Mangalore News: ಮಂಗಳೂರಿನಲ್ಲಿ ಏಕಾಂಗಿ ವಿಮಾನ ಹಾರಾಟ ಬಯಸಿ ಪೊಲೀಸ್ ಅತಿಥಿಯಾದ ಪ್ರಯಾಣಿಕ !
May 12, 2024 06:57 PM IST
Share
ಮಂಗಳೂರು ವಿಮಾನದಲ್ಲಿ ಪ್ರಯಾಣಿಕನ ಹುಚ್ಚಾಟಕ್ಕೆ ಸಿಬ್ಬಂದಿ ಸುಸ್ತು.
- ಮಂಗಳೂರು ವಿಮಾನ ನಿಲ್ದಾಣದಿಂದ ಏಕಾಂಗಿಯಾಗಿ ಅರಬ್ಬಿ ಸಮುದ್ರದ ಮೇಲೆ ಹಾರುವ ಬಯಕೆ ವ್ಯಕ್ತಪಡಿಸಿ ಪ್ರಯಾಣಿಕ ಪೊಲೀಸ್ ಅತಿಥಿಯಾದ ಘಟನೆ ವರದಿಯಾಗಿದೆ.
ಮಂಗಳೂರು: ಆತ ದುಬೈನಿಂದ ಮಂಗಳೂರಿಗೆ ಬರುವ ವಿಮಾನದ ಪ್ರಯಾಣಿಕ. ಏರ್ ಇಂಡಿಯಾ ಎಕ್ಸ್ಪ್ರೆಸ್ ವಿಮಾನ ಇನ್ನೇನು ಮಂಗಳೂರು ತಲುಪಲು ಕೆಲವೇ ಸಮಯವಿತ್ತು. ಈ ವೇಳೆ ಆ ಪ್ರಯಾಣಿಕ ವಿಮಾನ ಸಿಬ್ಬಂದಿಯ ಶೌಚಾಲಯಕ್ಕೆ ನುಗ್ಗಿ ಕಿರಿಕಿರಿಯನ್ನೂ ಉಂಟು ಮಾಡಿದ. ವಿಮಾನದಲ್ಲಿ ಇಲ್ಲದ ಪ್ರಯಾಣಿಕರ ವಿವರ ಕೇಳಿ ತೊಂದರೆಯನ್ನೂ ನೀಡಿದ. ಇದೆಲ್ಲದನ್ನು ಸಹಿಸಿಕೊಂಡ ವಿಮಾನ ಸಿಬ್ಬಂದಿಗೆ ಆತ ಕೇಳಿದ್ದು, ಮಂಗಳೂರಿನಲ್ಲಿ ಪ್ರಯಾಣಿಕರನ್ನು ಇಳಿಸಿದ ಮೇಲೆ ನಾನೂ ಈ ವಿಮಾನದಲ್ಲಿ ಸಂಚರಿಸಬೇಕು. ಅರಬ್ಬಿ ಸಮುದ್ರದ ಮೇಲೆ ಏಕಾಂಗಿಯಾಗಿ ಹಾರಬೇಕು. ಇದಕ್ಕೆ ಅವಕಾಶ ಮಾಡಿಕೊಡಿ ಎಂದು ಕೇಳಿಕೊಂಡ. ಇದರಿಂದ ಕನಲಿ ಹೋದ ಭದ್ರತಾ ಅಧಿಕಾರಿಗಳು ಆತನ ವಿರುದ್ದ ಮಂಗಳೂರು ಪೊಲೀಸರಿಗೆ ದೂರು ನೀಡಿದರು. ಆತ ಪೊಲೀಸರ ಅತಿಥಿಯಾಗಿ ನಂತರ ಎಚ್ಚರಿಕೆ ನೀಡಿ ಬಿಡುಗಡೆಯಾಗುವ ಸನ್ನಿವೇಶ ಎದುರಾಯಿತು.
ಮಂಗಳೂರಿಗೆ ತೆರಳುತ್ತಿದ್ದ ವಿಮಾನದಲ್ಲಿ ಸಿಬ್ಬಂದಿಗೆ ಅಪ್ರಸ್ತುತ ಪ್ರಶ್ನೆಗಳನ್ನು ಕೇಳುವ ಮೂಲಕ ಕಿರುಕುಳ ನೀಡಿದ ಪ್ರಯಾಣಿಕನ ವಿರುದ್ಧ ಎಫ್ಐಆರ್ ದಾಖಲಿಸಲಾಗಿದೆ.
ದುಬೈನಿಂದ ಕರ್ನಾಟಕದ ಮಂಗಳೂರಿಗೆ ಬರುತ್ತಿದ್ದ ವಿಮಾನದಲ್ಲಿ ವಿಧ್ವಂಸಕ ವರ್ತನೆ ತೋರಿದ ಆರೋಪದ ಮೇಲೆ ಏರ್ ಇಂಡಿಯಾ ಎಕ್ಸ್ಪ್ರೆಸ್ ಸಿಬ್ಬಂದಿ ನೀಡಿದ ದೂರಿನ ಮೇರೆಗೆ ಪ್ರಯಾಣಿಕನ ವಿರುದ್ಧ ಎಫ್ಐಆರ್ ದಾಖಲಿಸಲಾಗಿದೆ ಎಂದು ಮಂಗಳೂರು ಬಜ್ಪೆ ಪೊಲೀಸರು ಬಹಿರಂಗಪಡಿಸಿದ್ದಾರೆ. ಈ ಬಗ್ಗೆ ವಿಮಾನದ ಭದ್ರತಾ ಸಂಯೋಜಕ ಸಿದ್ಧಾರ್ಥ್ ದಾಸ್ ಎಂಬವರು ಬಜ್ಪೆ ಪೊಲೀಸ್ ಠಾಣೆಯಲ್ಲಿ ಪ್ರಯಾಣಿಕ ಮೊಹಮ್ಮದ್ ಬಿ.ಸಿ ವಿರುದ್ಧ ದೂರು ದಾಖಲಿಸಿದ್ದಾರೆ.
ಮೇ9 ಗುರುವಾರ ಮುಂಜಾನೆ ಈ ಘಟನೆ ನಡೆದಿದ್ದು, ಸಂಜೆ ಎಫ್ಐಆರ್ ದಾಖಲಿಸಲಾಗಿದೆ. ಮೇ 8ರಂದು ರಾತ್ರಿ ದುಬೈನಿಂದ ಮಂಗಳೂರಿಗೆ ಏರ್ ಇಂಡಿಯಾ ಎಕ್ಸ್ಪ್ರೆಸ್ ವಿಮಾನ ಹತ್ತಿದ ಮಂಗಳೂರು ಸಮೀಪ ಬಿಸಿ ರೋಡಿನ ನಿವಾಸಿ ಮೊಹಮ್ಮದ್, ಗುರುವಾರ ಬೆಳಗ್ಗೆ 7.30ಕ್ಕೆ ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಬಂದಿಳಿದಿದ್ದರು. ವಿಮಾನದ ಸಮಯದಲ್ಲಿ ಮೊಹಮ್ಮದ್ ವಿಮಾನದ ಶೌಚಾಲಯವನ್ನು ಪ್ರವೇಶಿಸಿ ಫ್ಲೈಟ್ ಮ್ಯಾನಿಫೆಸ್ಟ್ನಲ್ಲಿ ಪಟ್ಟಿ ಮಾಡದ ಕೃಷ್ಣ ಎಂಬ ಪ್ರಯಾಣಿಕನ ಬಗ್ಗೆ ವಿಚಾರಿಸಲು ಹೊರಬಂದರು ಎಂದು ಪಿಟಿಐ ಸುದ್ದಿಸಂಸ್ಥೆ ವರದಿ ಮಾಡಿದೆ.
ಮೊಹಮ್ಮದ್ ಅಪ್ರಸ್ತುತ ಪ್ರಶ್ನೆಗಳನ್ನು ಕೇಳುವ ಮೂಲಕ ಮತ್ತು ಸೇವಾ ಗುಂಡಿಯನ್ನು ಪದೇ ಪದೇ ಸಕ್ರಿಯಗೊಳಿಸುವ ಮೂಲಕ ಸಿಬ್ಬಂದಿಗೆ ಅಡ್ಡಿಪಡಿಸಲು ಮುಂದಾದರು. ಮತ್ತಷ್ಟು ಗೊಂದಲಕ್ಕೀಡು ಮಾಡಿದ ಮೊಹಮ್ಮದ್ ತನ್ನ ಲೈಫ್ ಜಾಕೆಟ್ ಅನ್ನು ತೆಗೆದು ಹಸ್ತಾಂತರಿಸಿದರು, ಲ್ಯಾಂಡಿಂಗ್ ಮಾಡಿದ ನಂತರ ಅದನ್ನು ಬಳಸುವ ಉದ್ದೇಶವನ್ನು ವ್ಯಕ್ತಪಡಿಸಿದರು. ಇದಲ್ಲದೆ, ವಿಮಾನವು ಹಾರಾಟದಲ್ಲಿದ್ದಾಗ ಅರೇಬಿಯನ್ ಸಮುದ್ರದ ಮೇಲೆ ಏಕಾಂಗಿಯಾಗಿ ಹಾರುವ ಬಯಕೆಯನ್ನು ಅವರು ವ್ಯಕ್ತಪಡಿಸಿದರು. ಈ ಕಾರಣದಿಂದಲೇ ಅವರ ವಿರುದ್ದ ಭದ್ರತೆಗೆ ಅಡ್ಡಿಪಡಿಸಿದ ಹಾಗೂ ವಿಮಾನ ಯಾನದ ಶಿಷ್ಟಾಚಾರ ಉಲ್ಲಂಘಿಸಿದ ವಿರುದ್ದ ದೂರು ನೀಡಲಾಗಿದೆ ಎಂದು ಭದ್ರತಾ ಸಮನ್ವಯಾಧಿಕಾರಿ ಸಿದ್ದಾರ್ಥದಾಸ್‌ ಮಾಹಿತಿ ನೀಡಿದ್ದಾರೆ.
ಮಂಗಳೂರು ಬಜ್ಪೆ ಪೊಲೀಸರು ದೂರು ಆಧರಿಸಿ ಮೊಹಮ್ಮದ್ ಅವರನ್ನು ಕರೆಯಿಸಿ ವಿಚಾರಣೆ ನಡೆಸಿದ್ದೂ ಅಲ್ಲದೇ ಪ್ರಕರಣ ದಾಖಲಿಸಿಕೊಂಡು ಈ ರೀತಿ ಅಡ್ಡಿಪಡಿಸಿದರೆ ಕ್ರಮ ತೆಗೆದುಕೊಳ್ಳಲಾಗುತ್ತದೆ ಎಂದು ಮುಚ್ಚಳಿಕೆ ಬರೆಯಿಸಿಕೊಂಡು ಠಾಣೆಯ ಜಾಮೀನಿನ ಮೇಲೆ ಬಿಟ್ಟು ಕಳುಹಿಸಿದ್ದಾರೆ ಎನ್ನಲಾಗಿದೆ.