Shani Trayodashi: ಶನಿ ದೋಷವನ್ನು ನಿವಾರಿಸಲು ಶನಿ ತ್ರಯೋದಶಿ ಪೂಜೆ ಮತ್ತು ವ್ರತಾಚರಣೆ ನಡೆಸುವುದು ಹೇಗೆ, ಇಲ್ಲಿದೆ ವಿವರ

Shani Trayodashi: ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ ಡಿಸೆಂಬರ್ 28 ರಂದು ಶನಿ ತ್ರಯೋದಶಿ. ಇದು ಹೇಮಂತ ಋತು, ಮಾರ್ಗಶಿರ ಮಾಸ, ಕೃಷ್ಣ ಪಕ್ಷ, ಶನಿವಾರವೇ ಇದ್ದು, ಬಹಳ ವಿಶೇಷ. ಸಾಡೇಸತಿ ಶನಿ, ಶನಿ ದೆಸೆ ಸಂಕಷ್ಟ ಅನುಭವಿಸುತ್ತಿರುವವರು ಶನಿ ದೇವರ ಆರಾಧನೆ ಮಾಡುವುದು ಸಾಮಾನ್ಯ. ಶನಿ ತ್ರಯೋದಶಿ ವಿಶೇಷವಾದ ಕಾರಣ ಅನೇಕರು ಶನಿ ದೇವರನ್ನು ಒಲಿಸಿ ಸಂಕಷ್ಟ ಪರಿಹರಿಸಿಕೊಳ್ಳಲು ಪ್ರಯತ್ನಿಸುತ್ತಾರೆ. ಆ ಮೂಲಕ ಅದೃಷ್ಟ, ಶುಭಫಲ ಒದಗಿಸುವಂತೆ ಶನಿದೇವರನ್ನು ಬೇಡುತ್ತಾರೆ. ಶನಿ ತ್ರಯೋದಶಿಯಂದು ಶನಿ ದೇವರನ್ನು ಪೂಜಿಸುವುದು ಅದೃಷ್ಟವನ್ನು ತರುತ್ತದೆ. ದುಷ್ಟ ಶಕ್ತಿಯನ್ನು ದೂರ ಮಾಡುತ್ತದೆ ಎಂಬ ನಂಬಿಕೆ ಇದೆ. ಹಾಗಾಗಿ ಆಸ್ತಿಕ ಹಿಂದೂಗಳು, ಶನಿ ತ್ರಯೋದಶಿಯಂದು ಉಪವಾಸ ಮಾಡುವುದರಿಂದ ಒಳ್ಳೆಯದಾಗುತ್ತದೆ ಎಂದು ಭಾವಿಸುತ್ತಾರೆ. ಇದನ್ನು ಶನಿ ಪ್ರದೋಷ ಎಂದೂ ಕರೆಯಲಾಗುತ್ತದೆ. ತ್ರಯೋದಶಿ ಶನಿವಾರದಂದು ಬಂದಾಗ ಶನಿ ತ್ರಯೋದಶಿಯನ್ನು ಆಚರಿಸಲಾಗುತ್ತದೆ.

ಶನಿ ತ್ರಯೋದಶಿ ವ್ರತ

ಶನಿ ತ್ರಯೋದಶಿಯಂದು, ಹಿಂದೂಗಳು ಪರಮೇಶ್ವರ ಮತ್ತು ಪಾರ್ವತಿ ದೇವಿಯನ್ನು ಪೂಜಿಸುತ್ತಾರೆ. ವಿಶೇಷವಾಗಿ ಶನಿ ದೇವರನ್ನು ಪೂಜಿಸುತ್ತಾರೆ. ತ್ರಯೋದಶಿ ವ್ರತವನ್ನು ಆಚರಿಸುವುದರಿಂದ ಸಂಕಷ್ಟದಲ್ಲಿರುವವರ ಆತಂಕ ಮತ್ತು ಖಿನ್ನತೆ ದೂರವಾಗುತ್ತದೆ ಎಂಬ ನಂಬಿಕೆ ಇದೆ. ಅದೇ ರೀತಿ, ಮಾನಸಿಕ ಸಮಸ್ಯೆಗಳು ಸಹ ಕಡಿಮೆಯಾಗುವುದಲ್ಲದೆ, ಸಂತೋಷವಾಗಿರಬಹುದು ಎಂದು ಆಸ್ತಿಕರು ನಂಬುತ್ತಾರೆ. ಯೋಗಕ್ಷೇಮ ವೃದ್ಧಿಯ ಜೊತೆಗೆ, ಶನಿ ತ್ರಯೋದಶಿ ವ್ರತಾಚರಣೆ ಮೂಲಕ ನಿಮ್ಮ ಚಟುವಟಿಕೆಗಳಲ್ಲಿ ನೀವು ಯಶಸ್ಸನ್ನು ಪಡೆಯಬಹುದು ಎಂದು ಹೇಳಲಾಗುತ್ತದೆ. ಈ ವ್ರತವನ್ನು ಆಚರಿಸುವವರ ಆಸೆಗಳನ್ನು, ಬೇಡಿಕೆಗಳನ್ನು ಶಿವ ದೇವರು ಪೂರೈಸುತ್ತಾನೆ ಎಂದು ಅನೇಕ ಜನರು ನಂಬುತ್ತಾರೆ. ಶನಿ ತ್ರಯೋದಶಿ ಬಗ್ಗೆ ಇನ್ನೂ ಕೆಲವು ವಿಷಯಗಳನ್ನು ತಿಳಿದುಕೊಳ್ಳೋಣ.

ಶನಿ ತ್ರಯೋದಶಿ ಪೂಜಾ ಸಮಯ ಮತ್ತು ಪೂಜಾ ವಿಧಾನ

ಡಿಸೆಂಬರ್ 28 ರ ಶನಿವಾರ ನಸುಕಿನ 2:08 ನಿಮಿಷಕ್ಕೆ ತ್ರಯೋದಶಿ ತಿಥಿ ಶುರುವಾಗುತ್ತದೆ. ತ್ರಯೋದಶಿ ಡಿಸೆಂಬರ್ 29 ರ ಭಾನುವಾರ ನಸುಕಿನ 3:32 ರವರೆಗೆ ಇದೆ. ಈ ಲೆಕ್ಕಚಾರ ಪ್ರಕಾರ, ತ್ರಯೋದಶಿ ಶನಿವಾರಕ್ಕೆ ಅಂದರೆ ಡಿಸೆಂಬರ್ 28ಕ್ಕೆ ಪೂರ್ಣ ಸಿಗುತ್ತದೆ. ಹೀಗಾಗಿ ಅದನ್ನು ಶನಿ ತ್ರಯೋದಶಿ ಎಂದು ಪರಿಗಣಿಸಲಾಗಿದೆ.

ಶನಿ ತ್ರಯೋದಶಿ ಪೂಜಾ ವಿಧಾನ

1) ಶನಿ ತ್ರಯೋದಶಿಯಂದು ಪೂಜೆ ಮಾಡಲು ಬಯಸುತ್ತಿದ್ದರೆ, ಈ ವಿಷಯಗಳನ್ನು ಕಟ್ಟುನಿಟ್ಟಾಗಿ ಅನುಸರಿಸಬೇಕಾಗಬಹುದು. ಇದನ್ನು ಮಾಡುವುದರಿಂದ, ನೀವು ಶನಿ ದೇವರ ಆಶೀರ್ವಾದವನ್ನು ಪಡೆಯಲು ಸಾಧ್ಯವಿದೆ ಮತ್ತು ಸಮಸ್ಯೆಗಳು ದೂರಾಗಬಹುದು.

2) ಶನಿ ತ್ರಯೋದಶಿ ದಿನವೇ ಶನಿ ಪ್ರದೋಷವೂ ಇದ್ದು, ಶಿವ, ಪಾರ್ವತಿ ಮತ್ತು ಶನಿ ದೇವರನ್ನು ಪೂಜಿಸುವುದು ಸೂಕ್ತ.

3) ನೀವು ತ್ರಯೋದಶಿ ವ್ರತವನ್ನು ಆಚರಿಸಿದರೆ, ನಿಮ್ಮ ಆತಂಕ, ಖಿನ್ನತೆ, ಮಾನಸಿಕ ಸಮಸ್ಯೆಗಳು ದೂರಾಗಬಹುದು ಮತ್ತು ನೀವು ಸಂತೋಷವಾಗಿರಬಹುದು.

4) ಶನಿ ತ್ರಯೋದಶಿಯಂದು, ಬ್ರಹ್ಮ ಮುಹೂರ್ತದಲ್ಲಿ ಸ್ನಾನ ಮಾಡಿ, ಶನಿದೇವನನ್ನು ಪೂಜಿಸಿ, ಪೂಜಾ ಮಂದಿರವನ್ನು ಸ್ವಚ್ಛವಾಗಿರಿಸಿಕೊಂಡು ಉಪವಾಸವನ್ನು ಪ್ರಾರಂಭಿಸಬೇಕು.

5) ಶಿವ ಮತ್ತು ಪಾರ್ವತಿ ದೇವಿಯ ವಿಗ್ರಹಗಳನ್ನು ಇರಿಸಿ ದೀಪಾರಾಧನೆ ಮಾಡಬೇಕು. ಹಣ್ಣುಗಳು, ಹೂವುಗಳು ಮತ್ತು ಸಿಹಿ ಪದಾರ್ಥಗಳನ್ನು ಅರ್ಪಿಸಬೇಕು.

6) ಈ ದಿನ ಪೂಜೆ ಮಾಡುವಾಗ ಬಿಲ್ವ ಎಲೆಗಳನ್ನು ಶಿವನಿಗೆ ಅರ್ಪಿಸಬೇಕು.

7) ಸಂಜೆಯವರೆಗೆ ಹಣ್ಣುಗಳನ್ನು ಮಾತ್ರ ಸೇವಿಸಿ. ಮುಸ್ಸಂಜೆ ಹೊತ್ತಿನಲ್ಲಿ ಶಿವ ಪೂಜೆ ಮಾಡಿದ ನಂತರ ಉಪವಾಸವನ್ನು ಮುಕ್ತಾಯಗೊಳಿಸಿ.

(ಗಮನಿಸಿ: ಈ ಬರಹವು ಪ್ರಚಲಿತ ನಂಬಿಕೆ, ಶಾಸ್ತ್ರ ಮತ್ತು ಸಂಪ್ರದಾಯವನ್ನು ಆಧರಿಸಿದೆ. ಓದುಗರಿಗೆ ಮಾಹಿತಿ ನೀಡುವ ಉದ್ದೇಶದಿಂದ ಪ್ರಕಟಿಸಲಾಗಿದೆ. ಓದುಗರು ಅನುಸರಿಸುವ ಮೊದಲು ಹಿರಿಯರು, ಕುಲಪುರೋಹಿತರ ಅಭಿಪ್ರಾಯ ಪಡೆಯುವುದು ಒಳ್ಳೆಯದು)