ನತದೃಷ್ಟ ಕ್ಯಾಪ್ಟನ್ಸ್; ತಮ್ಮದೇ ನಾಯಕತ್ವದಲ್ಲಿ ಪ್ರೊ ಕಬಡ್ಡಿ ಲೀಗ್ ಪ್ರಶಸ್ತಿ ಗೆಲ್ಲಲು ಸಾಧ್ಯವಾಗದ ದಿಗ್ಗಜ ಆಟಗಾರರಿವರು!

Big Players Never Won PKL as Captain: ಬಹುನಿರೀಕ್ಷಿತ 11ನೇ ಆವೃತ್ತಿಯ ಪ್ರೊ ಕಬಡ್ಡಿ ಲೀಗ್ (PKL Season 11) ಅಕ್ಟೋಬರ್​ 18ರಿಂದ ಅದ್ಧೂರಿ ಆರಂಭ ಪಡೆದುಕೊಳ್ಳಲಿದೆ. ಮೂರು ನಗರಗಳಲ್ಲಿ ನಡೆಯುವ ಈ ಟೂರ್ನಿಗೆ ಕಬಡ್ಡಿ ಪ್ರೇಮಿಗಳು ಕಾತರದಿಂದ ಕಾಯುತ್ತಿದ್ದಾರೆ. 12 ತಂಡಗಳು ಹೊಸತನದೊಂದಿಗೆ ಕಣಕ್ಕಿಳಿಯಲು ಸಜ್ಜಾಗಿವೆ. ಲೀಗ್ ಇತಿಹಾಸದಲ್ಲಿ ಇದುವರೆಗೂ ಅತ್ಯಂತ ಯಶಸ್ವಿ ತಂಡವೆಂದರೆ, ಪಾಟ್ನಾ ಪೈರೇಟ್ಸ್. ಇದು ಒಟ್ಟು 3 ಬಾರಿ ಟ್ರೋಫಿ ಗೆದ್ದಿದೆ. ಆದಾಗ್ಯೂ, ವಿಭಿನ್ನ ನಾಯಕರ ನಾಯಕತ್ವದಲ್ಲಿ 3 ಬಾರಿ ಈ ಸಾಧನೆ ಮಾಡಿದೆ ಪಾಟ್ನಾ ಪೈರೇಟ್ಸ್. ಪ್ರಮುಖ ಆಟಗಾರರೇ ಟ್ರೋಫಿ ಗೆದ್ದ ತಂಡದಲ್ಲಿ ಸ್ಥಾನ ಗಿಟ್ಟಿಸಿಕೊಂಡಿದ್ದರು. ಆದರೆ ಈ ಮೂವರು ದಿಗ್ಗಜ ಆಟಗಾರರು ನಾಯಕರಾಗಿ ಒಮ್ಮೆಯೂ ಪಿಕೆಎಲ್ ಪ್ರಶಸ್ತಿ ಗೆದ್ದಿಲ್ಲ.

ಪವನ್ ಸೆಹ್ರಾವತ್ (ಪಿಕೆಎಲ್ 8 ಮತ್ತು ಪಿಕೆಎಲ್ 10)

ಪವನ್ ಸೆಹ್ರಾವತ್ ಪ್ರೊ ಕಬಡ್ಡಿ ಲೀಗ್ ಇತಿಹಾಸದಲ್ಲಿ ಮೂರನೇ ಅತ್ಯಂತ ಯಶಸ್ವಿ ರೈಡರ್ ಆಗಿದ್ದಾರೆ. 126 ಪಂದ್ಯಗಳಲ್ಲಿ ಒಟ್ಟು 1,189 ರೇಡ್ ಪಾಯಿಂಟ್ಸ್​ ಗಳಿಸಿದ್ದಾರೆ. ಆದರೆ, ನಾಯಕನಾಗಿ ಇನ್ನೂ ಪ್ರಶಸ್ತಿ ಗೆಲ್ಲುವಲ್ಲಿ ಯಶಸ್ವಿಯಾಗಿಲ್ಲ. ಪವನ್ ಲೀಗ್‌ನಲ್ಲಿ 2 ಬಾರಿ ಅಂದರೆ, ಬೆಂಗಳೂರು ಬುಲ್ಸ್ (ಪಿಕೆಎಲ್ 8) ಮತ್ತು ತೆಲುಗು ಟೈಟಾನ್ಸ್ (ಪಿಕೆಎಲ್ 10) ನಾಯಕತ್ವ ವಹಿಸಿದ್ದಾರೆ. ತನ್ನ ನಾಯಕತ್ವದಲ್ಲಿ 8ನೇ ಸೀಸನ್‌ನಲ್ಲಿ ಬೆಂಗಳೂರು ಬುಲ್ಸ್ ಸೆಮಿಫೈನಲ್‌ನಲ್ಲಿ ಸೋಲನುಭವಿಸಿದರೆ, ಪಿಕೆಎಲ್ 10ರಲ್ಲಿ ತೆಲುಗು ಟೈಟಾನ್ಸ್ ಕೇವಲ 2 ಪಂದ್ಯಗಳನ್ನು ಗೆದ್ದು ಪಾಯಿಂಟ್ ಪಟ್ಟಿಯಲ್ಲಿ ಕೊನೆಯ ಸ್ಥಾನದಲ್ಲಿತ್ತು.

ಇದನ್ನೂ ಓದಿ: ಗೂಳಿಗಳ ಬಳಗದಲ್ಲಿ ಪ್ರೊ ಕಬಡ್ಡಿಯ ಯಶಸ್ವಿ ರೈಡರ್; ಬೆಂಗಳೂರು ಬುಲ್ಸ್‌ ಕಪ್ ಗೆಲ್ಲಲು ಪರ್ದೀಪ್ ನರ್ವಾಲ್ ಪಣ

ದೀಪಕ್ ನಿವಾಸ್ ಹೂಡಾ

ದೀಪಕ್ ನಿವಾಸ್ ಹೂಡಾ ಅವರು ತಮ್ಮ ಪಿಕೆಎಲ್ ವೃತ್ತಿಜೀವನದಲ್ಲಿ 157 ಪಂದ್ಯಗಳಲ್ಲಿ ಕಣಕ್ಕಿಳಿದಿದ್ದು, ಒಟ್ಟು 1020 ರೇಡ್ ಪಾಯಿಂಟ್​ಗಳನ್ನು ಗಳಿಸಿದ್ದಾರೆ. ಪ್ರೊ ಕಬಡ್ಡಿ ಲೀಗ್‌ನ 5ನೇ ಆವೃತ್ತಿಯಲ್ಲಿ ಪುಣೇರಿ ಪಲ್ಟನ್ ನಾಯಕತ್ವದ ಜೊತೆಗೆ ದೀಪಕ್ ಪಿಕೆಎಲ್ 6, 7 ಮತ್ತು 8 ರಲ್ಲಿ ಸತತ 3 ಬಾರಿ ಜೈಪುರ ಪಿಂಕ್ ಪ್ಯಾಂಥರ್ಸ್ ನಾಯಕತ್ವ ವಹಿಸಿದ್ದರು. ಆದರೆ, ಈ ಅವಧಿಯಲ್ಲಿ ದೀಪಕ್ ಹೂಡಾ ನಾಯಕನಾಗಿ ಒಮ್ಮೆಯೂ ಪಿಕೆಎಲ್ ಪ್ರಶಸ್ತಿ ಗೆಲ್ಲಲು ಸಾಧ್ಯವಾಗಲಿಲ್ಲ. ಪಿಕೆಎಲ್ 5ರಲ್ಲಿ ಪುಣೇರಿ ಪಲ್ಟಾನ್ ಎಲಿಮಿನೇಟರ್​​ನಿಂದ ಹೊರಗುಳಿದಿತ್ತು. ಈ ಅವಧಿಯಲ್ಲಿ ಜೈಪುರ ಒಂದು ಬಾರಿಯೂ ಪ್ಲೇಆಫ್ ತಲುಪಲು ಸಾಧ್ಯವಾಗಲಿಲ್ಲ.

ಫಾಜೆಲ್ ಅತ್ರಾಚಲಿ

ಪಿಕೆಎಲ್ ಇತಿಹಾಸದಲ್ಲಿ ಅತ್ಯಂತ ಯಶಸ್ವಿ ಡಿಫೆಂಡರ್ ಫಾಜೆಲ್ ಅತ್ರಾಚಲಿ (169 ಪಂದ್ಯಗಳಲ್ಲಿ 486 ಟ್ಯಾಕಲ್ ಪಾಯಿಂಟ್ಸ್​) ಲೀಗ್‌ನ 5 ನೇ ಋತುವಿನಿಂದ ಪಿಕೆಎಲ್​ 10 ರವರೆಗೆ ಒಂದಲ್ಲ ಒಂದು ತಂಡಕ್ಕೆ ನಾಯಕತ್ವ ವಹಿಸಿದ್ದಾರೆ. ಆದಾಗ್ಯೂ, ಈ ಅವಧಿಯಲ್ಲಿ ಅವರ ನಾಯಕತ್ವದಲ್ಲಿ ಯಾವುದೇ ತಂಡ ಪಿಕೆಎಲ್ ಪ್ರಶಸ್ತಿ ಗೆದ್ದಿಲ್ಲ. ಫಾಜೆಲ್ ಅತ್ರಾಚಲಿ ಗುಜರಾತ್ ಜೈಂಟ್ಸ್, ಯು ಮುಂಬಾ ಮತ್ತು ಪುಣೇರಿ ಪಲ್ಟನ್ ತಂಡಗಳಿಗೆ ನಾಯಕತ್ವ ವಹಿಸಿದ್ದಾರೆ. ಆದರೆ ಈ ಅವಧಿಯಲ್ಲಿ ಫೈನಲ್​​ಗಳನ್ನು ಆಡಿದ್ದಾರೆ. ಆದರೆ, ಚಾಂಪಿಯನ್ ಆಗಲು ಸಾಧ್ಯವಾಗಲಿಲ್ಲ. ಈ ಆವೃತ್ತಿಯಲ್ಲಿ ಇತಿಹಾಸವನ್ನು ಬದಲಾಯಿಸಬಹುದೇ ಅಥವಾ ಇಲ್ಲವೇ ಎಂಬುದನ್ನು ಕಾದು ನೋಡಬೇಕಾಗಿದೆ.

ಇದನ್ನೂ ಓದಿ: PKL 11: ಪ್ರೊ ಕಬಡ್ಡಿ ಹೊಸ ಆವೃತ್ತಿಗೆ ಗೂಳಿಗಳ ಬಳಗ ಹೇಗಿದೆ; ಬೆಂಗಳೂರು ಬುಲ್ಸ್ ಶಕ್ತಿ-ದೌರ್ಬಲ್ಯಗಳಿವು