ಕೂದಲು ಅತಿಯಾಗಿ ಉದುರಲು ತಲೆ ಬಾಚುವ ವಿಚಾರದಲ್ಲಿ ನಾವು ಮಾಡುವ ಈ ತಪ್ಪುಗಳೇ ಕಾರಣ, ಇನ್ನಾದ್ರೂ ಗಮನ ಹರಿಸಿ

ಕಲುಷಿತ ನೀರು, ವಾತಾವರಣ, ಜೀವನಶೈಲಿ, ಆಹಾರ ಹೀಗೆ ಹಲವು ಕಾರಣಗಳಿಂದ ಇತ್ತೀಚಿನ ದಿನಗಳಲ್ಲಿ ಕೂದಲು ಉದುರುವ ಸಮಸ್ಯೆ ಹೆಚ್ಚಾಗುತ್ತಿದೆ. ಕೂದಲು ನಮ್ಮ ಸೌಂದರ್ಯದ ಪ್ರತೀಕ ಎನ್ನುವುದು ಸುಳ್ಳಲ್ಲ. ಆದರೆ ಇತ್ತೀಚಿನ ದಿನಗಳಲ್ಲಿ ಕೂದಲನ್ನು ಕಾಪಾಡಿಕೊಳ್ಳಲು ನಾವು ಹರಸಾಹಸ ಬೇಕಾಗಿದೆ. ಅಷ್ಟೆಲ್ಲಾ ಮಾಡಿದ್ರೂ ಕೂದಲು ಉದುರುವುದು ನಿಲ್ಲುವುದಿಲ್ಲ.

ಕೂದಲು ಉದುರಲು ಆರಂಭವಾಗಲು ತಲೆ ಬಾಚುವ ವಿಚಾರದಲ್ಲಿ ನಾವು ಮಾಡುವ ತಪ್ಪುಗಳೂ ಕಾರಣವಾಗಬಹುದು. ಕೆಲವರಿಗೆ ಕನ್ನಡಿ ಕಂಡಾಗಲೆಲ್ಲಾ ತಲೆ ಬಾಚುವ ಅಭ್ಯಾಸವಿರುತ್ತದೆ, ಇನ್ನೂ ಕೆಲವರಿಗೆ ದಿನಕ್ಕೆ ಒಂದು ಅಥವಾ ಎರಡು ಬಾರಿ ತಲೆ ಬಾಚುವ ಅಭ್ಯಾಸವಿರುತ್ತದೆ. ಕೆಲವರು ಪ್ರತಿದಿನ ತಲೆ ಬಾಚುವುದಿಲ್ಲ. ಅದೇನೇ ಇದ್ದರೂ ತಲೆ ಬಾಚುವಾಗ ನಾವು ಬಳಸುವ ಬಾಚಣಿಗೆ, ಅದರ ಹಲ್ಲುಗಳು ಹೇಗಿರುತ್ತವೆ ಎಂಬುದು ಕೂಡ ಮುಖ್ಯವಾಗುತ್ತದೆ. ತಲೆ ಬಾಚುವುದು ಒಂದು ಸರಳ ವಿಧಾನ ಎಂದು ನಿಮಗೆ ಅನ್ನಿಸಬಹುದು, ಆದರೆ ಬಾಚುವ ವಿಚಾರವೂ ಕೂದಲು ಉದುರುವುದಕ್ಕೆ ಸಂಬಂಧಿಸಿದ್ದು ಎಂಬುದು ಮಾತ್ರ ಸುಳ್ಳಲ್ಲ. ಕೂದಲು ಬಾಚುವ ವಿಚಾರದಲ್ಲಿ ನಾವು ಮಾಡುವ ತಪ್ಪುಗಳು ಕೂದಲನ್ನು ದುರ್ಬಲಗೊಳಿಸಿ ಉದುರುವಂತೆ ಮಾಡುತ್ತದೆ. ಹಾಗಾದರೆ ನಾವು ಬಳಸುವ ಬಾಚಣಿಗೆಗೂ ಕೂದಲು ಉದುರುವುದಕ್ಕೂ ಏನಿದೆ ಸಂಬಂಧ ನೋಡಿ.

ಇದನ್ನೂ ಓದಿ: ಕಸ ಎಂದು ಎಸೆಯುವ ಈರುಳ್ಳಿ ಸಿಪ್ಪೆಯಿಂದ ಕೂದಲಿಗಿದೆ ಅದ್ಭುತ ಪ್ರಯೋಜನ, ಕೂದಲು ಉದುರುವುದು ನಿಲ್ಲುವ ಜೊತೆ ತಲೆಹೊಟ್ಟಿಗೂ ಇದೇ ಪರಿಹಾರ

ಸ್ವಚ್ಛ ಮಾಡದ ಬಾಚಣಿಗೆ

ಶುಚಿತ್ವವಿಲ್ಲದ ಬಾಚಣಿಗೆ ಬಳಸುವುದರಿಂದ ಕೂಡ ಕೂದಲು ಉದುರಲು ಆರಂಭವಾಗುತ್ತದೆ. ಕಾಂಪ್ಯಾಕ್ಟ್ ಕೊಳಕು ಬಾಚಣಿಗೆಯನ್ನು ಅಸಹ್ಯವಾಗಿ ಕಾಣುವಂತೆ ಮಾಡಬಹುದು. ಬಾಚಣಿಗೆಯಲ್ಲಿರುವ ಕೊಳೆ ನೆತ್ತಿಗೆ ಅಂಟಬಹುದು. ಇದು ಕೂದಲಿನ ಕಿರುಚೀಲಗಳು ಮುಚ್ಚುವಂತೆ ಮಾಡಬಹುದು, ಸೋಂಕಿನ ಕಾರಣದಿಂದ ಕೂದಲು ಉದುರುವ ಪ್ರಮಾಣ ಏರಿಕೆಯಾಗಬಹುದು. ಹಾಗಾಗಿ ನಿಯಮಿತವಾಗಿ ಬಾಚಣಿಗೆ ಸ್ವಚ್ಛ ಮಾಡುವುದು ಬಹಳ ಅವಶ್ಯಕ.

ಒದ್ದೆ ಕೂದಲನ್ನು ಬಾಚುವುದು

ಹಲವರು ಸ್ನಾನ ಮಾಡಿದ ತಕ್ಷಣ ಕೂದಲು ಬಾಚುತ್ತಾರೆ. ಇದು ಕೂದಲು ಉದುರಲು ಆರಂಭವಾಗಲು ಪ್ರಮುಖ ಕಾರಣವಾಗಿದೆ.

ಅತಿಯಾದ ಒತ್ತಡ

ಕೂದಲು ಬಾಚುವಾಗ ಒತ್ತಿ, ಒತ್ತಡ ಹಾಕಿ ಬಾಚಬಾರದು. ಕೂದಲಿನಲ್ಲಿ ಸಿಕ್ಕು ಇದ್ದಾಗ ಈ ರೀತಿ ಬಾಚುತ್ತೇವೆ. ಇದು ಕೂದಲು ಉದುರಲು ಕಾರಣವಾಗಬಹುದು. ಅತಿಯಾಗಿ ಒತ್ತಡ ಹಾಕಿ ಬಾಚುವುದರಿಂದ ಕೂದಲು ಅರ್ಧಕ್ಕೆ ತುಂಡಾಗುವ ಸಾಧ್ಯತೆಯೂ ಹೆಚ್ಚು.

ಇದನ್ನೂ ಓದಿ: Hair Fall: ಇದು ಖಂಡಿತ ಸಹಜ ಲಕ್ಷಣವಲ್ಲ; ನಿಮ್ಮ ಕೂದಲು ಈ ರೀತಿ ಉದುರುತ್ತಿದ್ದರೆ ಈಗಲೇ ಎಚ್ಚೆತ್ತುಕೊಳ್ಳಿ

ಕೂದಲಿನ ಬುಡದವರೆಗೆ ಬಾಚಣಿಕೆ ತಾಗಿಸುವುದು

ಕೂದಲು ಬಾಚುವಾಗ ಬುಡದಿಂದ ಅಂದರ ನೆತ್ತಿಯ ಭಾಗದಿಂದ ಕೂದಲು ಬಾಚುವುದು ತಪ್ಪು. ನೆತ್ತಿಯ ಭಾಗಕ್ಕೆ ಬಾಚಣಿಕೆಯನ್ನು ಅತಿಯಾಗಿ ತಾಕಿಸುವುದು ಕೂಡ ಕೂದಲು ಉದುರಲು ಕಾರಣವಾಗುತ್ತದೆ. ಇದು ಕೂದಲಿನ ಸಂಪೂರ್ಣ ಬೇರಿನ ವ್ಯವಸ್ಥೆಯ ಮೇಲೆ ಪರಿಣಾಮ ಬೀರುತ್ತದೆ ಮತ್ತು ಅದರ ಸಾಂದ್ರತೆಯನ್ನು ಕಡಿಮೆ ಮಾಡುತ್ತದೆ, ಕೊನೆಗೆ ಕೂದಲು ನಿರಂತರವಾಗಿ ಉದುರಲು ಆರಂಭವಾಗುತ್ತದೆ.

ಬಾಚಣಿಕೆಯ ವಿನ್ಯಾಸ

ಬಾಚಣಿಕೆ ಬೇರೆ ಬೇರೆ ವಿನ್ಯಾಸದಲ್ಲಿ ಇರುವುದನ್ನು ನೀವು ಗಮನಿಸಿರಬಹುದು. ಚೂಪಾದ ಅಥವಾ ಅಸಮ ಹಲ್ಲುಗಳನ್ನು ಹೊಂದಿರುವ ಬಾಚಣಿಗೆಯನ್ನು ಬಳಸುವಾಗ ಅದನ್ನು ಸ್ಥಿರವಾಗಿ ಬಾಚಿಕೊಳ್ಳುವುದು ಸವಾಲಾಗಿದೆ. ನಿಮ್ಮ ಕೂದಲಿಗೆ ಹಾನಿಯಾಗದಂತೆ ನಿಧಾನವಾಗಿ ಬ್ರಷ್ ಮಾಡಲು ಬಯಸಿದರೆ, ಅಗಲವಾದ ಹಲ್ಲಿನ ಬಾಚಣಿಗೆ ಅಥವಾ ಮೃದುವಾದ, ಹೊಂದಿಕೊಳ್ಳುವ ಹಲ್ಲಿರುವ ಬ್ರಷ್‌ಗಳನ್ನು ಆಯ್ಕೆ ಮಾಡಿ.

ಇದನ್ನೂ ಓದಿ: ಕೂದಲು ಶುಷ್ಕವಾಗಿ ಉದುರಲು ಆರಂಭವಾಗಲು ಇದೇ ಪ್ರಮುಖ ಕಾರಣ; ಶಾಂಪೂ ಆರಿಸಿಕೊಳ್ಳುವ ಮೊದಲು ಈ ಅಂಶ ಗಮನಿಸಿ

ಅತಿಯಾದ ಬಾಚಣಿಕೆ ಬಳಕೆ

ಪದೇ ಪದೇ ಬಾಚಣಿಕೆ ಬಳಸುವುದು ಕೂಡ ನೆತ್ತಿಯ ಕಿರಿಕಿರಿಗೆ ಕಾರಣವಾಗಬಹುದು. ಇದರಿಂದ ನೆತ್ತಿಯ ಭಾಗ ದುರ್ಬಲವಾಗಿ ಕೂದಲು ಉದುರಲು ಆರಂಭವಾಗುತ್ತದೆ. ದಿನದಲ್ಲಿ ಒಂದೆರಡು ಬಾರಿ ಅಷ್ಟೇ ಬಾಚಣಿಕೆ ಬಳಸಿ ಕೂದಲು ಬಾಚಬೇಕು.

ರಾಸಾಯನಿಕಗಳು

ಶ್ಯಾಂಪೂಗಳು ಮತ್ತು ಕಂಡಿಷನರ್‌ಗಳಂತಹ ಹೇರ್‌ಕೇರ್ ಪ್ರಾಡಕ್ಟ್‌ಗಳನ್ನು ಅತಿಯಾಗಿ ಬಳಸುವುದನ್ನು ತಪ್ಪಿಸಬೇಕು. ಅಂತಹ ಉತ್ಪನ್ನಗಳು ರಾಸಾಯನಿಕಗಳನ್ನು ಹೊಂದಿರುತ್ತವೆ, ಆದ್ದರಿಂದ ಅವುಗಳನ್ನು ಅತಿಯಾಗಿ ಬಳಸುವುದರಿಂದ ಕೂದಲಿಗೆ ಹಾನಿಯಾಗುತ್ತದೆ ಮತ್ತು ಕೂದಲು ಉದುರುವಿಕೆಗೆ ಕಾರಣವಾಗಬಹುದು. ಇದರ ಬದಲು ನೈಸರ್ಗಿಕ ಉತ್ಪನ್ನಗಳನ್ನ ಬಳಸಬಹುದು.

ಸರಿಯಾದ ಬಾಚಣಿಕೆ ಬಳಕೆ

ನಿಮ್ಮ ಕೂದಲಿನ ಪ್ರಕಾರಕ್ಕೆ ಸೂಕ್ತವಾದ ಬಾಚಣಿಗೆಯನ್ನು ಆರಿಸುವುದು ಬಹಳ ಮುಖ್ಯ. ಪ್ರತಿಯೊಬ್ಬರ ಕೂದಲು ವಿಭಿನ್ನವಾಗಿರುತ್ತದೆ. ನೇರ ಕೂದಲಿನವರು, ಗುಂಗುರು ಕೂದಲಿನವರು ಮತ್ತು ರೇಷ್ಮೆಯಂತೆ ನಯವಾದ ಕೂದಲು ಹೀಗೆ ವಿಭಿನ್ನ ವಿನ್ಯಾಸದ ಕೂದಲು ಹೊಂದಿರುತ್ತೇವೆ. ಅವರ ಕೂದಲಿನ ಪ್ರಕಾರಕ್ಕೆ ಸೂಕ್ತವಾದ ಬಾಚಣಿಗೆಯನ್ನು ಬಳಸುವುದು ಬಹಳ ಮುಖ್ಯ. ತಪ್ಪಾದ ಬಾಚಣಿಗೆ ಬಳಕೆಯಿಂದಲೂ ಕೂದಲು ಉದುರುವುದು ಅನಿವಾರ್ಯ.

ಕೂದಲಿನ ವಿಚಾರದಲ್ಲಿ ನೀವು ಮಾಡುವ ಈ ಸರಳ ತಪ್ಪುಗಳೇ ಕೂದಲು ಅತಿಯಾಗಿ ಉದುರಲು ಕಾರಣ. ಕೂದಲಿನ ಆರೋಗ್ಯ ರಕ್ಷಣೆಗೆ ಈ ತಪ್ಪುಗಳನ್ನು ಖಂಡಿತ ಮಾಡದಿರಿ.

ಇದನ್ನೂ ಓದಿ: ಅತಿಯಾಗಿ ಕೂದಲು ಉದುರೋದು, ತಲೆಹೊಟ್ಟಿನ ಸಮಸ್ಯೆಯಿಂದ ಬೇಸರವಾಗಿದ್ಯಾ? ದಾಲ್ಚಿನ್ನಿ ಎಲೆಯಲ್ಲಿದೆ ಪರಿಹಾರ, ಬಳಸುವ ವಿಧಾನ ಇಲ್ಲಿದೆ