Krithi Shetty: ಸ್ಟಾರ್‌ ನಟನ ಮಗನಿಂದ ಕಿರುಕುಳ ಅನುಭವಿಸ್ತಿದ್ದಾರಂತೆ ಉಪ್ಪೆನ ಚೆಲುವೆ;ಆತ ಯಾರೆಂದು ತಿಳಿದುಕೊಳ್ಳುವ ಸಾಹಸದಲ್ಲಿ ಅಭಿಮಾನಿಗಳು

ಚಿತ್ರರಂಗದ ಸಮಸ್ಯೆಗಳಲ್ಲಿ ಕಾಸ್ಟಿಂಗ್‌ ಕೌಂಚ್‌ ಕೂಡಾ ಒಂದು. ಅನೇಕ ನಟಿಯರು, ತೆರೆ ಹಿಂದೆ ಕೆಲಸ ಮಾಡುವವರು ನಿರ್ದೇಶಕ, ನಿರ್ಮಾಪಕರು, ತಂತ್ರಜ್ಞರಿಂದ ಕಿರುಕುಳಕ್ಕೆ ಒಳಗಾದ ಅನೇಕ ಉದಾಹರಣೆಗಳಿವೆ. ಪೋಷಕ, ಜ್ಯೂನಿಯರ್‌ ಆರ್ಟಿಸ್ಟ್‌ಗಳು ಮಾತ್ರವಲ್ಲ ದೊಡ್ಡ ದೊಡ್ಡ ನಟಿಯರೂ ಕಿರುಕುಳಕ್ಕೆ ಒಳಗಾಗಿದ್ದಾರೆ. ಇದೀಗ ಕೃತಿ ಶೆಟ್ಟಿ ಕೂಡಾ ಇದೇ ರೀತಿಯ ಸಮಸ್ಯೆ ಎದುರಿಸುತ್ತಿದ್ದಾರೆ ಎನ್ನಲಾಗಿದೆ.

ಕರ್ನಾಟಕ ಮೂಲದ ನಟಿ ಕೃತಿ ಶೆಟ್ಟಿ ತೆಲುಗಿನ 'ಉಪ್ಪೆನ' ಸಿನಿಮಾ ಮೂಲಕ ನಾಯಕಿಯಾಗಿ ಚಿತ್ರರಂಗಕ್ಕೆ ಬಂದು ಚಿಕ್ಕ ವಯಸ್ಸಿಗೆ ಸ್ಟಾರ್‌ ನಟಿಯಾಗಿ ಗುರುತಿಸಿಕೊಂಡರು. ಉಪ್ಪೆನ ಬಳಿಕ ಆಕೆ ನಟಿಸಿದ ಸಿನಿಮಾಗಳು ಅಷ್ಟು ಸದ್ದು ಮಾಡದಿದ್ದರೂ ಈ ಬ್ಯೂಟಿಗೆ ಅವಕಾಶಗಳೇನೂ ಕಡಿಮೆ ಆಗಿಲ್ಲ. ಆದರೆ ಈಕೆ ಮಾತ್ರ ಬಂದ ಅವಕಾಶಗಳನ್ನೆಲ್ಲಾ ಒಪ್ಪಿಕೊಳ್ಳದೆ ಕಥೆ, ಹೀರೋ , ಪ್ರೊಡಕ್ಷನ್‌ ಹೌಸ್‌ ಎಲ್ಲವನ್ನೂ ಅಳೆದು ಲೆಕ್ಕಾಚಾರ ಮಾಡಿ ನಂತರವಷ್ಟೇ ಸಿನಿಮಾಗೆ ಒಪ್ಪಿಗೆ ಸೂಚಿಸುತ್ತಿದ್ದಾರೆ. ಆದರೆ ಇತ್ತೀಚೆಗೆ ಕೃತಿ ಶೆಟ್ಟಿಗೆ ಸ್ಟಾರ್‌ ನಟನ ಮಗನೊಬ್ಬ ಕರೆ ಮಾಡಿ ಕಿರುಕುಳ ನೀಡುತ್ತಿದ್ದಾರೆ ಎಂಬ ಸುದ್ದಿ ಹರಿದಾಡುತ್ತಿದೆ.

ಸ್ಟಾರ್‌ ನಟರೊಬ್ಬರ ಮಗನೊಬ್ಬ ಕೃತಿ ಶೆಟ್ಟಿ ಹಿಂದೆ ಬಿದ್ದಿದ್ದು ಆಕೆಗೆ ಫೋನ್‌ ಮಾಡಿ ಟಾರ್ಚರ್‌ ಕೊಡುತ್ತಿದ್ದಾರಂತೆ. ಅಷ್ಟೇ ಅಲ್ಲ ಇತ್ತೀಚೆಗೆ ಕೃತಿಗೆ ಕರೆ ಮಾಡಿ ಪಾರ್ಟಿಗೆ ಬರುವಂತೆ ಒತ್ತಾಯ ಮಾಡಿದ್ದಾರಂತೆ. ಇದಕ್ಕೆ ಕೃತಿ ಶೆಟ್ಟಿ ನಿರಾಕರಿಸಿದಾಗ ಎಷ್ಟು ಕೋಟಿ ಬೇಕಾದರೂ ಕೊಡುತ್ತೇನೆ, ಪಾರ್ಟಿಗೆ ಬರಲೇಬೇಕು ಎಂದು ತಾಕೀತು ಮಾಡಿದ್ದು ನಾನು ಯಾವ ಪಾರ್ಟಿಗೂ ಬರುವುದಿಲ್ಲ ಎಂದು ಕೃತಿ ಫೋನ್‌ ಕಟ್‌ ಮಾಡಿದ್ದಾಗಿ ಸುದ್ದಿ ಹರಿದಾಡುತ್ತಿದೆ. ಆದರೆ ಇದರ ಬಗ್ಗೆ ಕೂಡಾ ಸರಿಯಾದ ಮಾಹಿತಿ ದೊರೆಯುತ್ತಿಲ್ಲ.

ಕೃತಿ ಶೆಟ್ಟಿಗೆ ಹೀಗೆ ಸ್ಟಾರ್‌ ನಟನ ಮಗನಿಂದ ಕಿರುಕುಳ ಆಗುತ್ತಿದೆ ಎಂದು ತಿಳಿದ ಅಭಿಮಾನಿಗಳು ಆತ ಯಾರೆಂದು ತಿಳಿದುಕೊಳ್ಳುವ ಪ್ರಯತ್ನದಲ್ಲಿದ್ದಾರೆ. ಆದರೆ ಯಾವ ವಿಚಾರದ ಬಗ್ಗೆ ಕೂಡಾ ಸೂಕ್ತ ಮಾಹಿತಿ ಇಲ್ಲ. ಒಂದು ವೇಳೆ ಆತನ ಉಪಟಳ ಹೀಗೇ ಮುಂದುವರೆದರೆ ಮುಂದಿನ ದಿನಗಳಲ್ಲಿ ಬಹುಶ: ಕೃತಿ ಶೆಟ್ಟಿಯೇ ಆತನಿಗೆ ಪಾಠ ಕಲಿಸಬಹುದು ಎಂದೂ ಮಾತನಾಡಲಾಗುತ್ತಿದೆ.

ಕೃತಿ ಶೆಟ್ಟಿ ಚಿತ್ರರಂಗಕ್ಕೆ ಬಂದಿದ್ದು ಹಿಂದಿಯ ಸೂಪರ್‌ 30 ಚಿತ್ರದ ಮೂಲಕ. ಈ ಚಿತ್ರದಲ್ಲಿ ಕೃತಿ, ನಾಯಕಿಯ ಸ್ನೇಹಿತೆ ಪಾತ್ರದಲ್ಲಿ ನಟಿಸಿದ್ದರು. ಆದರೆ ಕೃತಿಗೆ ಹೆಸರು ತಂದುಕೊಟ್ಟದ್ದು ಆಕೆ ನಾಯಕಿಯಾಗಿ ನಟಿಸಿದ ತೆಲುಗು ಸಿನಿಮಾ 'ಉಪ್ಪೆನ'. ಈ ಸಿನಿಮಾ 2021 ರಲ್ಲಿ ತೆರೆ ಕಂಡಿತ್ತು. 15 ಕೋಟಿ ರೂಪಾಯಿ ಬಜೆಟ್‌ನಲ್ಲಿ ತಯಾರಾದ ಸಿನಿಮಾ 100 ಕೋಟಿ ರೂಪಾಯಿ ಲಾಭ ಮಾಡಿತ್ತು.

'ಉಪ್ಪೆನ' ಸಕ್ಸಸ್‌ ನಂತರ ಕೃತಿ ಶೆಟ್ಟಿಗೆ ಇತರ ಭಾಷೆಗಳಿಂದ ಕೂಡಾ ಬ್ಯಾಕ್‌ ಟು ಬ್ಯಾಕ್ ಆಫರ್‌ ಬರುತ್ತಿವೆ. ಕಳೆದ ವರ್ಷ ತೆರೆ ಕಂಡ ಕೃತಿ ಶೆಟ್ಟಿ ಅಭಿನಯದ 3 ಸಿನಿಮಾಗಳು ಫ್ಲಾಪ್‌ ಆಗಿತ್ತು. ಈ ವರ್ಷ ನಾಗ ಚೈತನ್ಯ ಜೊತೆ ನಟಿಸಿದ್ದ 'ಕಸ್ಟಡಿ' ಕೂಡಾ ಗೆಲುವು ಸಾಧಿಸಲು ಸಾಧ್ಯವಾಗಲಿಲ್ಲ. ಸದ್ಯಕ್ಕೆ ಕೃತಿ ಮಲಯಾಳಂ ಸಿನಿಮಾವೊಂದರಲ್ಲಿ ನಟಿಸುತ್ತಿದ್ದಾರೆ. ಈ ಸಿನಿಮಾ ಆಕೆಗೆ ಬ್ರೇಕ್‌ ನೀಡಲಿದ್ಯಾ ಅನ್ನೋದನ್ನು ಕಾದು ನೋಡಬೇಕು.