ಮಹಾವಿಷ್ಣುವಿನ 2ನೇ ಅವತಾರ ಯಾವುದು; ಆಮೆ ರೂಪದಲ್ಲಿ ಬಂದು ದೇವತೆಗಳ ಪ್ರಾಣ ಕಾಪಾಡಿದ ಆಸಕ್ತಿಕರ ಕಥೆ ಓದಿ
ಜಗತ್ತಿಗೆ ಆಪತ್ತು ಬಂದಾಗ ಮತ್ತು ಧರ್ಮವನ್ನು ಮರುಸ್ಥಾಪಿಸಲು ವಿಷ್ಣುವು ಭೂಮಿಯ ಮೇಲೆ ಅವತರಿಸಿದನು ಎಂದು ಕೆಲವು ಪುರಾಣಗಳು ಹೇಳುತ್ತವೆ. ಮಹಾವಿಷ್ಣುವಿನ ದಶಾವತಾರದ ಬಗ್ಗೆ ಪುರಾಣ ಗ್ರಂಥಗಳಲ್ಲಿ ಹೇಳಿರುವ ಕಥೆ ಜನಪ್ರಿಯವಾಗಿದೆ. ವಿಷ್ಣುವಿನ ಎರಡನೆಯ ಅವತಾರವೇ ಕೂರ್ಮಾವತಾರ. ವಿಷ್ಣು ಕೂರ್ಮಾವತಾರವನ್ನು ತಾಳಲು ಕಾರಣವೇನು? ಆಸಕ್ತಿದಾಯಕ ಕಥೆಯನ್ನು ತಿಳಿಯಿರಿ.
ತ್ರಿಮೂರ್ತಿಗಳಲ್ಲಿ ಒಬ್ಬನಾದ ಮಹಾವಿಷ್ಣುವನ್ನು ಅನೇಕ ಜನರು ಪೂಜಿಸುತ್ತಾರೆ ಜಗತ್ಪಾಲಕನಾದ. ವಿಷ್ಣುವಿನ ಆಶೀರ್ವಾದ ಪಡೆಯಲು ವಿಶೇಷ ಪೂಜೆಗಳನ್ನು ಮಾಡಲಾಗುತ್ತದೆ. ವಿಷ್ಣುವಿನ ಮಹಿಮೆ ಅಪಾರ ಮತ್ತು ಅನಂತ. ಜಗತ್ತು ಸಂಕಷ್ಟಕ್ಕೆ ಸಿಲುಕಿದಾಗಲೆಲ್ಲಾ ನೆರವಿಗೆ ಬಂದಿದ್ದು ವಿಷ್ಣು ಎಂದು ಪುರಾಣಗಳ ಕಥೆಗಳು ಹೇಳುತ್ತವೆ. ಅಲ್ಲದೆ, ಧರ್ಮವನ್ನು ಮರುಸ್ಥಾಪಿಸಲು ಭೂಮಿಯ ಮೇಲೆ ಅವತರಿಸಿದ್ದಾನೆ. ಪುರಾಣದ ಗ್ರಂಥಗಳಲ್ಲಿ ಈತನ 52 ಅವತಾರಗಳನ್ನು ಉಲ್ಲೇಖಿಸಲಾಗಿದೆ. ಮಹಾ ವಿಷ್ಣುವಿನ ಅವತಾರಗಳಲ್ಲಿ ದಶಾವತಾರವು ಬಹಳ ವಿಶೇಷವಾಗಿದೆ. ಇದರ ಪ್ರತಿ ಅವತಾರದಲ್ಲೂ ಮಹಾ ವಿಷ್ಣುವು ಅಧರ್ಮವನ್ನು ನಾಶಪಡಿಸಿ, ಧರ್ಮವನ್ನು ಎತ್ತಿ ಹಿಡಿದಿದ್ದಾನೆ. ಈ ಭೂಮಿಯನ್ನು ಕಾಪಾಡಿದ್ದಾನೆ ಎಂದು ಕಥೆಗಳು ಹೇಳುತ್ತವೆ. ದಶಾವತಾರದ ಎರಡನೆಯ ಅವತಾರವೇ ಕೂರ್ಮಾವತಾರ. ಮಹಾ ವಿಷ್ಣು ಕೂರ್ಮನಾಗಲು ಕಾರಣವೇನು? ಯಾರಿಂದ ಈ ಭೂಮಿಯನ್ನು ರಕ್ಷಿಸಿದನು ಎಂದು ನೋಡೋಣ.
ದೂರ್ವಾಸ ಋಷಿಯ ಶಾಪ
ನರಸಿಂಹ ಪುರಾಣದ ಪ್ರಕಾರ, ಒಮ್ಮೆ ದೇವರುಗಳಿಗೆ ತಮ್ಮ ಮಹಿಮೆ ಮತ್ತು ಶಕ್ತಿಯ ಬಗ್ಗೆ ಅಹಂಕಾರವುಂಟಾಗುತ್ತದೆ. ಅವರು ತಮ್ಮ ಅಹಂಕಾರದಲ್ಲಿಯೇ ಮುಳುಗಿಬಿಡುತ್ತಾರೆ. ಯಾವುದೇ ಋಷಿ ಅಥವಾ ಸಂತರನ್ನು ಗೌರವಿಸುವುದಿಲ್ಲ. ಅದೇ ಸಮಯದಲ್ಲಿ ದೂರ್ವಾಸ ಋಷಿಗಳು ಒಮ್ಮೆ ಪಾರಿಜಾತ ಪುಷ್ಪಗಳ ಮಾಲೆಯನ್ನು ಸಿದ್ಧಪಡಿಸಿ ಇಂದ್ರನಿಗೆ ಅರ್ಪಿಸಲು ಮುಂದಾಗುತ್ತಾರೆ. ಅಹಂಕಾರದಲ್ಲಿ ಮುಳುಗಿದ್ದ ಇಂದ್ರನು ಆ ಮಾಲೆಯನ್ನು ಧರಿಸುವ ಬದಲು ಅದನ್ನು ಆನೆಯ ತಲೆಯ ಮೇಲೆ ಹಾಕಿದನು. ಆನೆಯು ಅದನ್ನು ತನ್ನ ಸೊಂಡಿಲಿನಲ್ಲಿ ಎತ್ತಿ ಕಾಲುಗಳ ಕೆಳಗೆ ಹಾಕಿ, ತುಳಿದು ಪುಡಿಮಾಡಿತು. ಇದನ್ನು ನೋಡಿದ ದೂರ್ವಾಸ ಋಷಿ ಕೋಪಗೊಂಡರು. ದೇವತೆಗಳು ತಮ್ಮ ಶಕ್ತಿಯನ್ನು ಕಳೆದುಕೊಳ್ಳಲಿ ಎಂದು ಶಾಪ ನೀಡಿದರು. ದೂರ್ವಾಸ ಋಷಿಯ ಈ ಶಾಪದಿಂದ ಎಲ್ಲಾ ದೇವತೆಗಳು ಶಕ್ತಿಹೀನರಾದರು. ಅವರ ಶಕ್ತಿ ಕಡಿಮೆಯಾಗಿ ಮಹಿಮೆಗಳೆಲ್ಲಾ ನಿಂತುಹೋಯಿತು. ಅಸುರರು ಅವರ ಮೇಲೆ ದಾಳಿ ಮಾಡಲು ಪ್ರಾರಂಭಿಸಿದರು. ಅಸುರರು ಬಲಶಾಲಿಯಾಗುತ್ತಾ ಹೋದರು, ದೇವರುಗಳು ಸಂಪೂರ್ಣವಾಗಿ ಶಕ್ತಿಹೀನರಾದರು. ಆಗ ದೇವರುಗಳಿಗೆಲ್ಲಾ ಇನ್ನು ಹೋರಾಡಲು ಸಾಧ್ಯವಿಲ್ಲವೆಂದು ಅನಿಸತೊಡಗಿತು. ದುಃಖಿತರಾದ ದೇವತೆಗಳು ಒಂದೆಡೆ ಸೇರಿ ವಿಷ್ಣುವಿನ ಮೊರೆಹೋದರು.
ದೇವತೆಗಳು ತಮ್ಮ ನೋವನ್ನು ಮಹಾ ವಿಷ್ಣುವಿನ ಬಳಿ ಹೇಳಿಕೊಂಡರು ಮತ್ತು ಸಹಾಯ ಮಾಡುವಂತೆ ಯಾಚಿಸಿದರು. ಅವರ ಮನವಿಯನ್ನು ಕೇಳಿದ ವಿಷ್ಣುವು ಸಮುದ್ರ ಮಂಥನ ಮಾಡಲು ಹೇಳಿದನು. ಸಾಗರ ಮಂಥನದಿಂದ ಅಮೃತ ಕಲಶ ಹೊರಬರುತ್ತದೆ. ಅದನ್ನು ಸೇವಿಸಿದರೆ ದೇವತೆಗಳು ಅಮರರಾಗುತ್ತಾರೆ. ನೀವು ನಿಮ್ಮ ಅಧಿಕಾರವನ್ನು ಮರಳಿ ಪಡೆಯಬಹುದು ಎಂದು ಮಹಾ ವಿಷ್ಣು ಅವರಿಗೆ ಸಲಹೆಯನ್ನು ನೀಡುತ್ತಾನೆ. ಆದರೆ ದೇವತೆಗಳು ಮಾತ್ರ ಸಮುದ್ರ ಮಂಥನ ಮಾಡಲಾರರು. ಹಾಗಾಗಿ ವಿಷ್ಣುವಿನ ಸಲಹೆಯಂತೆ ರಾಕ್ಷಸರೂ ಸಮುದ್ರ ಮಂಥನದಲ್ಲಿ ಪಾಲ್ಗೊಳ್ಳುವಂತೆ ಮನವೊಲಿಸಿದರು.
ಸಾಗರ ಮಂಥನದಲ್ಲಿ ಅಮೃತ ಕಲಶವು ಹೊರಬಂದಾಗ, ಅವರು ಅದನ್ನು ಸಮಾನವಾಗಿ ಹಂಚಿಕೊಳ್ಳುವುದಾಗಿ ರಾಕ್ಷಸರಿಗೆ ಪ್ರಸ್ತಾಪಿಸಿದರು. ನಂತರ, ಪರಸ್ಪರ ಒಪ್ಪಂದದಿಂದ ಮಂದರ ಪರ್ವತವನ್ನು ಸಮುದ್ರ ಮಂಥನಕ್ಕಾಗಿ ಬದಲಾಯಿಸಲಾಯಿತು. ನಾಗರಾಜ ವಾಸುಕಿಯನ್ನು ಹಗ್ಗವಾಗಿ ಬಳಸಿಕೊಂಡರು. ನಂತರ ಮಂದರ ಪರ್ವತದ ಸುತ್ತಲೂ ನಾಗರಾಜ ವಾಸುಕಿಯನ್ನು ಸುತ್ತಿ ದೇವತೆಗಳು ಮತ್ತು ರಾಕ್ಷಸರು ಸಮುದ್ರ ಮಂಥನ ಆರಂಭಿಸಿದರು. ಆದರೆ ಪರ್ವತದ ಭಾರದಿಂದಾಗಿ ಅದು ಕ್ಷೀರ ಸಾಗರದಲ್ಲಿ ಮುಳುಗಲು ಪ್ರಾರಂಭಿಸಿತು.
ಆಗ ಸಾಕ್ಷಾತ್‌ ಮಹಾ ವಿಷ್ಣುವು ಕೂರ್ಮವಾಗಿ ಅವತರಿಸುತ್ತಾನೆ. ಮಂದರ ಪರ್ವತವನ್ನು ಎತ್ತಿ ಹಿಡಿಯುತ್ತಾನೆ. ಸ್ವಲ್ಪ ಸಮಯದ ನಂತರ ಪರ್ವತವು ವೇಗವಾಗಿ ತಿರುಗಲು ಪ್ರಾರಂಭಿಸಿದಾಗ ಸಾಗರದ ಮಂಥನವು ಪ್ರಾರಂಭವಾಗುತ್ತದೆ. ಅದರಿಂದ ಅನೇಕ ವಸ್ತುಗಳು ಹೊರಬರುತ್ತವೆ. ಕೊನೆಯಲ್ಲಿ ಅಮೃತ ಕಲಶವನ್ನು ಹೊರತೆಗೆಯಲಾಗುತ್ತದೆ. ಅದನ್ನು ಇಂದ್ರನ ಮಕ್ಕಳು ತೆಗೆದುಕೊಂಡು ಓಡಿ ಹೋಗತೊಡಗಿದರು. ರಾಕ್ಷಸರು ಅವರ ಹಿಂದೆ ಓಡಿದರು. ದೇವತೆಗಳು ತರಾತುರಿಯಲ್ಲಿ ಅಮೃತವನ್ನು ಸೇವಿಸಿದರು. ಅದರೊಂದಿಗೆ ಅವರು ಮತ್ತೆ ದೈವಿಕ ಶಕ್ತಿ, ಸಂತೋಷ ಮತ್ತು ಸಮೃದ್ಧಿಯನ್ನು ಪಡೆಯುತ್ತಾರೆ. ವಿಷ್ಣುವಿನ ಸಹಾಯವಿಲ್ಲದೆ ಸಮುದ್ರ ಮಂಥನ ಎಂದಿಗೂ ಸಾಧ್ಯವಾಗುತ್ತಿರಲಿಲ್ಲ.
ಕೂರ್ಮ ಜಯಂತಿ
ವೈಶಾಖ ಮಾಸದ ಹುಣ್ಣಿಮೆಯಂದು ಕೂರ್ಮ ಜಯಂತಿಯನ್ನು ಆಚರಿಸಲಾಗುತ್ತದೆ. ಅಂದು ಮಹಾವಿಷ್ಣುವು ಸಮುದ್ರ ಮಂಥನದಲ್ಲಿ ದೇವತೆಗಳಿಗೆ ಮತ್ತು ರಾಕ್ಷಸರಿಗೆ ಸಹಾಯ ಮಾಡಲು ಕೂರ್ಮಾವತಾರವನ್ನು ತಾಳಿದನು ಎಂದು ಹೇಳಲಾಗುತ್ತದೆ. ಸಮುದ್ರದ ಈ ಮಂಥನದಿಂದ ಲಕ್ಷ್ಮಿ, ವಿಷ ಮತ್ತು ಅಮೃತ ಸೇರಿದಂತೆ 14 ವಸ್ತುಗಳು ಉದ್ಭವಿಸಿದವು. ಈ ಕಾರಣಕ್ಕಾಗಿಯೇ ಆಮೆಯನ್ನು ವಿಷ್ಣವಿನ ಅವತಾರವೆಂದು ಪರಿಗಣಿಸಲಾಗಿದೆ.
(ಗಮನಿಸಿ: ಇದು ನಂಬಿಕೆ ಮತ್ತು ಶಾಸ್ತ್ರವನ್ನು ಆಧರಿಸಿದ ಬರಹ. ಇದರಲ್ಲಿರುವ ಎಲ್ಲ ಅಂಶಗಳನ್ನೂ ಹಿಂದೂಸ್ತಾನ್ ಟೈಮ್ಸ್ ಕನ್ನಡ ಪುಷ್ಟಿಕರಿಸುವುದಿಲ್ಲ. ನಿಮ್ಮ ಸ್ವಂತ ವಿವೇಚನೆ ಬಳಸಿ ನಿರ್ಧಾರಗಳನ್ನು ತೆಗೆದುಕೊಳ್ಳಿ.)
