ಚೆಸ್​ ವಿಶ್ವಕಪ್​ನಲ್ಲಿ ಅಧಿಕ ಪ್ರಶಸ್ತಿ ಗೆದ್ದವರು ಯಾರು; ಭಾರತಕ್ಕೆ ಸಿಕ್ಕಿರುವುದೆಷ್ಟು?

ಚೆಸ್​ ವಿಶ್ವಕಪ್ (FIDE Chess World Cup)​​ ಟೂರ್ನಿಯುದ್ದಕ್ಕೂ ಚದುರಂಗದ ಸಮರದಲ್ಲಿ ಆರ್ಭಟಿಸಿದ್ದ ಭಾರತದ ಆರ್​ ಪ್ರಜ್ಞಾನಂದ (R Praggnanandhaa), ಫೈನಲ್​ ಪಂದ್ಯದಲ್ಲಿ ಎಡವಿದರು. ಇದರೊಂದಿಗೆ ಚೆಸ್ ಆಟದಲ್ಲಿ ಹೊಸ ಚರಿತ್ರೆ ಬರೆಯುವ ಅವಕಾಶವನ್ನು ಕಳೆದುಕೊಂಡರು. ಫೈನಲ್​​ನಲ್ಲಿ ಗೆದ್ದ ವಿಶ್ವದ ನಂಬರ್​ 1 ಆಟಗಾರ ನಾರ್ವೆ ದೇಶದ ಮಾಗ್ನಸ್​ ಕಾರ್ಲ್​ಸನ್ (Magnus Carlsen), ಚೊಚ್ಚಲ ಚಾಂಪಿಯನ್​ ಪಟ್ಟ ಅಲಂಕರಿಸಿದರು.

ಚೆಸ್​ ವಿಶ್ವಕಪ್ ಫೈನಲ್​​​​ನ ಎರಡು ಸುತ್ತುಗಳಲ್ಲಿ ಪ್ರಜ್ಞಾನಂದ ಮತ್ತು ಮ್ಯಾಗ್ನಸ್ ಕಾರ್ಲ್​​ಸನ್​ ಡ್ರಾ ಸಾಧಿಸಿದ್ದರು. ಆದರೆ ಗುರುವಾರ ನಡೆದ ಮೂರನೇ ಸುತ್ತಿನಲ್ಲಿ ಟೈ ಬ್ರೇಕರ್​​​​ನಲ್ಲಿ ಪ್ರಜ್ಞಾನಂದ ಸೋಲಿಗೆ ಶರಣಾದರು. ಈ ಟೈ ಬ್ರೇಕರ್​​ನ ಮೊದಲ ಗೇಮ್​​ನಲ್ಲಿ 1-0ರಲ್ಲಿ ಮುನ್ನಡೆ ಸಾಧಿಸಿದ್ದ ಕಾರ್ಲ್​ಸನ್​, 2ನೇ ಗೇಮ್​ನಲ್ಲಿ ಡ್ರಾ ಸಾಧಿಸಿದರು. ಇದರಿಂದ ಮುನ್ನಡೆಯಲ್ಲಿದ್ದ ಕಾರ್ಲ್​ಸನ್​, ಜಯಭೇರಿ ಬಾರಿಸಿದರು. ಒಟ್ಟು ಚೆಸ್​ ವಿಶ್ವಕಪ್​​ನಲ್ಲಿ 12 ಆವೃತ್ತಿಗಳು ಜರುಗಿದ್ದು, ಭಾರತಕ್ಕೆ 2 ಲಭಿಸಿದೆ. ಪ್ರಜ್ಞಾನಂದ ಗೆದ್ದಿದ್ದರೆ, ಭಾರತಕ್ಕೆ 3ನೇ ಪ್ರಶಸ್ತಿ ಸಿಗುತ್ತಿತ್ತು.

ಹಾಗಾದರೆ ಪ್ರತಿ ಎರಡು ವರ್ಷಕ್ಕೊಮ್ಮೆ ಜರುಗುವ ಈ ಚೆಸ್​​​ ವಿಶ್ವಕಪ್​ನಲ್ಲಿ ಯಾರು? ಯಾವಾಗ? ಪ್ರಶಸ್ತಿ ಗೆದ್ದಿದ್ದಾರೆ ಎಂಬುದನ್ನು ಈ ಮುಂದೆ ನೋಡೋಣ.

• ಚೀನಾದ ಶೆನ್ಯಾಂಗ್​​ನಲ್ಲಿ 2000ರ ಸೆಪ್ಟೆಂಬರ್​ನಲ್ಲಿ (ಸೆ.1 ರಿಂದ 13) ನಡೆದ ಚೊಚ್ಚಲ ಚೆಸ್​ ವಿಶ್ವಕಪ್​ನಲ್ಲೇ ಭಾರತದ ದಿಗ್ಗಜ ಆಟಗಾರ ವಿಶ್ವನಾಥನ್ ಆನಂದ್ ಚಾಂಪಿಯನ್ ಆಗಿದ್ದರು. ಈ ಆವೃತ್ತಿಯ ಫೈನಲ್​​ನಲ್ಲಿ ರಷ್ಯಾದ ಎವ್ಗೆನಿ ಬರೀವ್ ಅವರನ್ನು ಸೋಲಿಸಿದ್ದರು.
• ಭಾರತದ ಹೈದರಾಬಾದ್​​ನಲ್ಲಿ 2002ರ ಅಕ್ಟೋಬರ್​​​ನಲ್ಲಿ (ಅ.9ರಿಂದ 22) ನಡೆದ ಎರಡನೇ ಆವೃತ್ತಿಯ ಚೆಸ್ ವಿಶ್ವಕಪ್​​ನಲ್ಲೂ ಭಾರತದ ವಿಶ್ವನಾಥನ್ ಆನಂದ್ ಅವರೇ ವಿಜೇತರಾಗಿದ್ದರು. ಅವರು ಉಜ್ಬೇಕಿಸ್ತಾನದ ರುಸ್ತಮ್ ಕಾಸಿಮ್ಜಾನೋವ್ ಎದುರು ಜಯಿಸಿದ್ದರು.
• ರಷ್ಯಾದ ಖಾಂಟಿ-ಮಾನ್ಸಿಸ್ಕ್​​ನಲ್ಲಿ 2005ರ ನವೆಂಬರ್​-ಡಿಸೆಂಬರ್​​ನಲ್ಲಿ ಜರುಗಿದ 3ನೇ ಆವೃತ್ತಿಯ ಚೆಸ್​ ವಿಶ್ವಕಪ್​​ನಲ್ಲಿ ಅಮೆರಿಕದ ಲೆವೊನ್ ಅರೋನಿಯನ್ ಅವರು ಉಕ್ರೇನ್​​ನ ರುಸ್ಲಾನ್ ಪೊನೊಮರಿವ್​​​​ ವಿರುದ್ಧ ಜಯಿಸಿ ಚಾಂಪಿಯನ್​ ಆಗಿದ್ದರು.
• 2007ರಲ್ಲಿ ನಡೆದ ಟೂರ್ನಿಯಲ್ಲಿ ಅಮೆರಿಕದ ಗಾಟಾ ಕಾಮ್ಸ್ಕಿ ಅವರು ಪ್ರಶಸ್ತಿ ಗೆದ್ದಿದ್ದರು. ಈ ಟೂರ್ನಿ ಕೂಡ ರಷ್ಯಾದಲ್ಲೇ ನಡೆದಿತ್ತು. ಸ್ಪೇನ್​ ಆಟಗಾರ ಅಲೆಕ್ಸಿ ಶಿರೋವ್ ರನ್ನರ್​ ಅಪ್​ ಆಗಿದ್ದರು.
• 2009ರಲ್ಲಿ ಇಸ್ರೇಲ್​​ನ ಬೋರಿಸ್ ಗೆಲ್ಫಾಂಡ್ ಚಾಂಪಿಯನ್ ಪಟ್ಟ ಅಲಂಕರಿಸಿದ್ದರು. ಉಕ್ರೇನ್​​ನ ರುಸ್ಲಾನ್ ಪೊನೊಮರಿವ್ 2ನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿದ್ದರು. ಈ ಟೂರ್ನಿಯೂ ರಷ್ಯಾದಲ್ಲೇ ನಡೆದಿತ್ತು.
• 2011ರ ಚೆಸ್​ ವಿಶ್ವಕಪ್​​ನಲ್ಲೂ ರಷ್ಯಾದ ಪೀಟರ್ ಸ್ವಿಡ್ಲರ್ ಗೆಲುವು ದಾಖಲಿಸಿದ್ದರು. ರಷ್ಯಾದವರೇ ಆದ ಅಲೆಕ್ಸಾಂಡರ್ ಗ್ರಿಸ್ಚುಕ್ ರನ್ನರ್ ಅಪ್ ಆಗಿದ್ದರು. ಈ ಟೂರ್ನಿಯೂ ರಷ್ಯಾದಲ್ಲೇ ನಡೆದಿತ್ತು ಎಂಬುದು ವಿಶೇಷ.
• 2013ರಲ್ಲಿ ರಷ್ಯಾದ ವ್ಲಾಡಿಮಿರ್ ಕ್ರಾಮ್ನಿಕ್ ಅವರು ಜಯಿಸಿದ್ದರು. ಡಿಮಿಟ್ರಿ ಆಂಡ್ರೇಕಿನ್ ರನ್ನರ್​ ಅಪ್ ಆಗಿದ್ದರು. ಈತ ಕೂಡ ರಷ್ಯಾದ ಆಟಗಾರನೇ ಆಗಿದ್ದ. ನಾರ್ವೆಯ ಟ್ರೋಮ್ಸೋದಲ್ಲಿ ಈ ಆವೃತ್ತಿ ಚೆಸ್ ವಿಶ್ವಕಪ್ ಗೆದ್ದಿತ್ತು.
• 2015ರ ಟೂರ್ನಿ ಅಜರ್​​ಬೈಜಾನ್​​ನ ಬಾಕುವಿನಲ್ಲಿ ನಡೆದಿತ್ತು. ರಷ್ಯಾದ ಸೆರ್ಗೆಯ್ ಕರ್ಜಾಕಿನ್ ಚಾಂಪಿಯನ್​ ಆಗಿದ್ದರೆ, ರಷ್ಯಾದವರೇ ಆದ ಪೀಟರ್ ಸ್ವಿಡ್ಲರ್ ರನ್ನರ್​ ಅಪ್ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿದ್ದರು.
• 2017 ಜಾರ್ಜಿಯಾದ ಟಿಬಿಲಿಸಿಯಲ್ಲಿ ನಡೆದ ಈ ಟೂರ್ನಿಯಲ್ಲಿ ಅಮೆರಿಕದ ಲೆವೊನ್ ಅರೋನಿಯನ್ ಅವರು 2ನೇ ವಿಶ್ವಕಪ್ ಗೆದ್ದರು. ಚೀನಾದ ಡಿಂಗ್ ಲಿರೆನ್ 2ನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿದ್ದರು.
• 2019ರಲ್ಲಿ ಮತ್ತೆ ರಷ್ಯಾದಲ್ಲಿ ಟೂರ್ನಿ ನಡೆದಿತ್ತು. ಅಜರ್​​ಬೈಜಾನ್​ನ ಟೀಮರ್ ರಾಡ್ಜಬೊವ್ ಚಾಂಪಿಯನ್ ಆಗಿದ್ದರೆ, ಚೀನಾದ ಡಿಂಗ್ ಲಿರೆನ್ ಮತ್ತೆ ರನ್ನರ್ ಅಪ್ ಆದರು.
• 2021ರ ರಷ್ಯಾದ ಸೋಚಿಯಲ್ಲಿ ಜರುಗಿದ ಟೂರ್ನಿಯಲ್ಲಿ ಪೋಲ್ಯಾಂಡ್​​ನ ಜಾನ್-ಕ್ರಿಸ್ಜ್ಟೋಫ್ ದುಡಾ ಪ್ರಶಸ್ತಿ ಗೆದ್ದರು. ರಷ್ಯಾದ ಸೆರ್ಗೆಯ್ ಕರ್ಜಾಕಿನ್ ರನ್ನರ್ ಅಪ್​ ಆದರು.
• 2023ರಲ್ಲಿ ಅಜರ್​​ಬೈಜಾನ್​​ನ ಬಾಕುವಿನಲ್ಲಿ ನಡೆದ ಈ ಟೂರ್ನಿಯಲ್ಲಿ ನಾರ್ವೆಯ ಮ್ಯಾಗ್ನಸ್ ಕಾರ್ಲ್​​ಸನ್​ ಜಯಿಸಿದ್ದಾರೆ. ಭಾರತದ ಆರ್ ಪ್ರಜ್ಞಾನಂದ ರನ್ನರ್​ಅಪ್​ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡರು.