Ind vs Aus WTC Final: ಚರಿತ್ರೆ ಬರೆದ ಆಸ್ಟ್ರೇಲಿಯಾ ನೂತನ ವಿಶ್ವ ಟೆಸ್ಟ್ ಚಾಂಪಿಯನ್​​​; ಸೋತ ಭಾರತ ತಂಡ ಮತ್ತೆ ರನ್ನರ್​ಅಪ್​ಗೆ ತೃಪ್ತಿ

ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಶಿಪ್​​ ಫೈನಲ್​​ನಲ್ಲಿ (WTC FInal 2023) ಆಸ್ಟ್ರೇಲಿಯಾ ಗೆದ್ದು (Australia Champion) ನೂತನ ಇತಿಹಾಸ ನಿರ್ಮಿಸಿದೆ. ಇಂಗ್ಲೆಂಡ್​​ನ ಓವಲ್​ ಮೈದಾನದಲ್ಲಿ ನಡೆದ ಅಂತಿಮ ದಿನದಾಟದಲ್ಲಿ ಹೋರಾಟ ನಡೆಸದೆ ಟೀಮ್​ ಇಂಡಿಯಾ (Team India) ಶರಣಾಗಿದೆ. ಇದರೊಂದಿಗೆ ಆಸಿಸ್​ ಚೊಚ್ಚಲ ಟೆಸ್ಟ್​ ಚಾಂಪಿಯನ್​ಶಿಪ್​ ಟ್ರೋಫಿ ಜಯಿಸಿದೆ.

ಈ ಭರ್ಜರಿ ಗೆಲುವಿನೊಂದಿಗೆ ಆಸ್ಟ್ರೇಲಿಯಾ, ಮೂರು ಫಾರ್ಮೆಟ್​ ಕ್ರಿಕೆಟ್​ನಲ್ಲೂ ವಿಶ್ವಕಪ್​​ ಗೆದ್ದ ವಿಶ್ವದ ಏಕೈಕ ತಂಡ ಎಂಬ ಐತಿಹಾಸಿಕ ದಾಖಲೆ ಬರೆದಿದೆ. 10 ವರ್ಷಗಳ ಬಳಿಕ ಐಸಿಸಿ ಟ್ರೋಫಿ ಗೆಲ್ಲುವ ಕನಸಿನಲ್ಲಿದ್ದ ಭಾರತಕ್ಕೆ ಮತ್ತೆ ನಿರಾಸೆಯಾಗಿದೆ. ಅಲ್ಲದೆ, ನಾಯಕನಾಗಿ ರೋಹಿತ್​ ಇದೇ ಮೊದಲ ಬಾರಿಗೆ ಫೈನಲ್ ಪಂದ್ಯದಲ್ಲಿ ಸೋತಿದ್ದಾರೆ.

3 ವಿಕೆಟ್​ ನಷ್ಟಕ್ಕೆ 164 ರನ್​ಗಳೊಂದಿಗೆ 5ನೇ ಹಾಗೂ ಅಂತಿಮ ದಿನದಾಟ ಆರಂಭಿಸಿದ ಟೀಮ್ ಇಂಡಿಯಾ, ಒಂದು ಸೆಷನ್​ ಅಂತ್ಯಕ್ಕೂ ಮೊದಲೇ ಆಲೌಟ್​ ಆಯಿತು. 4ನೇ ದಿನದಂದು ತಂಡಕ್ಕೆ ಭರವಸೆ ಮೂಡಿಸಿದ್ದ ವಿರಾಟ್​​ ಕೊಹ್ಲಿ, ಅಂತಿಮ ದಿನದಂದು ಕೇವಲ 5 ರನ್​ ಗಳಿಸಿ  ಹೊರ ನಡೆದರು. 

ಇದರೊಂದಿಗೆ ಭಾರತ ತಂಡದ ಟ್ರೋಫಿ ಕನಸು ಭಗ್ನವಾಯಿತು. ಕೊನೆಯ ದಿನದಾಟದಲ್ಲಿ ಭಾರತದ ಗೆಲುವಿಗೆ 280 ರನ್​ ಮತ್ತು ಆಸ್ಟ್ರೇಲಿಯಾಗೆ ಜಯಿಸಲು 7 ವಿಕೆಟ್​ ಬೇಕಿತ್ತು. ಅಂತಿಮವಾಗಿ ಆಸ್ಟ್ರೇಲಿಯಾವೇ 209 ರನ್​ಗಳ ಅಂತರದಿಂದ ಗೆದ್ದು ಬೀಗಿತು. 2ನೇ ಇನ್ನಿಂಗ್ಸ್​ನಲ್ಲಿ ಭಾರತ 234 ರನ್​ಗಳಿಗೆ ಆಲೌಟ್​ ಆಯಿತು.

ದಿನದಾಟ ಆರಂಭಿಸಿದ ವಿರಾಟ್​ ಕೊಹ್ಲಿ, ಕ್ರೀಸ್​​ನಲ್ಲಿ ಇದ್ದದ್ದು ಕೆಲವೇ ಹೊತ್ತು. ಸ್ಕಾಟ್​ ಬೋಲ್ಯಾಂಡ್​ ಬೌಲಿಂಗ್​ನಲ್ಲಿ ಸ್ಟೀವ್​ ಸ್ಮಿತ್​​ ಹಿಡಿದ ಅದ್ಭುತ ಸ್ಲಿಪ್​​ ಕ್ಯಾಚ್​ಗೆ ಬಲಿಯಾದರು. ಬಳಿಕ ಕ್ರೀಸ್​ಗೆ ಬಂದ ರವೀಂದ್ರ ಜಡೇಜಾ ಅದೇ ಓವರ್​ನಲ್ಲಿ ಡಕೌಟ್​​ ಆಗಿ ಹೊರ ನಡೆದರು. ಆ ಬಳಿಕ ಕ್ರೀಸ್​​ನಲ್ಲಿದ್ದ ಅಜಿಂಕ್ಯ ರಹಾನೆ ಕೆಲಹೊತ್ತು ಹೋರಾಟ ನಡೆಸಿದರು. ಆದರೆ 46 ರನ್​ ಗಳಿಸಿದ್ದಾಗ ಮಿಚೆಲ್​ ಸ್ಟಾರ್ಕ್​ ಬೌಲಿಂಗ್​​ನಲ್ಲಿ ಕೀಪರ್ ಕ್ಯಾಚ್ ನೀಡಿ ಔಟಾದರು.

ಬಳಿಕ ಕಣಕ್ಕಿಳಿದ ಕೆಎಸ್​ ಭರತ್​ (23) , ಶಾರ್ದೂಲ್​ ಠಾಕೂರ್ (0), ಉಮೇಶ್​ ಯಾದವ್​ (1), ಮೊಹಮ್ಮದ್​ ಸಿರಾಜ್​ (1) ಆಸ್ಟ್ರೇಲಿಯಾ ಬೌಲರ್​ಗಳ ಮಾರಕ ಬೌಲಿಂಗ್​ ದಾಳಿಗೆ ತತ್ತರಿಸಿದರು. ಮೊಹಮ್ಮದ್​ ಶಮಿ ಅಜೇಯ 13 ರನ್ ಗಳಿಸಿದರು. 2ನೇ ಇನ್ನಿಂಗ್ಸ್​​ನಲ್ಲಿ ಆಸಿಸ್​ ಬೌಲರ್​ಗಳು ಅದ್ಭುತ ಪ್ರದರ್ಶನ ನೀಡಿದರು. ನಾಥನ್​ ಲಿಯಾನ್ 4 ವಿಕೆಟ್, ಸ್ಕಾಟ್​ ಬೋಲ್ಯಾಂಡ್​ 3 ವಿಕೆಟ್, ಮಿಚೆಲ್​ ಸ್ಟಾರ್ಕ್​ 2 ವಿಕೆಟ್​, ಪ್ಯಾಟ್​ ಕಮಿನ್ಸ್​ 1 ವಿಕೆಟ್​ ಪಡೆದು ಮಿಂಚಿದರು.

ಸ್ಕೋರ್​ ವಿವರ

• ಆಸ್ಟ್ರೇಲಿಯಾ ಮೊದಲ ಇನ್ನಿಂಗ್ಸ್​ - 469/10
• ಭಾರತ ತಂಡ ಮೊದಲ ಇನ್ನಿಂಗ್ಸ್​ - 296/10
• ಆಸ್ಟ್ರೇಲಿಯಾ ಎರಡನೇ ಇನ್ನಿಂಗ್ಸ್​ - 270/8 ಡಿಕ್ಲೇರ್​​
• ಭಾರತ ತಂಡ ಎರಡನೇ ಇನ್ನಿಂಗ್ಸ್​ - 234/10

3 ಫಾರ್ಮೆಟ್​​ನಲ್ಲೂ ಆಸ್ಟ್ರೇಲಿಯಾ ಚಾಂಪಿಯನ್​

ಡಬ್ಲ್ಯುಟಿಸಿ ಫೈನಲ್​ ಗೆಲ್ಲುವ ಮೂಲಕ ಆಸ್ಟ್ರೇಲಿಯಾ ಐತಿಹಾಸಿಕ ದಾಖಲೆ ಬರೆದಿದೆ. ಏಕದಿನ, ಟಿ20 ಮತ್ತು ಟೆಸ್ಟ್​ ಮೂರು ಫಾರ್ಮೆಟ್​ನಲ್ಲೂ ಚಾಂಪಿಯನ್​ ಆದ ವಿಶ್ವ ಕ್ರಿಕೆಟ್​​ನಲ್ಲಿ ಮೊದಲ ತಂಡ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.