ಅಕ್ಕಿ-ಬೇಳೆ ಅಷ್ಟೇ ಅಲ್ಲ, ನಾವೂ ನೆನೆಯಬೇಕು ಜೊತೆಗೆ ನಮ್ಮ ಮನಸ್ಸನ್ನೂ ನೆನೆಸಬೇಕು: ಅನುದಿನ ಅಧ್ಯಾತ್ಮ

Rudra Prashnam meaning in Kannada 

paragraph

<p>ಕನ್ನಡದಲ್ಲಿ 'ನೆನೆ' ಎನ್ನುವ ಒಂದೊಳ್ಳೆ ಪದವಿದೆ. ಪ್ರೇಯಸಿಯೊಬ್ಬಳು ತನ್ನ ಪ್ರಿಯಕರನನ್ನು ನೆನೆಯುತ್ತಾಳೆ. ಅದೆಷ್ಟರಮಟ್ಟಿಗೆ ಎಂದರೆ ಅವಳು ಅವನನ್ನೇ ನೆನೆಯುತ್ತಾ, ಅವನ ನೆನಪಿನಲ್ಲಿಯೇ ಮುಳುಗಿ ಹೋಗುತ್ತಾಳೆ. ಅದೇ ಹೊತ್ತಿಗೆ ಅನ್ನ ಮಾಡಬೇಕೆಂಬ ಪ್ರಜ್ಞೆ ಜಾಗೃತವಾಗಿ ಅಕ್ಕಿಯನ್ನೂ ನೆನೆ ಹಾಕುತ್ತಾಳೆ. ಒಲೆ ಮೇಲಿಟ್ಟ ಪಾತ್ರೆಯಲ್ಲಿ ಅಕ್ಕಿಯು ಬೆಂದರೆ, ಇವಳ ಮನಸ್ಸು ಪ್ರಿಯಕರನ ನೆನಪಿನ ಶಾಖಕ್ಕೆ ಬೇಯುತ್ತದೆ. ಹೀಗೆ ನೆನಪು ನಮ್ಮ ಮನಸ್ಸನ್ನು ಹಸಿಯಾಗಿಸುತ್ತದೆ, ಬಿಸಿಯಾಗಿಸುತ್ತದೆ. ಇದೇ ನೆನೆಯುವ ಮತ್ತು ನೆನೆಸುವ ಪ್ರಕ್ರಿಯೆಯನ್ನು ತುಸು ಅಧ್ಯಾತ್ಮದ ಕಡೆಗೆ ತಿರುಗಿಸಿದರೆ ಶಿವನ ಒಲುಮೆ ಸಿಗುತ್ತದೆ.</p>

<p>ನೆನೆ ಎನ್ನುವ ಪದಕ್ಕೆ ಆವೃತ್ತವಾಗುವುದು, ಹಸಿಯಾಗುವುದು, ಪಕ್ವವಾಗುವುದು, ಹಳೆಯ ಘಟನೆಗಳು ಸ್ಮೃತಿಪಟಲದ ಮೇಲೆ ಮತ್ತೆ ಮೂಡುವುದು, ಸ್ಮರಿಸುವುದು, ನೆನಪಾಗುವುದು... ಹೀಗೆ ಹತ್ತಾರು ಅರ್ಥಗಳಿವೆ. ಕುಮಾರವ್ಯಾಸನು ನಾಮಸ್ಮರಣೆಯ ಮಹಿಮೆಯನ್ನು ಹೇಳುವಾಗ "ಹರಿನಾಮವನು ನೆನೆವರು ಕಾಲಚಕ್ರದ ಜವನ ಬೇಗೆಯ ಜುಣುಗಿ ಜಾರುವರು" (ಹರಿನಾಮವನ್ನು ನೆನೆದರೆ ಆ ಯಮನ ದಾಳಿಯಿಂದ ತಪ್ಪಿಸಿಕೊಂಡು ಬಿಡುತ್ತಾರೆ) ಎನ್ನುತ್ತಾನೆ.</p>

<p>ನೆನೆಯುತ್ತಲೇ ಇರುವ ದೇವರು ಈಶ್ವರ. ತಲೆಯ ಮೇಲೆ ಗಂಗೆಯನ್ನು ಹೊತ್ತ ಅವನು ಸದಾ ನೆಂದು ಮಿದುವಾಗಿಯೇ ಇರುತ್ತಾನೆ. ಪುರಾಣಗಳು ಶಿವನನ್ನು 'ಅಭಿಷೇಕ ಪ್ರಿಯ' ಎಂದು ಕೊಂಡಾಡಿವೆ. ನಮಕ-ಚಮಕಗಳನ್ನು ಪಾರಾಯಣ ಮಾಡುವ ಪದ್ಧತಿಗೆ "ರುದ್ರಾಭಿಷೇಕ" ಎಂಬ ಪದವನ್ನೇ ನಮ್ಮ ಪರಂಪರೆಯು ರೂಢಿಗೆ ತಂದಿದೆ. ಅಭಿಷೇಕ ಎಂದರೆ ಮತ್ತೇನು? ನೀರು, ಹಾಲು, ಜೇನು ಇತ್ಯಾದಿಗಳಿಂದ ಲಿಂಗವನ್ನು (ದೇವರ ಪ್ರತಿಮೆಯನ್ನು) ನೆನೆಸುತ್ತಾ ಅವನ ನಾಮಸ್ಮರಣೆಯನ್ನು ನಾವೂ ನೆನೆಯುವುದು.</p>

<p>ನೆನೆಯುವ ಪ್ರಕ್ರಿಯೆಯನ್ನು ಮತ್ತೊಂದು ಎತ್ತರಕ್ಕೆ ಕೊಂಡೊಯುತ್ತದೆ ರುದ್ರಾಭಿಷೇಕಕ್ಕೆ ಮೊದಲು ಹೇಳುವ ಧ್ಯಾನ ಶ್ಲೋಕ. ಈ ಸಂಸ್ಕೃತ ಶ್ಲೋಕವು ಹೀಗಿದೆ.</p>

<h2><i>"ಆಪಾತಾಲನಭಃಸ್ಥಲಾಂತಭುವನಬ್ರಹ್ಮಾಂಡಮಾವಿಃಸ್ಫುರತ್</i></h2><h2><i>ಜ್ಯೋತಿಃಸ್ಫಾಟಿಕಲಿಂಗಮೌಳಿವಿಲಸದ್ ಪೂರ್ಣೇನ್ದುವಾನ್ತಾಮೃತೈಃ |</i></h2><h2><i>ಅಸ್ತೋಕಾಪ್ಲುತಮೇಕಮೀಶಮನಿಶಂ ರುದ್ರಾನುವಾಕಾನ್ ಜಪನ್</i></h2><h2><i>ಧ್ಯಾಯೇದೀಪ್ಸಿತಸಿದ್ಧಯೇsದ್ರುತಪದಂ ವಿಪ್ರೋsಭಿಷಿಂಚೇತ್ ಶಿವಮ್ ||"</i></h2><p>ದೇವರನ್ನು ಹೇಗೆ ಚಿಂತಿಸಬೇಕೆಂಬ ಪರಿಕಲ್ಪನೆ ಕೊಡುವ ಈ ಶ್ಲೋಕದ ಭಾವವನ್ನು ವಿದ್ವಾಂಸರಾದ ಲಕ್ಷ್ಮೀನರಸಿಂಹ ಶಾಸ್ತ್ರಿಗಳು ಕನ್ನಡದಲ್ಲಿ ಹೀಗೆ ವಿವರಿಸಿದ್ದಾರೆ. "ಪರಮೇಶ್ವರನು ದೇವತೆಗಳು ಅನುಗ್ರಹಕ್ಕಾಗಿ ಲಿಂಗಾಕಾರವಾಗಿ ಜ್ಯೋತಿಃಸ್ವರೂಪದಿಂದ ತೋರಿಕೊಂಡಾಗ ಪಾತಾಳದಿಂದ ಹೊರಟ ಆ ಪ್ರಭೆಯು ಭೂಮ್ಯಾಕಾಶಗಳನ್ನೂ ವ್ಯಾಪಿಸಿ ದ್ಯುಲೋಕವನ್ನೂ ಮೀರಿ ಹೋಯಿತು. ಬ್ರಹ್ಮಾಂಡವನ್ನೇ ಬೆಳಗಿದ ಇಂಥ ಶುದ್ಧತೇಜೋಮಯವಾದ ಲಿಂಗವು ಪವಿತ್ರಜಲದಿಂದ ತೋಯ್ದು ಅಭಿಷಿಕ್ತವಾಗುತ್ತಿರುವುದು. ಇದೇ ಶಿವಲಿಂಗಾಭಿಷೇಕ. ಇದನ್ನು ಪ್ರತಿನಿಧಿಸುವುದಕ್ಕಾಗಿ ಬಾಹ್ಯವಾಗಿ ಶಿಲಾಮಯವಾದ ಲಿಂಗವನ್ನು ನದೀಜಲದಿಂದ ಧಾರಾಕಾರವಾಗಿ ಅಭಿಷೇಕ ಮಾಡುತ್ತಾರೆ. ನಾವು ಸ್ವತಃ ಅಭಿಷೇಕ ಮಾಡಿದರೂ, ನೋಡಿದರೂ ದಿವ್ಯಲಿಂಗವನ್ನು ಧ್ಯಾನಿಸುತ್ತಾ ತನ್ಮಯರಾಗುವುದು ಮುಖ್ಯ".</p>

<p>ಶಿವನನ್ನು ನೀರಿನಿಂದ ನೆನೆಸುತ್ತಾ, ಶಿವಧ್ಯಾನದಲ್ಲಿಯೇ ಮುಳುಗುವ ಭಕ್ತರಿಗೆ ಅವರು ಬಯಸಿದ್ದೆಲ್ಲವೂ ಸಿಗುತ್ತದೆ ಎಂದು ಈ ಧ್ಯಾನ ಶ್ಲೋಕ ಭರವಸೆ ನೀಡುತ್ತದೆ. ಆದರೆ ದೇವರನ್ನು ನೆನೆಯುವುದು ಮಾತ್ರವಲ್ಲ, ಧ್ಯಾನದಲ್ಲಿ ಸಂಪೂರ್ಣವಾಗಿ ಮುಳುಗಿದವರಿಗೆ ಅವನ 'ದರ್ಶನ" ಹೊರತುಪಡಿಸಿ ಮತ್ತೇನಾದರೂ ಬೇಡುವ ಬುದ್ಧಿ ಬಂದೀತೇ? ಹೀಗಾಗಿ ಎಲ್ಲದರಲ್ಲಿಯೂ ಶಿವನನ್ನು ಕಾಣುವ ಶಕ್ತಿಯನ್ನು ದೇವರು ನಮಗೆ ಕೊಡುವುದೇ ಅಭಿಷೇಕದ ಫಲವೂ ಆಗುತ್ತದೆ.</p>

<p>ಈ ಬರಹ ಓದುತ್ತಿರುವ ನೀವು, ಇನ್ಮುಂದೆ ಅಡುಗೆ ಮಾಡುವ ಅಕ್ಕಿಯನ್ನೋ, ಬೇಳೆಯನ್ನೋ ನೆನೆಸುವಾಗ ದೇವರ ಚಿಂತನೆಯಲ್ಲಿ ನಮ್ಮ ಮನಸ್ಸೂ ಇದೇ ಅಕ್ಕಿ-ಬೇಳೆಯಂತೆ ನೆನೆಯಲಿ ಎಂಬ ಭಾವನೆ ಬರಲಿ. ನೀವು ಎಂದಾದರೂ ಮಳೆಯಲ್ಲಿ ತೋಯ್ದರೆ ದೇವರ ಚಿಂತನೆಯು ನಮ್ಮನ್ನು ಹೀಗೆಯೇ ಇಡಿಯಾಗಿ ಆವರಿಸಬೇಕೆಂಬ ಚಿಂತನೆ ಬರಲಿ. ಸಕ್ಕರೆ ಪಾಕದಲ್ಲಿ ಹದವಾಗಿ ಮಿಂದ ಜಿಲೇಬಿ ಆಸ್ವಾದಿಸುವಾಗ ನಮ್ಮ ಮನಸ್ಸೂ ಸಹ ಪರಮಾತ್ಮನ ಚಿಂತನೆಯಿಂದ ಇದೇ ರೀತಿ ಸಿಹಿಯಾಗಲಿ ಎಂದುಕೊಳ್ಳಿ. ಈ ಥರದ ಯೋಚನೆಗಳು ಬಂದರೆ ಸಾಕು, ನೆನೆಸುವುದು, ನೆನೆಯುವುದೂ ಬದುಕಿನ ಅತ್ಯಂತ ಖುಷಿ ಸಂಗತಿಗಳಲ್ಲಿ ಒಂದು ಆಗಿಬಿಡುತ್ತೆ.</p>

ಭಗವದ್ಗೀತೆ: ಚಂಚಲ ಮನಸ್ಸನ್ನು ನಿಯಂತ್ರಿಸುವವನು ಮನಃಶಾಂತಿ ಸಾಧಿಸಬಲ್ಲ; ಗೀತೆಯಲ್ಲಿನ ಸಾರಾಂಶ ತಿಳಿಯಿರಿ

<p>ಕುರುಕ್ಷೇತ್ರದ ಯುದ್ಧದಲ್ಲಿ ಕೃಷ್ಣನು ಅರ್ಜುನನಿಗೆ ನೀಡಿದ ಧರ್ಮೋಪದೇಶದ ಸಾರವೇ ಭಗವದ್ಗೀತೆಯಾಗಿದೆ. ಚಂಚಲ ಮನಸ್ಸನ್ನು ನಿಯಂತ್ರಿಸುವವನು ಮನಃಶಾಂತಿ ಸಾಧಿಸಬಲ್ಲ ಎಂಬುದರ ಅರ್ಥ ತಿಳಿಯಿರಿ.</p>

Horoscope Today: ಚಾಡಿ ಮಾತನ್ನು ನಂಬಿ ಹಣಕಾಸಿನ ವಿಚಾರದಲ್ಲಿ ತೊಂದರೆ ತಂದುಕೊಳ್ಳುವಿರಿ; 29 ನವೆಂಬರ್‌, ಬುಧವಾರದ ರಾಶಿಫಲ

 29th November 2023 Daily Horoscope

<p>29 ನವೆಂಬರ್‌, ಬುಧವಾರದ ರಾಶಿ ಭವಿಷ್ಯ: ಪ್ರತಿಯೊಂದು ರಾಶಿಗೂ ಅದರದ್ದೇ ಆದ ಅಧಿಪತಿಗಳಿರುತ್ತಾರೆ. ಪಾಪ-ಪುಣ್ಯಗಳಿಗೆ ಅನುಸಾರವಾಗಿ ಗ್ರಹಗತಿಗಳು ಫಲಾಫಲಗಳನ್ನು ನೀಡುತ್ತವೆ. ಧನಸ್ಸು, ಮಕರ, ಕುಂಭ, ಮೀನ ರಾಶಿಯವರಿಗೆ ಇಂದು ಏನು ಫಲ? ಇಂದಿನ ದಿನಭವಿಷ್ಯ ಇಲ್ಲಿದೆ. (29th November 2023 Daily Horoscope).</p>

ಈ ರಾಶಿಯವರಿಗೆ ಉದ್ಯೋಗದಲ್ಲಿ ಮೇಲಧಿಕಾರಿಗಳ ಜೊತೆ ಅನಾವಶ್ಯಕ ವಾದ ವಿವಾದ; ನವೆಂಬರ್‌ 29, ಬುಧವಾರದ ರಾಶಿಫಲ

29th November 2023 Daily Horoscope

<p>29th ನವೆಂಬರ್‌, ಬುಧವಾರದ ರಾಶಿ ಭವಿಷ್ಯ: ಪ್ರತಿಯೊಂದು ರಾಶಿಗೂ ಅದರದ್ದೇ ಆದ ಅಧಿಪತಿಗಳಿರುತ್ತಾರೆ. ಪಾಪ-ಪುಣ್ಯಗಳಿಗೆ ಅನುಸಾರವಾಗಿ ಗ್ರಹಗತಿಗಳು ಫಲಾಫಲಗಳನ್ನು ನೀಡುತ್ತವೆ. ಸಿಂಹ, ಕನ್ಯಾ, ತುಲಾ, ವೃಶ್ಚಿಕ ರಾಶಿಯವರಿಗೆ ಇಂದು ಏನು ಫಲ? ಇಂದಿನ ದಿನಭವಿಷ್ಯ ಇಲ್ಲಿದೆ. (29th November 2023 Daily Horoscope).</p>

ಪರರ ಹಣಕಾಸಿನ ವಿಚಾರದಲ್ಲಿ ಮಧ್ಯಸ್ಥಿಕೆ ವಹಿಸಿದರೆ ಸಮಸ್ಯೆಗೆ ಸಿಲುಕುವಿರಿ; ಬುಧವಾರದ ದಿನಭವಿಷ್ಯ

<p>29 ನವೆಂಬರ್‌, ಬುಧವಾರದ ರಾಶಿ ಭವಿಷ್ಯ: ಪ್ರತಿಯೊಂದು ರಾಶಿಗೂ ಅದರದ್ದೇ ಆದ ಅಧಿಪತಿಗಳಿರುತ್ತಾರೆ. ಪಾಪ-ಪುಣ್ಯಗಳಿಗೆ ಅನುಸಾರವಾಗಿ ಗ್ರಹಗತಿಗಳು ಫಲಾಫಲಗಳನ್ನು ನೀಡುತ್ತವೆ. ಮೇಷ, ವೃಷಭ, ಮಿಥುನ, ಕಟಕ, ರಾಶಿಯವರಿಗೆ ಇಂದು ಏನು ಫಲ? ಇಂದಿನ ದಿನಭವಿಷ್ಯ ಇಲ್ಲಿದೆ. (29th November 2023 Daily Horoscope).</p>

<ul><li>ಸಕ್ಕರೆ ಪಾಕದಲ್ಲಿ ಹದವಾಗಿ ಮಿಂದ ಜಿಲೇಬಿ ಆಸ್ವಾದಿಸುವಾಗ ನಮ್ಮ ಮನಸ್ಸೂ ಸಹ ಪರಮಾತ್ಮನ ಚಿಂತನೆಯಿಂದ ಇದೇ ರೀತಿ ಸಿಹಿಯಾಗಲಿ ಎಂದುಕೊಳ್ಳಿ. ಈ ಥರದ ಯೋಚನೆಗಳು ಬಂದರೆ ಸಾಕು; ನೆನೆಸುವುದು, ನೆನೆಯುವುದೂ ಬದುಕಿನ ಅತ್ಯಂತ ಖುಷಿ ಸಂಗತಿಗಳು ಎನಿಸುತ್ತವೆ.</li></ul>

GM Mustard: ಕರ್ನಾಟಕಕ್ಕೆ ಬೇಡ ಕುಲಾಂತರಿ ಸಾಸಿವೆ; ಪ್ರಗತಿಪರ ರೈತರು, ಕೃಷಿ ಚಿಂತಕರು ಮುಂದಿಟ್ಟ 5 ಅಂಶಗಳು ಹೀಗಿವೆ

GM Mustard

<p>ಕರ್ನಾಟಕದಲ್ಲಿ ಕುಲಾಂತರಿ ಸಾಸಿವೆ ಬೆಳೆಯಲು ರಾಜ್ಯ ಸರ್ಕಾರವು ಅವಕಾಶ ನೀಡಬಾರದು ಎಂದು ಆಗ್ರಹಿಸಿ ಪ್ರಗತಿಪರ ರೈತರು ಹಾಗೂ ಕೃಷಿ ಚಿಂತರು ಬಹಿರಂಗ ಪತ್ರ ಬರೆದಿದ್ದಾರೆ. ಪ್ರೊ ಎಸ್.ಜಿ.ಸಿದ್ದರಾಮಯ್ಯ, ಶಾರದಾ ಗೋಪಾಲ‌, ಕವಿತಾ ಕುರುಗಂಟಿ, ನಾಗೇಶ ಹೆಗಡೆ, ಸಂತೋಷ ಕೌಲಗಿ, ಕೆ.ಪಿ. ಸುರೇಶ್, ಮಲ್ಲಿಕಾರ್ಜುನ ಹೊಸಪಾಳ್ಯ, ಜಿ.ಕೃಷ್ಣಪ್ರಸಾದ್‌, ಆನಂದತೀರ್ಥ ಪ್ಯಾಟಿ, ಅಣೇಕಟ್ಟೆ ವಿಶ್ವನಾಥ್ ಹಾಗೂ ರಮೇಶ ಚೀಮಾಚನಹಳ್ಳಿ ಅವರ ಸಹಿ ಇರುವ ಪತ್ರದಲ್ಲಿ ಕುಲಾಂತರಿ ಸಾಸಿವೆ ಬಳಕೆಯನ್ನು ಪ್ರಬಲವಾಗಿ ವಿರೋಧಿಸಲಾಗಿದೆ.</p>

<p>ಜಿಎಂ ಅಲ್ಲದ ಮಿಶ್ರತಳಿಗಳು ಇರುವಾಗ ಹೈಬ್ರಿಡ್ ತಂತ್ರಜ್ಞಾನದ ನೆಪದಲ್ಲಿ ಕುಲಾಂತರಿ ಕಳೆನಾಶಕ ಸಹಿಷ್ಣು ಸಾಸಿವೆಯನ್ನು ರೈತರ ಹೊಲಗಳಿಗೆ ನುಗ್ಗಿಸುವುದು ಸರಿಯಲ್ಲ. ಕರ್ನಾಟಕ ಸರಕಾರವು ರಾಜ್ಯದಲ್ಲಿ ಇದನ್ನು ನಿಷೇಧಿಸುವ ಮೂಲಕ ಇತರ ರಾಜ್ಯಗಳಿಗೆ ಮಾದರಿಯಾಗಬೇಕು ಮತ್ತು ನೀಡಿದ ಅನುಮತಿಯನ್ನು ಹಿಂತೆಗೆದುಕೊಳ್ಳುವಂತೆ ಕೇಂದ್ರ ಸರಕಾರವನ್ನು ಕೇಳಬೇಕು ಎಂದು ಪತ್ರದಲ್ಲಿ ಆಗ್ರಹಿಸಲಾಗಿದೆ.</p>

<h2><i>ಕುಲಾಂತರಿ ಸಾಸಿವೆ ಬಳಕೆ ಏಕೆ ಬೇಡ ಎನ್ನುವ ಬಗ್ಗೆ ಇವರು ಮುಂದಿಡುವ ವಿಚಾರಗಳು ಹೀಗಿವೆ. ಪತ್ರವನ್ನು ಯಥಾವತ್ತಾಗಿ ಪ್ರಕಟಿಸಲಾಗಿದೆ.</i></h2><p>'ಹತ್ತಿಯನ್ನೇನೂ ನಾವು ತಿನ್ನುವುದಿಲ್ಲʼ ಎಂಬ ಸಬೂಬು ಹೇಳಿ, ಕುಲಾಂತರಿ ಹತ್ತಿಯನ್ನು ಬೆಳೆಯಲು ಭಾರತ ಸರಕಾರ ಅನುಮತಿ ನೀಡಿತು. ಆಮೇಲೆ ಮೆಲ್ಲಗೆ ಕುಲಾಂತರಿ ಬದನೆಯನ್ನು ದೇಶದ ಒಳಕ್ಕೆ ನುಗ್ಗಿಸಲು ಏನೆಲ್ಲ ಯತ್ನಗಳು ನಡೆದವು. ಕರ್ನಾಟಕ ಸರಕಾರ ಅದಕ್ಕೆ ಅನುಮತಿ ನೀಡಲಿಲ್ಲ. ಭಾರತ ಸರಕಾರವೂ ಅನುಮತಿ ನೀಡಲಿಲ್ಲ. ಈಗ ಕುಲಾಂತರಿ ಸಾಸಿವೆಯನ್ನು ರೈತರ ಹೊಲಕ್ಕೆ ನುಗ್ಗಿಸಲು ಸಿದ್ಧತೆ ನಡೆದಿದೆ. ಕೇಂದ್ರ ಸರಕಾರ ರೈತರ ಹೊಲಗಳಲ್ಲಿ ಅದನ್ನು ಬೆಳೆಯಲು ಅನುಮತಿ ನೀಡಿದೆ. ಕರ್ನಾಟಕದಲ್ಲೂ ಅಂಥ ಸಾಸಿವೆಯ ಬಿತ್ತನೆ ನಡೆಯಬಹುದು. ಕರ್ನಾಟಕ ಸರಕಾರ ಇದಕ್ಕೆ ನಿಷೇಧ ಹಾಕಬೇಕೆಂದು ನಾವು ಒತ್ತಾಯಿಸುತ್ತೇವೆ. ಅದಕ್ಕೆ ಕಾರಣಗಳು ಹೀಗಿವೆ:</p>

<p>1) ಈ ಹೊಸ ಕುಲಾಂತರಿ ಸಾಸಿವೆಯಲ್ಲಿ ಕೀಟನಿರೋಧಕ ಶಕ್ತಿ ಇಲ್ಲ. ಇದನ್ನು ಹೈಬ್ರಿಡೈಸೇಶನ್ ತಂತ್ರಜ್ಞಾನ ಎಂದು ಕರೆಯಲಾಗುತ್ತಿದ್ದರೂ, ಇಳುವರಿ ಹೆಚ್ಚಳದ ಯಾವುದೇ ಪುರಾವೆಗಳಿಲ್ಲ. ಇದರ ಏಕೈಕ ಗುಣವೆಂದರೆ ಇದರ ಮೇಲೆ ಗ್ಲುಫೋಸಿನೇಟ್ ಕಳೆನಾಶಕವನ್ನು ಸುರಿದರೆ ಸಸ್ಯಕ್ಕೆ ಏನೂ ತೊಂದರೆ ಆಗುವುದಿಲ್ಲ. ಆದರೆ ಇದರ ಸುತ್ತಲಿನ ಕಳೆಗಳೆಲ್ಲ ಸುಟ್ಟುಹೋಗುತ್ತವೆ. ಒಂದೇ ಒಂದು ಲಕ್ಷಣವೆಂದರೆ ಕಾರ್ಮಿಕರು ಕಳೆ ತೆಗೆಯುವ ಅಗತ್ಯವಿಲ್ಲ. ಅದರಿಂದಾಗಿ, ಬಡ ಮಹಿಳೆಯರು ಉದ್ಯೋಗವನ್ನು ಕಳೆದುಕೊಳ್ಳುತ್ತಾರೆ.</p>

<p>2) ನಮ್ಮ ದೇಶ ಸಾಸಿವೆಯ ಮಟ್ಟಿಗೆ ಸ್ವಾವಲಂಬಿ ಆಗಿದೆ. ಉತ್ತಮ ಇಳುವರಿಯ ತಳಿಗಳನ್ನು ಮತ್ತು ಜಿಎಂ ಅಲ್ಲದ ಹೈಬ್ರಿಡ್ ಬೀಜಗಳನ್ನು ಉತ್ತರ ಭಾರತದ ರೈತರು ಬೆಳೆಯುತ್ತಿದ್ದಾರೆ. ನಮ್ಮ ರಾಜ್ಯದಲ್ಲಿ ಇದು ಅಲ್ಪ ಪ್ರಮಾಣದಲ್ಲಿ ಬೆಳೆಯಲ್ಪಡುತ್ತಿದೆ. ಕುಲಾಂತರಿ ತಳಿಯನ್ನು ಪರಿಚಯಿಸುವ ಯಾವ ತುರ್ತೂ ಇಲ್ಲ. ಆದರೂ ಇದನ್ನು ಹೊಲಕ್ಕೆ ನುಗ್ಗಿಸುವ ಹುನ್ನಾರ ಏಕೆ ನಡೆಯುತ್ತಿದೆಯೆಂದರೆ, ಒಮ್ಮೆ ಇದಕ್ಕೆ ಪ್ರವೇಶ ಸಿಕ್ಕರೆ ಆಮೇಲೆ ಕುಲಾಂತರಿ ಬದನೆ, ಮೆಣಸು, ಬೆಂಡೆ, ಟೊಮ್ಯಾಟೊ, ಕೋಸು, ಕೊತ್ತುಂಬರಿಗಳಿಗೂ ಅನುಮತಿ ಪಡೆಯುವುದು ಬಹುರಾಷ್ಟ್ರೀಯ ಕಂಪನಿಗಳಿಗೆ ಸುಲಭವಾಗುತ್ತದೆ. ಹಾಗೆ ಅವೆಲ್ಲ ನುಗ್ಗಿದ್ದೇ ಆದರೆ ನಮ್ಮ ಸ್ಥಳೀಯ ತಳಿವೈವಿಧ್ಯವೆಲ್ಲ ಮೂಲೆಗುಂಪಾಗುತ್ತವೆ. ಬಿಟಿ ಹತ್ತಿ ಬಂದ ನಂತರ ದೇಶದ ೯೫% ಸ್ಥಳೀಯ ತಳಿಗಳು ನಾಪತ್ತೆಯಾಗಿವೆ. ಕಂಪನಿ ಬೀಜಗಳಿಗಾಗಿ ರೈತರು ಕ್ಯೂ ನಿಲ್ಲುವಂತಾಗುತ್ತದೆ.</p>

<p>3) ಕುಲಾಂತರಿ ಸಾಸಿವೆಯ ಮಾದರಿಯಲ್ಲೇ ಕಳೆನಾಶಕ ವಿಷದ ಘಾಟನ್ನು ಸಹಿಸಿಕೊಳ್ಳುವ ತರಕಾರಿ ತಳಿಗಳು ಬಂದರೆ ರೌಂಡಪ್‌ನಂಥ ಕೆಮಿಕಲ್‌ಗಳ ಬಳಕೆ ಬೇಕಾಬಿಟ್ಟಿ ಹೆಚ್ಚುತ್ತದೆ. ಅದರಿಂದ ನೆಲದೊಳಗಿನ ಜೀವಿಗಳ ಮಾರಣ ಹೋಮ ಆಗುವುದಷ್ಟೇ ಅಲ್ಲ, ರೈತರ ಮತ್ತು ಬಳಕೆದಾರರ ಆರೋಗ್ಯದ ಮೇಲೆ ಗಂಭೀರ ಪರಿಣಾಮಗಳು ಕಾಣತೊಡಗುತ್ತವೆ.</p>

<p>4) ಸಾಸಿವೆ ಹೂಬಿಟ್ಟಾಗ ದುಂಬಿ, ಜೇನ್ನೊಣಗಳಂಥ ರೈತಸ್ನೇಹಿ ಜೀವಿಗಳ ಸಂಖ್ಯೆ ಹೆಚ್ಚುತ್ತದೆ; ಇತರ ಫಸಲುಗಳ ಪರಾಗಸ್ಪರ್ಶ ಹೆಚ್ಚುತ್ತದೆ. ಇಳುವರಿ ಕೂಡ ಹೆಚ್ಚುತ್ತದೆ. ಕುಲಾಂತರಿ ಸಾಸಿವೆಯ ಪರಾಗದಿಂದ ಕೀಟಗಳಿಗೆ ಏನೇನು ಅಪಾಯ ಇದೆ ಎಂಬುದರ ಪರೀಕ್ಷೆ ನಡೆದಿಲ್ಲ.</p>

<p>5) ಕುಲಾಂತರಿ ಸಾಸಿವೆಯನ್ನು ಒಗ್ಗರಣೆಗೆ ಬಳಸಿದರೆ ನಮ್ಮ ಆರೋಗ್ಯದ ಮೇಲೆ ಏನೇನು ಪರಿಣಾಮ ಆದೀತೆಂಬ ದೀರ್ಘಕಾಲೀನ ಪರೀಕ್ಷೆಗಳೂ ನಡೆದಿಲ್ಲ. ಸಂಶಯ, ಅಪನಂಬಿಕೆಗಳ ನಿವಾರಣೆ ಆಗದೇ ಇದನ್ನು ಹೊಲಕ್ಕಿಳಿಸಿದರೆ ಮುಂದೆ ಬಳಕೆದಾರರು, ಹೊಟೆಲ್‌ಗಳು, ಎಣ್ಣೆಗಾಣಗಳು ಈ ಸಾಸಿವೆಯನ್ನು ನಿರಾಕರಿಸಿದರೆ ರೈತರ ಶ್ರಮ ಮಣ್ಣು ಪಾಲಾಗಬಹುದು.</p>

Elephant in Dakshin Kannada: ಬೆಳ್ತಂಗಡಿ ಸುತ್ತಮುತ್ತ ಒಂಟಿಸಲಗದ ಪುಂಡಾಟ, ಜನರಿಗೆ ಪ್ರಾಣಸಂಕಟ

<ul><li>Elephant trouble in DK ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಕಾಡಾನೆ ಹಾವಳಿ ಮಿತಿ ಮೀರಿದೆ. ಬೆಳ್ತಂಗಡಿ ತಾಲ್ಲೂಕಿನಲ್ಲಿ ಕಾಡಾನೆಯೊಂದು ಮೂರು ದಿನದಿಂದ ತೊಂದರೆ ನೀಡುತ್ತಿದೆ. ಆನೆ ಓಡಿಸಲು ಇಲ್ಲವೇ ಸೆರೆಗೆ ಕರ್ನಾಟಕ ಅರಣ್ಯ ಇಲಾಖೆ( Karnataka Forest Department) &nbsp;ಮುಂದಾಗಿದೆ.</li></ul>

Bangalore Cyber crime:ಬಾಯ್‌ಫ್ರೆಂಡ್‌ ಮೊಬೈಲ್‌ನಲ್ಲಿತ್ತು ತನ್ನದೂ ಸೇರಿ 13 ಸಾವಿರ ಬೆತ್ತಲೆ ಫೋಟೋ: ಬೆಂಗಳೂರಲ್ಲಿ ಸೈಬರ್‌ ದೂರು

<ul><li>Bangalore cyber crime ಸ್ನೇಹಿತನೊಬ್ಬನ ಜತೆಗೆ ಸಲುಗೆಯಿಂದ ಇದ್ದ ಯುವತಿ ತನ್ನದೇ ಬೆತ್ತಲೆ ಫೋಟೋಗಳನ್ನು ಮೊಬೈಲ್‌ನಲ್ಲಿ ನೋಡಿದ್ದಾರೆ. ಈ ಕುರಿತು ಯುವತಿ ಕೆಲಸ ಮಾಡುವ ಬೆಂಗಳೂರಿನ ಕಂಪೆನಿ ಕಾನೂನು ಅಧಿಕಾರಿ ಸೈಬರ್‌ ಠಾಣೆಯಲ್ಲಿ( Bangalore cyber police) ದೂರು ದಾಖಲಿಸಿದ್ದಾರೆ.</li></ul>

Kannada Pustaka Habba: ಪುಸ್ತಕ ಪ್ರಿಯರ ಮನ ಗೆದ್ದ ರಾಷ್ಟ್ರೋತ್ಥಾನ ಸಾಹಿತ್ಯದ 3ನೇ ಕನ್ನಡ ಪುಸ್ತಕ ಹಬ್ಬ, ಡಿ.3ಕ್ಕೆ ಸಮಾರೋಪ

<p>ಕರ್ನಾಟಕ ರಾಜ್ಯೋತ್ಸವ ನಿಮಿತ್ತ ರಾಷ್ಟ್ರೋತ್ಥಾನ ಸಾಹಿತ್ಯ ಆಯೋಜಿಸಿದ 33 ದಿನಗಳ 3ನೇ ಕನ್ನಡ ಪುಸ್ತಕ ಹಬ್ಬಕ್ಕೆ ಪುಸ್ತಕ ಪ್ರಿಯರಿಂದ ಭಾರಿ ಸ್ಪಂದನೆ ಸಿಕ್ಕಿದೆ. ನಿತ್ಯವೂ ಒಂದಿಲ್ಲೊಂದು ಕಾರ್ಯಕ್ರಮ, ಉಪನ್ಯಾಸಗಳ ಮೂಲಕ ಗಮನಸೆಳೆದಿರುವ ಹಬ್ಬದ ಪುಸ್ತಕ ಲೋಕ ವಿದ್ಯಾರ್ಥಿ ಯುವಜನರನ್ನು ಬೆರಗುಗೊಳಿಸಿದೆ. ಈ ಹಬ್ಬ ಡಿಸೆಂಬರ್ 3ರಂದು ಸಂಪನ್ನಗೊಳ್ಳಲಿದೆ.</p>

Kalburgi Crime: ಕಲಬುರಗಿ ಜಿಲ್ಲೆಯಲ್ಲಿ ತಾಯಿ ನಿಂದಿಸಿದ್ದಕ್ಕೆ ಅಜ್ಜನನ್ನೆ ಕೊಂದ ಮೊಮ್ಮಗ

<ul><li>Kalburgi Crime news ಕಲಬುರಗಿ ಜಿಲ್ಲೆಯಲ್ಲಿ ತಾಯಿಗೆ ನಿಂದಿಸಿದ ಸಿಟ್ಟಿಗೆ ಅಜ್ಜನನ್ನೇ ಮೊಮ್ಮಗ ಇರಿದು ಕೊಂದು ಪೊಲೀಸರ ಅತಿಥಿಯಾಗಿರುವ ಘಟನೆ ನಡೆದಿದೆ.&nbsp;</li></ul>

<ul><li>Agriculture: ಜಿಎಂ ಅಲ್ಲದ ಮಿಶ್ರತಳಿಗಳು ಇರುವಾಗ ಹೈಬ್ರಿಡ್ ತಂತ್ರಜ್ಞಾನದ ನೆಪದಲ್ಲಿ ಕುಲಾಂತರಿ ಕಳೆನಾಶಕ ಸಹಿಷ್ಣು ಸಾಸಿವೆಯನ್ನು ರೈತರ ಹೊಲಗಳಿಗೆ ನುಗ್ಗಿಸುವುದು ಸರಿಯಲ್ಲ ಎಂದು ಪ್ರಗತಿಪರ ಕೃಷಿಕರು, ಬರಹಗಾರರಾಗಿರುವ ಎಸ್‌ಜಿ ಸಿದ್ದರಾಮಯ್ಯ, ನಾಗೇಶ ಹೆಗಡೆ ಸೇರಿದಂತೆ ಹಲವು ಹಿರಿಯರು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.</li></ul>

ಸಂಪಾದಕೀಯ: ಮರೆತೇ ಹೋಗುತ್ತಿದೆ ಮಳೆ ಎಂಬ ಸಂಭ್ರಮ, ಈಗ ಮಳೆಯೆಂದರೆ ಕಣ್ಮುಂದೆ ಬರುವುದು ಸಂಕಟವಷ್ಟೇ

Bengaluru Rains

<p>ಬೆಂಗಳೂರಿನಂಥ ಮಹಾನಗರಗಳಲ್ಲಿ ಮಳೆ ಬಂದರೆ ಸಂಭ್ರಮಿಸುವವರು ಬಹಳ ಕಡಿಮೆ. ಬೆಳಿಗ್ಗೆ ಆಫೀಸಿನ ಧಾವಂತ, ಸಂಜೆಗೆ ಮನೆಗೆ ಹೋಗುವ ಆತುರ, ಮಧ್ಯಾಹ್ನಕ್ಕೆ ಬಂದರೆ ಮನೆ ಸೇರಲು ಆಗದು. ಹೀಗೆ ಬಹುತೇಕ ಬೆಂಗಳೂರು ನಿವಾಸಿಗಳಿಗೆ ಮಳೆರಾಯನೆಂದರೆ ಬೇಡದ ಅತಿಥಿ. ಆದರೆ ಜನರ ಕಷ್ಟಸುಖ ನೋಡಿ ತನ್ನ ಕೆಲಸ ಮಾಡುತ್ತಾನೆಯೇ ಮಳೆರಾಯ? ಎಂದಿಗೂ ಇಲ್ಲ. ಬರಬೇಕು ಎನಿಸಿದಾಗ ಬಂದ, ಹೋಗಬೇಕು ಎನಿಸಿದಾಗ ಹೋದ. ಜನರು ಸಂಭ್ರಮಿಸಿದರೂ, ಬೈದುಕೊಂಡರೂ ಅದರಿಂದ ಮಳೆರಾಯನಿಗೆ ಆಗಬೇಕಾದ್ದು ಏನೂ ಇಲ್ಲ. ಅವನಿಗೆ ಬೆಂಗಳೂರು ದೊಡ್ಡದಲ್ಲ, ಕಲಬುರ್ಗಿ ಸಣ್ಣದಲ್ಲ.</p>

<p>ಆದರೆ ಮಳೆ ಎನ್ನುವುದು ನಗರವಾಸಿಗಳ ಪಾಲಿಗೆ ಸಂಭ್ರಮವಾಗಿ ಉಳಿದೇ ಇಲ್ಲ. ಕರ್ನಾಟಕದ ಯಾವುದೇ ಜಿಲ್ಲಾ ಕೇಂದ್ರಗಳು, ತಾಲ್ಲೂಕು ಕೇಂದ್ರಗಳು, ಅಷ್ಟೇಕೆ ದೊಡ್ಡ ಪಟ್ಟಣಗಳಲ್ಲಿ ಪರಿಸ್ಥಿತಿ ಹೇಗಿದೆ ಎಂದು ಸುಮ್ಮನೆ ಒಮ್ಮೆ ಸುತ್ತಾಡಿದರೂ ತಿಳಿಯುತ್ತದೆ. ಐದು-ಹತ್ತು ವರ್ಷಗಳ ಹಿಂದೆ ಸರಾಗವಾಗಿ ಚರಂಡಿ ಸೇರುತ್ತಿದ್ದ, ಆ ಮೂಲಕ ಕೆರೆ ಸರಪಳಿಗಳ ಭಾಗವಾಗುತ್ತಿದ್ದ ಮಳೆನೀರಿಗೆ ಈಗ ರಸ್ತೆಯೇ ದೊಡ್ಡ ಚರಂಡಿ. ಏಕೆಂದರೆ ಕರ್ನಾಟಕದ ಬಹುಪಾಲು ನಗರ-ಪಟ್ಟಣಗಳಲ್ಲಿ ಕಳೆದ ಐದು ವರ್ಷಗಳಲ್ಲಿ ರಸ್ತೆಗಳು ರಿಪೇರಿಯಾಗಿವೆ, ವಿಸ್ತರಣೆಯಾಗಿವೆ.</p>

<p>ರಸ್ತೆಗಳು ಈಗ ತಲುಪಿರುವ ಪರಿಸ್ಥಿತಿ ನೋಡಿದರೆ ರಿಪೇರಿ-ವಿಸ್ತರಣೆ ಮಾಡುವ ಸಂದರ್ಭದಲ್ಲಿ ನಗರಾಡಳಿತ, ಲೋಕೋಪಯೋಗಿ ಇಲಾಖೆ ಎಂಜಿನಿಯರ್‌ಗಳಲ್ಲಿ 'ಮುಂದೆಂದೂ ಈ ಊರಿನಲ್ಲಿ ಮಳೆಯೇ ಬರುವುದಿಲ್ಲ' ಎಂಬ ಮನೋಭಾವವೇ ವಿಜೃಂಭಿಸಿರುವಂತೆ ಭಾಸವಾಗುತ್ತದೆ. ಅಭಿವೃದ್ಧಿಯ ನೆಪದಲ್ಲಿ ರಸ್ತೆ ದೊಡ್ಡದಾಯಿತು, ಬಹುತೇಕ ರಸ್ತೆಗಳ ಪಕ್ಕದಲ್ಲಿಯೇ ಇದ್ದ ಮಳೆಗಾಲುವೆಯಂಥ ಚರಂಡಿಗಳನ್ನು ಕ್ರಾಂಕ್ರೀಟ್ ಸ್ಲಾಬ್ ಹಾಕಿ ಮುಚ್ಚಲಾಯಿತು.</p>

<p>ಅಭಿವೃದ್ಧಿಯ ವೇಗ ಎಷ್ಟು ತೀವ್ರವಾಗಿದೆ ಎಂದರೆ ರಾಜ್ಯದ ನಗರ, ಪಟ್ಟಣ, ಹಳ್ಳಿಗಳ ಗಲ್ಲಿಗಲ್ಲಿಗಳೂ ಈಗ ಕಾಂಕ್ರೀಟ್ ರಸ್ತೆ ಪಡೆದಿವೆ. ಕಾಂಕ್ರಿಟ್ ರಸ್ತೆಗಳನ್ನು ಅಭಿವೃದ್ಧಿಯ ಮಾನದಂಡ ಎಂದುಕೊಂಡರೆ ಕರ್ನಾಟಕ ಇದರಲ್ಲಿ ಬಹಳ ಮುಂದಿದೆ. ಕಿತ್ತುಹೋದ ರಸ್ತೆಗಳನ್ನು ಭ್ರಷ್ಟಾಚಾರದ ಮಾನದಂಡ ಎಂದುಕೊಂಡರೆ ಕರ್ನಾಟಕದ ಸ್ಥಾನವು ಅದರಲ್ಲಿಯೂ ಮೊದಲ ಸಾಲಿನಲ್ಲಿಯೇ ಇರುತ್ತದೆ. ಪ್ರಮುಖ ರಸ್ತೆಗಳಷ್ಟೇ ಅಲ್ಲ, ಮನೆ ಮುಂದಿನ ಒಳರಸ್ತೆಗಳಲ್ಲಿಯೂ ನೀರು ಚರಂಡಿ ಸೇರದೆ ಬೀದಿಯಲ್ಲಿಯೇ ನಿಲ್ಲುತ್ತದೆ, ಹರಿಯುತ್ತದೆ ಎನ್ನುವುದನ್ನು ನೀವು ಎಂಜಿನಿಯರಿಂಗ್ ವೈಫಲ್ಯದ ಮಾನದಂಡ ಎಂದುಕೊಂಡರೆ ಕರ್ನಾಟಕದ ಬಹುತೇಕ ಎಲ್ಲ ಹಳ್ಳಿ-ಪಟ್ಟಣ-ನಗರಗಳಲ್ಲಿಯೂ ಸಾಕಷ್ಟು ಸಾಕ್ಷ್ಯಗಳು ಕಣ್ಣಿಗೆ ರಾಚುತ್ತವೆ.</p>

<p>ಮಳೆಯನ್ನು ಒಂದು ಸಮಸ್ಯೆಯಾಗಿಸುವಲ್ಲಿ ಅಭಿವೃದ್ಧಿ, ಭ್ರಷ್ಟಾಚಾರ ಮತ್ತು ಎಂಜಿನಿಯರಿಂಗ್ ವೈಫಲ್ಯದ ಜೊತೆಗೆ ಜನರ ಅಸೀಮ ನಿರ್ಲಕ್ಷ್ಯವೆಂಬ ಮತ್ತೊಂದು ಅಂಶದ ಕೊಡುಗೆಯೂ ದೊಡ್ಡದು. ಮಳೆ ಬಂದಾಗ ರಸ್ತೆ ತುಂಬೆಲ್ಲಾ ನೀರು ಹರಿದು ವಿಶ್ವವಿದ್ಯಮಾನವಾಗುವ ಬೆಂಗಳೂರು ನಗರ ಬೇಸಿಗೆಯಲ್ಲಿ ಕುಡಿಯುವ ನೀರಿಗಾಗಿ ಪರಿತಪಿಸುತ್ತದೆ. ಆದರೆ ಮಳೆ ಸುರಿಯುವಾಗ ಅದರ ನೀರು ಸಂಗ್ರಹಿಸಿಕೊಳ್ಳಬೇಕೆಂಬ, ನೀರಿನ ಕಾಳಜಿ ಮಾಡಬೇಕೆಂಬ ವ್ಯವಧಾನ ಇರುವವರ ಸಂಖ್ಯೆ ಬಹುಕಡಿಮೆ. ಕೆಲವರು ನಾಮಕಾವಾಸ್ತೆ ಅಳವಡಿಸಿಕೊಂಡಿದ್ದಾರಾದರೂ ಫಿಲ್ಟರ್ ನಿರ್ವಹಣೆಯ ಉಸಾಬರಿಯೇ ಬೇಡವೆಂದು ಚರಂಡಿಗೆ ಬಿಡುವುದೇ ಹೆಚ್ಚು.</p>

<p>ಇಂಥದ್ದನ್ನೆಲ್ಲಾ ಜನರ ಗಮನಕ್ಕೆ ತಂದು, ತಾಕೀತು ಮಾಡಿ, ಮಳೆ ನೀರು ಸಂಗ್ರಹ ವ್ಯವಸ್ಥೆಯನ್ನು ಮನೆಗಳಲ್ಲಿ ಅಳವಡಿಸಲು ಒತ್ತಾಯಿಸಬೇಕಿದ್ದ ಬಿಬಿಎಂಪಿ ಏನು ಮಾಡುತ್ತಿದೆ ಎಂದು ನೀವು ಕೇಳಬಹುದು. ಬೇಸಿಗೆಯಲ್ಲಿ ರಾಜಕಾಲುವೆಯ ಹೂಳೆತ್ತುವುದು, ಮಳೆಗಾಲದಲ್ಲಿ ಅಂಡರ್‌ಪಾಸ್‌ಗಳಿಗೆ ಪಂಪ್ ಇರಿಸಿ ನೀರೆತ್ತುವುದು, ಅದು ಬಿಟ್ಟರೆ ಅಕ್ರಮ ಕಟ್ಟಡಗಳನ್ನು ಗುರುತಿಸುವುದು, ಆಗಾಗ ಕೋರ್ಟ್‌ ತಪರಾಕಿ ಕೊಟ್ಟಾಗ ಕಟ್ಟಡ ಮಾಲೀಕರಿಗೆ ನೊಟೀಸ್ ಕೊಟ್ಟು ಬೆದರಿಸಿ ಬೆಚ್ಚಗಾಗಿಸಿಕೊಳ್ಳುವುದು. ಇಷ್ಟೆಲ್ಲಾ ಕೆಲಸಗಳ ಮಧ್ಯೆ ಜನರಲ್ಲಿ ಜಾಗೃತಿ ಮೂಡಿಸಲು ಬಿಬಿಎಂಪಿ ಅಧಿಕಾರಿಗಳಿಗೆ ಸಮಯವಾದರೂ ಎಲ್ಲಿ ಸಿಗಬೇಕು? ಅಧಿಕಾರಿಗಳ ಪಾಲಿಗೆ ಮಳೆ ಎನ್ನುವುದು ಇತ್ತೀಚೆಗೆ ಚಿನ್ನದ ಮೊಟ್ಟೆ ಇಡುವ ಕೋಳಿಯಂತಾಗಿದೆ.</p>

<p>ದಿಕ್ಕುದೆಸೆಯಿಲ್ಲದ ಅಭಿವೃದ್ಧಿಯ ಅನೂಹ್ಯ ವೇಗ, ಕಣ್ಣೆದುರೇ ಕಣ್ಮುಚ್ಚುತ್ತಿರುವ ಕೆರೆಗಳು, ಮಣ್ಣೇ ಇಲ್ಲದ ಕಾಂಕ್ರಿಟ್ ರಸ್ತೆಗಳು, ಮಳೆ ಬರಬಹುದು ಎನ್ನುವುದನ್ನೇ ಮರೆತ ನಗರ ಯೋಜನಾ ಎಂಜಿನಿಯರ್‌ಗಳು, ನಲ್ಲಿ ತಿರುಗಿಸಿದಾಗ ನೀರು ಬಂದರಷ್ಟೇ ಸಾಕು ಎನ್ನುವ ಧೋರಣೆಯ ಜನತೆ ಇದ್ದಾಗ ಮಳೆರಾಯನನ್ನು ಒಲಿಸಿಕೊಳ್ಳುವ ವ್ಯವಧಾನ ಯಾರಿಗೆ ತಾನೆ ಇರಲು ಸಾಧ್ಯ? ಮಳೆ ಬಂದರೂ ಕಷ್ಟ, ಬಾರದಿದ್ದರೆ ಕೇಳುವುದೇ ಬೇಡ. ಬಂದರೆ ವರುಣಾರ್ಭಟ, ಹೋದರೆ ಕರುಣೆಯಿಲ್ಲದ ವರುಣ ದೇವ. ಒಟ್ಟಿನಲ್ಲಿ ಜನರಿಂದ ಬೈಗುಳ ತಿನ್ನಲು ಮಳೆರಾಯ ಸದಾ ಸಿದ್ಧನಿರಬೇಕು.</p>

<p>ನಗರ ವಿನ್ಯಾಸದ ಯೋಜನೆಗಳು ಸುಧಾರಿಸುವವರೆಗೆ ಕರ್ನಾಟಕದ ಈ ಪರಿಸ್ಥಿತಿ ಬದಲಾಗುವುದಿಲ್ಲ. ಕಟ್ಟಡ-ರಸ್ತೆಗಳ ವಿನ್ಯಾಸವನ್ನು ಭೂ ಮೇಲ್ಮೈಗೆ ಅನುಗುಣವಾಗಿ ಅಳವಡಿಸಬೇಕು. ನೀರು ಹರಿಯುವ ಮಾರ್ಗ ತಡೆ ರಹಿತವಾಗಿರಬೇಕು ಎಂಬ ತೀರಾ ಸಾಮಾನ್ಯ ಸಂಗತಿಗೆ ಬೆಲೆ ಕೊಟ್ಟರೆ ಮಾತ್ರ ನಾವು 'ಬಾ ಮಳೆಯೇ ಬಾ' ಎಂದು ಸಂಭ್ರಮಿಸಲು ಸಾಧ್ಯ. ಇಲ್ಲದಿದ್ದರೆ 'ಯಾಕಾದರೂ ಮಳೆ ಬಂತೋ' ಎಂಬ ಹಳಹಳಿಕೆಯೇ ಶಾಶ್ವತವಾಗಿ ಸಂಭ್ರಮದ ಆಯಾಮವನ್ನೇ ಮರೆಯಬೇಕಾಗುತ್ತದೆ.</p>

<p>ಬೆಂಗಳೂರನ್ನು ಹಿಡಿತಕ್ಕೆ ತೆಗೆದುಕೊಂಡಿರುವ ಡಿ.ಕೆ.ಶಿವಕುಮಾರ್ ಅವರು ಮೊದಲು ಬಿಬಿಎಂಪಿ, ಬಿಡಬ್ಲ್ಯುಎಸ್‌ಎಸ್‌ಬಿ, ಬಿಡಿಎ ಸೇರಿದಂತೆ ನಗರ ಯೋಜನೆಗೆ ಸಂಬಂಧಿಸಿದ ಸಂಸ್ಥೆಗಳು, ಇಲಾಖೆಗಳ ನಡುವೆ ಸಮನ್ವಯ ಮೂಡಿಸುವ ಕೆಲಸ ಮಾಡಲಿ. ಬೆಂಗಳೂರು ಒಂದು ಮಾದರಿಯಾದರೆ ಅದನ್ನು ಕರ್ನಾಟಕದ, ಭಾರತದ ಇತರ ನಗರಗಳು ಸುಲಭವಾಗಿ ಅನುಸರಿಸುತ್ತವೆ. ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರೂ ಈ ಪ್ರಯತ್ನಕ್ಕೆ ಒತ್ತಾಸೆಯಾಗಿ ನಿಲ್ಲಬೇಕು. ನಗರ ಯೋಜನಾ ವಿಭಾಗದ ಅಧಿಕಾರಿಗಳ ವಿಶೇಷ ಸಭೆಗಳನ್ನು ಇವರಿಬ್ಬರೂ ನಿಯಮಿತವಾಗಿ ನಡೆಸಿ ಕಿವಿಹಿಂಡದಿದ್ದರೆ ಪರಿಸ್ಥಿತಿ ಇನ್ನೆಷ್ಟು ವರ್ಷ ಕಳೆದರೂ ಸುಧಾರಿಸದು.</p>

<p>(ಸಂಪಾದಕೀಯದ ಬಗ್ಗೆ ನಿಮ್ಮ ಅಭಿಪ್ರಾಯ, ಸಲಹೆ, ಪ್ರತಿಕ್ರಿಯೆಗಳಿಗೆ ಸ್ವಾಗತ. ನಮ್ಮ ಇಮೇಲ್ ವಿಳಾಸ: ht.kannada@htdigital.in)</p>

<ul><li>ಬೆಂಗಳೂರನ್ನು ಹಿಡಿತಕ್ಕೆ ತೆಗೆದುಕೊಂಡಿರುವ ಡಿ.ಕೆ.ಶಿವಕುಮಾರ್ ಅವರು ಮೊದಲು ನಗರ ಯೋಜನೆಗೆ ಸಂಬಂಧಿಸಿದ ಸಂಸ್ಥೆಗಳು, ಇಲಾಖೆಗಳ ನಡುವೆ ಸಮನ್ವಯ ಮೂಡಿಸುವ ಕೆಲಸ ಮಾಡಲಿ. ನಗರ ಯೋಜನಾ ವಿಭಾಗದ ಅಧಿಕಾರಿಗಳ ವಿಶೇಷ ಸಭೆಗಳನ್ನು ನಿಯಮಿತವಾಗಿ ನಡೆಸಿ ಕಿವಿಹಿಂಡದಿದ್ದರೆ ಪರಿಸ್ಥಿತಿ ಇನ್ನೆಷ್ಟು ವರ್ಷ ಕಳೆದರೂ ಸುಧಾರಿಸದು.</li></ul>

Kalaburagi News: ಆಸ್ತಿ ವಿಚಾರಕ್ಕಾಗಿ ನಡೆದ ಗಲಾಟೆ ಕೊಲೆಯಲ್ಲಿ ಅಂತ್ಯ

Kalaburagi Crime News

<p><strong>ಕಲಬುರಗಿ:</strong> ನಗರದ ಕೆಕೆ ಕಾಲೋನಿಯಲ್ಲಿ ಜಮೀನು ವಿಚಾರವಾಗಿ 45ವರ್ಷದ ವಿಜಯಲಕ್ಷ್ಮಿ ಎಂಬುವರನ್ನು ಸಂಬಂದಿಕರೆ ಭೀಕರವಾಗಿ ಕೊಲೆಗೈದಿದ್ದಾರೆ.</p>

<p>ಕಲಬುರಗಿ ತಾಲೂಕಿನ ಸಿಂದಗಿ ಗ್ರಾಮದ ಮೃತ ವಿಜಯಲಕ್ಷ್ಮಿ ಹಾಗೂ ಅವರ ಪತಿ ಮಲಕಯ್ಯ ಅವರ ಸಹೋದರ ಕುಪೇಂದ್ರ ನಡುವೆ ಸಿಂದಗಿ ಗ್ರಾಮದಲ್ಲಿರುವ 9 ಎಕರೆ ಜಮೀನಿಗಾಗಿ ಕಳೆದ 20 ವರ್ಷಗಳಿಂದ ಜಗಳ‌ನಡೆಯುತ್ತಿತ್ತು, ಈ ವಿಚಾರವಾಗಿ ನ್ಯಾಯಾಲಯದಲ್ಲೂ ವಿಚರಾಣೆ ನಡೆದಿತ್ತು, ಪಿತ್ರಾರ್ಜಿತ ಆಸ್ತಿಯಲ್ಲಿ ಮೃತ ವಿಜಯಲಕ್ಷ್ಮಿ ಗಂಡ ಮಲಕಯ್ಯ ಅವರ ಪರವಾಗಿ ಆಗಿತ್ತು, ಈ ವಿಚಾರವಾಗಿ ವಿಜಯಲಕ್ಷ್ಮಿ ತನ್ನ ಪತಿ ಸಹೋದರ ಕುಪೇಂದ್ರ ಅವರಿಗೆ ತಮ್ಮ ಜಮೀನು ಬಿಟ್ಟುಕೊಡುವಂತೆ ಕ್ಯಾತೆ ತಗೆದಿದ್ದರು, ಕಳೆದ ಹಲವು ಬಾರಿ ಜಗಳವಾಗಿತ್ತು, ಇಂದು ಬೆಳಿಗೆ ಕೆಕೆ ನಗರದಲ್ಲಿರುವ ವಿಜಯಲಕ್ಷ್ಮಿ‌ಮನೆಗೆ ಬಂದ ಕುಪೇಂದ್ರ ಹಾಗೂ ಅವರ ಮಕ್ಕಳು ಏಕಾ ಎಕಿ ವಿಜಯಲಕ್ಷ್ಮಿ ಹಾಗೂ ಅವರ ಮನೆಯವರ ಮೇಲೆ ಚಾಕುವಿನಿಂದ ಹಲ್ಲೆ ಮಾಡಿದ್ದಾರೆ.</p>

<p>ಘಟನೆಯಲ್ಲಿ ವಿಜಯಲಕ್ಷ್ಮಿ ಸಾವನ್ನಪ್ಪಿದ್ದು, ಇನ್ನು ಘಟನೆಯಲ್ಲಿ ರೇಣುಕಾ,ಪಲ್ಲವಿ,ನಾಗರಾಜ್ ಗಾಯಗೊಂಡಿದ್ದು‌ ಸರ್ಕಾರಿ ಅಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.</p>

<p>ವಿಷಯ ತಿಳಿದ ಸಬ್ ಅರ್ಬನ್ ಪೊಲೀಸರು ಹಾಗೂ ನಗರ ಪೊಲೀಸ್ ಆಯುಕ್ತ ಆರ್.ಚೇತನ್ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ಸಬ್ ಅರ್ಬನ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು ಆರೋಪಿಗಳ‌ಪತ್ತೆಗಾಗಿ ಪೊಲೀಸರು ಬಲೆ ಬಿಸಿದ್ದಾರೆ.</p>

<ul><li>Crime News: ಕಲಬುರಗಿ ತಾಲೂಕಿನ ಸಿಂದಗಿ ಗ್ರಾಮದ ಮೃತ ವಿಜಯಲಕ್ಷ್ಮಿ ಹಾಗೂ ಅವರ ಪತಿ ಮಲಕಯ್ಯ ಅವರ ಸಹೋದರ ಕುಪೇಂದ್ರ ನಡುವೆ ಸಿಂದಗಿ ಗ್ರಾಮದಲ್ಲಿರುವ 9 ಎಕರೆ ಜಮೀನಿಗಾಗಿ ಕಳೆದ 20 ವರ್ಷಗಳಿಂದ ಜಗಳ‌ನಡೆಯುತ್ತಿತ್ತು, ಈ ವಿಚಾರವಾಗಿ ನ್ಯಾಯಾಲಯದಲ್ಲೂ ವಿಚರಾಣೆ ನಡೆದಿತ್ತು.</li></ul>

Anna Bhagya: ಅಕ್ಕಿ ಬದಲು ಹಣಕ್ಕೆ ಬಿಜೆಪಿ ಕೆಂಡಾಮಂಡಲ; ಸಿದ್ದರಾಮಯ್ಯ ಸರ್ಕಾರ ಫೇಲ್ ಆಗಿದೆ ಎಂದ ನಾಯಕರು

Nalin Kumar Kateel

<p><strong>ಬೆಂಗಳೂರು: </strong>ಚುನಾವಣೆಗೆ ಮೊದಲು ಕಾಂಗ್ರೆಸ್‌ ಘೋಷಿಸಿದ ಗ್ಯಾರೆಂಟಿಗಳೆಲ್ಲವೂ ಅಧಿಕಾರಕ್ಕೆ ಬಂದ ಬಳಿಕ, “ಷರತ್ತುಗಳು” ಅನ್ವಯಕ್ಕೆ ತಲುಪಿದ್ದು, ಸ್ವರೂಪವೂ ಬದಲಾಗುತ್ತಿದೆ ಎಂದು ಬಿಜೆಪಿ ನಾಯಕರು ಟೀಕಿಸಿದ್ದಾರೆ. ಯಾರು ಏನು ಟೀಕೆ ಮಾಡಿದರು? ಇಲ್ಲಿದೆ ವಿವರ.</p>

<p>ಚುನಾವಣೆಗೆ ಮೊದಲು 10 ಕೆಜಿ ಕೊಡ್ತೀವಿ ಅಂತ ಹೇಳಿದ್ರು. ಅಂದ್ರೆ ಅವರು 15 ಕೆಜಿ ಕೊಡಬೇಕಿತ್ತು. ಆದರೆ ಈಗ ಅವರು ತಾವು 5 ಕೊಟ್ಟು, ಉಳಿದದ್ದು ಕೇಂದ್ರದ ಅಕ್ಕಿಯನ್ನು ತಮ್ಮದು ಎಂದು ಹೇಳುತ್ತಿದ್ದಾರೆ. ನಾವು ಹಣ ಕೊಡಿ ಎಂದರೆ ಹಣ ತಿನ್ನಲು ಆಗುತ್ತಾ ಎಂದು ಸಿದ್ದರಾಮಯ್ಯ ಪ್ರಶ್ನೆ ಮಾಡಿದ್ದರು. ಈಗ ಉಲ್ಟಾ ಹೊಡೆದಿದ್ದಾರೆ.</p>

<h2>- ನಳಿನ್ ಕುಮಾರ್ ಕಟೀಲ್</h2><p>ಸಿದ್ದರಾಮಯ್ಯ ಅವರು ರಾಜ್ಯದ ಬಡವರಿಗೆ ಮೋಸ ಮಾಡುತ್ತಿದ್ದಾರೆ. ತಲಾ 10 ಕೆಜಿ ಅಕ್ಕಿ ಕೊಡುವುದಾಗಿ ಹೇಳಿದ್ದರು. ಕೇಂದ್ರ ಸರ್ಕಾರದ 5 ಕೆಜಿ ಅಕ್ಕಿ ಸತತವಾಗಿ ಬರುತ್ತಲೇ ಇದೆ. ರಾಜ್ಯ ಸರ್ಕಾರ ಕೊಡಬೇಕಿದ್ದ ಅಕ್ಕಿ ಕೊಡಲು ಆಗುತ್ತಿಲ್ಲ. ಸಿದ್ದರಾಮಯ್ಯ ಮಾತಿಗೆ ತಪ್ಪುತ್ತಿದ್ದಾರೆ. ಇದು ವಚನಭ್ರಷ್ಟ ಸರ್ಕಾರ. ಅಧಿಕಾರಕ್ಕೆ ಬಂದ ಒಂದೇ ತಿಂಗಳಲ್ಲಿ ಸರ್ಕಾರ ಫೇಲ್ ಆಯಿತು. ಬಸ್ ಕಡಿಮೆ ಮಾಡಿದ್ದಾರೆ. ಜನರಿಗೆ, ವಿದ್ಯಾರ್ಥಿಗಳಿಗೆ ತೊಂದರೆಯಾಗಿದೆ. ಡಿಗ್ರಿ ವಿದ್ಯಾರ್ಥಿಗಳಿಗೆ ನಿರುದ್ಯೋಗಿ ಪದವೀಧರರಿಗೆ ನಿರುದ್ಯೋಗಿ ಭತ್ಯೆ ಕೊಡುವುದಾಗಿ ಹೇಳಿದ್ದಿರಿ. ಅದಕ್ಕೂ ಷರತ್ತು ತಂದಿದ್ದೀರಿ. ಗೃಹಲಕ್ಷ್ಮಿ ಮೂಲಕ ಹಣ ಕೊಡುವುದಾಗಿ ಭರವಸೆ ಕೊಟ್ಟಿದ್ದೀರಿ. ಅದೂ ಜಾರಿಗೆ ಬಂದಿಲ್ಲ. ಒಟ್ಟಿನಲ್ಲಿ ಇದು ಫೇಲ್ ಸರ್ಕಾರ.</p>

<h2>- ರವಿಕುಮಾರ್, ವಿಧಾನ ಪರಿಷತ್ ಸದಸ್ಯ, ಬಿಜೆಪಿ</h2><p>ಈ ಸರ್ಕಾರದವರು ಟೋಪಿ ಹಾಕುತ್ತಿದ್ದಾರೆ. ಜನರಿಗೆ ಅಕ್ಕಿ ಬದಲು ಹಣ ಕೊಡುವುದು ಏಕೆ? ಕೊಟ್ಟ ಮಾತು ತಪ್ಪಿದ್ದಾರೆ.</p>

<h2>- ಅಶ್ವತ್ಥನಾರಾಯಣ, ಬಿಜೆಪಿ ನಾಯಕ</h2></p>

<p>Anna Bhagya: ಕರ್ನಾಟಕದ ಸಿದ್ದರಾಮಯ್ಯ ನೇತೃತ್ವದ ಸರ್ಕಾರ ಅನ್ನಭಾಗ್ಯ ಯೋಜನೆಯಂತೆ ಅಕ್ಕಿಯ ಬದಲು ಹಣ ಕೊಡುವ ತೀರ್ಮಾನವನ್ನು ಇಂದು (ಜೂ.28) ತೆಗೆದುಕೊಂಡಿದೆ. ಇದು ವಿಪಕ್ಷೀಯರಿಂದ ವ್ಯಾಪಕ ಟೀಕೆಗೆ ಒಳಗಾಗಿದೆ. ಬಿಜೆಪಿ ನಾಯಕರ ಟೀಕೆ ಏನು - ಇಲ್ಲಿದೆ ವಿವರ.</p>

Anna Bhagya Politics: ಬಿಜೆಪಿಯಿಂದ ಕರ್ನಾಟಕಕ್ಕೆ ದ್ರೋಹ; ಡಿಕೆ ಶಿವಕುಮಾರ್ ಆಕ್ರೋಶ

<p><strong>ಬೆಂಗಳೂರು: </strong>ಅನ್ನಭಾಗ್ಯದ ಅಕ್ಕಿ ವಿತರಣೆಗೆ ಸಮಸ್ಯೆ ಆದ ಕಾರಣ ಅಕ್ಕಿಯ ಬದಲು ಹಣ ನೀಡುವ ಕರ್ನಾಟಕ ಸರ್ಕಾರದ ನಿರ್ಧಾರವನ್ನು ಕಾಂಗ್ರೆಸ್‌ ನಾಯಕರು ಸಮರ್ಥಿಸಿದ್ದಾರೆ. ಸಿದ್ದರಾಮಯ್ಯ ನೇತೃತ್ವದ ಸಚಿವ ಸಂಪುಟ ಸರಿಯಾದ ತೀರ್ಮಾನ ತೆಗೆದುಕೊಂಡಿದೆ. ಕೇಂದ್ರ ಸರ್ಕಾರದ ಅಸಹಕಾರ ಹೆಚ್ಚಾಗಿದೆ ಎಂದು ತೀವ್ರ ವಾಗ್ದಾಳಿ ನಡೆಸಿದ್ದಾರೆ. </p>

<p>ಬಿಜೆಪಿ ಉದ್ದೇಶಪೂರ್ವಕವಾಗಿ ಈ ವಿಚಾರದಲ್ಲಿ ರಾಜಕಾರಣ ಮಾಡಿದೆ. ಅವರಿಗೆ ಅಕ್ಕಿ ಸಂಗ್ರಹದ ಅಧಿಕಾರ ಇದೆ. ಸದ್ಯಕ್ಕೆ ನಮ್ಮ ಮಾತು ಉಳಿಸಿಕೊಂಡಿದ್ದೇವೆ. ಕೆಲವು ಕಡೆ ಅಕ್ಕಿ ಕೊಡಲು ಬದ್ಧರಾಗಿದ್ದಾರೆ. ಕೆಲವರು ಒಂದು, ಮೂರು, ಆರು ತಿಂಗಳಿಗೆ ಕೊಡ್ತೀವಿ ಅಂತ ಹೇಳ್ತಿದ್ಆರೆ. ಅದಕ್ಕೆ ನಾವು ಇಂಥ ತೀರ್ಮಾನ ತಗೊಂಡ್ವಿ. ಬಿಜೆಪಿಯವರು ನಮ್ಮ ಗ್ಯಾರೆಂಟಿ ಫೇಲ್ ಮಾಡಬೇಕು ಅಂತ ನಾವು ಬದ್ಧರಾಗಿದ್ದೇವೆ. ಅದಕ್ಕೆ ಈ ತೀರ್ಮಾನ. ಅಕ್ಕಿ ಸಂಗ್ರಹಕ್ಕೆ ಯೋಜನೆ ರೂಪಿಸುತ್ತೇವೆ. ಒಂದು ದಿನಕ್ಕೆ ಭತ್ತ ಬೆಳೆದು ಅಕ್ಕಿ ಮಾಡಲು ಆಗಲ್ಲ.</p>

<h2>- ಡಿ.ಕೆ.ಶಿವಕುಮಾರ್, ಉಪಮುಖ್ಯಮಂತ್ರಿ</h2><p>ಬಿಜೆಪಿ ನಾಯಕರು ಕೇಂದ್ರದಿಂದ ಅಕ್ಕಿ ಕೊಡಿಸಬೇಕು. ಸಂಸತ್ ಭವನದ ಮುಂದೆ ಪ್ರತಿಭಟನೆ ಮಾಡಲಿ. ಅದು ಬಿಟ್ಟು ವಿಕೃತ ಹೇಳಿಕೆ ಕೊಟ್ಟರೆ ಏನು ಪ್ರಯೋಜನ. ಕೇಂದ್ರ ಬಿಜೆಪಿ ಸರ್ಕಾರ ಕರ್ನಾಟಕಕ್ಕೆ ದ್ರೋಹ ಮಾಡಿದೆ. ಪ್ರಧಾನಿ ಮೋದಿ, ಗೃಹ ಸಚಿವ ಅಮಿತ್ ಶಾ ನಮ್ಮ ಮಾತು ಕೇಳಿಸಿಕೊಳ್ಳಲಿಲ್ಲ, ಸ್ಪಂದಿಸಲಿಲ್ಲ. ಕಟೀಲು, ಬೊಮ್ಮಾಯಿ ಅವರು ವಿಕೃತವಾಗಿ ನಡೆದುಕೊಂಡಿದ್ದಾರೆ. ನಮಗೆ ಕೇಂದ್ರ ಸರ್ಕಾರ ಮೋಸ ಮಾಡಿದೆ. ನಾವು ಜುಲೈ 1ರಿಂದ ಅನ್ನಭಾಗ್ಯ ಜಾರಿ ಮಾಡಲಾಗುವುದು ಎಂದು ಹೇಳಿದ್ದೆವು. ಮಾತು ಉಳಿಸಿಕೊಳ್ಳುತ್ತಿದ್ದೇವೆ. ಕೇಂದ್ರ ಸರ್ಕಾರದ ಅಧೀನದಲ್ಲಿರುವ ಎಫ್‌ಕೆಸಿಸಿಐ ಸರ್ಕಾರಗಳು ಹರಾಜಿನಲ್ಲಿ ಪಾಲ್ಗೊಳ್ಳಬಾರದು ಎಂಬ ಷರತ್ತು ಹಾಕಿದೆ. ಇದೆಂಥ ವಿಪರ್ಯಾಸ.</p>

<h2>- ಸಚಿವ ದಿನೇಶ್ ಗುಂಡೂರಾವ್</h2><p>ಅಕ್ಕಿ ಸಿಗುವವರೆಗೆ ಅದರ ಬದಲು ಹಣ ಕೊಡುತ್ತೇವೆ. ಕೇಂದ್ರ ಸರ್ಕಾರ ಮತ್ತು ಬಿಜೆಪಿ ಏನೇ ತೊಡರುಗಾಲು ಹಾಕಿದರೂ ನಮ್ಮ ಗ್ಯಾರಂಟಿಗಳು ಅನುಷ್ಠಾನಕ್ಕೆ ಬರುತ್ತವೆ. ಇದರಲ್ಲಿ ಏನೂ ವ್ಯತ್ಯಾಸ ಆಗುವುದಿಲ್ಲ.</p>

<h2>- ಸಚಿವ ಚೆಲುವರಾಯಸ್ವಾಮಿ</h2></p>

<p>Anna Bhagya Politics: ಸಿದ್ದರಾಮಯ್ಯ ನೇತೃತ್ವದ ಸಚಿವ ಸಂಪುಟ ಅನ್ನಭಾಗ್ಯದ ಅಕ್ಕಿ ಬದಲು ಹಣ ನೀಡುವ ತೀರ್ಮಾನ ತೆಗೆದುಕೊಂಡಿರುವುದನ್ನು ಕಾಂಗ್ರೆಸ್‌ ನಾಯಕರು ಸಮರ್ಥಿಸುತ್ತಿದ್ದಾರೆ. ಯಾರು ಏನು ಹೇಳಿದರು? ಇಲ್ಲಿದೆ ವಿವರ.</p>

Breaking News: ಜುಲೈ 14ರಿಂದ ಗೃಹಲಕ್ಷ್ಮಿ ಯೋಜನೆಗೆ ಅರ್ಜಿ ಸ್ವೀಕಾರ ಆರಂಭ ಸಾಧ್ಯತೆ

<p><strong>ಬೆಂಗಳೂರು: </strong>ಕರ್ನಾಟಕದ ಜನತೆ ಕಾತರದಿಂದ ನಿರೀಕ್ಷಿಸುತ್ತಿರುವ ಗೃಹಲಕ್ಷ್ಮಿ ಯೋಜನೆ ಕುರಿತು ಬುಧವಾರ ನಡೆದ ಸಚಿವ ಸಂಪುಟ ಸಭೆಯಲ್ಲಿಯೂ ಚರ್ಚೆಯಾಗಿದೆ ಎಂದು ಸಚಿವ ಎಚ್‌.ಕೆ.ಪಾಟೀಲ ಹೇಳಿದರು.</p>

<p>ಯೋಜನೆಯ ಕುರಿತು ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ಸಚಿವೆ ಲಕ್ಷ್ಮೀ ಹೆಬ್ಬಾಳ್ಕರ್ ಈ ಕುರಿತು ಶೀಘ್ರದಲ್ಲಿಯೇ ಅಧಿಕೃತ ಹೇಳಿಕೆ ನೀಡಲಿದ್ದಾರೆ. ಜುಲೈ 14ರಿಂದ ಈ ಯೋಜನೆ ಆರಂಭವಾಗುವ ನಿರೀಕ್ಷೆಯಿದೆ. ಈ ಕುರಿತು ಚರ್ಚೆ ನಡೆದಿದೆ ಎಂದು ಅವರು ತಿಳಿಸಿದರು.</p>

<p>ಗೃಹಲಕ್ಷ್ಮಿ ವಿಚಾರವಾಗಿ ರಾಜ್ಯದಲ್ಲಿ ಸಾಕಷ್ಟು ಚರ್ಚೆಯಾಗಿದೆ. ಸಚಿವೆ ಲಕ್ಷ್ಮೀ ಹೆಬ್ಬಾಳ್ಕರ್ ಈ ಕುರಿತು ಅಧಿಕೃತವಾಗಿ ನಿಮ್ಮ ಪ್ರಶ್ನೆಗಳಿಗೆ ಉತ್ತರಿಸಲಿದ್ದಾರೆ. ಜುಲೈ 14ರಿಂದ ಗೃಹಲಕ್ಷ್ಮಿ ಆರಂಭಿಸಲು ಚರ್ಚೆಯಾಗಿದೆ. ಇಂದು ಸಂಜೆ ಅಥವಾ ನಾಳೆ ಬೆಳಗ್ಗೆ ವಿವರವಾದ ಕಾರ್ಯಕ್ರಮ ಪಟ್ಟಿ ಹೊರಬರಬಹುದು ಎಂದು ಮಾಹಿತಿ ನೀಡಿದರು. ಲಕ್ಷ್ಮೀ ಹೆಬ್ಬಾಳ್ಕರ್ ಅವರು ಈ ಕುರಿತು ಮುಖ್ಯಮಂತ್ರಿಯೊಂದಿಗೆ ಸಮಾಲೋಚನೆ ಮಾಡಿದ್ದಾರೆ. ಅವರೇ ಹೆಚ್ಚಿನ ವಿವರ ಒದಗಿಸುತ್ತಾರೆ ಎಂದು ತಿಳಿಸಿದರು.</p>

<p>ಪರಿಶಿಷ್ಟ ಜಾತಿ ಹಾಗೂ ಪಂಗಡವರಿಗೆ ಟೆಂಡರ್‌ ಮೂಲಕ ವಹಿಸಲಾದ ಕಾಮಗಾರಿಗಳ ಮೊತ್ತದ ಮಿತಿ 50 ಲಕ್ಷ ರೂಪಾಯಿ ಇತ್ತು. 2017-18ರ ಬಜೆಟ್‌ನಲ್ಲಿ ಸಿದ್ದರಾಮಯ್ಯ ಈ ಘೋಷಣೆ ಮಾಡಿದ್ದರು. ಇದೀಗ ಈ ಮೊತ್ತವನ್ನು 1 ಕೋಟಿ ರೂಪಾಯಿ ಹೆಚ್ಚಿಸಲು ಪಾರದರ್ಶಕ ಅಧಿನಿಯಮಕ್ಕೆ ತಿದ್ದುಪಡಿ ಮಾಡಲು ಉದ್ದೇಶಿಸಲಾಗಿದೆ. ಇದನ್ನು ವಿಧಾನಸಭೆಯಲ್ಲಿ ಮಂಡಿಸುತ್ತೇವೆ ಎಂದು ಹೇಳಿದರು. ಕರ್ನಾಟಕ ರಸ್ತೆ ಸುರಕ್ಷತಾ ಪ್ರಾಧಿಕಾರ ಕಾಯ್ದೆಗೆ ತಿದ್ದುಪಡಿ ಮಾಡಲು ಉದ್ದೇಶಿಸಲಾಗಿದೆ. ಮುಂದಿನ ದಿನಗಳಲ್ಲಿ ಈ ಪ್ರಾಧಿಕಾರದ ವ್ಯಾಪ್ತಿಗೆ ಬಿಬಿಎಂಪಿ ಕೂಡ ಸೇರಲಿದೆ ಎಂದು ಸಚಿವ ಪಾಟೀಲ ಹೇಳಿದರು.</p>

<p>Gruhalakshmi Yojane: ಬಹು ನಿರೀಕ್ಷೆಯ ಗೃಹಲಕ್ಷ್ಮಿ ಯೋಜನೆಯ ಕುರಿತು ಸಚಿವ ಸಂಪುಟ ಸಭೆಯಲ್ಲಿ ಚರ್ಚೆ ಆಗಿದೆ. ಇದರ ಅರ್ಜಿ ಬಿಡುಗಡೆ ಜುಲೈ 14ಕ್ಕೆ ನಡೆಯುವ ಸಾಧ್ಯತೆ ಇದೆ.&nbsp;</p>

GST Rules: ಜಿಎಸ್‌ಟಿ ತಿದ್ದುಪಡಿ ವಿಧೇಯಕಕ್ಕೆ ಸಚಿವ ಸಂಪುಟ ಅನುಮೋದನೆ, ಕೇಂದ್ರಕ್ಕೆ ಮತ್ತೊಮ್ಮೆ ಸೆಡ್ಡು ಹೊಡೆದ ಸಿದ್ದರಾಮಯ್ಯ

<p><strong>ಬೆಂಗಳೂರು: </strong>ಕರ್ನಾಟಕ ಸರಕು ಮತ್ತು ಸೇವೆಗಳ ತೆರಿಗೆ ತಿದ್ದುಪಡಿ ವಿಧೇಯಕ 2023 (Karnataka Goods and Service Tax (Amendment) Act 2023)  ಕ್ಕೆ ಕರ್ನಾಟಕ ಸಚಿವ ಸಂಪುಟವು (Karnataka Cabinet) ಬುಧವಾರ ಅನುಮೋದನೆ ನೀಡಿದೆ. ಜಿಎಸ್‌ಟಿ ಮಂಡಳಿ (GST Council) ಯಿಂದ ಕೆಲ ತಿದ್ದುಪಡಿಗಳನ್ನು ಅಂಗೀಕರಿಸಲು ನಮಗೆ ಸೂಚಿಸಲಾಗಿತ್ತು. ಆದರೆ ನಾವು ಕರ್ನಾಟಕದಲ್ಲಿ ಎರಡು ತಿದ್ದುಪಡಿ ಒಪ್ಪಿಲ್ಲ ಎಂದು ಸಚಿವ ಎಚ್‌.ಕೆ..ಪಾಟೀಲ ವಿವರಿಸಿದರು.</p>

<p>ವಿಧಾನಸೌಧದಲ್ಲಿ ಸಚಿವ ಸಂಪುಟದ ತೀರ್ಮಾನಗಳನ್ನು ಮಾಧ್ಯಮ ಪ್ರತಿನಿಧಿಗಳಿಗೆ ವಿವರಿಸಿದರು.</p>

<p>ಜಿಎಸ್‌ಟಿ ನಿಯಮ '132ಕೆ' ನಿಯಮವನ್ನು ನಾವು ಒಪ್ಪಿಲ್ಲ. 'ಯಾವುದೇ ವ್ಯಾಪಾರಸ್ಥ ಸುಳ್ಳು ಮಾಹಿತಿ ಕೊಟ್ಟರೆ ಅದನ್ನು ಸರಿ ಎಂದು ಸಾಬೀತುಪಡಿಸುವ ಜವಾಬ್ದಾರಿ ಜಿಎಸ್‌ಟಿ ಪಾವತಿದಾರನ ಮೇಲೆಯೇ ಇರುತ್ತಿತ್ತು. ಇದನ್ನು ನಾವು ಬದಲಿಸಿದ್ದೇವೆ. ವ್ಯಾಪಾರಿ ಕೊಟ್ಟ ತಪ್ಪು ಮಾಹಿತಿಯನ್ನು ಪತ್ತೆ ಮಾಡುವುದು ಸರ್ಕಾರದ ಜವಾಬ್ದಾರಿ ಎಂದು ಕೇಂದ್ರ ಸರ್ಕಾರ ಸೂಚಿಸಿತ್ತು. ಇದನ್ನು ಕರ್ನಾಟಕ ಸಚಿವ ಸಂಪುಟ ಒಪ್ಪಿಲ್ಲ' ಎಂದು ಅವರು ತಿಳಿಸಿದರು.</p>

<p>ಸಚಿವ ಸಂಪುಟ ತೀರ್ಮಾನ ಕುರಿತು ಜಿಎಸ್‌ಟಿ ಮಂಡಳಿಯಲ್ಲಿ ಚರ್ಚೆ ಆಗಬಹುದು. ಆಗ ನಾವೂ ನಮ್ಮ ವಿವರ ಕೊಡುತ್ತೇವೆ. ಈ ವಿಧೇಯಕದ ಬಗ್ಗೆ ವಿಧಾನಸಭೆ ಅಧಿವೇಶನದಲ್ಲಿಯೂ ಚರ್ಚೆ ನಡೆಸುತ್ತೇವೆ ಎಂದು ತಿಳಿಸಿದರು</p>

<h2>ನೀರಾವರಿ ಯೋಜನೆಗಳಿಗಾಗಿ ಉಪ ಸಮಿತಿ</h2><p>ಕೃಷ್ಣಾ, ಕಾವೇರಿ, ಮಹದಾಯಿ ಹಾಗೂ ಇತರ ನೀರಾವರಿ ಯೋಜನೆಗಳ ಅನುಷ್ಠಾನ ಹಾಗೂ ನ್ಯಾಯಾಧೀಕರಣ ತೀರ್ಮಾನಗಳ ಅನುಷ್ಠಾನದ ಬಗ್ಗೆ ಪರಿಶೀಲಿಸಲು ಸಚಿವ ಸಂಪುಟ ಉಪ ಸಮಿತಿ ರಚಿಸಲು ಮುಖ್ಯಮಂತ್ರಿ ಸೂಚಿಸಿದ್ದಾರೆ. ಅದರಂತೆ ಉಪ ಸಮಿತಿ ರಚಿಸಲು ಸಚಿವ ಸಂಪುಟ ಸಭೆ ಒಪ್ಪಿಗೆ ಸೂಚಿಸಿದೆ. ಈ ಉಪ ಸಮಿತಿಯಲ್ಲಿ ಯಾರು ಇರಬೇಕೆಂದು ನಿರ್ಧರಿಸಲು ಮುಖ್ಯಮಂತ್ರಿಗೆ ಅಧಿಕಾರ ಕೊಡಲಾಗಿದೆ.</p>

<h2>ಅಪರಾಧ ಪ್ರಕರಣ ಹಿಂಪಡೆಯುವ ಕುರಿತು ಪರಿಶೀಲಿಸಲು ಉಪ ಸಮಿತಿ</h2><p>ರಾಜ್ಯದ ವಿವಿಧ ನ್ಯಾಯಾಲಯಗಳಲ್ಲಿ ವಿಚಾರಣೆಯಲ್ಲಿರುವ ಅಪರಾಧ ಪ್ರಕರಣಗಳನ್ನು ಹಿಂಪಡೆಯುವ ಸಲವಾಗಿ ಹಲವಾರು ಸಂಘ ಸಂಸ್ಥೆಗಳು ಬಂದು ನಮಗೆ ಮನವಿ ಸಲ್ಲಿಸಿವೆ. ಸರ್ಕಾರ ಪ್ರಕರಣ ಹಿಂಪಡೆಯಬೇಕು ಎಂದು ಕೋರಿದ್ದರು. ಇಂಥ ಮನವಿಗಳನ್ನು ಪರಿಶೀಲಿಸಲು, ಅಪರಾಧ ಪ್ರಕರಣಗಳನ್ನು ಪರಿಶೀಲಿಸಲು ಸಚಿವ ಸಂಪುಟ ಉಪ ಸಮಿತಿ ರಚಿಸಲು ಸಚಿವ ಸಂಪುಟ ಸಭೆ ನಿರ್ಧರಿಸಿದೆ. ಸಮಿತಿಯಲ್ಲಿ ಯಾರೆಲ್ಲಾ ಇರಬೇಕು ಎನ್ನುವುದು ಮುಖ್ಯಮಂತ್ರಿ ನಿರ್ಧರಿಸುತ್ತಾರೆ ಎಂದು ಎಚ್‌.ಕೆ.ಪಾಟೀಲ ಹೇಳಿದರು.</p>

<p>ಕರ್ನಾಟಕದಲ್ಲಿ ಎಷ್ಟು ಅಪರಾಧ ಪ್ರಕರಣಗಳ ಬಗ್ಗೆ ಇಂಥ ಬೇಡಿಕೆಯಿದೆ ಎಂಬ ಪ್ರಶ್ನೆಗೆ, "ನನ್ನ ಬಳಿ ಮಾಹಿತಿ ಇಲ್ಲ" ಎಂದು ಎಚ್‌.ಕೆ.ಪಾಟೀಲ ಉತ್ತರಿಸಿದರು.</p>

<p>ಕನ್ನಡ ಪರ ಸಂಘಟನೆಗಳು, ರೈತ ಸಂಘಟನೆಗಳು, ಸ್ಥಳೀಯ ಸಂಘಟನೆಗಳಿಂದ ಇಂಥ ಮನವಿಗಳು ಬಂದಿದ್ದವು. ಯಾವುದೇ ನಿರ್ದಿಷ್ಟ ಅವಧಿಯಲ್ಲಿ ದಾಖಲಾದ ಪ್ರಕರಣಗಳನ್ನಷ್ಟೇ ಪರಿಶೀಲಿಸುವುದಿಲ್ಲ. ಕಾಲಮಿತಿಯನ್ನು ತೀರ್ಮಾನಿಸಿಲ್ಲ. ನಿರಪರಾಧಿಗಳ ವಿರುದ್ಧ ತಪ್ಪು ಆರೋಪ, ತಪ್ಪಾಗಿ ಪ್ರಕರಣ ದಾಖಲಿಸಲಾಗಿದೆ ಎಂಬ ದೂರು ಬಂದರೆ ಈ ಉಪ ಸಮಿತಿ ಪರಿಶೀಲಿಸುತ್ತದೆ ಎಂದು ಸ್ಪಷ್ಟಪಡಿಸಿದರು.</p>

<p>ಪೊಲೀಸರು ಅನ್ಯಾಯವಾಗಿ ಪ್ರಕರಣ ದಾಖಲಿಸಿದ್ದರೆ, ಆ ಸಂದರ್ಭದಲ್ಲಿ ಆ ಸ್ಥಳದಲ್ಲಿದ್ದವರಿಂದ ತಪ್ಪು ನಿರ್ಧಾರಗಳಿಂದ ಜನರಿಗೆ ತೊಂದರೆಯಾಗಿದ್ದರೆ ನ್ಯಾಯ ಒದಗಿಸಲು ಸರ್ಕಾರ ಮುಂದಾಗಲಿದೆ ಎಂಬ ಸಂದೇಶ ರವಾನಿಸುವುದು ಈ ಉಪ ಸಮಿತಿ ರಚನೆಯ ಉದ್ದೇಶ ಎಂದು ಅವರು ಹೇಳಿದರು.</p>

Telangana Election: ತೆಲಂಗಾಣ ಚುನಾವಣೆ ನಾಳೆಯೇ ಮತದಾನ, 3ನೇ ಬಾರಿ ಸಿಎಂ ಆಗೋ ಆಸೆ ಕೆಸಿಆರ್‌ಗೆ, ಮೊದಲ ಸಲ ಅಧಿಕಾರ ಹಿಡಿವಾಸೆ ಕಾಂಗ್ರೆಸ್‌ಗೆ

<p>ತೀವ್ರ ಕುತೂಹಲ ಕೆರಳಿಸಿರುವ ತೆಲಂಗಾಣ ರಾಜ್ಯ ವಿಧಾನಸಭಾ ಚುನಾವಣೆ ಅಂತಿಮ ಘಟ್ಟಕ್ಕೆ ತಲುಪಿದೆ. ಈ ರಾಜ್ಯದಲ್ಲಿ ನಾಳೆಯೇ ಮತದಾನ. ಮೂರನೇ ಬಾರಿಗೆ ಮುಖ್ಯಮಂತ್ರಿಯಾಗುವ ನಿರೀಕ್ಷೆಯಲ್ಲಿದ್ದಾರೆ ಮುಖ್ಯಮಂತ್ರಿ ಕೆಸಿಆರ್. ಅದೇ ರೀತಿ ಅಧಿಕಾರಕ್ಕೆ ಬರುವ ಕನಸು ಕಾಣುತ್ತಿದೆ ಕಾಂಗ್ರೆಸ್. ಈ ವಿದ್ಯಮಾನದ ರಾಜಕೀಯ ವಿಶ್ಲೇಷಣೆ ನೀಡಿದ್ದಾರೆ ಎಚ್.ಮಾರುತಿ.&nbsp;</p>

Sunil Kanugolu: ತೆಲಂಗಾಣ ಚುನಾವಣೆ ಗೆಲ್ಲಲು ಕಾಂಗ್ರೆಸ್‌ಗೆ 6 ಗ್ಯಾರೆಂಟಿ ಆಸರೆ, ಸುನಿಲ್ ಕನುಗೋಲು ‘ಚಾಣಕ್ಯ ತಂತ್ರ’

<p>ಕರ್ನಾಟಕದಲ್ಲಿ ಕಾಂಗ್ರೆಸ್ ಪಕ್ಷದಕ್ಕೆ ಮತದಾರ ಆಡಳಿತ ಚುಕ್ಕಾಣಿ ನೀಡುವಂತೆ ಮಾಡಿದ ಚುನಾವಣಾ ತಂತ್ರಗಾರ ಸುನಿಲ್ ಕನುಗೋಲು ತೆಲಂಗಾಣ ಚುನಾವಣೆಯಲ್ಲೂ ತಮ್ಮ ತಂತ್ರಗಾರಿಕೆಯ ಚಮತ್ಕಾರ ನೋಡಲು ಪ್ರಯತ್ನಿಸುತ್ತಿದ್ದಾರೆ. ಅಲ್ಲೂ 5 ಗ್ಯಾರೆಂಟಿಯನ್ನೇ ಕಾಂಗ್ರೆಸ್‌ಗೆ ಗೆಲುವಿನ ಆಸರೆಯನ್ನಾಗಿ ಹಿಡಿಯಲು ಸಲಹೆ ನೀಡಿದ್ದು, ಫಲಿತಾಂಶಕ್ಕಾಗಿ ಎದುರು ನೋಡುತ್ತಿದ್ದಾರೆ.&nbsp;</p>

Explainer:ಛತ್ತೀಸಗಢದಲ್ಲಿ ಅಧಿಕಾರದ ಗದ್ದುಗೆ ಯಾರಿಗೆ ಸಿಗಬಹುದು: ಇಲ್ಲಿದೆ ವಿವರ

<ul><li>Chhattisgarh assembly Elections ದಟ್ಟಾರಣ್ಯದಿಂದ ಕೂಡಿರುವ ಗ್ರಾಮೀಣ ಪ್ರದೇಶವನ್ನೇ ಹೆಚ್ಚು ಹೊಂದಿರುವ ಛತ್ತೀಸಗಢ(Chhattisgarh) ವಿಧಾನಸಭೆ ಚುನಾವಣೆಯ ಹಿನ್ನೆಲೆ. ರಾಜಕೀಯ ಚಟುವಟಿಕೆ ಮತ್ತಿತರರ ವಿವರ ಇಲ್ಲಿದೆ.</li></ul>

Explainer: ರಾಜಸ್ಥಾನದಲ್ಲಿ ಮತ್ತೆ ಅಧಿಕಾರ ಬದಲಿಸುವರೇ ಮತದಾರ : ಹೀಗಿದೆ ಚುನಾವಣೆ ಚಿತ್ರಣ

<ul><li>Rajasthan Assembly elections &nbsp;ರಾಜಸ್ಥಾನದಲ್ಲಿ ವಿಧಾನಸಭೆ ಚುನಾವಣೆ ಮುಗಿದಿದೆ. ಇನ್ನು ಫಲಿತಾಂಶಕ್ಕೆ ಕಾಯುವ ಸಮಯ. ಹೇಗಿದೆ ಅಲ್ಲಿನ ಕಣ ಚಿತ್ರಣ…</li></ul>

<p>GST Rules: ಜಿಎಸ್‌ಟಿ ವಿಧೇಯಕಕ್ಕೆ ತಿದ್ದುಪಡಿ ಮಾಡುವ ಪ್ರಸ್ತಾವನೆಯನ್ನು ಸಿದ್ದರಾಮಯ್ಯ ಸಚಿವ ಸಂಪುಟ ಅಂಗೀಕರಿಸಿದೆ. ಆ ಮೂಲಕ ಕೇಂದ್ರ ಸರ್ಕಾರಕ್ಕೆ ಸೆಡ್ಡುಹೊಡೆದಿದೆ.</p>

Anna Bhagya: ಅಕ್ಕಿಯ ಬದಲು ಹಣ ನೀಡಲು ಕರ್ನಾಟಕ ಸರ್ಕಾರ ನಿರ್ಧಾರ; ಸಚಿವ ಸಂಪುಟ ಸಭೆ ತೀರ್ಮಾನ

<p><strong>ಬೆಂಗಳೂರು:</strong> ಉಚಿತ ಅಕ್ಕಿ ವಿತರಣೆಗೆ ಸಂಬಂಧಿಸಿದಂತೆ ಕೇಂದ್ರ ಸರ್ಕಾರದೊಂದಿಗೆ ಸುದೀರ್ಘ ಹಗ್ಗಜಗ್ಗಾಟ ನಡೆಸಿದ ಕರ್ನಾಟಕ ಸರ್ಕಾರವು ಬುಧವಾರ ಮಹತ್ವದ ತೀರ್ಮಾನ ತೆಗೆದುಕೊಂಡಿದೆ. ಅಕ್ಕಿ ಕೊರತೆ ಹಿನ್ನೆಲೆಯಲ್ಲಿ 5 ಕೆಜಿ ಹೆಚ್ಚುವರಿ ಅಕ್ಕಿಯ ಬದಲು ಒಂದು ಕೆಜಿ ಅಕ್ಕಿಗೆ 34 ರೂಪಾಯಿಯಂತೆ, ಫಲಾನುಭವಿಗಳಿಗೆ ತಿಂಗಳಿಗೆ 170 ರೂಪಾಯಿ ನೀಡಲು ಕರ್ನಾಟಕ ಸಚಿವ ಸಂಪುಟ ಸಭೆ ತೀರ್ಮಾನಿಸಿದೆ.</p>

<p>ಸಚಿವ ಸಂಪುಟ ಸಭೆಯ ನಂತರ ಮಾಧ್ಯಮಗೋಷ್ಠಿಯಲ್ಲಿ ಮಾತನಾಡಿದ ಸಚಿವರಾದ ಎಚ್‌.ಕೆ.ಪಾಲೀಲ್ ಮತ್ತು ಆಹಾರ ಸಚಿವ ಮುನಿಯಪ್ಪ ಕೇಂದ್ರ ಸರ್ಕಾರದ ಅಸಹಕಾರದ ಬಗ್ಗೆ ಕಠಿಣ ದನಿಯಲ್ಲಿ ಆಕ್ಷೇಪಿಸಿದರು. "ಕೇಂದ್ರ ಸರ್ಕಾರವು ತನ್ನ ಬಳಿ ಅಕ್ಕಿ ದಾಸ್ತಾನು ಇದ್ದರೂ ರಾಜ್ಯದ ಫಲಾನುಭವಿಗಳಿಗೆ ಅಕ್ಕಿ ಕೊಡಲಿಲ್ಲ. ನಾವು ಹಣ ಕೊಡುತ್ತೇವೆ ಎಂದರೂ ಸ್ಪಂದಿಸಲಿಲ್ಲ" ಎಂದು ಮುನಿಯಪ್ಪ ದೂರಿದರು.</p>

<p>15 ಲಕ್ಷ ಟನ್‌ನಷ್ಟು ಅಕ್ಕಿಯನ್ನು ಮುಕ್ತ ಟೆಂಡರ್‌ ಮೂಲಕ ಕೆಜಿಗೆ 31 ರೂಪಾಯಿಯಂತೆ ಕೊಟ್ಟಿದ್ದಾರೆ. ನಾವು 34 ರೂಪಾಯಿ ಕೊಡುತ್ತೇವೆ ಎಂದರೂ ಸ್ಪಂದಿಸಲಿಲ್ಲ. ಹೀಗಾಗಿ ಅನಿವಾರ್ಯವಾಗಿ ನಾವು ಬದಲಿ ಯೋಚನೆ ಮಾಡಬೇಕಾಯಿತು. ಕೇಂದ್ರದ ಅಧೀನದಲ್ಲಿರುವ ಸಂಸ್ಥೆಗಳು ನಮ್ಮ ಮನವಿಗೆ ಸ್ಪಂದಿಸಲಿಲ್ಲ. ಹೀಗಾಗಿ ಕೇಂದ್ರ ಗೋದಾಮು ನಿಗಮವು ಒಂದು ಕೆಜಿ ಅಕ್ಕಿಗೆ ನಿಗದಿಪಡಿಸಿರುವ 34 ರೂಪಾಯಿ ಮೊತ್ತವನ್ನು ಜನರಿಗೇ ನೇರವಾಗಿ ಹಂಚಿಕೆ ಮಾಡಲು ಸಚಿವ ಸಂಪುಟ ಸಭೆ ತೀರ್ಮಾನಿಸಿದೆ ಎಂದು ಮುನಿಯಪ್ಪ ತಿಳಿಸಿದರು.</p>

<p>ಕೇಂದ್ರ ಸರ್ಕಾರ ನಮಗೆ ಸಹಕರಿಸಿಲ್ಲ. ಬಡವರಿಗೆ ಅಕ್ಕಿ ಕೊಡುವುದರಲ್ಲಿ ರಾಜಕೀಯ ಮಾಡಿದ ಕಾರಣ ನಾವು ಜನರಿಗೆ ಮಾತು ಕೊಟ್ಟಂತೆ ಹಣ ಕೊಡ್ತಿದ್ದೀವಿ. ನಂತರ ಎಷ್ಟು ಬೇಗ ಆದರೆ ಅಷ್ಟು ಬೇಗ ಪಾರದರ್ಶಕವಾಗಿ ಟೆಂಡರ್ ಕರೆದು ಪ್ರತಿ ಫಲಾನುಭವಿಗೆ ತಲಾ 10 ಕೆಜಿಯಂತೆ ಅಕ್ಕಿ ಕೊಡುತ್ತೇವೆ. ಒಂದು ಕೆಜಿಗೆ 34 ರೂಪಾಯಿಯಂತೆ ಮನೆಯಲ್ಲಿ ಎಷ್ಟು ಜನರಿದ್ದಾರೆ ಲೆಕ್ಕ ಹಾಕಿ ಹಣಕೊಡುತ್ತೇವೆ ಎಂದು ಹೇಳಿದರು.</p>

<p>ರಾಜ್ಯ ಸರ್ಕಾರವು ಈ ಯೋಜನೆಯ ಅನುಷ್ಠಾನಕ್ಕಾಗಿ ಒಂದು ತಿಂಗಳಿಗೆ ಸುಮಾರು 800 ಕೋಟಿ ರೂಪಾಯಿ ಖರ್ಚು ಮಾಡಬೇಕಾಗಬಹುದು. ಈ ಲೆಕ್ಕಾಚಾರ ನಾವು ಹಾಕಿಕೊಂಡಿದ್ದೇವೆ. 20 ಸಾವಿರ ಟನ್ ಅಕ್ಕಿ ಖರೀದಿಗೂ ಕ್ರಮ ತೆಗೆದುಕೊಂಡಿದ್ದೇವೆ ಎಂದು ಸಚಿವರು ಮಾಧ್ಯಮ ಪ್ರತಿನಿಧಿಗಳಿಗೆ ಪ್ರಶ್ನೆಗೆ ಉತ್ತರಿಸುವಾಗ ಮಾಹಿತಿ ನೀಡಿದರು.</p>

<p>ಅಕ್ಕಿ ಬದಲು ಹಣ ನೀಡುವ ತಾಂತ್ರಿಕ ವಿವರ ಒದಗಿಸಿದ ಸಚಿವ ಎಚ್‌.ಕೆ.ಪಾಟೀಲ, ಕುಟುಂಬದ ಯಜಮಾನರ (ಮ್ಯಾನೇಜರ್ ಆಫ್ ದಿ ಹೌಸ್‌) ಅಕೌಂಟ್‌ಗೆ ಹಣ ಹಾಕುತ್ತೇವೆ. ಅವರು ಮನೆಯ ಇತರರಿಗೆ ಆಹಾರ ಒದಗಿಸುತ್ತಾರೆ. ಈ ಕುರಿತು ನಾವು ಯೋಚಿಸಿದ್ದೇವೆ ಎಂದು ವಿವರಿಸಿದರು.</p>

<p>ಶೇ 95ರಷ್ಟು ಪಡಿತರ ಚೀಟಿಗಳು ಆಧಾರ್ ಕಾರ್ಡ್‌ಗೆ ಲಿಂಕ್ ಹಾಗಿವೆ. ಗೃಹಲಕ್ಷ್ಮೀ ಯೋಜನೆಗೂ ಇದು ಬಳಕೆಯಾಗಲಿದೆ. ಬ್ಯಾಂಕ್ ಖಾತೆಗಳಿಗೆ ಹಣ ಹಾಕುತ್ತೇವೆ. ಈ ತಿಂಗಳಲ್ಲಿಯೇ ನಾವು ಕೆಲಸ ಆರಂಭಿಸುತ್ತೇವೆ. ಮುಂದಿನ ತಿಂಗಳಿನಿಂದಲೇ ಹಣ ಜಮಾ ಆಗಲಿದೆ ಎಂದು ಆಹಾರ ಸಚಿವ ಮುನಿಯಪ್ಪ ಹೆಚ್ಚಿನ ವಿವರಣೆ ಒದಗಿಸಿದರು.</p>

<h2>ಕೇಂದ್ರದ ಅಸಹಕಾರ, ತಾತ್ಸಾರ</h2><p>ಕೇಂದ್ರ ಸರ್ಕಾರ ಬಡವರ ಕಾರ್ಯಕ್ರಮದ ಬಗ್ಗೆ ತಾತ್ಸಾರ ತೋರಿಸಿದರು. ನಮಗೆ ಅಸಹಕಾರ ತೋರಿಸಿದರು. ಹೀಗಾಗಿ ನಾವು ಅನಿವಾರ್ಯವಾಗಿ ಜನರಿಗೆ ಹಣ ಕೊಡುವ ನಿರ್ಧಾರ ಮಾಡಬೇಕಾಯಿತು. ಈ ಹಣದಿಂದ ಜನರು ಅಕ್ಕಿಯಷ್ಟೇ ಅಲ್ಲ, ಜೋಳ, ರಾಗಿ, ಬೇಳೆ, ಎಣ್ಣೆ ಏನು ಬೇಕಾದರೂ ಖರೀದಿಸಬಹುದು ಎಂದು ಸಚಿವ ಎಚ್‌.ಕೆ.ಪಾಟೀಲ ಕೇಂದ್ರದ ವಿರುದ್ಧ ನೇರ ಆರೋಪ ಮಾಡಿದರು.</p>

<p>ಒಬ್ಬ ಫಲಾನುಭವಿಗೆ 170 ರೂಪಾಯಿಯಂತೆ ಪಡಿತರ ಚೀಟಿಯಲ್ಲಿ ಎಷ್ಟು ಜನರ ಹೆಸರಿದೆಯೋ ಅಷ್ಟೂ ಜನರಿಗೆ ಕೊಡುತ್ತೇವೆ. ಇದು ತಾತ್ಕಾಲಿಕ ವ್ಯವಸ್ಥೆ ಮಾತ್ರ. ನಮಗೆ ಅಕ್ಕಿ ಸಿಕ್ಕ ನಂತರ ಅಕ್ಕಿಯನ್ನೇ ಕೊಡುತ್ತೇವೆ. ಹಣ ಕೊಡುವುದು ನಿಲ್ಲಿಸುತ್ತೇವೆ ಎಂದು ತಿಳಿಸಿದರು.</p>

<p>ನಾವು ಅಕ್ಕಿಯನ್ನೂ ಕೊಡಬಾರದು, ರೊಕ್ಕವನ್ನೂ (ಹಣ) ಕೊಡಬಾರದು ಎಂದು ವಿರೋಧ ಪಕ್ಷಗಳು ಹೇಳುತ್ತಿವೆ. ಇದನ್ನು ಕೇಳಲು ಆಗುವುದಿಲ್ಲ. ಕೇಂದ್ರ ಸರ್ಕಾರದ ಗೋದಾಮುಗಳಲ್ಲಿ 7 ಲಕ್ಷ ಟನ್ ಅಕ್ಕಿ ಇದೆ. ಇದನ್ನು ಎತ್ತುವಳಿ ಮಾಡಲು ಖಾಸಗಿಯವರಿಗೆ ಕೊಡುವಂತೆ ಕೇಂದ್ರ ಸರ್ಕಾರ ಸೂಚಿಸಿದೆ. ರಾಜ್ಯ ಸರ್ಕಾರಕ್ಕೆ ಅಕ್ಕಿ ಕೊಡಬಾರದು ಎಂದು ತಾಕೀತು ಮಾಡಿದೆ ಎಂದು ಆರೋಪ ಮಾಡಿದರು.</p>

<p>ಕರ್ನಾಟಕದಲ್ಲಿ 85 ಲಕ್ಷ ಬಿಪಿಎಲ್ ಕಾರ್ಡ್‌ದಾರರು ಇದ್ದಾರೆ. ಯೋಜನೆಯನ್ನು ಸಮರ್ಪಕವಾಗಿ ಅನುಷ್ಠಾನಗೊಳಿಸುವ ವಿಶ್ವಾಸ ನಮಗಿದೆ ಎಂದರು.</p>

<ul><li>Anna Bhagya Scheme Karnataka: ಕರ್ನಾಟಕ ಸರಕಾರವು ಅಕ್ಕಿ ಕೊರತೆ ಹಿನ್ನೆಲೆಯಲ್ಲಿ 5 ಕೆಜಿ ಹೆಚ್ಚುವರಿ ಅಕ್ಕಿಯ ಬದಲು ಒಂದು ಕೆಜಿ ಅಕ್ಕಿಗೆ 34 ರೂಪಾಯಿಯಂತೆ, ಫಲಾನುಭವಿಗಳಿಗೆ ತಿಂಗಳಿಗೆ 170 ರೂಪಾಯಿ ನೀಡಲು ಕರ್ನಾಟಕ ಸಚಿವ ಸಂಪುಟ ಸಭೆ ತೀರ್ಮಾನಿಸಿದೆ.</li></ul>

ಈಜಿ ಲೈಫ್; ಕೈಜಾರಿದ ಕನಸುಗಳಿಗೆ ಬಟ್ಟೆ ತೊಡಿಸಿ ಕೊನೆಯಾಸೆ ಹುಡುಕ ಹೊರಟಾಗ, ಮುಗುಳ್ನಕ್ಕಿತ್ತು ಮೊದಲ ಆಸೆ

The Asadas

<p>ಮಹಾಭಾರತದಲ್ಲಿ ಒಂದು ಪ್ರಸಂಗವಿದೆ. ಪಾಂಡವರಲ್ಲಿ ಧರ್ಮಜಿಜ್ಞಾಸೆ ನಡೆಯುವಾಗ ಭೀಮ ಕಾಮವೇ (ಆಸೆಯೇ) ಮುಖ್ಯ. ಅದೇ ಮನುಷ್ಯತ್ವದ ತಂತು ಎಂಬ ಅರ್ಥಗಳು ಬರುವ ಮಾತು ಆಡುತ್ತಾನೆ. ಮುಂದೆ ಇದರ ಬಗ್ಗೆ ದೊಡ್ಡ ಚರ್ಚೆಯಾಗಿ ಶ್ರೀಕೃಷ್ಣ ಇದನ್ನೇ ಒಪ್ಪುತ್ತಾನೆ. ಹೌದು ಆಸೆಯೇ ಮುಖ್ಯ. ಆಸೆಯ ಬೆನ್ನು ಹತ್ತುವುದೇ ಜೀವನ. ಹೀಗೆ ಬೆನ್ನು ಹತ್ತಿದ ಎಲ್ಲ ಆಸೆಗಳು ಈಡೇರಬೇಕು ಎಂದೇನೂ ಇಲ್ಲ. ಎಷ್ಟೋ ಸಲ ಬೆನ್ನುಹತ್ತುವವರಿಗೂ ಅದು ಕೈಗೂಡಬಹುದು ಎಂಬ ವಿಶ್ವಾಸವೂ ಇರುವುದಿಲ್ಲ. ಹಾಗೆಂದು ಆಸೆಯನ್ನೇ ಬಿಟ್ಟುಬಿಟ್ಟರೆ ಬದುಕು ಸಾಗುವುದುಂಟೆ. ಮತ್ತೆ ಉಸಿರೆಳೆದುಕೊಳ್ಳಬಲ್ಲೆ ಎಂಬ ಭರವಸೆಯಿಂದಲೇ ತಾನೆ ಶ್ವಾಸಕೋಶದಿಂದ ಉಸಿರು ಹೊರಗೆ ಬೀಳುವುದು. ಇಂಥ ಭರವಸೆಗಳೋ, ವಿಶ್ವಾಸಗಳೋ, ಆಶಯಗಳೋ, ಗುರಿಗಳೋ, ಮತ್ತೇನೋ... ಆ ಎಲ್ಲದರ ಮೊತ್ತವನ್ನೇ ಸದ್ಯದ ಮಟ್ಟಿಗೆ ಆಸೆ ಎಂದುಕೊಳ್ಳೋಣ. ಭಿನ್ನವಿಭಿನ್ನ ಹಿನ್ನೆಲೆಯ ಮನುಷ್ಯರು ಆಸೆಗಳನ್ನು ಬೆನ್ನುಹತ್ತುವುದನ್ನು ಬಿಂಬಿಸುವ ಸಿನಿಮಾ 'ದಿ ಅಸಾದಾಸ್'. ಇದೇ ಸಿನಿಮಾದ ಆಶಯವನ್ನೇ ಹೋಲುವ ಘಟನೆಯೊಂದು ಮೈಸೂರಿನಲ್ಲಿ ನಡೆದದ್ದು ತೀರಾ ವಿಶೇಷ. ಸಪ್ತಸಾಗರದಾಚೆಗೆ ಇರುವ ಮನುಷ್ಯರಲ್ಲೂ ಇರುವ ತಂತು ಒಂದೇ ಎಂಬುದನ್ನು ನೆನಪಿಸುವಂತಿದೆ ಈ ಘಟನೆ.</p>

<p>ಈಗ ವಿಷಯಕ್ಕೆ ಬರೋಣ. ಸಾಮಾನ್ಯ ಬದುಕಿನ ಅಸಾಮಾನ್ಯ ಸಂಗತಿಗಳನ್ನು ಹೆಕ್ಕಿ ತೋರಿಸುವಲ್ಲಿ ಜಪಾನಿ ಸಿನಿಮಾ ನಿರ್ದೇಶಕರು ನಿಪುಣರು. 2020ರಲ್ಲಿ ತೆರೆಕಂಡ 'ದಿ ಅಸಾದಾಸ್' (The Asadas) ಕೂಡ ಇಂಥದ್ದೇ ಚಿತ್ರ. ಸ್ವತಃ ಅಣ್ಣನಿಂದ 'ಕೆಲಸಕ್ಕೆ ಬಾರದವ' ಎನಿಸಿಕೊಂಡ ತರುಣ ಮಸಾಶಿ ಸದಾ ಹೊಸತನಕ್ಕೆ ತುಡಿಯುವ ಮನಸ್ಸುಳ್ಳವನು. ಅವನಲ್ಲಿ ಮೊಳೆತ ಫೋಟೊಗ್ರಫಿ ಹುಚ್ಚಿಗೆ ಅವನ ಅಪ್ಪನೇ ಕಾರಣ. ಫೋಟೊಗ್ರಫಿ ಕೋರ್ಸ್‌ಗೆ ಸೇರುತ್ತಾನಾದರೂ ಅದರಲ್ಲಿ ಒಂದು ಪ್ರಾಜೆಕ್ಟ್ ಬಾಕಿಯಾಗಿರುತ್ತದೆ. ಆ ಪ್ರಾಜೆಕ್ಟ್ ಮುಗಿಯುವುದರೊಂದಿಗೆ ಮಸಾಶಿ ಬದುಕಿಗೂ ಹೊಸ ತಿರುವು ಸಿಗುತ್ತದೆ. ಎಷ್ಟೋ ಸನ್ನಿವೇಶಗಳಲ್ಲಿ ಪ್ರೇಕ್ಷಕರಿಗೆ ತಮ್ಮದೇ ಬದುಕು ತೆರೆಯ ಮೇಲೆ ಬಂದಂತೆ ಭಾಸವಾಗುತ್ತದೆ.</p>

<p>'ನಿನ್ನ ಅಮ್ಮನಿಗೆ ನರ್ಸ್ ಆಗಬೇಕೆಂಬ ಆಸೆಯಿತ್ತು. ನನಗೂ ಏನೇನೋ ಆಸೆಗಳಿದ್ದವು. ಆದರೆ ನನಗೆ ನನ್ನ ಆಸೆ ಈಡೇರಿಸಿಕೊಳ್ಳುವುದಕ್ಕಿಂತಲೂ ನಿನ್ನಮ್ಮನ ಖುಷಿ ಮುಖ್ಯವಾಗಿತ್ತು. ಹೀಗಾಗಿ ನಾನು ಮನೆಯಲ್ಲಿ ರುಚಿರುಚಿಯಾಗಿ ಅಡುಗೆ ಮಾಡಲು ಶುರು ಮಾಡಿದೆ. ಮಕ್ಕಳನ್ನು ಸಾಕಿ ಬೆಳೆಸಿದೆ. ಈಗ ನೋಡು ನಿನ್ನಮ್ಮ ರಿಟೈರ್ಡ್ ಆಗಿದ್ದಾಳೆ. ಆದರೂ ನಾನೇ ಅಡುಗೆ ಮಾಡ್ತಿದ್ದೇನೆ. ಸಂಜೆ ಬೇಗ ಮನೆಗೆ ಬಾ, ನಿನಗೊಂದು ಸರ್‌ಪ್ರೈಸ್ ಇರುತ್ತೆ. ಆರುವ ಮೊದಲು ತಿಂದ್ರೆ ಚಂದ' ಎಂದು ಫೋಟೊಗ್ರಫಿ ಪ್ರಾಜೆಕ್ಟ್‌ಗಾಗಿ ತಲೆಕೆಡಿಸಿಕೊಳ್ಳುತ್ತಿದ್ದ ಮಗ ಮಸಾಶಿ ಎದುರು ತಲೆಗೂದಲು ಹಣ್ಣಾದ ಆಕಿರಾ ಅಸಾದಾ ಹೆಮ್ಮೆಯಿಂದ ಹೇಳುತ್ತಾನೆ.</p>

<p>ಇಷ್ಟುದಿನ ಅಪ್ಪನ ಬದುಕಿನ ಬಗ್ಗೆ ಹೆಚ್ಚು ಆಸಕ್ತಿಯನ್ನೇ ತೋರದಿದ್ದ ಮಸಾಶಿಗೆ ಈಗ ಅಪ್ಪ ಅಂದ್ರೆ ಹೊಲಿಗೆ ಹಾಕಿರುವ ಕುತೂಹಲದ ಮೂಟೆ ಎನಿಸುತ್ತದೆ. ನಿಧಾನವಾಗಿ ಅಪ್ಪನ ಆಸೆಗಳನ್ನು ಅರಿಯಲು ಯತ್ನಿಸುತ್ತಾನೆ. ಆಗ ಅವನಿಗೆ ತನ್ನ ಅಪ್ಪನಿಗೆ ಫೈರ್‌ಮನ್ ಆಗುವ ಆಸೆಯಿದ್ದುದು ತಿಳಿಯುತ್ತೆ. ಊರಿನ ಫೈರ್‌ಸ್ಟೇಷನ್‌ಗೆ ಅಣ್ಣನನ್ನು ಸಾಗ ಹಾಕಿ, ಅವನಿಂದ ಸಲಾಮು ಹಾಕಿಸಿ ಫೈರ್ ಎಂಜಿನ್ ವಾಹನ ಮತ್ತು ಸಮವಸ್ತ್ರ ತಂದು, ಅದನ್ನು ಅಪ್ಪ, ಅಮ್ಮ, ಅಣ್ಣನಿಗೆ ತೊಡಿಸಿ. ತಾನೂ ತೊಟ್ಟುಕೊಂಡು ಕ್ಯಾಮೆರಾಗೆ ಟೈಮರ್ ಇಟ್ಟು ಫೋಟೊ ತೆಗೆಯುತ್ತಾನೆ. ಮುಂದೆ ಇಂಥ ಫೋಟೊಗಳೇ ಅವನಿಗೆ ಹೆಸರು ತಂದುಕೊಡುತ್ತವೆ.</p>

<p>ಪ್ರತಿಯೊಬ್ಬರಲ್ಲಿಯೂ ಒಂದಲ್ಲ ಒಂದು ಇಂಥ ಈಡೇರದ ಪ್ರಬಲ ಆಸೆಗಳಿರುತ್ತವೆ ಎನ್ನುವುದನ್ನು ಅರ್ಥ ಮಾಡಿಕೊಳ್ಳುವ ಮಸಾಶಿ ಒಬ್ಬ ಛಾಯಾಚಿತ್ರ ಕಲಾವಿದನಾಗಿ ದೊಡ್ಡ ಹೆಸರು ಮಾಡುತ್ತಾನೆ. ಎಷ್ಟೋ ಕುಟುಂಬಗಳ ಅವಿಸ್ಮರಣೀಯ ಕ್ಷಣಗಳನ್ನು ಮರುಸೃಷ್ಟಿಸಿ, ಕ್ಯಾಮೆರಾ ಕಣ್ಣಿನಲ್ಲಿ ದಾಖಲಿಸುತ್ತಾನೆ. ಎಲ್ಲ ಹೀಗೆ ಸಾಗುತ್ತಿರುವಾಗಲೇ ಸುನಾಮಿ ಜಪಾನಿಗೆ ಅಪ್ಪಳಿಸುತ್ತದೆ. ಎಷ್ಟೋ ಕುಟುಂಬಗಳು ಬೀದಿಪಾಲಾಗುತ್ತವೆ. ತನ್ನ ಗ್ರಾಹಕರಿಗೆ ಫೋಟೊ ತಲುಪಿಸಲು ಹೋಗುವ ಮಸಾಶಿ ಅವರ ಮನೆಗಳೇ ಕೊಚ್ಚಿಹೋಗಿರುವುದನ್ನು ಕಂಡು ಹೌಹಾರುತ್ತಾನೆ. ಕಲಾವಿದನಾಗಿ ಮಾಗಿದ್ದ ಅವನ ಮನಸ್ಸು ಈಗ ದೇಶದ ಸಂಕಷ್ಟಕ್ಕೆ ಮಿಡಿಯುತ್ತದೆ. ಹೆಣಗಳು ಸಿಗದ ಕುಟುಂಬಗಳು ತಮ್ಮವರ ಅಂತ್ಯಸಂಸ್ಕಾರಕ್ಕಾಗಿ ಒಂದು ಫೋಟೊ ಆದರೂ ಸಿಗಬಹುದೆಂದು ಹುಡುಕಾಡುತ್ತಿರುವುದನ್ನು ಮನಗಂಡು, ಕೆಸರಿನಲ್ಲಿ ಸಿಲುಕಿದ ಹಳೇ ಫೋಟೊ ಆಲ್ಬಮ್‌ಗಳನ್ನು ಹುಡುಕಿ ಫೋಟೊಗಳನ್ನು ಸ್ವಚ್ಛಗೊಳಿಸಿ ಪ್ರದರ್ಶಿಸುತ್ತಾನೆ.</p>

<p>ಇಂಥದ್ದೊಂದು ಸಂದರ್ಭದಲ್ಲಿಯೇ ಮಸಾಶಿಗೆ ಅಪ್ಪನೇ ಇಲ್ಲದ ಫೋಟೊ ಆಲ್ಬಮ್ ಕೈಲಿ ಹಿಡಿದ ಮಗು ಸಿಗುವುದು. ಯಾವಾಗಲೂ ಹೆಂಡತಿ, ಮಕ್ಕಳ ಫೋಟೊ ತೆಗೆಯುತ್ತಿದ್ದ ಅಪ್ಪ ತಾನು ಮಾತ್ರ ಯಾವ ಫೋಟೊದಲ್ಲೂ ಇರಲೇ ಇಲ್ಲ. ಏಕೆಂದರೆ ಅವನು ತನ್ನನ್ನು ತಾನೇ ಮರೆಯುವಷ್ಟರ ಮಟ್ಟಿಗೆ ಹೆಂಡತಿ-ಮಕ್ಕಳನ್ನು ಪ್ರೀತಿಸುತ್ತಿದ್ದ. ಕ್ಯಾಮೆರಾ ಹಿಂದಿದ್ದ ಅಪ್ಪ ಹೇಗೆ ತಾನೆ ಫೋಟೊದಲ್ಲಿ ಬರಲು ಸಾಧ್ಯ? ಗಟ್ಟಿಕಥೆಯೇ ಈ ಚಿತ್ರದ ನಿಜವಾದ ಹೀರೋ. ಅದಕ್ಕೆ ಪೂರಕವಾಗಿ ಛಾಯಾಗ್ರಹಣ, ಸಂಗೀತ, ಸಂಭಾಷಣೆ, ಉದ್ವೇಗವೇ ಇಲ್ಲದ ನಿರೂಪಣೆ... ಹೀಗೆ ಇಡೀ ಚಿತ್ರ ಒಂದೊಳ್ಳೆ ಅನುಭವವಾಗಿ ರೂಪಾಂತರವಾಗುತ್ತದೆ. ಹಲವು ವರ್ಷಗಳ ಒಳಗೆ ಮನಸ್ಸಿನಲ್ಲಿಯೇ ಬೆಳೆಯುತ್ತಿರುತ್ತದೆ.</p>

<p>'ದಿ ಅಸಾದಾಸ್' ಚಿತ್ರ ಮತ್ತೊಮ್ಮೆ ನೆನಪಾಗಲು ಮೈಸೂರಿನ ಟೆರಾಕೋಟಾ ಕಲಾವಿದೆ ನೀಲಿ ಲೋಹಿತ್ ಕಾರಣ. ತಮಗೆ ಆಗಿರುವ ಅನ್ಯಾಯದ ವಿರುದ್ಧ ಪ್ರಬಲ ಹೋರಾಟ ನಡೆಸುತ್ತಿರುವ ನೀಲಿ ಲೋಹಿತ್ ಅವರ ಫೇಸ್‌ಬುಕ್ ಬರಹಗಳು ಜನರ ಗಮನ ಸೆಳೆದಿವೆ. ವ್ಯವಸ್ಥೆಯ ಹುಳುಕನ್ನು ಒಂದೊಂದಾಗಿ ಬಯಲಾಗಿಸುತ್ತಿರುವ ಇವರ ಫೇಸ್‌ಬುಕ್ ಖಾತೆಯಲ್ಲಿ ಮೇ 15ರಂದು ಅಪ್‌ಲೋಡ್ ಆಗಿರುವ ಚಿತ್ರಗಳು, ಅವರು ಬರೆದುಕೊಂಡಿರುವ ಒಕ್ಕಣೆ 'ದಿ ಅಸಾದಾಸ್' ಚಿತ್ರದ ಕರ್ನಾಟಕದ ಅವತರಣಿಕೆಯಂತೆ ಭಾಸವಾಗುತ್ತದೆ.</p>

<p>"ಅವ್ವಾ ಹೋಗ್ಬಿಟ್ಳು... ಅಲ್ಲಿಗೆ ಅವಳೊಟ್ಟಿಗೆ ನನ್ನ Law ಓದುವ ಕನಸೂ ಹೋಯ್ತು... ಆದರೂ ನಾನಾ ಬಿಡೋಳು, ಆ ಕನಸಿಗೆ ಕಡೆ ಪಕ್ಷ ಒಂದು ದಿನದ ಬಟ್ಟೆ ತೊಡಿಸಿ ನೋಡಿಯೇ ಬಿಡೋಣ ಎಂದು ಮಗಳಿಗೆ ಹೇಳಿದ್ದೆ ತಡ, ಅವಳೆ ಖುದ್ದು ನಿಂತು ಈ ಹೊಸಮಗುವಿಗೆ Lawyer ಅವತಾರ ತೊಡಿಸಿ, ಪಟಪಟನೆ ಪಟಗಳನ್ನ ತೆಗೆದು "Sanam tere kasam heroin ಥರ ಮುದ್ದಾಗಿಯಾ" ಅಂದರೆ ಈ ನೀಲಿ ಎಷ್ಟು ಹಾರಿರ್ಬೇಡ ಹೇಳಿ" ಎಂದು ನೀಲಿ ಲೋಹಿತ್ ಬರೆದುಕೊಂಡಿದ್ದಾರೆ. ಮನದಾಳದ ಮೂಸೆಯಲ್ಲಿದ್ದ ಪ್ರಬಲ ಆಸೆಯೊಂದು ಈಡೇರಿದ ತೃಪ್ತಿ ಹೀಗಾದರೂ ಅವರಿಗೆ ಸಿಕ್ಕಿದೆ. ಅದೇ ಹೊತ್ತಿನಲ್ಲಿ ಹೀಗೆ ಪರಿತಪಿಸುವ ಎಷ್ಟೋ ಜನರಿಗೆ ದಾರಿಯನ್ನೂ ತೋರಿಸಿದೆ.</p>

<h2>‘ದಿ ಅಸಾದಾಸ್’ ಸಿನಿಮಾದ ಟ್ರೇಲರ್</h2></p>

<h2>ಮೈಸೂರಿನ ಕಲಾವಿದೆ ನೀಲಿ ಲೋಹಿತ್ ಅವರ ಫೇಸ್‌ಬುಕ್ ಪೋಸ್ಟ್</h2></p>

<p>(ಪ್ರಿಯ ಓದುಗರೇ, ಪಾಸಿಟಿವ್ ಎನಿಸುವ, ಜೀವನಪ್ರೀತಿ ಹೆಚ್ಚಿಸುವ ಸತ್ಯಕಥೆಗಳನ್ನು ನೀವೂ ಹಂಚಿಕೊಳ್ಳಬಹುದು. ಇಮೇಲ್ dm.ghanashyam@htdigital.in, ht.kannada@htdigital.in)</p>

Brain Teaser: ಈ ಗಣಿತದ ಪಜಲ್‌ ನಿಮ್ಮ ತಲೆಗೆ ಹುಳ ಬಿಡುವುದು ಪಕ್ಕಾ; ಜಾಣರಾದ್ರೆ ಇದಕ್ಕೆ  ಉತ್ತರ ಹುಡುಕಿ

<ul><li>ನಾವೆಷ್ಟೇ ಬುದ್ಧಿವಂತರಿದ್ದರೂ ಗಣಿತದ ಕೆಲವು ಸವಾಲುಗಳು ತಲೆಗೆ ಹುಳ ಬಿಟ್ಟು ಬಿಡುತ್ತವೆ. ಎಷ್ಟೇ ಗುಣಿಸಿ, ಭಾಗಿಸಿ, ಕೂಡಿಸಿ, ಕಳೆದರೂ ಸರಿಯಾದ ಉತ್ತರ ಮಾತ್ರ ಸಿಗೋದೇ ಇಲ್ಲ. ಆದರೆ ಕೆಲವರಿಗೆ ಗಣಿತ ಸವಾಲು ಎಂದರೆ ನೀರು ಕುಡಿದಷ್ಟೇ ಸುಲಭ, ಅಂತಹವರಿಗಾಗಿ ಇಲ್ಲಿದೆ ಒಂದು ಪಜಲ್‌.&nbsp;</li></ul>

ರಂಗಮಂಚದಲ್ಲಿ ಚಾರು ವಸಂತ ಮ್ಯಾಜಿಕ್; ಜೀವನರಾಂ ಸುಳ್ಯ ನಿರ್ದೇಶನ ನಾಟಕದ ಬಗ್ಗೆ ಮಮತಾ ಅರಸೀಕೆರೆ ಬರಹ

<ul><li>ಹಿರಿಯ ಸಾಹಿತಿ ಹಂಪನಾ ಅವರ ಚಾರು ವಸಂತ ಖಂಡಕಾವ್ಯವನ್ನು ನಾ ದಾಮೋದರ ಶೆಟ್ಟಿ ಅವರು ರಂಗರೂಪಕ್ಕೆ ಇಳಿಸಿದರೆ, ಜೀವನ ರಾಂ ಸುಳ್ಯ ಈ ನಾಟಕವನ್ನು ನಿರ್ದೇಶಿಸಿ ರಂಗದ ಮೇಲೆ ಮ್ಯಾಜಿಕ್‌ ಅನ್ನೇ ಸೃಷ್ಟಿಸಿದ್ದಾರೆ. ಚಾರು ವಸಂತ ನಾಟಕ ಬಗ್ಗೆ ಮಮತಾ ಅರಸೀಕರೆ ಅವರ ಫೇಸ್‌ಬುಕ್‌ ಬರಹ ಹೀಗಿದೆ&nbsp;</li></ul>

Viral News: ಇಡೀ ದಿನ ನಾನೇನು ಮಾಡಿಲ್ಲ ಎಂದ ಗೃಹಿಣಿ: ಇದಕ್ಕೆ ಪತಿ ನೀಡಿದ ಉತ್ತರ ನೆಟ್ಟಿಗರ ಮನಗೆದ್ದಿತು

house wife

<ul><li>Housewives: ಗೃಹಿಣಿಯರು ಎಂದರೆ ಅವರು ಮನೆಯ ಖರ್ಚಿಗೆ ಆಸರೆಯಾಗುವುದಿಲ್ಲ ಎಂಬ ಅಭಿಪ್ರಾಯ ಅನೇಕರಲ್ಲಿದೆ. ಆದರೆ ಮನೆಗೆಲಸ, ಮಕ್ಕಳ ಲಾಲನೆ ಪಾಲನೆ, ಮನೆಯಲ್ಲಿ ಹಿರಿಯರ ಯೋಗಕ್ಷೇಮ ಇವೆಲ್ಲವನ್ನೂ ನೋಡಿಕೊಳ್ಳುವ ಗೃಹಿಣಿಯು ತಾವು ಯಾವುದಕ್ಕೂ ಪ್ರಯೋಜನವಿಲ್ಲವೆಂಬ ಕೀಳರಿಮೆಯಲ್ಲೇ ಬದುಕುತ್ತಿರುವ ಅನೇಕ ಗೃಹಿಣಿಯರನ್ನು ಹುರಿದುಂಬಿಸಲಿದೆ ಈ ಪೋಸ್ಟ್..</li></ul>

Firefox Browser: ಫೈರ್‌ಫಾಕ್ಸ್‌ ಬ್ರೌಸರ್‌ ಬಳಸುತ್ತಿದ್ದೀರಾ; ಪ್ರಮುಖ ಭದ್ರತಾ ಸಮಸ್ಯೆಗಳನ್ನು ತಪ್ಪಿಸಲು ಈ ಟಿಪ್ಸ್‌ ಅನುಸರಿಸಿ

<ul><li>ಇತ್ತೀಚಿನ ದಿನಗಳಲ್ಲಿ ಸೈಬರ್​ ಕ್ರೈಂ ಪ್ರಕರಣಗಳು ದಿನದಿಂದ ದಿನಕ್ಕೆ ಹೆಚ್ಚುತ್ತಲೇ ಇದೆ. ಇದೀಗ ಮೊಝಿಲ್ಲಾ ಫೈರ್​ಫಾಕ್ಸ್​ ಸರ್ಚ್​ ಇಂಜಿನ್​ ಬಳಕೆ ಮಾಡುತ್ತಿರುವವರಿಗೆ ಆಘಾತಕಾರಿ ಮಾಹಿತಿಯೊಂದು ಹೊರಬಿದ್ದಿದೆ. ಈ ಕೂಡಲೇ ನೀವು ಫೈರ್​ಫಾಕ್ಸ್​ ಅಪ್​ಡೇಟ್​ ಮಾಡದೇ ಹೋದಲ್ಲಿ ಭಾರೀ ದೊಡ್ಡ ಅಪಾಯಕ್ಕೆ ಸಿಲುಕಲಿದ್ದೀರಿ.</li></ul>

<ul><li>The Asadas: ಸಾವಿನ ನೆರಳಿನಲ್ಲಿ ಬದುಕು ಹುಡುಕುವ ಕಥೆ ಇರುವ ಚಿತ್ರ 'ದಿ ಅಸಾದಾಸ್‌'. ಎಲ್ಲ ಕಳೆದುಕೊಂಡ ಅಸಹಾಯಕತೆಯಲ್ಲಿಯೂ ಬದುಕುವ ಆಸೆ ಚಿಗುರಿಸುವ ಬೆಳ್ಳಿಗೆರೆಯನ್ನು ಹೇಗೆಲ್ಲಾ ಕಂಡುಕೊಳ್ಳಬಹುದು ಎನ್ನುವುದಕ್ಕೆ ಈ ಚಿತ್ರಕ್ಕಿಂತ ಉತ್ತಮ ಉದಾಹರಣೆ ಇನ್ನೊಂದಿಲ್ಲ.</li></ul>

D M Ghanashyam