ಭುವನೇಶ್ವರ್ ಇನ್, ಎರಡು ಬದಲಾವಣೆ ಖಚಿತ; ಸಿಎಸ್ಕೆ ವಿರುದ್ಧದ ಕದನಕ್ಕೆ ಆರ್ಸಿಬಿ ಸಂಭಾವ್ಯ XI
RCB Predicted Playing XI: ಮಾರ್ಚ್ 28ರ ಶುಕ್ರವಾರ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧದ ಪಂದ್ಯಕ್ಕೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದಲ್ಲಿ ಎರಡು ಬದಲಾವಣೆ ಕಾಣಬಹುದು. ಅದರ ವಿವರ ಇಂತಿದೆ.
ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಭರ್ಜರಿ ಗೆಲುವಿನ ಆರಂಭ ಕಂಡಿದೆ. ಬ್ಯಾಟಿಂಗ್ ಮತ್ತು ಬೌಲಿಂಗ್ ಎರಡರಲ್ಲೂ ತನ್ನ ಪ್ರತಾಪ ತೋರುವ ಮೂಲಕ ಗಮನ ಸೆಳೆದಿದೆ. ಸಮತೋಲಿತ ತಂಡವಾದ ಆರ್ಸಿಬಿ, ಚೊಚ್ಚಲ ಪ್ರಶಸ್ತಿಗೆ ಮುತ್ತಿಕ್ಕುವ ವಿಶ್ವಾಸ ಮೂಡಿಸಿದೆ. 18ನೇ ಆವೃತ್ತಿಯ ಐಪಿಎಲ್ ಉದ್ಘಾಟನಾ ಪಂದ್ಯದಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧ ರೈಡ್ ಮಾಡಿದ ಆರ್ಸಿಬಿ ತನ್ನ ಮುಂದಿನ ಪಂದ್ಯಕ್ಕೆ ಸಜ್ಜಾಗುತ್ತಿದೆ. ಮಾರ್ಚ್ 28ರಂದು ಮುಂಬೈ ಇಂಡಿಯನ್ಸ್ ತಂಡವನ್ನು ಸೋಲಿಸಿರುವ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಸೆಣಸಾಟ ನಡೆಸಲಿದೆ.
ಕೋಲ್ಕತ್ತಾದ ಈಡನ್ ಗಾರ್ಡನ್ಸ್ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಕೆಕೆಆರ್ ನಿಗದಿತ 20 ಓವರ್ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 174 ರನ್ ಗಳಿಸಿತು. 175 ರನ್ ಗುರಿ ಬೆನ್ನಟ್ಟಿದ ಆರ್ಸಿಬಿ 3 ವಿಕೆಟ್ ನಷ್ಟಕ್ಕೆ 177 ರನ್ ಪೇರಿಸಿತು. 7 ವಿಕೆಟ್ಗಳ ಜಯ ದಾಖಲಿಸಿದ ಬೆಂಗಳೂರು, ಇದೀಗ ಸಿಎಸ್ಕೆ ವಿರುದ್ಧ ಇಂತಹದ್ದೇ ಸರ್ವಾಂಗೀಣ ಪ್ರದರ್ಶನ ತೋರಲು ಕಸರತ್ತು ನಡೆಸುತ್ತಿದೆ. ಈ ಪಂದ್ಯವು ಚೆನ್ನೈನ ಸ್ಪಿನ್ ಟ್ರ್ಯಾಕ್ ಚೆಪಾಕ್ ಮೈದಾನದಲ್ಲಿ ನಡೆಯಲಿರುವ ಕಾರಣ ರಾಯಲ್ ಚಾಲೆಂಜರ್ಸ್ ಪ್ಲೇಯಿಂಗ್ 11ರಲ್ಲಿ ಬದಲಾವಣೆಯಾಗುವ ಸಾಧ್ಯತೆ ಇದೆ.
ಎರಡು ಬದಲಾವಣೆ ನಿರೀಕ್ಷೆ
ಬೆಂಗಳೂರು ತಂಡದಲ್ಲಿ 2 ಬದಲಾವಣೆ ಕಾಣುವ ಸಾಧ್ಯತೆಯಿದೆ. ಆದರೆ ಬ್ಯಾಟಿಂಗ್ ವಿಭಾಗದಲ್ಲಿ ಯಾವುದೇ ಬದಲಾವಣೆ ನಿರೀಕ್ಷೆ ಇಲ್ಲ. ಫಿಲ್ ಸಾಲ್ಟ್ ಮತ್ತು ವಿರಾಟ್ ಕೊಹ್ಲಿ ಆರಂಭಿಕರಾಗಿ ಉತ್ತಮ ಅಡಿಪಾಯ ಹಾಕಿಕೊಡುವ ಭರವಸೆ ನೀಡಿದ್ದಾರೆ. ಮೊದಲ ಪಂದ್ಯದಲ್ಲಿ ಮಿಂಚಿನ ಪ್ರದರ್ಶನ ನೀಡಿರುವ ರಜತ್ ಪಾಟೀದಾರ್ ಮತ್ತು ಲಿಯಾಮ್ ಲಿವಿಂಗ್ಸ್ಟೋನ್ ಪಂದ್ಯದ ದಿಕ್ಕು ಬದಲಿಸುವ ಹಿಟ್ಟರ್ಗಳಾಗಿದ್ದಾರೆ. ಆದರೆ ಈ ಪಂದ್ಯಕ್ಕೆ ದೇವದತ್ ಪಡಿಕ್ಕಲ್ ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಕಣಕ್ಕಿಳಿಯಲು ಕಷ್ಟಕರವಾಗಬಹುದು.
ನೂತನ ಐಪಿಎಲ್ನಲ್ಲಿ ಇನ್ನೂ ಬ್ಯಾಟಿಂಗ್ ಮಾಡಲು ಅವಕಾಶ ಪಡೆಯದ ಟಿಮ್ ಡೇವಿಡ್ ಮತ್ತು ಜಿತೇಶ್ ಶರ್ಮಾ ಫಿನಿಷಿಂಗ್ ಪಾತ್ರ ನಿಭಾಯಿಸಬೇಕಿದೆ. ಈ ಇಬ್ಬರ ಪಾತ್ರ ಪ್ರಮುಖ ಪಾತ್ರವಹಿಸಲಿದೆ. ಕೆಕೆಆರ್ ವಿರುದ್ಧ ಪಂದ್ಯದ ಚಿತ್ರಣ ಬದಲಿಸಿದ ಆಲ್ರೌಂಡರ್ ಕೃನಾಲ್ ಪಾಂಡ್ಯ ಬೌಲಿಂಗ್ ಜತೆಗೆ ಬ್ಯಾಟಿಂಗ್ನಲ್ಲೂ ನೆರವಾಗಬೇಕು. ಚೆನ್ನೈ ತಂಡವನ್ನು ಕಟ್ಟಿ ಹಾಕಲು ಜೋಶ್ ಹೇಜಲ್ವುಡ್, ಯಶ್ ದಯಾಳ್ ಮತ್ತೊಮ್ಮೆ ಜೋಡೆತ್ತುಗಳಂತೆ ಕೆಲಸ ಮಾಡಬೇಕಿದೆ.
ಭುವನೇಶ್ವರ್ ಕುಮಾರ್ ಇನ್, ಸ್ವಪ್ನಿಲ್ ಸಿಂಗ್ಗೂ ಅವಕಾಶ
ಸಣ್ಣ ಗಾಯದ ಕಾರಣ ಮೊದಲ ಪಂದ್ಯಕ್ಕೆ ಅಲಭ್ಯರಾಗಿದ್ದ ಸ್ವಿಂಗ್ ಕಿಂಗ್ ಭುವನೇಶ್ವರ್ ಕುಮಾರ್ 2ನೇ ಪಂದ್ಯಕ್ಕೆ ಮರಳುವ ನಿರೀಕ್ಷೆ ಹೆಚ್ಚಿದೆ. ಅವರು ತಂಡವನ್ನು ಕೂಡಿಕೊಂಡರೆ ರಸಿಕ್ ದಾರ್ ಜಾಗ ಬಿಟ್ಟುಕೊಡುವುದು ಖಚಿತ. ಜೊತೆಗೆ ಚೆನ್ನೈ ಸ್ಪಿನ್ ಟ್ರ್ಯಾಕ್ ಆಗಿರುವ ಕಾರಣ ಸುಯಾಶ್ ಶರ್ಮಾ ಜೊತೆಗೆ ಮತ್ತೊಬ್ಬ ಸ್ಪಿನ್ನರ್ ಸ್ವಪ್ನಿಲ್ ಸಿಂಗ್ಗೂ ಅವಕಾಶ ನೀಡಬಹುದು. ಮೊದಲು ಬೌಲಿಂಗ್ ಆಯ್ಕೆ ಮಾಡಿಕೊಂಡರೆ ಸ್ವಪ್ನಿಲ್ ಮತ್ತು ಸುಯಾಶ್ ಇಬ್ಬರೂ ತಂಡದ ಭಾಗವಾದರೂ ಅಚ್ಚರಿ ಇಲ್ಲ.
ಆಗ ದೇವದತ್ ಪಡಿಕ್ಕಲ್ ಬದಲಿಗೆ ಟಿಮ್ ಡೇವಿಡ್ ಇಂಕ್ಯಾಪ್ಟ್ ಪ್ಲೇಯರ್ ಆಗಬಹುದು. ಮೊದಲು ಆರ್ಸಿಬಿ ಬ್ಯಾಟಿಂಗ್ ಮಾಡಿದರೆ ಸ್ವಪ್ನಿಲ್ ಸಿಂಗ್ ಪ್ಲೇಯಿಂಗ್ 11 ಭಾಗವಾಗಬಹುದು. ಏಕೆಂದರೆ ಸುಯಾಶ್ಗೆ ಹೋಲಿಸಿದರೆ ಸ್ವಪ್ನಿಲ್ ಬ್ಯಾಟಿಂಗ್ನಲ್ಲೂ ಉತ್ತಮ ಪ್ರದರ್ಶನ ನೀಡುತ್ತಾರೆ. ಚೇಸಿಂಗ್ ಮಾಡಿದರೆ, ಪ್ಲೇಯಿಂಗ್ 11ನಲ್ಲಿ ಸುಯಾಶ್ ಮತ್ತು ಸ್ವಪ್ನಿಲ್ ಅವಕಾಶ ಪಡೆಯುತ್ತಾರೆ. ಆಗ ಟಿಮ್ ಡೇವಿಡ್ ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಬ್ಯಾಟಿಂಗ್ ಮಾಡಲು ಬರಬಹುದು. ಇದರೊಂದಿಗೆ ಮೂವರು ಸ್ಪಿನ್ನರ್ಗಳು, ಮೂವರು ವೇಗಿಗಳೊಂದಿಗೆ ತಂಡವು ಕಣಕ್ಕಿಳಿಯಬಹುದು.
ಸಿಎಸ್ಕೆ ವಿರುದ್ಧದ ಪಂದ್ಯಕ್ಕೆ ಆರ್ಸಿಬಿ ಸಂಭಾವ್ಯ ತಂಡ
ವಿರಾಟ್ ಕೊಹ್ಲಿ, ಫಿಲಿಪ್ ಸಾಲ್ಟ್, ರಜತ್ ಪಾಟೀದಾರ್ (ನಾಯಕ), ಲಿಯಾಮ್ ಲಿವಿಂಗ್ಸ್ಟೋನ್, ಜಿತೇಶ್ ಶರ್ಮಾ (ವಿಕೆಟ್ ಕೀಪರ್), ಕೃನಾಲ್ ಪಾಂಡ್ಯ, ಭುವನೇಶ್ವರ್ ಕುಮಾರ್, ಸ್ವಪ್ನಿಲ್ ಸಿಂಗ್, ಸುಯಾಶ್ ಶರ್ಮಾ, ಜೋಶ್ ಹೇಜಲ್ವುಡ್, ಯಶ್ ದಯಾಳ್.
ಇಂಪ್ಯಾಕ್ಟ್ ಪ್ಲೇಯರ್ - ಟಿಮ್ ಡೇವಿಡ್
Prasanna Kumar PN
