Australian Open: ಆಸ್ಟ್ರೇಲಿಯನ್ ಓಪನ್ ಗೆದ್ದ ಸಬಲೆಂಕಾ ಮತ್ತು ಬೋಪಣ್ಣ ಜೋಡಿಗೆ ಸಿಕ್ಕ ಬಹುಮಾನ ಎಷ್ಟು?

ಶನಿವಾರ (ಜನವರಿ 27) ಸಂಜೆ ರಾಡ್ ಲೇವರ್‌ ಅರೆನಾದಲ್ಲಿ ನಡೆದ ಮಹಿಳೆಯರ ಸಿಂಗಲ್ಸ್ ಫೈನಲ್‌ನಲ್ಲಿ ಚೀನಾದ ಕ್ವಿನ್​ವೆನ್​ ಜೆಂಗ್​ ಅವರನ್ನು 6-3, 6-2 ನೇರ ಸೆಟ್‌ಗಳಿಂದ ಸೋಲಿಸುವ ಮೂಲಕ ಬೆಲಾರಸ್​ನ ಅರಿನಾ ಸಬಲೆಂಕಾ ಸತತ 2ನೇ ಬಾರಿಗೆ ಆಸ್ಟ್ರೇಲಿಯನ್ ಓಪನ್ ಪ್ರಶಸ್ತಿ ಗೆದ್ದರು. ಇದರೊಂದಿಗೆ 2012 ಮತ್ತು 2013ರಲ್ಲಿ ವಿಕ್ಟೋರಿಯಾ ಅಜರೆಂಕಾ ನಂತರ ಮೆಲ್ಬರ್ನ್ ಪಾರ್ಕ್​​ನಲ್ಲಿ ಸತತ 2ನೇ ಮಹಿಳಾ ಪ್ರಶಸ್ತಿ ಗೆದ್ದ ಎರಡನೇ ಆಟಗಾರ್ತಿ ಎನಿಸಿಕೊಂಡರು.

ಇದನ್ನೂ ಓದಿ: ರೋಹನ್ ಬೋಪಣ್ಣ ಮುಕುಟಕ್ಕೆ ಮತ್ತೊಂದು ಕಿರೀಟ; ಮ್ಯಾಥ್ಯೂ ಎಬ್ಡೆನ್ ಅವರೊಂದಿಗೆ ಆಸ್ಟ್ರೇಲಿಯಾ ಓಪನ್ ಗೆದ್ದ ಕನ್ನಡಿಗ

ಮತ್ತೊಂದೆಡೆ​ ಡಬಲ್ಸ್​ ಫೈನಲ್​ನಲ್ಲಿ ರೋಹನ್ ಬೋಪಣ್ಣ ಮತ್ತು ಮ್ಯಾಥ್ಯೂ ಎಬ್ಡೆನ್ ಜೋಡಿ ಗೆದ್ದು ದಾಖಲೆ ಬರೆಯಿತು. ಇಟಲಿಯ ಸಿಮೋನ್ ಬೊಲೆಲ್ಲಿ-ಆಂಡ್ರಿಯಾ ವವಾಸ್ಸೋರಿ ವಿರುದ್ಧ 7-0 (0), 7-5 ಸೆಟ್‌ಗಳ ಅಂತರದಿಂದ ಜಯದ ದಾಖಲೆ ಬರೆದರು. ಈ ಮೂಲಕ 40ನೇ ವಯಸ್ಸಿನಲ್ಲಿ ಮಾರ್ಸೆಲೊ ಅರೆವೊಲಾ ನಿರ್ಮಿಸಿದ್ದ ದಾಖಲೆಯನ್ನು 43 ವರ್ಷದ ಬೋಪಣ್ಣ ಮುರಿದಿದ್ದಾರೆ. ಆ ಮೂಲಕ ಗ್ರ್ಯಾಂಡ್ ಸ್ಲಾಮ್ ಪ್ರಶಸ್ತಿ ಮುಡಿಗೇರಿಸಿಕೊಂಡ ಹಿರಿಯ ಆಟಗಾರ ಎನಿಸಿದ್ದಾರೆ.

ಹಾಗಾದರೆ ಆಸ್ಟ್ರೇಲಿಯನ್ ಓಪನ್​​ ಸಿಂಗಲ್ಸ್ ವಿಭಾಗದಲ್ಲಿ ಗೆದ್ದ ಅರಿನಾ ಸಬಲೆಂಕಾ ಮತ್ತು ಡಬಲ್ಸ್​​ ಫೈನಲ್​ನಲ್ಲಿ ಜಯಿಸಿದ ರೋಹನ್ ಬೋಪಣ್ಣ ಮತ್ತು ಮ್ಯಾಥ್ಯೂ ಎಬ್ಡೆನ್ ಜೋಡಿಗೆ ಸಿಕ್ಕ ಬಹುಮಾನವೆಷ್ಟು? ಇಲ್ಲಿದೆ ವಿವರ.

ಇದನ್ನೂ ಓದಿ: ಕ್ವಿನ್​ವೆನ್ ವಿರುದ್ಧ ಜಯಿಸಿ ಆಸ್ಟ್ರೇಲಿಯನ್ ಓಪನ್ ಕಿರೀಟಕ್ಕೆ ಮುತ್ತಿಕ್ಕಿ ದಾಖಲೆ ಬರೆದ ಅರಿನಾ ಸಬಲೆಂಕಾ

ಸಬಲೆಂಕಾ ಗೆದ್ದ ಬಹುಮಾನವೆಷ್ಟು?

ಪಂದ್ಯದ ಆರಂಭದಿಂದ ಕೊನೆಯವರೆಗೂ ವೀರಾವೇಶದ ಆಟವಾಡಿದ ಸಬಲೆಂಕಾ, ಎದುರಾಳಿ ಚೀನಾದ ಆಟಗಾರ್ತಿ ಕ್ವಿನ್​ವೆನ್ ಜೆಂಗ್​ಗೆ ಒತ್ತಡ ನೀಡಿದರು. ನೇರ ಸೆಟ್​ಗಳಿಂದ ಜೆಂಗ್​​ಗೆ ಮಣ್ಣು ಮುಕ್ಕಿಸಿದರು. ತನ್ನ ಚೊಚ್ಚಲ ಗ್ರ್ಯಾಂಡ್ ಸ್ಲಾಮ್ ಪ್ರಶಸ್ತಿ ಗೆಲ್ಲುವ ಕನಸಿನಲ್ಲಿದ್ದ ಚೀನಾದ ಆಟಗಾರ್ತಿ ನಿರಾಸೆ ಅನುಭವಿಸಿದರು. ಇನ್ನು ಆಸ್ಟ್ರೇಲಿಯನ್ ಓಪನ್ ಗೆದ್ದಿದ್ದಕ್ಕಾಗಿ ಸಬಲೆಂಕಾ ಅವರು ಆಸ್ಟ್ರೇಲಿಯನ್ ಡಾಲರ್ 3,150,000 ಅಂದರೆ 17.25 ಕೋಟಿ ರೂ ಬಹುಮಾನ ಪಡೆಯಲಿದ್ದಾರೆ. ರನ್ನರ್​ ಅಪ್​ ಜೆಂಗ್ ಅವರು 9.50 ಕೋಟಿ ಪಡೆಯಲಿದ್ದಾರೆ.

ರೋಹನ್ ಬೋಪಣ್ಣ ಜೋಡಿ ಗೆದ್ದಿದ್ದೆಷ್ಟು?

17ನೇ ಆಸ್ಟ್ರೇಲಿಯನ್ ಓಪನ್​​ನಲ್ಲಿ 43 ವರ್ಷ ಮತ್ತು 329 ದಿನಗಳ ವಯಸ್ಸಿನ ಬೋಪಣ್ಣ ಅವರು ತಮ್ಮ ಮೊದಲ ಗ್ರ್ಯಾಂಡ್ ಸ್ಲಾಮ್ ಪುರುಷರ ಡಬಲ್ಸ್ ಪ್ರಶಸ್ತಿಯನ್ನು ಗಳಿಸಿದರು. ಮಾತ್ರವಲ್ಲದೆ ಅತ್ಯಂತ ಹಿರಿಯ ಗ್ರ್ಯಾಂಡ್ ಸ್ಲಾಮ್ ಚಾಂಪಿಯನ್ ಆಗಿ ಇತಿಹಾಸ ನಿರ್ಮಿಸಿದರು. ಅಂತಿಮ ಪಂದ್ಯವು ಆರಂಭದಿಂದಲೂ ಬೋಪಣ್ಣ ಮತ್ತು ಎಬ್ಡೆನ್ ಪರಾಕ್ರಮ ಪ್ರದರ್ಶಿಸಿದರು. ರೋಹನ್ ಬೋಪಣ್ಣ ಮತ್ತು ಎಬ್ಡೆನ್ ಆಸ್ಟ್ರೇಲಿಯನ್ ಡಾಲರ್​ 730,000 ಅಂದರೆ 4 ಕೋಟಿ ಗೆದ್ದಿದ್ದಾರೆ. ರನ್ನರ್​ಅಪ್ ಜೋಡಿಗೆ 2 ಕೋಟಿಗೂ ಹೆಚ್ಚು ಬಹುಮಾನ ಸಿಕ್ಕಿದೆ.

(This copy first appeared in Hindustan Times Kannada website. To read more like this please logon to kannada.hindustantime.com)