ಕನ್ನಡ ಸುದ್ದಿ  /  Cricket  /  Cameramen Showed Rohit Sharma Repeatedly Fans Are Disappointed After Seeing Hitman As A Player In Gt Vs Mi Ipl 2024 Prs

ಪದೇ ಪದೇ ರೋಹಿತ್​ ಶರ್ಮಾ ತೋರಿಸಿದ ಕ್ಯಾಮೆರಾಮೆನ್​; ಬಾಸ್​ನ ನೋಡೋಕೆ ಆಗ್ತಿಲ್ಲ, ತೋರಿಸ್ಬೇಡ್ರೋ ಎಂದ ಹಿಟ್​ಮ್ಯಾನ್ ಫ್ಯಾನ್ಸ್

Rohit Sharma : ಗುಜರಾತ್​ ಟೈಟಾನ್ಸ್ ವಿರುದ್ಧದ ಪಂದ್ಯದಲ್ಲಿ ನಾಯಕತ್ವ ಕಳೆದುಕೊಂಡು ಕೇವಲ ಆಟಗಾರನಾಗಿ ಕಣಕ್ಕಿಳಿದ ರೋಹಿತ್​ ಶರ್ಮಾ ಅವರನ್ನು ಕ್ಯಾಮೆರಾಮೆನ್ ಪದೇ ಪದೇ ತೋರಿಸುತ್ತಿದ್ದರು. ಹಾಗಾಗಿ ಪದೇ ಪದೇ ತೋರಿಸಬೇಡಿ, ನಮ್ಮ ಬಾಸ್​ನ ನೋಡೋಕೆ ಆಗ್ತಿಲ್ಲ ಎಂದು ಫ್ಯಾನ್ಸ್ ಕೇಳಿದ್ದಾರೆ.

ಪದೇ ಪದೇ ರೋಹಿತ್​ ಶರ್ಮಾ ತೋರಿಸಿದ ಕ್ಯಾಮೆರಾಮೆನ್
ಪದೇ ಪದೇ ರೋಹಿತ್​ ಶರ್ಮಾ ತೋರಿಸಿದ ಕ್ಯಾಮೆರಾಮೆನ್

2013ರಲ್ಲಿ ಮುಂಬೈ ಇಂಡಿಯನ್ಸ್ (Mumbai Indians) ನಾಯಕತ್ವ ವಹಿಸಿಕೊಂಡು ಐದು ಟ್ರೋಫಿಗಳನ್ನು ಗೆದ್ದುಕೊಟ್ಟಿರುವ ರೋಹಿತ್​ ಶರ್ಮಾ (Rohit Sharma), 10 ವರ್ಷಗಳ ನಂತರ ಇದೇ ಮೊದಲ ಬಾರಿಗೆ ಐಪಿಎಲ್​ನಲ್ಲಿ ನಾಯಕನಲ್ಲದೆ ಕೇವಲ ಆಟಗಾರನಾಗಿ ಕಣಕ್ಕಿಳಿದಿದ್ದಾರೆ. ತನ್ನ ಕ್ಯಾಪ್ಟನ್ಸಿಯಲ್ಲಿ ಬೆಳೆದ ಹಾರ್ದಿಕ್ ಪಾಂಡ್ಯ (Hardik Pandya) ನಾಯಕತ್ವದಲ್ಲಿ ಮೊದಲ ಬಾರಿಗೆ ಆಡುತ್ತಿರುವ ರೋಹಿತ್ ಅವ​ರನ್ನೇ ಕ್ಯಾಮೆರಾಮನ್​ ಪದೇ ಪದೇ ತೋರಿಸುವ ಮೂಲಕ ಹಿಟ್​ಮ್ಯಾನ್​ ಅಭಿಮಾನಿಗಳ ಮನಸ್ಸು ನೋಯಿಸಿದ್ದಾರೆ.

ಐಪಿಎಲ್​ನ ಐದನೇ ಪಂದ್ಯದಲ್ಲಿ ಗುಜರಾತ್ ಟೈಟಾನ್ಸ್ (Gujarat Titans) ವಿರುದ್ಧ ಕಣಕ್ಕಿಳಿದ ಮುಂಬೈ ಇಂಡಿಯನ್ಸ್ ಆರಂಭಿಕ ಆಟಗಾರ ರೋಹಿತ್​ ಅವರು ಮೈದಾನದಲ್ಲಿ ಕಾಣಿಸಿಕೊಂಡರು. ಈ ಅವಧಿಯಲ್ಲಿ ಅವರ ಮುಖದಲ್ಲಿ ಮೊದಲಿದ್ದ ಕಳೆ ಕಂಡು ಬರಲಿಲ್ಲ. ಈ ಮೊದಲು ನಗು ಮುಖದಲ್ಲೇ ಇರುತ್ತಿದ್ದ ಹಿಟ್​ಮ್ಯಾನ್, ನಾಯಕತ್ವ ಕಳೆದುಕೊಂಡು ಮೈದಾನಕ್ಕಿಳಿದ ಮೊದಲ ಪಂದ್ಯದಲ್ಲಿ ಸಪ್ಪಗಿದ್ದರು. ಬೌಲರ್ ವಿಕೆಟ್ ಪಡೆದರೂ ಸಹ ಹೆಚ್ಚು ಸಂಭ್ರಮಿಸಲಿಲ್ಲ. ತಾನು ಕ್ಯಾಚ್ ಹಿಡಿದರೂ ತನ್ನಲ್ಲಿ ಮೊದಲಿದ್ದ ಜೋಶ್ ಕಾಣಿಸಲಿಲ್ಲ.

ಜೋಶ್​ ಕಳೆದುಕೊಂಡಿದ್ದ ರೋಹಿತ್​ ಅವರನ್ನು ಪಂದ್ಯದ ಮಧ್ಯೆ ಪದೇ ಪದೇ ತೋರಿಸಲಾಗುತ್ತಿತ್ತು. ಅವರು ಸಪ್ಪಗಿರುವುದನ್ನು ನೋಡಿದ ಅಭಿಮಾನಿಗಳು ನೊಂದುಕೊಳ್ಳುತ್ತಿದ್ದಾರೆ. ಈ ಚಿತ್ರಗಳು ಹಿಟ್​ಮ್ಯಾನ್ ಅಭಿಮಾನಿಗಳ ಮನಸ್ಸನ್ನು ಹೆಚ್ಚು ಘಾಸಿಗೊಳಿಸಿತು. ಹಾಗಾಗಿ ಕ್ಯಾಮೆರಾಮೆನ್ ರೋಹಿತ್​ರನ್ನೇ ಪದೆಪದೇ ತೋರಿಸುತ್ತಿದ್ದ ಕಾರಣ, ಅಭಿಮಾನಿಗಳು ಮನವಿಯೊಂದನ್ನು ಮಾಡಿದ್ದಾರೆ. ನಮ್ಮ ಬಾಸ್​ನನ್ನು ಪದೆಪದೇ ತೋರಿಸಬೇಡ್ರೋ, ಅವರನ್ನು ನೋಡೋಕೆ ಆಗ್ತಿಲ್ಲ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಪೋಸ್ಟ್ ಮಾಡಿದ್ದಾರೆ.

ರೋಹಿತ್​.. ರೋಹಿತ್​.. ಘೋಷಣೆ

ಹಾರ್ದಿಕ್ ಪಾಂಡ್ಯ ಮೇಲೆ ಗರಂ ಆಗಿರುವ ಹಿಟ್​ಮ್ಯಾನ್ ಫ್ಯಾನ್ಸ್ ಟಾಸ್ ಅವಧಿಯಲ್ಲಿ ಮುಜುಗರಕ್ಕೆ ಒಳಗಾಗುವಂತೆ ಮಾಡಿದ್ದಾರೆ. ಗುಜರಾತ್ ವಿರುದ್ಧ ಟಾಸ್​ ಅವಧಿಯಲ್ಲಿ ಹಾರ್ದಿಕ್​ ಮಾತನಾಡುವಾಗ ರೋಹಿತ್... ರೋಹಿತ್..​ ರೋಹಿತ್​ ಎಂದು ಸ್ಟೇಡಿಯಂ ರೂಫ್​ ಕಿತ್ತು ಹೋಗುವಂತೆ ಘೋಷಣೆ ಕೂಗಿದ್ದಾರೆ. ರೋಹಿತ್​ ಶರ್ಮಾ ಸಪ್ಪಗಿರುವ ಮತ್ತು ಘೋಷಣೆ ಕೂಗಿರುವ ವಿಡಿಯೋಗಳು ಮತ್ತು ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿವೆ. ಅಲ್ಲದೆ, ತಮ್ಮ ನಾಯಕನನ್ನು ಕಂಡು ಅಭಿಮಾನಿಗಳು ಭಾವುಕರಾಗಿದ್ದಾರೆ.

ರೋಹಿತ್​ ಕೆಳಗಿಳಿಸಿ ಹಾರ್ದಿಕ್ ಕ್ಯಾಪ್ಟನ್

ಐಪಿಎಲ್ 2024ರ ಮಿನಿ ಹರಾಜಿಗೂ ಮುನ್ನ ನಡೆದ ಟ್ರೇಡಿಂಗ್ ವಿಂಡೋದಲ್ಲಿ ಹಾರ್ದಿಕ್ ಪಾಂಡ್ಯ ಅವರನ್ನು ಮುಂಬೈ ಇಂಡಿಯನ್ಸ್ 15 ಕೋಟಿಗೆ ತಂಡಕ್ಕೆ ಕರೆಸಿಕೊಂಡಿತು. ಆದರೆ ಹರಾಜು ನಡೆದ ಕೆಲವೇ ದಿನಗಳಲ್ಲಿ 5 ಟ್ರೋಫಿ ಗೆದ್ದುಕೊಟ್ಟ ರೋಹಿತ್​ ಅವರನ್ನು ಕೆಳಗಿಳಿಸಿ ಏಕಾಏಕಿ ಹಾರ್ದಿಕ್ ಪಾಂಡ್ಯಗೆ ಪಟ್ಟ ಕಟ್ಟಲಾಯಿತು. ಇದು ಶರ್ಮಾ ಅಭಿಮಾನಿಗಳಿಗೆ ಕೋಪ ತರಿಸಿತು. ಅಲ್ಲದೆ, ಮುಂಬೈ ಇಂಡಿಯನ್ಸ್ ಸಾಮಾಜಿಕ ಜಾಲತಾಣಗಳ ಖಾತೆಗಳನ್ನು ಅನ್​ಫಾಲೋ ಮಾಡಿದ್ದರು.

ಮೊದಲ ಬಾರಿಗೆ ಮೌನ ಮುರಿದ ಹಾರ್ದಿಕ್ ಪಾಂಡ್ಯ

ಮುಂಬೈಕ್ಕೆ ಮರಳಿದ ಕುರಿತು ನಾಯಕ ಹಾರ್ದಿಕ್​ ಪಾಂಡ್ಯ ಇದೇ ಮೊದಲ ಬಾರಿಗೆ ಮೌನ ಮುರಿದಿದ್ದಾರೆ. ಎಂಐಗೆ ಮರಳಿದ್ದು ಖುಷಿ ನೀಡುತ್ತಿದೆ. ನಾನು ಹುಟ್ಟಿ ಬೆಳೆದಿದ್ದು ಗುಜರಾತ್​​ನಲ್ಲಿ. ನನಗಿಲ್ಲಿ ಸಾಕಷ್ಟು ಯಶಸ್ಸು ದೊರೆತಿದೆ. ಅಭಿಮಾನಿಗಳಿಗೆ ಮತ್ತು ಗುಜರಾತ್​ಗೆ ನಾನು ಕೃತಜ್ಞನಾಗಿರುತ್ತೇನೆ. ಆದರೆ, ನನ್ನ ಕ್ರಿಕೆಟ್​ನಲ್ಲಿ ಜನ್ಮ ಪಡೆದಿದ್ದು ಮುಂಬೈನಲ್ಲಿ. ಹಾಗಾಗಿ ಮರಳಿ ಸೇರಿದ್ದು ನಿಜವಾಗಿಯೂ ಖುಷಿಕೊಡುತ್ತಿದೆ ಎಂದು ಹೇಳಿಕೆ ನೀಡಿದ್ದಾರೆ.