ಮೂರು ದಿನದ ಅದ್ಧೂರಿ ಜಾತ್ರೆಗೆ ಸಿದ್ಧವಾಯ್ತು ವೇದಿಕೆ; ನಾಳೆಯಿಂದ ಜೀ ಕನ್ನಡ ಕುಟುಂಬ ಅವಾರ್ಡ್ಸ್ 2024 ಶುರು

Zee Kannada Kutumba Awards 2024: ಜೀ ಕನ್ನಡ ವಾಹಿನಿಯ ಸಂಬಂಧಗಳನ್ನು ಸಂಭ್ರಮಿಸುವ ಅತೀದೊಡ್ಡ ಹಬ್ಬ 'ಜೀ ಕನ್ನಡ ಕುಟುಂಬ ಅವಾರ್ಡ್ಸ್-2024' ಕ್ಷಣಗಣನೆ ಶುರುವಾಗಿದೆ. ಕೋಟಿ ಕಣ್ಣುಗಳು ಕಾತುರತೆಯಿಂದ ಕಾಯುತ್ತಿದ್ದ ಎಂಟರ್ಟೈನ್ಮೆಂಟ್‌ನ ಮಹಾಪರ್ವ ಇದೇ ತಿಂಗಳ 25, 26 ಮತ್ತು 27 ರಂದು ಒಟ್ಟು ಮೂರು ದಿನಗಳ ಕಾಲ ಜೀ ಕನ್ನಡ ವಾಹಿನಿಯಲ್ಲಿ ಸಂಜೆ 6:30ರಿಂದ ಪ್ರಸಾರ ಆಗಲಿದೆ.

ಮನರಂಜನೆಯ ಹಬ್ಬಕ್ಕೆ ಮೆರುಗಿನ ಆರಂಭ ನೀಡಿದ್ದು 'ರೆಡ್ ಕಾರ್ಪೆಟ್'ನಲ್ಲಿ ಅಂದ ಚೆಂದದ ಉಡುಗೆ ತೊಟ್ಟು ಮಸ್ತ್ ಆಗಿ ಬಂದ ತಾರೆಯರು. ನೆಚ್ಚಿನ ತಾರೆಯರು 'ಜೀ ಕನ್ನಡ ಕುಟುಂಬ ಅವಾರ್ಡ್ಸ್-2024- Red Carpet'ನಲ್ಲಿ ಕಲರ್ ಕಲರ್ ಉಡುಗೆಯಲ್ಲಿ ಮಿಂಚಿದ್ದರ ಝಲಕ್ 25 ಮತ್ತು 26 ರಂದು ಸಂಜೆ 5:30ಕ್ಕೆ ಪ್ರಸಾರ ಆಗಲಿದೆ.

ಮಂತ್ರಾಲಯ ಶ್ರೀಗಳ ಆಗಮನ

ಮಂತ್ರಾಲಯದ ಶ್ರೀ ರಾಘವೇಂದ್ರ ಸ್ವಾಮಿ ಮಠದ ಪೀಠಾಧಿಪತಿ ಶ್ರೀ ಸುಬುಧೇಂದ್ರ ತೀರ್ಥರು ಜೀ ಕನ್ನಡದಲ್ಲಿ ಪ್ರಸಾರ ಆಗಲಿರುವ 'ಶ್ರೀ ರಾಘವೇಂದ್ರ ಮಹಾತ್ಮೆ' ಧಾರಾವಾಹಿಯ ಪ್ರೋಮೋವನ್ನು ಬಿಡುಗಡೆಗೊಳಿಸಿ ಆಶೀರ್ವದಿಸಿದ್ದಾರೆ. ಅದೇ ರೀತಿ 'ಜೀ ಕನ್ನಡ ಕುಟುಂಬ ಅವಾರ್ಡ್ಸ್ 2024' ಕಾರ್ಯಕ್ರಮವನ್ನು ಕನ್ನಡದ ಖ್ಯಾತ ನಿರೂಪಕ/ ನಿರೂಪಕಿಯರಾದ ಅನುಶ್ರೀ, ಅಕುಲ್ ಬಾಲಾಜಿ, ಶ್ವೇತ ಚಂಗಪ್ಪ ಮತ್ತು ಕುರಿ ಪ್ರತಾಪ್ ನಡೆಸಿಕೊಡಲಿದ್ದಾರೆ.

ಇದನ್ನೂ ಓದಿ: ಟಿಆರ್‌ಪಿಯಲ್ಲಿ ಮತ್ತೆ ತನ್ನ ಗತವೈಭವಕ್ಕೆ ಮರಳಿದ ಪುಟ್ಟಕ್ಕನ ಮಕ್ಕಳು ಧಾರಾವಾಹಿ; ಬಿಗ್‌ ಬಾಸ್‌ ಟಿಆರ್‌ಪಿ ಹೇಗಿದೆ?

ತಾರಾ ಸಂಗಮ

ಹ್ಯಾಟ್ರಿಕ್ ಹೀರೋ ಡಾ. ಶಿವರಾಜ್ ಕುಮಾರ್, ರಿಯಲ್ ಸ್ಟಾರ್ ಉಪೇಂದ್ರ, ಕ್ರೇಜಿಸ್ಟಾರ್ ರವಿಚಂದ್ರನ್, ಡಾನ್ಸ್ ಕಿಂಗ್ ಶಶಿಕುಮಾರ್, ಶರಣ್, ರಾಜ್ ಬಿ ಶೆಟ್ಟಿ, ಡಾಲಿ ಧನಂಜಯ್, ಕಾಂತಾರ ಬೆಡಗಿ ಸಪ್ತಮಿ ಗೌಡ, ನವಜೋಡಿಗಳಾದ ತರುಣ್ ಸುಧೀರ್ ಮತ್ತು ಸೋನಲ್, ರೋರಿಂಗ್ ಸ್ಟಾರ್ ಮುರಳಿ, ಕೃಷ್ಣ ಅಜಯ್ ರಾವ್, ನೀನಾಸಂ ಸತೀಶ್, ರುಕ್ಮಿಣಿ ವಸಂತ್, ಆರಾಧನಾ ರಾಮ್, ಸಂಯುಕ್ತ ಹೊರನಾಡು, ಶರ್ಮಿಳಾ ಮಾಂಡ್ರೆ, ಅರ್ಚನ ಜೋಯಿಸ್, ಅಮೃತಾ ಐಯ್ಯಂಗಾರ್, ಪ್ರಿಯಾಂಕಾ ಉಪೇಂದ್ರ, ಅನು ಪ್ರಭಾಕರ್, ಮಾಳವಿಕಾ ಅವಿನಾಶ್, ಪ್ರೇಮ, ನಿಶ್ವಿಕಾ ನಾಯ್ಡು ಸಂಸದರಾದ ಡಾ. ಸಿ. ಎನ್ ಮಂಜುನಾಥ್ ಮತ್ತಿತರು ಜೀ ಕನ್ನಡ ಕುಟುಂಬ ಅವಾರ್ಡ್ಸ್-2024 ರಂಗನ್ನು ಮತ್ತಷ್ಟು ಮೆರುಗುಗೊಳಿಸಲಿದ್ದಾರೆ. ಇದೇ ವೇಳೆ ಹ್ಯಾಟ್ರಿಕ್ ಹೀರೋ ಡಾ. ಶಿವರಾಜ್ ಕುಮಾರ್ 'ಭೈರತಿ ರಣಗಲ್' ಆಗಿ ಎಂಟ್ರಿ ಕೊಟ್ಟಿದ್ದು ಮತ್ತೊಂದು ಹೈಲೈಟ್ ಆಗಿತ್ತು.

ಇದನ್ನೂ ಓದಿ: ಅನಿರೀಕ್ಷಿತ ತಿರುವಿನಲ್ಲಿ ಸೀತಾ ರಾಮ ಧಾರಾವಾಹಿ; ಭಾರ್ಗವಿ ಪ್ಲಾನ್‌ ಉಲ್ಟಾ, ಭೀಕರ ರಸ್ತೆ ಅಪಘಾತದಲ್ಲಿ ಸೀತಾ ಬದಲು ಸಿಹಿ ಸಾವು

ಈ ಬಾರಿಯ ಜೀ ಕನ್ನಡ ಕುಟುಂಬ ಅವಾರ್ಡ್ಸ್ ಅಮೋಘ ಕ್ಷಣಗಳಿಗೆ ಸಾಕ್ಷಿಯಾಗಿದ್ದು, ಕನ್ನಡ ಚಲನಚಿತ್ರ ತಾರೆಯರು ಹಾಗೂ ಕಿರುತೆರೆ ಕಲಾವಿದರು ಜೊತೆಯಾಗಿ ಸೇರಿ ಸಂಭ್ರಮಿಸಿದ್ದು. ನೆಚ್ಚಿನ ತಾರೆಯರು ಅವರ ಅವಿಸ್ಮರಣೀಯ ಸುಂದರ ಮತ್ತು ನೋವಿನ ಕ್ಷಣಗಳನ್ನು ಮೆಲುಕು ಹಾಕುತ್ತಾ ವೀಕ್ಷಕರಿಗೆ ಇನ್ನಷ್ಟು ಹತ್ತಿರವಾಗಿದ್ದಾರೆ. ಯಾರು ಯಾವ ಪ್ರಶಸ್ತಿಗೆ ಭಾಜನರಾದರು, ಯಾರು ಯಾವ ಹಾಡಿಗೆ ನೃತ್ಯ ಮಾಡಿದರು, ಯಾರು ಯಾವ ಉಡುಗೆಯಲ್ಲಿ ಮಿಂಚಿದರು ಹೀಗೆ ಮತ್ತಷ್ಟು ಇಂಟೆರೆಸ್ಟಿಂಗ್ ವಿಷಯಗಳ ಅನಾವರಣಕ್ಕೆ ಕ್ಷಣಗಣನೆ ಆರಂಭವಾಗಿದೆ.