ಬಿಸಿಸಿಐ ಕಠಿಣ ನಿರ್ಧಾರ: ಭಾರತ ಎ ತಂಡದಲ್ಲಿ ಕೊಹ್ಲಿ, ರೋಹಿತ್​ಗೆ ಸ್ಥಾನ, ಕರುಣ್ ನಾಯರ್​ಗೂ ಅವಕಾಶ?​

ಜೂನ್‌ನಲ್ಲಿ ನಡೆಯಲಿರುವ ಇಂಗ್ಲೆಂಡ್ ಪ್ರವಾಸಕ್ಕೂ ಮುನ್ನ ಭಾರತೀಯ ಟೆಸ್ಟ್ ತಂಡದ ಪ್ರಮುಖ ಆಟಗಾರರು 'ಎ' ತಂಡದ ಭಾಗವಾಗುವ ಸಾಧ್ಯತೆಯಿದೆ ಎಂದು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (BCCI) ತಿಳಿಸಿದೆ. ಎರಡು ನಾಲ್ಕು ದಿನಗಳ ಪಂದ್ಯಗಳಲ್ಲಿ ಲಯನ್ಸ್ ತಂಡವನ್ನು ಎದುರಿಸಲು ಈ ಆಟಗಾರರು ಆಯ್ಕೆಯಾಗುವ ನಿರೀಕ್ಷೆಯಿದೆ. ಇಂಗ್ಲೆಂಡ್ ವಿರುದ್ಧದ 5 ಪಂದ್ಯಗಳ ಟೆಸ್ಟ್ ಸರಣಿಗೆ ಸಿದ್ಧತೆಯಾಗಿ ಈ ಪಂದ್ಯಗಳು ಮೇ-ಜೂನ್ ಅವಧಿಯಲ್ಲಿ ನಡೆಯಲಿವೆ. ಹೆಡ್ಡಿಂಗ್ಲಿಯಲ್ಲಿ ಜೂನ್ 20 ರಿಂದ ಹಿರಿಯ ತಂಡದ ಅಭಿಯಾನ ಆರಂಭವಾಗಲಿದೆ.

2025-27ರ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಚಕ್ರದ ಆರಂಭವನ್ನು ಗುರುತಿಸುವ ಈ ಸರಣಿಗೆ ಮುನ್ನ, ಭಾರತ ಎ ಮೇ 30 ರಿಂದ ಎರಡು ಪ್ರವಾಸ ಪಂದ್ಯಗಳನ್ನು ಆಡಲಿದೆ. ‘ಮೊದಲ 4 ದಿನಗಳ ಪಂದ್ಯವನ್ನು ಮೇ 30 ರಿಂದ ಕ್ಯಾಂಟರ್ಬರಿಯಲ್ಲಿರುವ ದಿ ಸ್ಪಿಟ್‌ಫೈರ್ ಗ್ರೌಂಡ್, ಸೇಂಟ್ ಲಾರೆನ್ಸ್‌ನಲ್ಲಿ ಆಯೋಜಿಸಲಾಗುವುದು. 2ನೇ ಪಂದ್ಯವು ಜೂನ್ 6 ರಂದು ನಾರ್ಥಾಂಪ್ಟನ್‌ನ ಕೌಂಟಿ ಗ್ರೌಂಡ್‌ನಲ್ಲಿ ಆರಂಭವಾಗಲಿದೆ’ ಎಂದು ಇಂಗ್ಲೆಂಡ್ ಮತ್ತು ವೇಲ್ಸ್ ಕ್ರಿಕೆಟ್ ಮಂಡಳಿ (ECB) ಹೇಳಿಕೆಯಲ್ಲಿ ತಿಳಿಸಿದೆ.

ಇದನ್ನೂ ಓದಿ: ಬಿಸಿಸಿಐನಲ್ಲಿ ಹೆಚ್ಚುತ್ತಿದೆ ಬದಲಾವಣೆಯ ಹೊಗೆ; ‘ಎ’ ಪ್ಲಸ್ ದರ್ಜೆಯಿಂದ ರೋಹಿತ್​, ಕೊಹ್ಲಿ ಔಟ್? ಜಡೇಜಾಗೂ ಹಿಂಬಡ್ತಿ

ಪಿಟಿಐ ವರದಿಯ ಪ್ರಕಾರ, ಕೆಲವು ಪ್ರಮುಖ ಭಾರತೀಯ ಟೆಸ್ಟ್ ಆಟಗಾರರು ಪ್ರವಾಸ ಪಂದ್ಯಗಳಿಗೆ 'ಎ' ತಂಡದ ಭಾಗವಾಗಲಿದ್ದಾರೆ. ಇದು ಪ್ರಸ್ತುತ ತಮ್ಮ ತಮ್ಮ ಐಪಿಎಲ್​ ಫ್ರಾಂಚೈಸಿಗಳೊಂದಿಗೆ ಒಪ್ಪಂದ ಹೊಂದಿರುವ ಆಟಗಾರರಿಗೆ ಇದು ಒತ್ತಡವನ್ನು ಉಂಟು ಮಾಡಬಹುದು. ಐಪಿಎಲ್ 2025ರ ಪ್ಲೇಆಫ್‌ಗಳು ಮೇ 20, 21 ಮತ್ತು 23 ರಂದು ನಡೆಯಲಿದ್ದು, ಫೈನಲ್ ಮೇ 25ರಂದು ನಡೆಯಲಿದೆ. ಐಪಿಎಲ್ ನಾಕೌಟ್​ ಹೊತ್ತಿನಲ್ಲಿ ಭಾರತ ಎ ತಂಡವನ್ನು ಪ್ರಕಟಿಸಬಹುದು.

ರೋಹಿತ್​-ಕೊಹ್ಲಿ ಕಳಪೆ ಪ್ರದರ್ಶನ

ಭಾರತ ‘ಎ’ ಪರ ಆಡಲು ವಿರಾಟ್ ಕೊಹ್ಲಿ ಮತ್ತು ರೋಹಿತ್ ಶರ್ಮಾರನ್ನು ಬಿಸಿಸಿಐ ಕೇಳಬಹುದು. ರೆಡ್-ಬಾಲ್ ಕ್ರಿಕೆಟ್‌ನಲ್ಲಿ ಅವರ ಕಳಪೆ ಫಾರ್ಮ್ ಹೊಂದಿರುವ ಕಾರಣ ಮಹತ್ವದ ಸರಣಿಗೂ ಮುನ್ನ ಲಯಕ್ಕೆ ಕಂಡುಕೊಳ್ಳಲು ಈ ಅಭ್ಯಾಸ ಪಂದ್ಯಗಳನ್ನು ಆಡುವಂತೆ ಈ ಸ್ಟಾರ್​ ಆಟಗಾರರಿಗೆ ಕೇಳಬಹುದು. ಭಾರತದ ನಾಯಕ ಸೆಪ್ಟೆಂಬರ್​​ನಿಂದ ತಂಡ ಆಡಿದ 3 ಟೆಸ್ಟ್ ಸರಣಿಗಳಲ್ಲಿ ಕೇವಲ 164 ರನ್ ಗಳಿಸಿದ್ದಾರೆ. ಆಸ್ಟ್ರೇಲಿಯಾ ಪ್ರವಾಸದಲ್ಲಿ 31 ರನ್ ಗಳಿಸಿದ್ದೂ ಇದರಲ್ಲಿ ಸೇರಿದೆ. ಮತ್ತೊಂದೆಡೆ, ಪರ್ತ್‌ನಲ್ಲಿ ಶತಕ ಗಳಿಸಿದ್ದರೂ ಆಸ್ಟ್ರೇಲಿಯಾ ಸರಣಿಯಲ್ಲಿ ಕೊಹ್ಲಿ ಸರಾಸರಿ ಕೇವಲ 23.75 ರಷ್ಟಿತ್ತು.

ಇದನ್ನೂ ಓದಿ: ಬಿಸಿಸಿಐ, ದ್ರಾವಿಡ್ ಮುಖಕ್ಕೆ ಕಪಾಳಮೋಕ್ಷ ಮಾಡಿದಂತಿದೆ ಈ ಶತಕ; ಇಶಾನ್​ ಕಿಶನ್ ತಾತನ ಅತಿರೇಕದ ಹೇಳಿಕೆಗೆ ಆಕ್ರೋಶ

ಕರುಣ್ ನಾಯರ್ ಇಂಗ್ಲೆಂಡ್ ಪ್ರವಾಸಕ್ಕೆ ಆಯ್ಕೆ?

ಲಯನ್ಸ್ ವಿರುದ್ಧದ 2 ಪಂದ್ಯಗಳಿಗೆ ಭಾರತ ಎ ತಂಡದಲ್ಲಿ ಕರುಣ್ ನಾಯರ್ ಅವರನ್ನು ಸೇರಿಸುವ ಸಾಧ್ಯತೆ ಇದೆ ಎಂದು ವರದಿ ಹೇಳಿದೆ. ದೇಶೀಯ ಕ್ರಿಕೆಟ್​ನಲ್ಲಿ ವಿದರ್ಭ ಪರ ಕಣಕ್ಕಿಳಿದಿದ್ದ ಕನ್ನಡಿಗ ಕರುಣ್ ನಾಯರ್, ಟನ್​ಗಟ್ಟಲ್ಲೇ ರನ್ ಗಳಿಸಿದ್ದರು. ಸೈಯದ್ ಮುಷ್ತಾಕ್ ಅಲಿ ಟ್ರೋಫಿಯಲ್ಲಿ ಅಗ್ರ ಸ್ಕೋರರ್​ ಆಗಿದ್ದ ನಾಯರ್, ರಣಜಿ ಟ್ರೋಫಿಯಲ್ಲಿ 9 ಪಂದ್ಯಗಳಿಂದ 863 ರನ್ ಗಳಿಸಿ 4ನೇ ಹೆಚ್ಚು ರನ್ ಗಳಿಸಿದವರಾಗಿದ್ದರು. ಸರಾಸರಿ 54 ಮತ್ತು ನಾಲ್ಕು ಶತಕ ಮತ್ತು ಎರಡು ಅರ್ಧಶತಕ ಸಿಡಿಸಿದ್ದರು.

ಇದನ್ನೂ ಓದಿ: ಸನ್​ರೈಸರ್ಸ್ ರನ್ ವೇಗ ತಡೆಯುವುದೇ ಲಕ್ನೋ; ಉಭಯ ತಂಡಗಳ ಪ್ರಮುಖ ಅಂಕಿ-ಅಂಶ, ದಾಖಲೆಗಳು, ಇತಿಹಾಸ