The Egoist Teapot: ವಿಶ್ವದ ಅತ್ಯಂತ ಬೆಲೆಬಾಳುವ ಟೀ ಪಾಟ್ ಇದು; ಇದರ ಬೆಲೆ ಎಷ್ಟು ಕೋಟಿ ಅಂತ ಗೊತ್ತಾದ್ರೆ ದಂಗಾಗುತ್ತೀರ!

ಪ್ರಪಂಚದಾದ್ಯಂತದ ಚಹಾ ಪ್ರೇಮಿಗಳು ವಿವಿಧ ಬಗೆಯ ಟೀ ಪಾಟ್‌ಗಳಲ್ಲಿ ಟೀ ಇಟ್ಟುಕೊಳ್ಳುತ್ತಾರೆ ಮತ್ತು ವಿವಿಧ ಬಗೆಯ ಕಪ್​​ ಹಾಗೂ ಸಾಸರ್‌ಗಳಲ್ಲಿ ಚಹಾ ಕುಡಿಯುತ್ತಾರೆ. ಇವುಗಳಲ್ಲಿ ಕೆಲವು ಟೀಪಾಟ್‌, ಟೀ ಕಪ್​ ಅಥವಾ ಸಾಸರ್​ ದುಬಾರಿಯಾಗಿರಬಹುದು. ಆದರೆ ಇಲ್ಲೊಂದು ಟೀ ಪಾಟ್‌ ಎಷ್ಟು ದುಬಾರಿಯೆಂದರೆ ಇದು ಗಿನ್ನಿಸ್​ ರೆಕಾರ್ಡ್​ ಅನ್ನೇ ಬರೆದಿದೆ ಎಂದರೆ ನೀವು ನಂಬಲೇಬೇಕು.

ಈ ಟೀ ಪಾಟ್​ಗೆ "ದಿ ಇಗೋಯಿಸ್ಟ್" (The Egoist) ಎಂದು ಹೆಸರಿಡಲಾಗಿದ್ದು, ವಿಶ್ವದ ಅತ್ಯಂತ ಬೆಲೆಬಾಳುವ ಟೀ ಪಾಟ್ ಇದಾಗಿದೆ. 2016 ರಲ್ಲೇ ಇದು ವಿಶ್ವದಾಖಲೆಯನ್ನು ನಿರ್ಮಿಸಿತ್ತು. ಆದರೆ 2023ರ ಆಗಸ್ಟ್ 9 ರಂದು ಗಿನ್ನೆಸ್ ವರ್ಲ್ಡ್ ರೆಕಾರ್ಡ್ಸ್ ತನ್ನ ಟ್ವಿಟರ್‌ನಲ್ಲಿ ಇದರ ಫೋಟೋ ಹಂಚಿಕೊಂಡ ಬಳಿಕ ಇದೀಗ ವೈರಲ್​ ಆಗಿದೆ.

ಯುನೈಟೆಡ್​ ಕಿಂಗ್​ಡಮ್​ನ ಎನ್ ಸೇಥಿಯಾ ಫೌಂಡೇಶನ್ ಒಡೆತನದಲ್ಲಿ ಈ ಟೀ ಪಾಟ್ ಇದೆ. ಇದನ್ನು 18-ಕ್ಯಾರೆಟ್ ಹಳದಿ ಚಿನ್ನ ಮತ್ತು ಕಟ್ ವಜ್ರ ಹಾಗೂ 6.67-ಕ್ಯಾರೆಟ್ ಮಾಣಿಕ್ಯದಿಂದ ತಯಾರಿಸಲಾಗಿದೆ. ಟೀ ಪಾಟ್​ನ ಹಿಡಿಕೆಯನ್ನು ಆನೆ ದಂತದಿಂದ ತಯಾರಿಸಲಾಗಿದೆ. ಇದನ್ನು . ಇಟಲಿಯ ಆಭರಣ ವ್ಯಾಪಾರಿ ಫುಲ್ವಿಯೊ ಸ್ಕಾವಿಯಾ ಅವರು ತಯಾರಿಸಿದ್ದಾರೆ.

ಅಂದಹಾಗೆ ಇದರ ಬೆಲೆ ಬರೋಬ್ಬರಿ 24 ಕೋಟಿ ರೂಪಾಯಿ (30 ಲಕ್ಷ ಡಾಲರ್). ಈ ಪೋಸ್ಟ್ ನೋಡಿದ ನೆಟ್ಟಿಗರು ಇದರ ಬೆಲೆ ಕೇಳಿ ದಂಗಾಗಿದ್ದಾರೆ. ನನಗಿಂತಲೂ ಹೆಚ್ಚು ಮೌಲ್ಯಯುತವಾಗಿರುವ ಇದನ್ನು ನಾನು ಕದಿಯುತ್ತೇನೆ ಎಂದು ಟ್ವಿಟರ್​ ಬಳಕೆದಾರರೊಬ್ಬರು ಕಮೆಂಟ್​ ಮಾಡಿದ್ದಾರೆ.

ಆ ಪ್ರತಿಷ್ಠಾನವು ಅದನ್ನು ಎಲ್ಲಿಂದ ಕದ್ದಿದೆ? ಎಂಬ ಬಗ್ಗೆ ನನಗೆ ಕುತೂಹಲವಿದೆ. ಯಾಕೆಂದರೆ, ಇತ್ತೀಚಿನ ದಿನಗಳಲ್ಲಿ ಯುನೈಟೆಡ್​ ಕಿಂಗ್​ಡಮ್​ನಲ್ಲಿನ ಹೆಚ್ಚಿನ ಕಲಾಕೃತಿಗಳು ಮತ್ತು ಪುರಾತನ ವಸ್ತುಗಳನ್ನು ಒಂದು ವಸಾಹತುಶಾಹಿ ದೇಶ ಅಥವಾ ಮತ್ತೊಂದು ದೇಶದಿಂದ ಕಳವು ಮಾಡಲಾಗಿದೆ ಎಂದು ಹೇಳಲಾಗುತ್ತಿದೆ ಎಂದು ಮತ್ತೊಬ್ಬರು ಟ್ವೀಟ್​ ಮಾಡಿದ್ದಾರೆ.

ಇದನ್ನೂ ಓದಿ: Shahi Imam Bukhari: ಭಾರತದ ಮುಸ್ಲಿಮರ ಮನ್ ಕಿ ಬಾತ್ ಆಲಿಸಿ; ಪ್ರಧಾನಿ ಮೋದಿಗೆ ಜಾಮಾ ಮಸೀದಿ ಮುಖಂಡನ ಮನವಿ