ದೀಪಾವಳಿ ಹಬ್ಬಕ್ಕೆ ಓಡಾಡಿ ಕಾಲುಗಳಲ್ಲಿ ನೋವು ಕಾಣಿಸಿಕೊಂಡಿದೆಯಾ: ಇಲ್ಲಿದೆ ಸಿಂಪಲ್ ಮನೆಮದ್ದು, ಟ್ರೈ ಮಾಡಿ ನೋಡಿ

ಬೆಳಕಿನ ಹಬ್ಬ ದೀಪಾವಳಿಯನ್ನು ಎಲ್ಲರ ಮನೆಯಲ್ಲೂ ಬಹಳ ಸಂಭ್ರಮದಿಂದ ಆಚರಿಸಲಾಗಿದೆ. ಅದಕ್ಕಾಗಿ ಮಹಿಳೆಯರು ವಾರದ ಮೊದಲೇ ಮನೆಯ ಮೂಲೆ ಮೂಲೆಯನ್ನು ಶುಚಿಗೊಳಿಸಿ ಹಬ್ಬವನ್ನು ಚೆನ್ನಾಗಿ ಮಾಡಿದ್ದಾರೆ. ಹಬ್ಬದ ಆಚರಣೆಗೆ ಗಂಟೆಗಟ್ಟಲೆ ನಿಂತು ವೈವಿಧ್ಯಮಯ ಅಡುಗೆಗಳನ್ನು ಮಾಡಿ ದಣಿದಿದ್ದಾರೆ. ಅತಿಯಾದ ಕೆಲಸ ಮತ್ತು ಓಡಾಟದಿಂದ ಕಾಲುಗಳಲ್ಲಿ ನೋವು, ಆಯಾಸದಿಂದ ಅವರು ಬಳಲುವುದು ಸಾಮಾನ್ಯ. ಅದರಲ್ಲೂ ಕೆಲವರು ಹಿಮ್ಮಡಿ ನೋವು, ಮೊಣಕಾಲಿನ ತೀವ್ರ ನೋವಿನಿಂದ ಬಹಳ ಚಿಂತೆಗೊಳಗಾಗಿದ್ದಾರೆ. ರಾತ್ರಿಯಲ್ಲಿ ಸರಿಯಾಗಿ ನಿದ್ದೆ ಮಾಡಲೂ ಆಗದೇ ಆರೋಗ್ಯದ ಕಠಿಣ ಪರಿಸ್ಥಿತಿಗಳನ್ನು ಎದುರಿಸುತ್ತಿದ್ದಾರೆ. ಅಂತಹವರು ಏನು ಮಾಡಬೇಕೆಂದು ತಿಳಿಯದೇ ಕಷ್ಟ ಪಡುತ್ತಿದ್ದರೆ ಅವರಿಗೆ ಇಲ್ಲಿದೆ ಉತ್ತಮ ಮನೆಮದ್ದು. ಮನೆಯಲ್ಲೇ ಮಾಡಿಕೊಳ್ಳಬಹುದಾದ ಸುಲಭದ ಉಪಚಾರಗಳು ಇಲ್ಲಿವೆ. ಈ ರೀತಿ ಮಾಡುವುದರಿಂದ ಕಾಲು ನೋವು ಕಡಿಮೆಯಾಗುತ್ತದೆ ಮತ್ತು ಆಯಾಸವೂ ದೂರವಾಗುತ್ತದೆ.

ನೋವು ಮತ್ತು ಆಯಾಸ ದೂರ ಮಾಡುವ ಮನೆಮದ್ದುಗಳು

ಉಗುರು ಬೆಚ್ಚಗಿನ ನೀರಿನಲ್ಲಿ ಪಾದಗಳನ್ನು ಇಡಿ: ಪಾದದ ಸ್ನಾಯುಗಳಿಗೆ ಅತಿಯಾದ ಒತ್ತಡದಿಂದ ಅವು ಊದಿಕೊಂಡಿರುತ್ತವೆ. ಅದಕ್ಕೆ ವಿಶ್ರಾಂತಿಯನ್ನು ನೀಡುವುದು ಅಗತ್ಯವಾಗಿದೆ. ಉಗುರು ಬೆಚ್ಚಗಿನ ನೀರಿಗೆ ಸ್ವಲ್ಪ ಉಪ್ಪು ಸೇರಿಸಿ. ಈಗ ನಿಮ್ಮ ಪಾದಗಳನ್ನು ಉಗುರು ಬೆಚ್ಚಗಿನ ನೀರಿನಲ್ಲಿ ಇಡಿ. ಕನಿಷ್ಠ 20 ನಿಮಿಷಗಳ ಕಾಲ ನಿಮ್ಮ ಪಾದಗಳನ್ನು ಆ ನೀರಿನಲ್ಲಿ ಇಡಿ. ಹೀಗೆ ಮಾಡುವುದರಿಂದ ಸ್ನಾಯುಗಳಿಗೆ ವಿಶ್ರಾಂತಿ ದೊರಕುತ್ತದೆ. ಪಾದಗಳ ನೋವು ಕಡಿಮೆಯಾಗುತ್ತದೆ.

ಮಸಾಜ್‌ ಮಾಡಿಕೊಳ್ಳಿ: ಕಾಲು ಮತ್ತು ಪಾದಗಳ ನೋವಿಗೆ ರಕ್ತ ಪರಿಚಲನೆಯಲ್ಲಾದ ಅಡಚಣೆಯೂ ಕಾರಣವಾಗಿರಬಹುದು. ಇದನ್ನು ಗುಣಪಡಿಸಲು ಮಸಾಜ್‌ ಉತ್ತಮವಾಗಿದೆ. ಬಾದಾಮಿ, ಸಾಸಿವೆ ಅಥವಾ ಎಳ್ಳೆಣ್ಣೆ ಬಳಸಿ ಮಸಾಜ್‌ ಮಾಡಿಕೊಳ್ಳಿ. ಇದು ನಿಮ್ಮ ಪಾದ ಮತ್ತು ಕಾಲುಗಳಿಗೆ ಸಾಕಷ್ಟು ಆರಾಮವನ್ನು ನೀಡುತ್ತದೆ.

ಇದನ್ನೂ ಓದಿ: ಚಳಿಗಾಲದಲ್ಲಿ ದೇಹ ಬೆಚ್ಚಗಿರಿಸಿ, ಸ್ಟೈಲಿಶ್ ಲುಕ್ ನೀಡುವ ಕೋಟ್‌ಗಳಿವು; ಫ್ಯಾಷನ್ ಪ್ರಿಯರು ಗಮನಿಸಿ

ಶಾಖ ನೀಡಿ: ಕಾಲು ನೋವಿಗೆ ಇನ್ನೊಂದು ಬೆಸ್ಟ್‌ ಪರಿಹಾರವೆಂದರೆ ಶಾಖ ನೀಡುವುದು. ನೀವು ಪಾದ ಮತ್ತು ಕಾಲುಗಳ ಭಾಗದಲ್ಲಿ ತೀವ್ರ ನೋವು ಅನುಭವಿಸುತ್ತಿದ್ದರೆ ಆ ಜಾಗದಲ್ಲಿ ಹಾಟ್‌ ಪ್ಯಾಡ್‌ ಬಳಸಿ ಶಾಖ ನೀಡಿ. ಹೀಗೆ ಮಾಡುವುದರಿಂದ ಪಾದಗಳು ಊದಿಕೊಂಡಿರುವುದು ಕಡಿಮೆಯಾಗುತ್ತದೆ. ಇದರಿಂದ ನೋವು ನಿವಾರಣೆಯಾಗುತ್ತದೆ.

ಕಾಲುಗಳನ್ನು ಮೇಲಕ್ಕೆತ್ತಿ: ದಿನವಿಡೀ ನಿಂತು ಕೆಲಸ ಮಾಡುವುದರಿಂದ ಹೃದಯವು ರಕ್ತಪರಿಚಲನೆಯನ್ನು ಮಾಡಲು ಹೆಚ್ಚು ಸಮಯ ಕೆಲಸ ಮಾಡಬೇಕಾಗುತ್ತದೆ. ನಿಮ್ಮ ಕಾಲುಗಳಲ್ಲಿ ನೋವಿದ್ದರೆ ಕಾಲುಗಳನ್ನು ಮೇಲಕ್ಕೆತ್ತುವುದರಿಂದ ರಕ್ತದ ಹರಿವು ಸುಧಾರಿಸುತ್ತದೆ. ಇದನ್ನು ಮಾಡಲು ಮೊದಲಿಗೆ ನೆಲದ ಮೇಲೆ ಒಂದು ಮ್ಯಾಟ್‌ ಹಾಕಿಕೊಳ್ಳಿ. ಅದರ ಮೇಲೆ ಮಲಗಿ .ನಿಮ್ಮ ಪಾದಗಳನ್ನು ಸ್ವಲ್ಪ ಮೇಲಕ್ಕೆತ್ತಿ ಗೋಡೆಗೆ ಚಾಚಿ ಮಲಗಿ ಅಥವಾ ಕಾಲುಗಳ ಕೆಳಗೆ ಒಂದು ತಲೆದಿಂಬನ್ನು ಇಡಿ. ಹೀಗೆ ಮಾಡುವುದರಿಂದ ರಕ್ತಪರಿಚಲನೆ ಸುಧಾರಿಸಿ, ನೋವು ಕಡಿಮೆಯಾಗುತ್ತದೆ.

ಇದನ್ನೂ ಓದಿ: ಕಾಜು ಮಸಾಲೆಯಿಂದ ಪನೀರ್‌ ಮಸಾಲೆವರೆಗೆ: ರೆಸ್ಟೋರೆಂಟ್‌ ಶೈಲಿಯ ಪರ್ಫೆಕ್ಟ್‌ ಗ್ರೇವಿ ತಯಾರಿಸಲು ಇಲ್ಲಿದೆ ಟಿಪ್ಸ್‌

ಈ ಮನೆಮದ್ದುಗಳಿಂದಲೂ ನಿಮ್ಮ ಕಾಲು ನೋವು ಕಡಿಮೆಯಾಗಿಲ್ಲ ಎಂದಾದರೆ ನಿಮಗೆ ಚಿಕಿತ್ಸೆಯ ಅಗತ್ಯವಿದೆ ಎಂಬುದನ್ನು ತಿಳಿದುಕೊಳ್ಳಿ. ನೀವು ಖಂಡಿತ ವೈದ್ಯರ ಬಳಿ ಹೋಗಿ ಸಮಾಲೋಚಿಸುವುದು ಉತ್ತಮ. ನಿಮ್ಮ ಕಾಲುನೋವಿಗೆ ಸೂಕ್ತ ಔಷಧ ಪಡೆದುಕೊಳ್ಳಿ.