Puppy Food: ನಿಮ್ಮ ನಾಯಿಮರಿಗೂ ಇರಲಿ ಆರೋಗ್ಯಕರ ಆಹಾರ; ಇಲ್ಲಿದೆ ಸಲಹೆಗಳು
Feb 18, 2024 02:47 PM IST
Share
ನಾಯಿಮರಿಗೆ ಆರೋಗ್ಯಕರ ಆಹಾರ (ಪ್ರಾತಿನಿಧಿಕ ಚಿತ್ರ)
- Food for puppy: ಮನುಷ್ಯನಿಗೆ ಆರೋಗ್ಯವಾಗಿರಲು ಉತ್ತಮ ಹಾಗೂ ಶುಚಿ ರುಚಿಯ ಆಹಾರ ಎಷ್ಟು ಮುಖ್ಯವೋ ಅದೇ ರೀತಿಯಲ್ಲಿ ಶ್ವಾನಗಳಿಗೂ. ಅವುಗಳ ಜೀವನದಲ್ಲಿ ಆರಂಭಿಕ ತಿಂಗಳುಗಳು ಬಹಳ ನಿರ್ಣಾಯಕವಾಗಿವೆ. ಆದ್ದರಿಂದ ನಾಯಿಮರಿಗಳಿಗೆ ಸಮತೋಲಿತ ಆಹಾರವನ್ನು ನೀಡಿ, ಪ್ರೀತಿಯಿಂದ ಬೆಳೆಸುವುದು ಅತೀ ಮುಖ್ಯ.
ಶ್ವಾನಗಳೆಂದರೆ ಅನೇಕರಿಗೆ ಬಹಳ ಪ್ರೀತಿ. ಮನೆ ಮಕ್ಕಳಂತೆಯೇ ಅವುಗಳ ಲಾಲನೆ ಪಾಲನೆ ಮಾಡುತ್ತಾ, ಅವುಗಳ ತುಂಟಾಟ ನೋಡುತ್ತ ಕಾಲ ಕಳೆಯುತ್ತಾರೆ. ನಮ್ಮೊಂದಿಗೆ ಅವುಗಳೂ ಕೂಡ ಸ್ಪಂದಿಸುವುದನ್ನು ಕಂಡು ಅಬ್ಬಬ್ಬಾ ! ಅದೆಷ್ಟು ಪ್ರೀತಿ ಇವುಗಳಿಗೆ ನಮ್ಮ ಮೇಲೆ ಅನ್ನಿಸಿಬಿಡುತ್ತವೆ. ಆದರೆ ಶ್ವಾನದ ತಳಿ, ಯಾವ ವಾತಾವರಣಕ್ಕೆ ಹೊಂದಿಕೊಳ್ಳುತ್ತದೆ, ಎಂತಹ ಆಹಾರ ನೀಡಬೇಕು ಎಂಬಿತ್ಯಾದಿ ಅಂಶಗಳ ಕುರಿತು ಅರಿತುಕೊಳ್ಳದೇ ಶ್ವಾನ ಸಾಕಲು ಎಂದಿಗೂ ಹೋಗಲೇಕೂಡದು.
ಹೌದು, ಶ್ವಾನದ ಪೋಷಕರು ಅವುಗಳನ್ನು ಆರೋಗ್ಯಕರ ಮತ್ತು ಸಕ್ರಿಯವಿರುವಂತೆ ಮಾಡಲು ಜೀವಸತ್ವಗಳು, ಖನಿಜಗಳು, ಪ್ರೋಟೀನ್ಗಳು, ಮತ್ತು ಕ್ಯಾಲೊರಿಗಳಲ್ಲಿ ಸಮೃದ್ಧವಾಗಿರುವ ಆಹಾರಗಳನ್ನು ತಪ್ಪದೇ ನೀಡಬೇಕು. ಇದರಿಂದ ಅವುಗಳ ಜೀವಕೋಶಗಳ ಬೆಳವಣಿಗೆಗೆ ಸಹಾಯಕ. ಅವುಗಳ ಚರ್ಮದ ಆರೋಗ್ಯವನ್ನು ಹೆಚ್ಚಿಸುವ ವಿಟಮಿನ್ ಇ ಕೂಡ ಸಾಕಷ್ಟು ಪ್ರಮಾಣದಲ್ಲಿ ನೀಡಬೇಕು. ನಿಮ್ಮ ನಾಯಿಮರಿಗಳ ಆಹಾರದಲ್ಲಿ ಏನಿರಬೇಕು ಎಂಬುದರ ಕುರಿತು ಚೆನ್ನಾಗಿ ತಿಳಿದಿರುವುದು ಅತ್ಯಂತ ಸಹಾಯಕವಾಗಿದೆ.
ಮಾರ್ಸ್ ಪೆಟ್‌ಕೇರ್ ಇಂಡಿಯಾದ ಸಲಹೆಗಾರ ಡಾ.ಉಮೇಶ್ ಕಲ್ಲಹಳ್ಳಿ ಹೇಳುವ ಪ್ರಕಾರ "ಮಾನವರಂತೆ, ಶ್ವಾನಗಳಿಗೂ ತಮ್ಮ ಆರೋಗ್ಯ ಮತ್ತು ಕಾರ್ಯಕ್ಷಮತೆಯ ಮಟ್ಟವನ್ನು ಕಾಪಾಡಿಕೊಳ್ಳಲು ಸಮತೋಲಿತ ಮತ್ತು ಪೌಷ್ಟಿಕ ಆಹಾರದ ಅಗತ್ಯವಿರುತ್ತದೆ. ಅವುಗಳ ಆಹಾರವು ಪ್ರಾಣಿಗಳಿಗೆ ಅಗತ್ಯವಿರುವ ಎಲ್ಲಾ ಪ್ರಮುಖ ಪೋಷಕಾಂಶಗಳನ್ನು ಹೊಂದಿರಬೇಕು. ಅದರ ಜೀವನ ಹಂತಕ್ಕೆ ಸರಿಯಾದ ಪ್ರಮಾಣಗಳನ್ನು ಸಂಪೂರ್ಣ ಮತ್ತು ಸಮತೋಲಿತವೆಂದು ಪರಿಗಣಿಸಬೇಕು. ಶ್ವಾನದ ಮರಿಗಳಿಗೆ ಆರೋಗ್ಯಕರ ಮತ್ತು ಸಕ್ರಿಯವಾಗಿ ಬೆಳೆಯಲು ನಿರ್ದಿಷ್ಟವಾಗಿ ಹೆಚ್ಚಿನ ಮಟ್ಟದ ವಿಟಮಿನ್‌ಗಳು, ಖನಿಜಗಳು, ಪ್ರೋಟೀನ್ಗಳು, ಲಿಪಿಡ್‌ಗಳು ಮತ್ತು ಕ್ಯಾಲೋರಿಗಳು ಬೇಕಾಗುತ್ತವೆ".
ನಿಮ್ಮ ಶ್ವಾನಗಳ ಆಹಾರದಲ್ಲಿರಬೇಕಾದ ಅಗತ್ಯ ಪೋಷಕಾಂಶಗಳು: ಡಾ ಕಲ್ಲಹಳ್ಳಿಯವರು ನಿಮ್ಮ ನಾಯಿಮರಿಗಳ ಆಹಾರದಲ್ಲಿ ಸೇರಿಸಬೇಕಾದ ಪ್ರಮುಖ ಪೋಷಕಾಂಶಗಳನ್ನು ಹೀಗೆ ಹಂಚಿಕೊಂಡಿದ್ದಾರೆ:
1. DHA
ಡಿಎಚ್ಎ (Docosahexaenoic acid) ನಿಮ್ಮ ಶ್ವಾನಗಳ ನರಮಂಡಲದ ಬೆಳವಣಿಗೆಯಲ್ಲಿ ಮಹತ್ವದ ಪಾತ್ರವನ್ನು ವಹಿಸುತ್ತದೆ. ಇದು ಅವುಗಳನ್ನು ಚುರುಕಾಗಿ, ತೀಕ್ಷ್ಣವಾಗಿ ಮತ್ತು ಹೊಸ ತಂತ್ರಗಳನ್ನು ಕಲಿಯಲು ಸಹಾಯ ಮಾಡುತ್ತದೆ. DHAಯ ಪ್ರಯೋಜನಗಳು ಅರಿವಿನ ಕಾರ್ಯಗಳಿಗೆ ಮಾತ್ರ ಸೀಮಿತವಾಗಿಲ್ಲ. ಅದರ ಜೊತೆಗೆ ಚರ್ಮ, ರೆಟಿನಾ ಮತ್ತು ಪ್ರತಿರಕ್ಷಣಾ ವ್ಯವಸ್ಥೆಯಂತಹ ಪ್ರಮುಖ ದೇಹ ವ್ಯವಸ್ಥೆಗಳಿಗೆ ವಿಸ್ತರಿಸುತ್ತವೆ. ಆದ್ದರಿಂದ, ನಿಮ್ಮ ಶ್ವಾನಗಳ ಆಹಾರದಲ್ಲಿ DHA ಗೆ ಆದ್ಯತೆ ನೀಡುವುದು ಅತ್ಯಗತ್ಯ. ಮೀನು ಮತ್ತು ಇತರ ಪೋಷಕಾಂಶಗಳಿಂದ ಅವುಗಳ ಮೆದುಳಿನ ಬೆಳವಣಿಗೆ, ಅರಿವಿನ ಸಾಮರ್ಥ್ಯ ಮತ್ತು ದೃಷ್ಟಿ ಅಭಿವೃದ್ಧಿಗೆ ನೆರವಾಗಲಿದೆ.
2. ವಿಟಮಿನ್ ಇ
ನಾಯಿಮರಿಗಳ ಆರೋಗ್ಯ ಮತ್ತು ಬೆಳವಣಿಗೆಗೆ ವಿಟಮಿನ್ ಇ ಅತ್ಯಗತ್ಯ ಪೋಷಕಾಂಶವಾಗಿದೆ. ಇದು ಅವರ ಅಭಿವೃದ್ಧಿಗೆ ಸಹಾಯ ಮಾಡುತ್ತದೆ. ಶಕ್ತಿಯುತವಾದ ಉತ್ಕರ್ಷಣ ನಿರೋಧಕವಾಗಿ ಕಾರ್ಯನಿರ್ವಹಿಸುತ್ತದೆ. ಇದು ಸ್ವತಂತ್ರ ರಾಡಿಕಲ್ಗಳನ್ನು ತಟಸ್ಥಗೊಳಿಸಲು ಮತ್ತು ಆಕ್ಸಿಡೇಟಿವ್ ಹಾನಿಯಿಂದ ಜೀವಕೋಶಗಳನ್ನು ರಕ್ಷಿಸಲು ಸಹಾಯ ಮಾಡುತ್ತದೆ, ಇದರಿಂದಾಗಿ ಅವುಗಳ ಪ್ರತಿರಕ್ಷಣಾ ವ್ಯವಸ್ಥೆಯನ್ನು ಹೆಚ್ಚಿಸುತ್ತದೆ. ವಿಟಮಿನ್ ಇ ನಾಯಿಗಳ ಚರ್ಮದ ಆರೋಗ್ಯವನ್ನು ಹೆಚ್ಚಿಸುತ್ತದೆ.
3. ಪ್ರೋಟೀನ್
ಪ್ರೋಟೀನ್ಗಳು ದೇಹದ ರಚನೆಗಳನ್ನು ಅಭಿವೃದ್ಧಿಪಡಿಸಲು, ಸರಿಪಡಿಸಲು ಮತ್ತು ನಿರ್ವಹಿಸಲು ಸಹಾಯ ಮಾಡುವ ಪ್ರಮುಖ ಪೋಷಕಾಂಶಗಳಾಗಿವೆ. ಪ್ರತಿರಕ್ಷಣಾ ವ್ಯವಸ್ಥೆಯನ್ನು ಬೆಂಬಲಿಸುವಲ್ಲಿ ಅವು ನಿರ್ಣಾಯಕ. ಚರ್ಮದ ನಿರ್ವಹಣೆಯು ಆಹಾರದ ಪ್ರೋಟೀನ್‌ನ 30-35% ಅನ್ನು ಬಳಸಿಕೊಳ್ಳುತ್ತದೆ.
ಹೀಗಾಗಿ ನಿಮ್ಮ ಶ್ವಾನಗಳ ಒಟ್ಟಾರೆ ಆರೋಗ್ಯ ಮತ್ತು ಯೋಗಕ್ಷೇಮವನ್ನು ಕಾಪಾಡಿಕೊಳ್ಳಲು ನಿರ್ದಿಷ್ಟ ಜೀವನ ಹಂತಕ್ಕೆ ಸೂಕ್ತವಾದ ಸಮತೋಲಿತ ಮತ್ತು ಪೌಷ್ಟಿಕ ಆಹಾರವನ್ನು ಒದಗಿಸುವುದು ಅತೀ ಅಗತ್ಯವಾಗಿದೆ.
ವಿಭಾಗ