆಂಕಟೇಶ್ವರನ ಪೆನ್ಸಿಲ್‌ ಸ್ಕೆಚ್‌ ಬರೆದು ಆ ಫೋಟೋಗೆ ಕಟ್ಟು ಹಾಕಿಸಿ ಅಲ್ಲು ಅರ್ಜುನ್‌ಗೆ ಗಿಫ್ಟ್‌ ಆಗಿ ನೀಡಿದ್ದರು. ಜನರು ಇಷ್ಟೆಲ್ಲಾ ಇಷ್ಟಪಡುವ ಬ್ರಹ್ಮಾನಂದಂ ಅವರ ಫೋಟೋವೊಂದು ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗುತ್ತಿದ್ದು ಅಭಿಮಾನಿಗಳು ಶಾಕ್‌ ಆಗಿದ್ದಾರೆ.

ವ್ಹೀಲ್‌ ಚೇರ್‌ ಮೇಲೆ ಬ್ರಹ್ಮಾನಂದಂ

ವೈರಲ್‌ ಆಗುತ್ತಿರುವ ಫೋಟೋದಲ್ಲಿ ಬ್ರಹ್ಮಾನಂದಂ ವೀಲ್‌ ಚೇರ್‌ ಮೇಲೆ ಕುಳಿತಿದ್ದಾರೆ. ಜೊತೆಗೆ ಮೂತ್ರ ವಿಸರ್ಜನೆಗಾಗಿ ಯೂರಿನ್‌ ಬ್ಯಾಗ್‌ ಅಳವಡಿಸಲಾಗಿದೆ. ಕಳೆದ ಕೆಲವು ದಿನಗಳಿಂದ ಈ ಪೋಟೋ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗುತ್ತಿದೆ. ಇದನ್ನು ನೋಡಿದವರು ಬ್ರಹ್ಮಾನಂದಂಗೆ ಏನಾಯ್ತು ಎಂದು ಆಘಾತ ವ್ಯಕ್ತಪಡಿಸುತ್ತಿದ್ದಾರೆ. ಬೇಗ ಗುಣಮುಖರಾಗಿ ಎಂದು ಹಾರೈಸುತ್ತಿದ್ದಾರೆ. ಬ್ರಹ್ಮಾನಂದಂ ಫೋನ್‌ ನಂಬರ್‌ ಗೊತ್ತಿರುವವರು ಅವರಿಗೆ ಕಾಲ್‌, ಮೆಸೇಜ್‌ ಮಾಡಿ ಆರೋಗ್ಯ ಹೇಗಿದೆ? ಏನಾಯ್ತು? ಎಂದು ವಿಚಾರಿಸುತ್ತಿದ್ದಾರೆ.

'ಕೀಡಾ ಕೋಲ' ಸಿನಿಮಾದ ದೃಶ್ಯ

ಅಸಲಿಗೆ ಅಭಿಮಾನಿಗಳು ಗಾಬರಿ ಪಡುವಂತದ್ಧೇನೂ ಆಗಿಲ್ಲ. ಬ್ರಹ್ಮಾನಂದಂ ಆರೋಗ್ಯವಾಗಿದ್ದಾರೆ. ವೈರಲ್‌ ಆಗುತ್ತಿರುವ ಫೋಟೋ ಅವರ ಹೊಸ ಸಿನಿಮಾದ್ದು. ಈ ವಿಚಾರ ತಿಳಿದ ಅಭಿಮಾನಿಗಳು ನಿಟ್ಟುಸಿರು ಬಿಟ್ಟಿದ್ದಾರೆ. 'ಕೀಡಾ ಕೋಲ' ಎಂಬ ಹೊಸ ಸಿನಿಮಾದಲ್ಲಿ ಬ್ರಹ್ಮಾನಂದಂ ನಟಿಸುತ್ತಿದ್ದಾರೆ. ಈಗಾಗಲೇ ಈ ಚಿತ್ರದ ಟೀಸರ್‌ ರಿಲೀಸ್‌ ಆಗಿದೆ. ತರುಣ್‌ ಭಾಸ್ಕರ್‌ ಈ ಸಿನಿಮಾಗೆ ಆಕ್ಷನ್‌ ಕಟ್‌ ಹೇಳುತ್ತಿದ್ದಾರೆ. ಇದನ್ನು ಹೊರತುಪಡಿಸಿ ಬ್ರಹ್ಮಾನಂದಂ ಮಹೇಶ್‌ ಬಾಬು ಅವರ 'ಗುಂಟೂರು ಕಾರಂ' ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ.

ಇದನ್ನೂ ಓದಿ: ಕ್ಯಾಬ್‌ ಡ್ರೈವರ್‌ ಜೊತೆ ಕಿರುತೆರೆ ನಟಿ ಪದ್ಮಿನಿ ಕಿರಿಕ್‌; ಸೋಷಿಯಲ್‌ ಮೀಡಿಯಾದಲ್ಲಿ ಖಂಡನೆ

ಇದನ್ನೂ ಓದಿ: ಬಿಗ್‌ ಬಾಸ್‌ ಸೀಸನ್‌ 10ರ ಮೊದಲ ಸ್ಪರ್ಧಿ ಚಾರ್ಲಿ; ಶುಭ ಕೋರಿದ ಸ್ನೇಹಿತರಾದ ಮ್ಯಾಕ್ಸ್‌, ಜಾಕ್‌, ಮ್ಯಾಗಿ