ಕನ್ನಡ ಸುದ್ದಿ  /  ಕ್ರಿಕೆಟ್  /  Rcb Hosa Adhyaya: ಸಿಎಸ್​ಕೆ ವಿರುದ್ಧ ಪರಾಕ್ರಮ ಮೆರೆದು ಪ್ಲೇಆಫ್ ಹೆಬ್ಬಾಗಿಲು ದಾಟಲು ಪ್ರಮುಖ 6 ಕಾರಣಗಳು

RCB Hosa Adhyaya: ಸಿಎಸ್​ಕೆ ವಿರುದ್ಧ ಪರಾಕ್ರಮ ಮೆರೆದು ಪ್ಲೇಆಫ್ ಹೆಬ್ಬಾಗಿಲು ದಾಟಲು ಪ್ರಮುಖ 6 ಕಾರಣಗಳು

RCB Hosa Adhyaya: ನಿರ್ಣಾಯಕ ಫೈಟ್​​ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್​ ವಿರುದ್ಧ ರೋಚಕ 27 ರನ್​ಗಳ ಗೆಲುವು ಸಾಧಿಸಿದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಪ್ಲೇಆಫ್​ ಪ್ರವೇಶಿಸಿದೆ. ಈ ಪಂದ್ಯದಲ್ಲಿ ಆರ್​ಸಿಬಿ ಗೆಲುವಿಗೆ ಪ್ರಮುಖ ಕಾರಣಗಳೇನು? ಇಲ್ಲಿದೆ ವಿವರ.

ಸಿಎಸ್​ಕೆ ವಿರುದ್ಧ ಪರಾಕ್ರಮ ಮೆರೆದು ಪ್ಲೇಆಫ್ ಹೆಬ್ಬಾಗಿಲು ದಾಟಲು ಪ್ರಮುಖ 6 ಕಾರಣಗಳು
ಸಿಎಸ್​ಕೆ ವಿರುದ್ಧ ಪರಾಕ್ರಮ ಮೆರೆದು ಪ್ಲೇಆಫ್ ಹೆಬ್ಬಾಗಿಲು ದಾಟಲು ಪ್ರಮುಖ 6 ಕಾರಣಗಳು

ಆರಂಭಿಕ 8 ಪಂದ್ಯಗಳಲ್ಲಿ ಕೇವಲ 1 ಪಂದ್ಯ ಜಯಿಸಿದ್ದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ನಂತರ ಸತತ 6 ಗೆಲುವಿನ ವಿನೂತನ ದಾಖಲೆಯೊಂದಿಗೆ ಐಪಿಎಲ್-2024 ಪ್ಲೇಆಫ್​ಗೆ ರಾಜನಡಿಗೆಯಲ್ಲಿ ದಾಪುಗಾಲಿಟ್ಟಿದೆ. ಸಿಎಸ್​ಕೆ ತಂಡವನ್ನು ಕೆಲವೇ ದಿನಗಳ ಹಿಂದೆ ಅಸಂಭವ ಎನಿಸಿದ್ದ ಗುರಿಯನ್ನು ಸಾಕಾರಗೊಳಿಸಿದೆ.

ಟ್ರೆಂಡಿಂಗ್​ ಸುದ್ದಿ

ರೋಚಕ ಫೈಟ್​ನಲ್ಲಿ ಬದ್ಧ ಎದುರಾಳಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡವನ್ನು ಮಣಿಸಿ ಪ್ಲೇಆಫ್​​ಗೆ ಲಗ್ಗೆ ಇಟ್ಟ ಆರ್​ಸಿಬಿ, ನಿರ್ಣಾಯಕ ಪಂದ್ಯದಲ್ಲಿ 27 ರನ್​ಗಳಿಂದ ಗೆದ್ದು ಪ್ಲೇಆಫ್​​ ಹೆಬ್ಬಾಗಿಲು ದಾಟಿದೆ. ಟೂರ್ನಿಯಲ್ಲಿ ಸತತ 6 ಸೋಲುಗಳಿಂದ ಸತತ 6 ಗೆಲುವುಗಳ ತನಕ ಆರ್​​ಸಿಬಿ ಪ್ಲೇಆಫ್​ ಹಾದಿಯೇ ರೋಚಕವಾಗಿದೆ. ಚೆನ್ನೈ ವಿರುದ್ಧ ಆರ್​ಸಿಬಿ ಗೆಲುವಿನ ಕಾರಣಗಳೇನು?

ಫಾಫ್​-ಕೊಹ್ಲಿ ಉತ್ತಮ ಜೊತೆಯಾಟ

ಪಂದ್ಯ ಗೆಲ್ಲಲು ಪ್ರಮುಖ ಕಾರಣಗಳಲ್ಲಿ ವಿರಾಟ್ ಕೊಹ್ಲಿ ಮತ್ತು ಫಾಫ್ ಡು ಪ್ಲೆಸಿಸ್ ಜೊತೆಯಾಟವೂ ಒಂದು. ಸಿಎಸ್​ಕೆ ಬೌಲರ್​​ಗಳ ಎದುರು ದಿಟ್ಟ ಹೋರಾಟ ನಡೆಸಿದ ಕೊಹ್ಲಿ-ಫಾಫ್, ಮೊದಲ ವಿಕೆಟ್​​ಗೆ 78 ರನ್​​ ಕಲೆ ಹಾಕಿದರು. ಪವರ್​​ಪ್ಲೇನಲ್ಲಿ ಸ್ಪಿನ್ನರ್ಸ್​ ಎದುರು ತತ್ತರಿಸಿದರೂ ಪವರ್​​ಪ್ಲೆ ನಂತರ ಪುಟಿದೆದ್ದ ಕೊಹ್ಲಿ, 29 ಎಸೆತಗಳಲ್ಲಿ 3 ಬೌಂಡರಿ, 4 ಸಿಕ್ಸರ್ ಸಹಿತ 47 ರನ್​ ಗಳಿಸಿದರು. ತಂಡಕ್ಕೆ ಭದ್ರಬುನಾದಿ ಹಾಕಿಕೊಟ್ಟ ಕಾರಣ ಉಳಿದ ಆಟಗಾರರು ಮಿಂಚಿನ ಬ್ಯಾಟಿಂಗ್ ನಡೆಸಲು ಸಾಧ್ಯವಾಯಿತು.

ಆರ್​ಸಿಬಿ ಬ್ಯಾಟರ್​ಗಳ ಅಬ್ಬರ

ಭರ್ಜರಿ ಆರಂಭ ಪಡೆದ ನಂತರ ಉಳಿದ ಬ್ಯಾಟರ್​​ಗಳು ಸ್ಪೋಟಕ ಬ್ಯಾಟಿಂಗ್ ನಡೆಸಲು ನೆರವಾಯಿತು. ಎನರ್ಜಿ ಬೂಸ್ಟ್​ ಸಿಕ್ಕಂತಾಯಿತು. ನಿಧಾನವಾಗಿ ಬ್ಯಾಟಿಂಗ್ ನಡೆಸುತ್ತಿದ್ದ ಫಾಫ್ (54) ಕೂಡ ಘರ್ಜಿಸಲು ಶುರುವಿಟ್ಟು ಅರ್ಧಶತಕ ಚಚ್ಚಿದರೆ, ರಜತ್ ಪಾಟೀದಾರ್ (41)​​ ಮತ್ತೊಮ್ಮೆ ಆಕರ್ಷಕ ಇನ್ನಿಂಗ್ಸ್​​ ಕಟ್ಟಿದರು. ಕೊನೆಯಲ್ಲಿ ಕ್ಯಾಮರೂನ್ ಗ್ರೀನ್ (38*) ಸ್ಫೋಟಕ ಬ್ಯಾಟಿಂಗ್ ಮಾಡಿದರು. ಹೊಡಿಬಡಿ ದಾಂಗುಡಿ ಆಟದ ಅಬ್ಬರಕ್ಕೆ ತಂಡದ ಮೊತ್ತಕ್ಕೆ 200ರ ಗಡಿ ದಾಟಿತು. ಇದು ಬೌಲರ್​​ಗಳ ಆತ್ಮವಿಶ್ವಾಸ ಹೆಚ್ಚಿಸಿತು.

ಫಾಫ್ ಡು ಪ್ಲೆಸಿಸ್ ಬೆಂಕಿ ಕ್ಯಾಚ್​​

ಪಂದ್ಯದ ಟರ್ನಿಂಗ್​​​ಗೆ ನಾಯಕ ಫಾಫ್ ಡು ಪ್ಲೆಸಿಸ್ ಹಿಡಿದ ಬೆಂಕಿ ಕ್ಯಾಚ್ ಕೂಡ ಒಂದು. 15ನೇ ಓವರ್​ನ ಅಂತಿಮ ಎಸೆತದಲ್ಲಿ ಮಿಚೆಲ್ ಸ್ಯಾಂಟ್ನರ್ ಫುಲ್ ಟಾಸ್ ಅನ್ನು ಮಿಡ್​ ಆಫ್​​​ನಲ್ಲಿ ಬೌಂಡರಿ ಸಿಡಿಸಲು ಯತ್ನಿಸಿದರು. ಆದರೆ ಗಾಳಿಯಲ್ಲಿ ಹೋಗುತ್ತಿದ್ದ ಚೆಂಡನ್ನು ಚಿರತೆಯಂತೆ ಹಾರಿ ಒಂದೇ ಕೈಯಲ್ಲಿ ಕ್ಯಾಚ್ ಹಿಡಿದರು. ಇದು ತಂಡಕ್ಕೆ ತಿರುವು ಕೊಟ್ಟ ಕ್ಯಾಚ್​ ಎಂದರೆ ತಪ್ಪಾಗಲ್ಲ. ಹಾಗೆಯೇ ಅಜಿಂಕ್ಯ ರಹಾನೆ ಅವರ ಅತ್ಯಂತ ಕಷ್ಟದ ಕ್ಯಾಚ್​ ಗೇಮ್​ ಚೇಂಜಿಂಗ್​ ಕ್ಯಾಚ್​. 

ಯಶ್ ದಯಾಳ್ ಅದ್ಭುತ ಬೌಲಿಂಗ್

ಯಶ್​ ದಯಾಳ್​ರನ್ನು ಆರ್​ಸಿಬಿ ಖರೀದಿಸಿದಾಗ, ಹೀಯಾಳಿಸಿದ್ದರು. 2023ರ ಐಪಿಎಲ್​ನಲ್ಲಿ ಕೊನೆಯ ಓವರ್​​​ನಲ್ಲಿ ಸತತ 5 ಸಿಕ್ಸರ್​ ಚಚ್ಚಿಸಿಕೊಂಡು ಟ್ರೋಲ್ ಆಗಿದ್ದ ದಯಾಳ್, ಈ ವರ್ಷ ಆರ್​ಸಿಬಿ ಪರ ಗೇಮ್ ಚೇಂಜಿಂಗ್ ಪರ್ಫಾಮೆನ್ಸ್ ನೀಡಿದ್ದಾರೆ. ಸಿಎಸ್​ಕೆ ವಿರುದ್ಧವೂ ಸೊಗಸಾದ ಬೌಲಿಂಗ್​ ನಡೆಸಿ ಡ್ಯಾರಿಲ್ ಮಿಚೆಲ್ ಮತ್ತು ಎಂಎಸ್ ಧೋನಿ ಔಟ್ ಮಾಡಿ ತಂಡಕ್ಕೆ ಪಂದ್ಯಕ್ಕೆ ತಿರುವು ಕೊಟ್ಟರು. ಕೊನೆಯ ಓವರ್​ನಲ್ಲಿ 17 ರನ್​ಗಳನ್ನು ಡಿಫೆಂಡ್ ಮಾಡಿಕೊಂಡರು. ಆ ಮೂಲಕ ಹೀರೋ ಆದರು.

ರಚಿನ್ ರವೀಂದ್ರ ರನೌಟ್

ಸಿಎಸ್​ಕೆ ಬ್ಯಾಟರ್​ಗಳು ಬ್ಯಾಕ್ ಟು ಬ್ಯಾಕ್ ವಿಕೆಟ್ ಒಪ್ಪಿಸುತ್ತಿದ್ದರೂ ಆಧಾರವಾಗುತ್ತಿದ್ದ ರಚಿನ್ ರವೀಂದ್ರ ರನೌಟ್ ಆಗಿದ್ದು, ಪಂದ್ಯ ಹೆಚ್ಚು ಟರ್ನ್​ ಆಗಲು ಕಾರಣವಾಯಿತು. 37 ಎಸೆತಗಳಲ್ಲಿ 5 ಬೌಂಡರಿ, 3 ಸಿಕ್ಸರ್ ಸಹಿತ 61 ರನ್ ​ಗಳಿಸಿ ಔಟಾದರು. ಶಿವಂ ದುಬೆ ಅವರು ರಚಿನ್ ರನ್ ಬೇಡವೆಂದರೂ ನೋಡದೆಯೇ ರನ್​​ಗಾಗಿ ಓಡಿದ್ದರಿಂದ ರಚಿನ್​ ವಿಕೆಟ್​ ಕಳೆದುಕೊಂಡರು. ಋತುರಾಜ್ ಗಾಯಕ್ವಾಡ್, ಡ್ಯಾರಿಲ್ ಮಿಚೆಲ್, ಶಿವಂ ದುಬೆ ಬೇಗನೇ ಔಟಾಗಿದ್ದು ಕೂಡ ಆರ್​ಸಿಬಿ ಗೆಲುವಿಗೆ ಪ್ರಮುಖ ಕಾರಣವಾಯಿತು.

ಅಭಿಮಾನಿಗಳೇ ದೇವರು

ತಂಡದ ಪ್ರದರ್ಶನವು ಒಂದು ತಕ್ಕಡಿಯಲ್ಲಿ ತೂಗಿದರೆ, ಅಭಿಮಾನಿಗಳ ಬೆಂಬಲ ಬೆಂಬಲ ಮತ್ತೊಂದು ತಕ್ಕಡಿಯಲ್ಲಿ ತೂಗಿದೆ ಅಂದರೆ ತಪ್ಪಾಗಲ್ಲ. ದೊಡ್ಮನೆ ಕುಟುಂಬ ಹೇಳಿದಂತೆ ಆರ್​ಸಿಬಿ ಪಾಲಿಗೆ ಅಭಿಮಾನಿಗಳೇ ನಮ್ಮನೆ ದೇವರು. ಸತತ ಸೋಲುಗಳಿಂದ ಉಸಿರುಗಟ್ಟಿದ್ದ ಆರ್​ಸಿಬಿ ತಂಡವನ್ನು ಕೈಬಿಡದ ಅಭಿಮಾನಿಗಳು, ಸಿಎಸ್​ಕೆ ವಿರುದ್ಧ ತಮ್ಮ ಜೋಶ್ ಅನ್ನು ಮತ್ತಷ್ಟು ಹೆಚ್ಚಿಸಿಕೊಂಡರು. ಈ ಪ್ರೀತಿಯಿಂದಲೇ ಪ್ಲೇಆಫ್ ಪ್ರವೇಶಿಸಲು ಕಾರಣವಾಯಿತು.

 

(ಕನ್ನಡದಲ್ಲಿ ಕ್ರಿಕೆಟ್, ಎಚ್‌ಟಿ ಕನ್ನಡ ಬೆಸ್ಟ್‌. ಐಪಿಎಲ್, ಟಿ20 ವರ್ಲ್ಡ್‌ಕಪ್ ಸೇರಿದಂತೆ ಕ್ರಿಕೆಟ್ ಲೋಕದ ಸಮಗ್ರ ಮಾಹಿತಿ, ತಾಜಾ ವಿದ್ಯಮಾನ, ರನ್-ವಿಕೆಟ್, ಪ್ಲೇಆಫ್, ಟೀಮ್ ಸ್ಟಾಟ್ ವಿಶ್ಲೇಷಣೆಗಳಿಗಾಗಿ kannada.hindustantimes.com/cricket ಕ್ಕೆ ಭೇಟಿ ನೀಡಿ.)

ಟಿ20 ವರ್ಲ್ಡ್‌ಕಪ್ 2024

ಕ್ರಿಕೆಟ್‌ಗೆ ಸಂಬಂಧಿಸಿದ ಎಲ್ಲ ಸುದ್ದಿ, T20 ವಿಶ್ವಕಪ್, T20 ವಿಶ್ವಕಪ್ ವೇಳಾಪಟ್ಟಿ, T20 ವಿಶ್ವಕಪ್ ಅತ್ಯಧಿಕ ರನ್‌ಗಳು, T20 ವಿಶ್ವಕಪ್ ಪಾಯಿಂಟ್ಸ್ ಟೇಬಲ್, T20 ವಿಶ್ವಕಪ್ ಲೈವ್ ಸ್ಕೋರ್, T20 ವಿಶ್ವಕಪ್ ಅಂಕಿಅಂಶಗಳು.. ಕ್ರಿಕೆಟ್‌ಗೆ ಸಂಬಂಧಿಸಿದ ಸಮಗ್ರ ಮಾಹಿತಿಗಾಗಿ HT ಕನ್ನಡ ವೆಬ್‌ಸೈಟ್ ನೋಡಿ