ಶಕೀಬ್ ಅಲ್ ಹಸನ್, ರಿಶಾದ್ ಹೊಸೈನ್ ಮಿಂಚು; ನೆದರ್ಲೆಂಡ್ಸ್ ಮಣಿಸಿ ಸೂಪರ್-8ರ ಸನಿಹಕ್ಕೆ ಬಂದ ಬಾಂಗ್ಲಾದೇಶ

ಟಿ20 ವಿಶ್ವಕಪ್ 2024 ಟೂರ್ನಿಯಲ್ಲಿ ಗುಂಪು ಹಂತದ 27ನೇ ಪಂದ್ಯದಲ್ಲಿ ನೆದರ್ಲೆಂಡ್ಸ್ ವಿರುದ್ಧ ಬಾಂಗ್ಲಾದೇಶ (Bangladesh beat Netherlands), 25 ರನ್​​ಗಳ ಭರ್ಜರಿ ಗೆಲುವು ಸಾಧಿಸಿದೆ. ಡಿ ಗುಂಪಿನಲ್ಲಿ ಸೌತ್ ಆಫ್ರಿಕಾ ಈಗಾಗಲೇ ಸೂಪರ್-8ಕ್ಕೆ ಅರ್ಹತೆ ಪಡೆದುಕೊಂಡಿದೆ. ಇದೀಗ ಬಾಂಗ್ಲಾ ಎರಡನೇ ತಂಡವಾಗಿ ಮುಂದಿನ ಸುತ್ತಿಗೆ ಪ್ರವೇಶಿಸಲು ಮುಂಚೂಣಿಯಲ್ಲಿದೆ. ಈ ಪಂದ್ಯದ ಬೆನ್ನಲ್ಲೇ ಶ್ರೀಲಂಕಾ ಎಲಿಮಿನೇಟ್​ ಆಗಿದೆ. ಬಾಂಗ್ಲಾ ಪ್ರಸ್ತುತ 3 ಪಂದ್ಯಗಳ ಪೈಕಿ 2ರಲ್ಲಿ ಗೆದ್ದು 4 ಅಂಕ ಸಂಪಾದಿಸಿದೆ. ಸೋತರೂ ನೆದರ್ಲೆಂಡ್ಸ್ ತಂಡಕ್ಕೆ ಇನ್ನೂ ಅವಕಾಶ ಇದೆ.

ಸೇಂಟ್ ವಿನ್ಸೆಂಟ್​ನ ಅರೊನ್ಸ್ ವಾಲೆ ಗ್ರೌಂಡ್​​ನಲ್ಲಿ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಬಾಂಗ್ಲಾದೇಶ, ಕಠಿಣ ಪಿಚ್​​ನಲ್ಲಿ ಉತ್ತಮ ಮೊತ್ತ ಕಲೆ ಹಾಕಿತು. 20 ಓವರ್​​ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 159 ರನ್ ಗಳಿಸಿತು. ಶಕೀಬ್ ಅಲ್ ಹಸನ್ ಅರ್ಧಶತಕ ಸಿಡಿಸಿ ಮಿಂಚಿದರು. ಈ ಗುರಿ ಬೆನ್ನಟ್ಟಿದ ನೆದರ್ಲೆಂಡ್ಸ್ ಬ್ಯಾಟಿಂಗ್​ನಲ್ಲೂ ವಿಫಲವಾಯಿತು. 20 ಓವರ್​ ಬ್ಯಾಟಿಂಗ್ ಮಾಡಿದರೂ 8 ವಿಕೆಟ್ ನಷ್ಟಕ್ಕೆ 134 ರನ್ ಗಳಿಸಲಷ್ಟೇ ಶಕ್ತವಾಯಿತು.

ಬ್ಯಾಟಿಂಗ್​​ನಲ್ಲೂ ಡಚ್ಚರು ವಿಫಲ

ಈ ಗುರಿ ಬೆನ್ನಟ್ಟಿದ ನೆದರ್ಲೆಂಡ್ಸ್​, ಕಳಪೆ ಪ್ರದರ್ಶನ ತೋರಿತು. ಬಾಂಗ್ಲಾದೇಶ ಬೌಲರ್​​ಗಳ ಎದುರು ರನ್ ಗಳಿಸಲು ಡಚ್ ಬ್ಯಾಟರ್​​ಗಳು ಪರದಾಡಿದರು. ಆರಂಭಿಕರಾದ ಮೈಕೆಲ್ ಲೆವಿಟ್ 18, ಮ್ಯಾಕ್ಸ್​ ಓಡೌಡ್ 12 ರನ್ ಗಳಿಸಲಷ್ಟೇ ಶಕ್ತರಾದರು. ಬಳಿಕ ಕಣಕ್ಕಿಳಿದ ವಿಕ್ರಮಜಿತ್ ಸಿಂಗ್ 26, ಸೈಬ್ರಾಂಡ್ ಎಂಗಲ್‌ಬ್ರೆಕ್ಟ್ 33, ಸ್ಕಾಟ್ ಎಡ್ವರ್ಡ್ಸ್ 25 ರನ್ ಕಲೆ ಹಾಕಿ ತಂಡಕ್ಕೆ ನೆರವಾಗಲು ಯತ್ನಿಸಿದರು. ಆದರೆ ಸಾಧ್ಯವಾಗಲಿಲ್ಲ.

ಇದನ್ನೂ ಓದಿ: ವಿರಾಟ್ ಕೊಹ್ಲಿ ಸತತ ವೈಫಲ್ಯ; ಸ್ಟ್ರೈಕ್​ರೇಟ್ ಟೀಕಿಸಿದ್ದ ಬೆನ್ನಲ್ಲೇ ಈಗ ಮಾಜಿ ನಾಯಕನ ಬೆಂಬಲಕ್ಕೆ ನಿಂತ ಸುನಿಲ್ ಗವಾಸ್ಕರ್​

ಆ ನಂತರ ಬಾಸ್​ ಡಿ ಲೀಡೆ 0, ಲೋಗನ್ ವಾನ್ ಬೀಕ್ 2 ರನ್ ಗಳಿಸಿ ನಿರಾಸೆ ಮೂಡಿಸಿದರು. ಕೊನೆಯಲ್ಲಿ ಆರ್ಯನ್ ದತ್ ಅಜೇಯ 15 ರನ್ ಗಳಿಸಿ ವಿಕೆಟ್ ಒಪ್ಪಿಸಿದರು. ಬೌಲಿಂಗ್​​​ನಲ್ಲಿ ರಿಶಾದ್ ಹೊಸೈನ್ 3 ವಿಕೆಟ್ ಉರುಳಿಸಿದರೆ, ಟಸ್ಕಿನ್ ಅಹ್ಮದ್ 2 ವಿಕೆಟ್ ಪಡೆದರು. ಮುಸ್ತಫಿಜುರ್​ ರೆಹಮಾನ್, ತಂಜಿಮ್ ಹಸನ್ ಸಕೀಬ್, ಮಹಮ್ಮದ್ದುಲ್ಲಾ ತಲಾ 1 ವಿಕೆಟ್ ಪಡೆದು ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು.

ಶಕೀಬ್​ ಭರ್ಜರಿ ಅರ್ಧಶತಕ

ಬಾಂಗ್ಲಾದೇಶ ಮೊದಲು ಬ್ಯಾಟಿಂಗ್ ನಡೆಸಿತು. ಆರಂಭಿಕ 3 ಓವರ್​​​​ಗಳಲ್ಲೇ ತನ್ನ ಎರಡು ವಿಕೆಟ್​​ಗಳನ್ನು ಕಳೆದುಕೊಂಡಿತು. ನಜ್ಮುಲ್ ಹೊಸೈನ್ ಶಾಂಟೋ ಮತ್ತು ಲಿತ್ತನ್ ದಾಸ್ ತಲಾ 1 ರನ್ ಗಳಿಸಿ ಆರ್ಯನ್ ದತ್ ಬೌಲಿಂಗ್​​ನಲ್ಲಿ ಔಟಾದರು. ಆ ಬಳಿಕ ತಂಜೀದ್ ಹಸನ್ (35), ಶಕೀಬ್ ಅಲ್ ಹಸನ್ (64) ಆರಂಭಿಕ ಆಘಾತದಿಂದ ಚೇತರಿಕೆ ನೀಡಿದರು. ಓವರ್​​​ಗಳು ಮುಂದುವರೆದಂತೆ ಬ್ಯಾಟಿಂಗ್ ಅಬ್ಬರ ಹೆಚ್ಚಿಸಿದರು. ವೇಗವಾಗಿ ರನ್ ಕಲೆ ಹಾಕತೊಡಗಿದರು.

ಆದರೆ, ಹಸನ್ 26 ಎಸೆತಗಳಲ್ಲಿ 5 ಬೌಂಡರಿ, 1 ಸಿಕ್ಸರ್ ಸಹಿತ 35 ರನ್​​ಗಳಿಸಿ ಔಟಾದರು. ಮತ್ತೊಂದೆಡೆ ಶಕೀಬ್ ಅರ್ಧಶತಕ ಸಿಡಿಸಿದರು. 46 ಎಸೆತಗಳಲ್ಲಿ 9 ಬೌಂಡರಿ ಸಹಿತ ಅಜೇಯ 64 ರನ್ ಸಿಡಿಸಿದ್ದರು. ಮಹಮ್ಮದ್ದುಲ್ಲಾ 25 ರನ್ ಗಳಿಸಿ ಔಟಾದರು. ಜೇಕರ್ ಅಲಿ 14 ರನ್ ಗಳಿಸಿದರು. ತೌಹಿದ್ ಹೃದೋಯ್ 9 ರನ್ ಕಲೆ ಹಾಕಿದರು. ಆರ್ಯನ್ ದತ್ ಮತ್ತು ಪಾಲ್ ವ್ಯಾನ್ ಮೀಕೆರೆನ್ ತಲಾ 2 ವಿಕೆಟ್ ಪಡೆದರು. ಟಿಮ್ ಪ್ರಿಂಗಲ್ 1 ವಿಕೆಟ್ ಉರುಳಿಸಿ ಮಿಂಚಿದರು.

ಇನ್ನಷ್ಟು ಟಿ20 ವಿಶ್ವಕಪ್ 2024 ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

ಇದನ್ನೂ ಓದಿ: ಟಿ20 ವಿಶ್ವಕಪ್​ ಸೂಪರ್​-8ನಲ್ಲಿ ಭಾರತ ಪಂದ್ಯಗಳು ಯಾವಾಗ, ಎಲ್ಲಿ, ಯಾರ ವಿರುದ್ಧ? ಇಲ್ಲಿದೆ ನೋಡಿ ಕಂಪ್ಲೀಟ್ ಮಾಹಿತಿ