Ramayana: ರಾಮಾಯಣದಿಂದ ಪ್ರತಿಯೊಬ್ಬರು ಕಲಿಯಬಹುದಾದ 10 ಜೀವನ ಪಾಠಗಳಿವು, ಇದರಿಂದ ಬದುಕು ಬದಲಾಗುತ್ತೆ

ಭಾರತದ ಪ್ರಸಿದ್ಧ ಧಾರ್ಮಿಕ ಗ್ರಂಥಗಳಲ್ಲಿ ರಾಮಾಯಣ ಮುಖ್ಯವಾದುದು. ಇದು ಕೇವಲ ಧರ್ಮಗ್ರಂಥವಷ್ಟೇ ಅಲ್ಲ, ಬದುಕಿನ ಪಾಠ ಹೇಳುವ ಮಹಾಕಾವ್ಯವೂ ಹೌದು. ರಾಮಾಯಣವು ಪ್ರಭು ಶ್ರೀರಾಮನ ಆದರ್ಶ ಜೀವನದ ಕುರಿತು ಜಗತ್ತಿಗೆ ಪರಿಚಯಿಸುವ ಜೊತೆಗೆ ಎಲ್ಲ ಕಾಲಕ್ಕೂ ಸಲ್ಲುವಂತಹ ಜೀವನಪಾಠಗಳನ್ನೂ ಹೊಂದಿದೆ. ಇದು ಕೆಟ್ಟದ್ದರ ವಿರುದ್ಧ ಒಳ್ಳೆತನದ ಗೆಲುವು ಸಾರುವ ಅಂಶವನ್ನು ಮಾತ್ರ ಹೊಂದಿಲ್ಲ. ಎಂದೆಂದಿಗೂ ಪ್ರಸ್ತುತ ಎನ್ನಿಸುವ ಕಾಲಾತೀತ ಜೀವನ ಪಾಠಗಳು, ನೈತಿಕ ಮಾರ್ಗದರ್ಶನ ಮತ್ತು ಆಧ್ಯಾತ್ಮಿಕ ಒಳನೋಟಗಳನ್ನು ಹೊಂದಿದೆ. ರಾಮಾಯಣವೂ ತೇತ್ರಾಯುಗದ ಕಥೆಯನ್ನು ಹೊಂದಿದ್ದರೂ ಕಲಿಯುಗದಲ್ಲೂ ಇದರಿಂದ ಕಲಿಯಬಹುದಾದ ಸಾಕಷ್ಟು ಜೀವನಪಾಠಗಳಿವೆ. ರಾಮಾಯಣದಿಂದ ನಾವು ಅಳವಡಿಸಿಕೊಳ್ಳಬಹುದಾದ 10 ಜೀವನಪಾಠಗಳ ಬಗ್ಗೆ ಇಲ್ಲಿ ಹೇಳಲಾಗಿದೆ.

ಆಸೆಗಿಂತ ಕರ್ತವ್ಯ ಮುಖ್ಯ

ಶ್ರೀರಾಮನು ಎಲ್ಲದ್ದಕ್ಕಿಂತ ಧರ್ಮ, ಕರ್ತವ್ಯ ಮುಖ್ಯ ಎಂದು ನಂಬಿದ್ದನು. ವೈಯಕ್ತಿಕ ಬದುಕಿನಲ್ಲಿ ಸಾಕಷ್ಟು ಕಳೆದುಕೊಂಡಿದ್ದರು, ರಾಮ ತನ್ನ ಕರ್ತವ್ಯಗಳಿಗೆ ತೋರಿದ ಅಚಲ ಬದ್ಧತೆಯು ಜವಾಬ್ದಾರಿಗಳನ್ನು ಎತ್ತಿಹಿಡಿಯುವ ಮಹತ್ವವನ್ನು ನಮಗೆ ಕಲಿಸುತ್ತದೆ. ತನ್ನ ತಂದೆಯ ಮಾತನ್ನು ಗೌರವಿಸಲು ವನವಾಸವನ್ನು ಕೈಗೊಳ್ಳುವ ಮೂಲಕ, ರಾಮನು ವೈಯಕ್ತಿಕ ಸೌಕರ್ಯಕ್ಕಿಂತ ಕರ್ತವ್ಯದ ಮೌಲ್ಯ ಅವಶ್ಯ ಎಂದು ಹೇಳಿದ್ದ. ಇದನ್ನು ನಾವು ರಾಮ ಹಾಗೂ ರಾಮಾಯಣದಿಂದ ಕಲಿತು ಅಳವಡಿಸಿಕೊಳ್ಳಬಹುದಾಗಿದೆ.

ಇದನ್ನೂ ಓದಿ: ರಾಮಾಯಣದ ಈ ಮೂಲ ಮಂತ್ರ ಜೀವನದಲ್ಲಿ ಅಳವಡಿಸಿಕೊಂಡರೆ ನಿಮ್ಮ ಯಶಸ್ಸನ್ನು ಯಾರಿಂದಲೂ ತೆಡೆಯಲು ಸಾಧ್ಯವಿಲ್ಲ

ಒಗ್ಗಟ್ಟಿನಲ್ಲಿ ಬಲವಿದೆ

ರಾಮ, ಲಕ್ಷ್ಮಣ, ಹನುವಂತ ಮತ್ತು ವಾನರ ಸೇನೆಯ ನಡುವಿನ ಮೈತ್ರಿಯು ಏಕತೆ ಮತ್ತು ಒಗ್ಗಟ್ಟಿನ ಪ್ರಯತ್ನದ ಬಲವನ್ನು ತೋರಿಸುತ್ತದೆ. ಸೀತೆಯನ್ನು ರಕ್ಷಿಸುವಲ್ಲಿ ರಾಮ, ಲಕ್ಷಣರೊಂದಿಗೆ ವಾನರ ಸೇನೆಯು ಸೇರಿ ಹೋರಾಡಿ ಗೆಲುವು ಸಾಧಿಸಿದ್ದು, ಒಟ್ಟಾಗಿ ಕೆಲಸ ಮಾಡಿದಾಗ ಎಂತಹ ದೊಡ್ಡ ಸವಾಲನ್ನಾದರೂ ಸುಲಭದಲ್ಲಿ ಜಯಿಸಬಹುದು ಎಂಬುದನ್ನು ನಮಗೆ ನೆನಪಿಸುತ್ತದೆ. ಇದು ಈ ಕಾಲದಲ್ಲಿ ಮನುಷ್ಯ ಕಲಿಯಬೇಕಾದ ಬಹುದೊಡ್ಡ ಪಾಠ.

ನಿಷ್ಠೆ ಮತ್ತು ಭಕ್ತಿಯ ಮಹತ್ವ

ಭಗವಾನ್ ರಾಮನ ಮೇಲಿನ ಹನುಮನ ನಿಸ್ವಾರ್ಥ ಭಕ್ತಿಯು ನಿಷ್ಠೆ ಮತ್ತು ಅಚಲ ನಂಬಿಕೆಯ ಸ್ಫೂರ್ತಿದಾಯಕ ಉದಾಹರಣೆಯಾಗಿದೆ. ಆಂಜನೇಯನ ಸಮರ್ಪಣಾ ಮನೋಭಾವ, ಭಕ್ತಿ ಮತ್ತು ನಿಷ್ಠೆಯು ಮಾದರಿ ಎನ್ನಿಸಿಕೊಂಡಿದೆ.

ಸಂಬಂಧಗಳಿಗೆ ಗೌರವ ನೀಡುವುದು

ರಾಮಾಯಣವು ಕೌಟುಂಬಿಕ ಮತ್ತು ಸಾಮಾಜಿಕ ಬಂಧಗಳ ಮಹತ್ವವನ್ನು ಒತ್ತಿಹೇಳುತ್ತದೆ. ರಾಮನಿಗೆ ತನ್ನ ಹೆತ್ತವರ ಮೇಲಿನ ಗೌರವದಿಂದ ಹಿಡಿದು ಸೀತೆಗೆ ರಾಮನ ಮೇಲಿನ ಅಚಲ ಪ್ರೀತಿ ಮತ್ತು ಲಕ್ಷ್ಮಣನಿಗೆ ತನ್ನ ಸಹೋದರನ ಮೇಲಿನ ಭಕ್ತಿಯವರೆಗೆ, ಇದು ಸಂಬಂಧಗಳನ್ನು ಗೌರವಿಸುವುದರಿಂದ ಪಡೆದ ಶಕ್ತಿಯನ್ನು ಎತ್ತಿ ತೋರಿಸುತ್ತದೆ. ಸಂಬಂಧಗಳ ಮಹತ್ವವನ್ನು ನಾವು ರಾಮಾಯಣದಿಂದ ಕಲಿಯಬೇಕಿದೆ.

ದುರಾಸೆ ಮತ್ತು ದುರಹಂಕಾರದ ಪರಿಣಾಮಗಳು

ರಾವಣನು ಅಪಾರ ಜ್ಞಾನ ಮತ್ತು ಶಕ್ತಿಯನ್ನು ಹೊಂದಿದ್ದರೂ, ತನ್ನ ದುರಹಂಕಾರ ಮತ್ತು ಮಿತಿ ಇಲ್ಲದ ಆಸೆಗಳಿಂದಾಗಿ ತನ್ನ ಬದುಕನ್ನು ಹಾಳು ಮಾಡಿಕೊಳ್ಳುತ್ತಾನೆ. ಒಬ್ಬ ವ್ಯಕ್ತಿಯು ಎಷ್ಟೇ ಶಕ್ತಿಶಾಲಿಯಾಗಿದ್ದರೂ, ದುರಾಸೆ ಮತ್ತು ಅಹಂಕಾರವು ಅವನ ಪತನಕ್ಕೆ ಹೇಗೆ ಕಾರಣವಾಗಬಹುದು ಎಂಬುದರ ಕುರಿತ ರಾವಣನ ಕಥೆಯು ಪ್ರತಿಯೊಬ್ಬರಿಗೂ ಬದುಕಿನ ಎಚ್ಚರಿಕೆಯಾಗಿದೆ.

ಇದನ್ನೂ ಓದಿ: ರಾಮಾಯಣ: ಭಗವಂತ ರಾಮನಿಂದ ನಾವು ಕಲಿಯಬಹುದಾದ ಸಂಬಂಧ, ಅನುಬಂಧದ 5 ಪಾಠಗಳಿವು, ಅನುಸರಿಸಿದರೆ ಬದುಕು ಅದ್ಭುತ

ತ್ಯಾಗದ ಮಹತ್ವ

ಸೆರೆಯಲ್ಲಿದ್ದಾಗ ಸೀತೆ ಕಷ್ಟಗಳನ್ನು ಸಹಿಸಿಕೊಳ್ಳುವ ಇಚ್ಛಾಶಕ್ತಿ ಮತ್ತು ರಾಮನೊಂದಿಗೆ ವನವಾಸಕ್ಕೆ ಹೋಗಲು ಲಕ್ಷ್ಮಣನ ನಿರ್ಧಾರವು ಪ್ರೀತಿಪಾತ್ರರಿಗಾಗಿ ಮತ್ತು ಮಹಾಹಿತಕ್ಕಾಗಿ ತ್ಯಾಗದ ಮೌಲ್ಯವನ್ನು ಎತ್ತಿ ತೋರಿಸುತ್ತದೆ. ತ್ಯಾಗದಿಂದ ಸಾಕಷ್ಟು ಕಳೆದುಕೊಂಡರು ತ್ಯಾಗದ ಹಿಂದಿನ ಫಲ ಸಿಹಿಯಾಗಿರುತ್ತದೆ ಎಂಬುದನ್ನು ನಾವು ರಾಮಾಯಣದಿಂದ ಕಲಿಯಬಹುದಾಗಿದೆ.

ಕ್ಷಮೆಯ ಮಹತ್ವ

ರಾಮಾಯಣವು ಕ್ಷಮೆಯನ್ನು ಒಂದು ಸದ್ಗುಣವೆಂದು ಕಲಿಸುತ್ತದೆ. ಕೈಕೇಯಿಯಿಂದ ಅನ್ಯಾಯಕ್ಕೊಳಗಾದರೂ, ರಾಮನು ಅವಳನ್ನು ಅವಳನ್ನು ಗೌರವಿಸುತ್ತಿದ್ದ, ಆಕೆಯ ಮಾತಿಗೆ ಬೆಲೆ ಕೊಟ್ಟು ಪಟ್ಟಾಭಿಷೇಕವನ್ನು ಬಿಟ್ಟು ಕಾಡಿಗೆ ಹೊರಡುತ್ತಾನೆ. ಈ ಪಾಠವು ನಮಗೆ ದ್ವೇಷಗಳನ್ನು ಬಿಟ್ಟು ಶಾಂತಿಯನ್ನು ಕಂಡುಕೊಳ್ಳಲು, ಕ್ಷಮೆಯನ್ನು ಸ್ವೀಕರಿಸಲು ಪ್ರೋತ್ಸಾಹಿಸುತ್ತದೆ.

ಕಷ್ಟಕಾಲದಲ್ಲೂ ಶಾಂತವಾಗಿರುವುದು

ವಿಪತ್ತುಗಳ ನಡುವೆಯೂ ರಾಮನ ಶಾಂತ ಮತ್ತು ಸಂಯಮದ ವರ್ತನೆಯು, ಸವಾಲಿನ ಸಮಯದಲ್ಲಿಯೂ ಸಹ ನಾವು ಧೃತಿಗೆಡದೆ, ತಾಳ್ಮೆಯಿಂದ ಇರಲು ಸ್ಫೂರ್ತಿ ನೀಡುತ್ತದೆ. ರಾಮನ ಜೀವನವು ಸಮಚಿತ್ತತೆಯನ್ನು ಕಾಪಾಡಿಕೊಳ್ಳುವ ಮಹತ್ವವನ್ನು ಪ್ರತಿಬಿಂಬಿಸುತ್ತದೆ.

ಮಹಿಳೆಯರ ಘನತೆಯ ಮೌಲ್ಯ

ರಾಮಾಯಣದಲ್ಲಿ ಶ್ರೀರಾಮನಷ್ಟೇ ಸೀತಾಮಾತೆಯ ಪಾತ್ರವೂ ಮಹತ್ವದ್ದು. ಸೀತಾಮಾತೆಯು ಅಂದು ನಡೆದುಕೊಂಡ ರೀತಿಯು ಮಹಿಳೆಯರ ಘನತೆಯ ಮೌಲ್ಯವನ್ನು ಎತ್ತಿ ಹಿಡಿಯುವಂತೆ ಮಾಡಿತ್ತು. ರಾಮಾಯಣವು ಮಹಿಳೆಯರನ್ನು ಗೌರವಿಸಬೇಕು ಎಂಬ ಪಾಠವನ್ನು ನಮಗೆ ಕಲಿಸುತ್ತದೆ.

ದುಷ್ಟತನದ ಮೇಲೆ ಒಳ್ಳೆಯದರ ಗೆಲುವು

ರಾಮಾಯಣವು ಕೆಟ್ಟತನ ಮೇಲೆ ಒಳ್ಳೆಯದರ ಗೆಲುವನ್ನು ಸಂಕೇತಿಸುತ್ತದೆ. ಎಷ್ಟೇ ಸಮಯ ತೆಗೆದುಕೊಂಡರೂ ಸತ್ಯ ಮತ್ತು ಸದ್ಗುಣಗಳಿಗೆ ಅಂತಿಮವಾಗಿ ಜಯ ಸಿಕ್ಕೇ ಸಿಗುತ್ತದೆ, ಆ ಕಾರಣಕ್ಕೆ ನಾವು ಎಂತಹ ಸಂದರ್ಭದಲ್ಲೂ ಕೆಟ್ಟದಾರಿ ತುಳಿಯಬಾರದು ಎಂಬುದನ್ನು ಇದು ನಮಗೆ ನೆನಪಿಸುತ್ತದೆ.

ರಾಮಾಯಣವು ಕೇವಲ ಭೂತಕಾಲದ ಕಥೆಯಲ್ಲ, ಬದಲಾಗಿ ಜೀವನದ ಸಂಕೀರ್ಣತೆಗಳನ್ನು ನಿಭಾಯಿಸಲು ಒಂದು ಮಾರ್ಗದರ್ಶಿ ಪುಸ್ತಕವಾಗಿದೆ. ಧರ್ಮ, ಸಂಬಂಧಗಳು, ನಾಯಕತ್ವ ಮತ್ತು ನೈತಿಕ ನಡವಳಿಕೆ ಹೀಗೆ ಹಲವು ಅಂಶಗಳನ್ನು ಹೊಂದಿರುವ ರಾಮಾಯಣದ ಪಾಠಗಳು ಎಲ್ಲಾ ಕಾಲಕ್ಕೂ ನಮಗೆ ಸ್ಫೂರ್ತಿ ನೀಡುವಂತಿದೆ.

ಇದನ್ನೂ ಓದಿ: ಉತ್ತಮ ಜೀವನಕ್ಕಾಗಿ ತಿಳಿಯಬೇಕಾದ ಅಂಶಗಳು; ಚೈತ್ರ ಮಾಸದಲ್ಲಿ ರಾಮಾಯಣ ಓದಿದರೆ ಎಷ್ಟೊಂದು ಪ್ರಯೋಜನಗಳು