ಬೆನ್ ಸ್ಟೋಕ್ಸ್ ಅವರೇ ನೇರ ಕಾರಣ; ಇಂಗ್ಲೆಂಡ್​ ಸರಣಿ ಸೋಲಿಗೆ ಕಾರಣ ತಿಳಿಸಿದ ಬಿಸಿಸಿಐ ಅಧ್ಯಕ್ಷ ರೋಜರ್ ಬಿನ್ನಿ

ಭಾರತದ ವಿರುದ್ಧ ನಡೆಯುತ್ತಿರುವ 5 ಟೆಸ್ಟ್​ ಸರಣಿಯಲ್ಲಿ ಇಂಗ್ಲೆಂಡ್ ತಂಡವು ಹೀನಾಯ ಸೋಲು ಕಂಡಿದೆ. ಆದರೆ ಈ ಟೆಸ್ಟ್ ಸರಣಿ ಸೋಲಿಗೆ ಪ್ರಮುಖ ಕಾರಣ ಏನೆಂಬುದನ್ನು ಬಿಸಿಸಿಐ ಅಧ್ಯಕ್ಷ ರೋಜರ್ ಬಿನ್ನಿ ತಿಳಿಸಿದ್ದಾರೆ. ಅಲ್ಲದೆ, ಬಜ್​ಬಾಲ್ ಆಟವನ್ನು ಟೀಕಿಸಿದ್ದಾರೆ. ಈ ಸರಣಿ ಸೋಲಿಗೆ ಬೆನ್​ ಸ್ಟೋಕ್ಸ್ ಅವರೇ ನೇರ ಕಾರಣ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಧರ್ಮಶಾಲಾದ ಹಿಮಾಚಲ ಪ್ರದೇಶ ಕ್ರಿಕೆಟ್ ಅಸೋಸಿಯೇಷನ್ ​​ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಅಂತಿಮ ಟೆಸ್ಟ್ ಪಂದ್ಯದಲ್ಲಿ ಇಂಗ್ಲೆಂಡ್ 255 ರನ್​​​ಗಳ ದೊಡ್ಡ ಹಿನ್ನಡೆಯಲ್ಲಿದೆ. ಬ್ರೆಂಡನ್ ಮೆಕಲಮ್ ಮುಖ್ಯ ತರಬೇತುದಾರರಾಗಿ ಮತ್ತು ಬೆನ್ ಸ್ಟೋಕ್ಸ್ ನಾಯಕನಾಗಿ ಒಂದು ಸರಣಿಯನ್ನೂ ಸೋಲದೆ ಭಾರತದ ಪ್ರವಾಸ ಕೈಗೊಂಡರು. ಆದರೆ ಅವರ ಬಜ್​ಬಾಲ್​ ಭಾರತದ ಪಿಚ್​​ಗಳಲ್ಲಿ ನಡೆಯಲಿಲ್ಲ.

ಪಿಟಿಐ ಜೊತೆಗಿನ ಸಂವಾದದಲ್ಲಿ ಬೆನ್ ಸ್ಟೋಕ್ಸ್ ನಾಯಕತ್ವ ಟೀಕಿಸಿದ ರೋಜರ್ ಬಿನ್ನಿ, ಸ್ಟೋಕ್ಸ್ ಅವರ ನಾಯಕತ್ವ ಆಕ್ರಮಣಕಾರಿಯಾಗಿದೆ. ಆದರೆ ಅದೇ ತಂಡಕ್ಕೆ ಮುಳುವಾಗುತ್ತಿದೆ. ತನ್ನ ಕೊನೆಯ ಟೆಸ್ಟ್​ ಪಂದ್ಯಗಳಲ್ಲಿ ಇಂಗ್ಲೆಂಡ್ ಪತನಕ್ಕೆ ಅವರ ನಾಯಕತ್ವವೇ ಕಾರಣ ಎಂದು ನಾನು ಭಾವಿಸುತ್ತೇನೆ. ಕಷ್ಟದ ಸಂದರ್ಭದಲ್ಲಿ ಭಾರತೀಯ ಸ್ಪಿನ್ನರ್​​ಗಳನ್ನು ಎದುರಿಸುವ ಬದಲಿಗೆ ದೊಡ್ಡ ಸ್ಕೋರ್​ಗೆ ಮುಂದಾಗುತ್ತಿರುವುದೇ ಅವನತಿಗೆ ಕಾರಣವಾಗುತ್ತಿದೆ ಎಂದು ಹೇಳಿದ್ದಾರೆ.

ರೋಹಿತ್​ರನ್ನು ಹೊಗಳಿದ ರೋಜರ್ ಬಿನ್ನಿ

ಇದೇ ವೇಳೆ ರೋಹಿತ್​ ಶರ್ಮಾ ನಾಯಕತ್ವವನ್ನು ಗುಣಗಾನ ಮಾಡಿದ್ದಾರೆ. ರೋಹಿತ್​ ಬಹಳ ಚಾಣಾಕ್ಷದಿಂದ ವರ್ತಿಸಿದ್ದಾರೆ. ಯಾರಿಗೆ, ಹೇಗೆ ಬೌಲಿಂಗ್ ನೀಡಬೇಕು, ಯಾವ ಬ್ಯಾಟ್ಸ್​​​ಮನ್​ಗೆ ಯಾವ ಬೌಲರ್​​ ಸೂಕ್ತ ಎಂಬ ತಂತ್ರ ಮತ್ತು ಯೋಜನೆಗಳನ್ನು ಕಾರ್ಯಗತಗೊಳಿಸಿ ಯಶಸ್ಸು ಪಡೆದರು. ಈ ನಡುವೆಯೂ ಇಂಗ್ಲೆಂಡ್ ತನ್ನ ತಂತ್ರ ಬದಲಿಸಲಿಲ್ಲ ಎಂದು ನಾನು ಭಾವಿಸುತ್ತೇನೆ. ಇಂಗ್ಲೆಂಡ್ ಎಷ್ಟೇ ಆಕ್ರಮಣಕಾರಿಯಾಗಿ ಆಡಿದರೂ ರೋಹಿತ್​ ತಾಳ್ಮೆ ಕಳೆದುಕೊಳ್ಳಲಿಲ್ಲ ಎಂದು ಬಿನ್ನಿ ಬಣ್ಣಿಸಿದ್ದಾರೆ.

ಇದನ್ನೂ ಓದಿ: ಡಿಆರ್‌ಎಸ್ ತೆಗೆದುಕೊಳ್ಳುವಂತೆ ಸರ್ಫರಾಜ್‌ ಖಾನ್ ಮನವಿ ಆಲಿಸದ ರೋಹಿತ್; ನಂತ್ರ ಆಗಿದ್ದು ಪಶ್ಚಾತಾಪ, ವಿಡಿಯೊ ನೋಡಿ

ಮೊದಲ ಟೆಸ್ಟ್​​ನಲ್ಲಿ ಆಕ್ರಮಣಕಾರಿಯಾಗಿ ಆಡಿದ ಇಂಗ್ಲೆಂಡ್​ ಗೆದ್ದಿತು. ಆದರೆ, ಇಂಗ್ಲೆಂಡ್​ ಇಲ್ಲಿ ಪಾಠ ಕಲಿಯಲಿಲ್ಲ. ಮೊದಲ ಟೆಸ್ಟ್ ಸೋಲಿನ ಹೊರತಾಗಿಯೂ ತಾಳ್ಮೆಯ ಮಂತ್ರ ಪಠಿಸಿದ ರೋಹಿತ್​, ನಂತರದ ಟೆಸ್ಟ್​ ಪಂದ್ಯಗಳಲ್ಲಿ ಗೆದ್ದು ಬೀಗಿದರು ಎಂದು ಬಿನ್ನಿ ಹೇಳಿದ್ದಾರೆ. ಇಂಗ್ಲೆಂಡ್ ಮೊದಲ ಇನ್ನಿಂಗ್ಸ್‌ನಲ್ಲಿ 218 ರನ್‌ಗಳಿಗೆ ಆಲೌಟ್ ಆಗಿದೆ. ಭಾರತ ತನ್ನ 2ನೇ ದಿನದಾಟಕ್ಕೆ 8 ವಿಕೆಟ್​ ನಷ್ಟಕ್ಕೆ 473 ರನ್ ಗಳಿಸಿ 255 ರನ್​ಗಳ ಮುನ್ನಡೆ ಸಾಧಿಸಿ ಮೂರನೇ ದಿನದಾಟಕ್ಕೆ ಕ್ರೀಸ್ ಕಾಯ್ದುಕೊಂಡಿದೆ.

ಇದನ್ನೂ ಓದಿ: ಮೊದಲ ಮಗುವಿನ ನಿರೀಕ್ಷೆಯಲ್ಲಿ ಮಿಲನಾ ನಾಗರಾಜ್‌; ವಿವಾಹವಾಗಿ ಮೂರನೇ ವರ್ಷ ಗುಡ್‌ನ್ಯೂಸ್‌ ನೀಡಿದ್ರು ಡಾರ್ಲಿಂಗ್‌

ಭಾರತ ಮೊದಲ ದಿನದಂತ್ಯಕ್ಕೆ 1 ವಿಕೆಟ್ ನಷ್ಟಕ್ಕೆ 135 ರನ್ ಗಳಿಸಿತ್ತು. ಈ ಕುರಿತು ವಿಷಾದ ವ್ಯಕ್ತಪಡಿಸಿದ ರೋಜರ್​ ಬಿನ್ನಿ, ಇಂಗ್ಲೆಂಡ್ ಹೀನಾಯ ಮತ್ತು ವಿಷಾದಕರ ಪರಿಸ್ಥಿತಿಗೆ ತಂಡದ ಆಟಗಾರರನ್ನೇ ದೂಷಿಸಬೇಕು. ಈ ಸಮಯದಲ್ಲಿ ಇಂಗ್ಲೆಂಡ್​ ಪರಿಸ್ಥಿತಿಗೆ ತಂಡದ ಆಟಗಾರರರೇ ಹೊಣೆಯಾಗಬೇಕು ಎಂದು ನಾನು ಭಾವಿಸುತ್ತೇನೆ. ಮೊದಲ ದಿನದಾಟದ ಬೆಳಿಗ್ಗೆ ಅವರು ಉತ್ತಮ ಆಟವನ್ನಾಡಿದರು. ಬೃಹತ್ ಸ್ಕೋರ್​ ಮಾಡುತ್ತಾರೆ ಎಂದು ನಿರೀಕ್ಷಿಸಲಾಗಿತ್ತು. ಆದರೆ ನಂತರ ಆಗಿದ್ದೇ ಬೇರೆ. ಆ ಪರಿಸ್ಥಿತಿಗೆ ಅವರೇ ಹೊಣೆ ಎಂದು ಬಿನ್ನಿ ಹೇಳಿದ್ದಾರೆ.

ಇದನ್ನೂ ಓದಿ: ಶಿವರಾತ್ರಿ ಹಬ್ಬದ ದಿನ ಬರಲಿದೆ ‘ಗಂಗೆ ಗೌರಿ’ ಚಿತ್ರದ ಟೀಸರ್‌;‌ ಬಹುವರ್ಷಗಳ ಬಳಿಕ ಕನ್ನಡದಲ್ಲೊಂದು ಪೌರಾಣಿಕ ಸಿನಿಮಾ