ಟಿ20 ವಿಶ್ವಕಪ್​ ಗೆಲ್ಲಲು ಪಾಕಿಸ್ತಾನ ಮಾಸ್ಟರ್ ಪ್ಲಾನ್; ಭಾರತಕ್ಕೆ ಒಡಿಐ ವರ್ಲ್ಡ್​ಕಪ್ ಗೆದ್ದುಕೊಟ್ಟಿದ್ದ ಹೆಡ್​​ಕೋಚ್​ಗೆ ಮಣೆ

ಭಾರತದ ಮಾಜಿ ಮುಖ್ಯ ಕೋಚ್ ಗ್ಯಾರಿ ಕರ್ಸ್ಟನ್ (Gary Kirsten) ಭಾನುವಾರ (ಏಪ್ರಿಲ್ 28) ಪಾಕಿಸ್ತಾನದ ಹೊಸ ವೈಟ್-ಬಾಲ್ ಮುಖ್ಯ ಕೋಚ್ ಆಗಿ ನೇಮಕಗೊಂಡಿದ್ದಾರೆ. ಆಸ್ಟ್ರೇಲಿಯಾದ ಮಾಜಿ ವೇಗಿ ಜೇಸನ್ ಗಿಲ್ಲೆಸ್ಪಿ (Jason Gillespie) ಅವರಿಗೆ ಟೆಸ್ಟ್ ತಂಡದ ಜವಾಬ್ದಾರಿಯನ್ನು ನೀಡಲಾಗಿದೆ. ಪಾಕಿಸ್ತಾನ ಕ್ರಿಕೆಟ್ ಮಂಡಳಿಯು (Pakistan Cricket Board) ಎಕ್ಸ್​​​ನಲ್ಲಿ ಪೋಸ್ಟ್ ಮಾಡುವ ಮೂಲಕ ಇಬ್ಬರು ಮಾಜಿ ಕ್ರಿಕೆಟಿಗರ ನೇಮಕಾತಿಯನ್ನು ದೃಢಪಡಿಸಿದೆ.

ದಕ್ಷಿಣ ಆಫ್ರಿಕಾದ ಮಾಜಿ ಬ್ಯಾಟರ್ ಗ್ಯಾರಿ ಕರ್ಸ್ಟನ್ ಅವರು, 2011ರ ಏಪ್ರಿಲ್ 2 ರಂದು ಮುಂಬೈನ ವಾಂಖೆಡೆ ಸ್ಟೇಡಿಯಂನಲ್ಲಿ ನಡೆದ ಫೈನಲ್‌ ಪಂದ್ಯದಲ್ಲಿ ಶ್ರೀಲಂಕಾ ತಂಡವನ್ನು 6 ವಿಕೆಟ್‌ಗಳಿಂದ ಸೋಲಿಸುವ ಮೂಲಕ 2011ರಲ್ಲಿ ಏಕದಿನ ವಿಶ್ವಕಪ್ ಪ್ರಶಸ್ತಿಯನ್ನು ಗೆದ್ದ ಎಂಎಸ್ ಧೋನಿ ನೇತೃತ್ವದ ಭಾರತ ತಂಡದ ಮುಖ್ಯ ಕೋಚ್ ಆಗಿದ್ದರು. ಕಸ್ಟರ್ನ್​​ ಅವರನ್ನು ಹೆಡ್​ ಕೋಚ್​ ಆಗಿ ನೇಮಿಸುವ ಮೂಲಕ ಜೂನ್​ 1ರಿಂದ ಶುರುವಾಗುವ ಟಿ20 ವಿಶ್ವಕಪ್​ ಗೆಲ್ಲಲು ಪಾಕ್ ಮಾಸ್ಟರ್​ ಪ್ಲಾನ್​ ರೂಪಿಸಿದೆ.

ಗ್ಯಾರಿ ಕರ್ಸ್ಟನ್ ಅವರ ಅಧಿಕಾರಾವಧಿಯಲ್ಲಿ ಏಕದಿನ ವರ್ಲ್ಡ್ ಕಪ್ ಗೆಲ್ಲುವುದರ ಜತೆಗೆ ಭಾರತ ತಂಡವು ಟೆಸ್ಟ್ ಮತ್ತು ಏಕದಿನ ಕ್ರಿಕೆಟ್​ನಲ್ಲೂ ನಂಬರ್ 1 ಸ್ಥಾನ ತಲುಪಿತ್ತು. ಭಾರತ ತಂಡದೊಂದಿಗೆ ಒಪ್ಪಂದ ಮುಕ್ತಾಯದ ನಂತರ ಕರ್ಸ್ಟನ್ ಅವರು 2011 ರಿಂದ 2013 ರವರೆಗೆ ದಕ್ಷಿಣ ಆಫ್ರಿಕಾದ ಮುಖ್ಯ ತರಬೇತುದಾರರಾಗಿ ಸೇವೆ ಸಲ್ಲಿಸಿದ್ದರು. 56 ವರ್ಷದ ಕರ್ಸ್ಟನ್ ಐಪಿಎಲ್​ನಲ್ಲಿ ಗುಜರಾತ್ ಟೈಟಾನ್ಸ್‌ ತಂಡಕ್ಕೆ ಬ್ಯಾಟಿಂಗ್ ಕೋಚ್ ಮತ್ತು ಮಾರ್ಗದರ್ಶಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.

ಜೂನ್ 9ರಂದು ಭಾರತ-ಪಾಕಿಸ್ತಾನ ಮುಖಾಮುಖಿ

ಪಾಕಿಸ್ತಾನ ತಂಡದೊಂದಿಗೆ ಕರ್ಸ್ಟನ್ ಅವರ ಮೊದಲ ಪ್ರಮುಖ ಕಾರ್ಯಯೋಜನೆಯು 2024ರ ಟಿ20 ವಿಶ್ವಕಪ್ ಆಗಿರುತ್ತದೆ. ಜೂನ್ 1ರಿಂದ 29ರ ತನಕ ವೆಸ್ಟ್ ಇಂಡೀಸ್ ಮತ್ತು ಯುಎಸ್​ಎ ಜಂಟಿ ಆತಿಥ್ಯದಲ್ಲಿ ಟೂರ್ನಿ ನಡೆಯಲಿದೆ. ಟಿ20 ವಿಶ್ವಕಪ್​ನಲ್ಲಿ ಜೂನ್ 9ರಂದು ನ್ಯೂಯಾರ್ಕ್‌ನಲ್ಲಿ ಪಾಕಿಸ್ತಾನ ಮತ್ತು ಭಾರತ ಸೆಣಸಾಟ ನಡೆಸಲಿವೆ. ಮಿನಿ ವಿಶ್ವಕಪ್‌ ಇತಿಹಾಸದಲ್ಲಿ ಪಾಕ್, ಭಾರತ ತಂಡವನ್ನು ಒಮ್ಮೆ ಮಾತ್ರ ಸೋಲಿಸಿದೆ. ಉಭಯ ತಂಡಗಳು 2022ರ ಅಕ್ಟೋಬರ್ 23ರಂದು ಕೊನೆಯ ಬಾರಿ ಮುಖಾಮುಖಿಯಾಗಿದ್ದವು.

ಇದನ್ನೂ ಓದಿ: ಆರ್ಚರಿ ವಿಶ್ವಕಪ್​ನಲ್ಲಿ ಭಾರತ ಚಿನ್ನದ ಬೇಟೆ; 5 ಗೋಲ್ಡ್, 1 ಬೆಳ್ಳಿ, 1 ಕಂಚು ಗೆದ್ದು ಇತಿಹಾಸ ಸೃಷ್ಟಿ

ಜೇಸನ್ ಗಿಲ್ಲೆಸ್ಪಿ ಪ್ರದರ್ಶನ

ಕರ್ಸ್ಟನ್ ಅವರು ಬಾಬರ್ ಅಜಮ್ ನೇತೃತ್ವದ ವೈಟ್-ಬಾಲ್ ತಂಡದ ಮುಖ್ಯಕೋಚ್ ಆಗಿ ನೇಮಕಗೊಂಡಿದ್ದರೆ, ಆಸ್ಟ್ರೇಲಿಯಾದ ಮಾಜಿ ವೇಗಿ ಗಿಲ್ಲೆಸ್ಪ್ ಶಾನ್ ಮಸೂದ್ ನೇತೃತ್ವದ ಟೆಸ್ಟ್ ತಂಡದ ಜವಾಬ್ದಾರಿ ವಹಿಸಿಕೊಳ್ಳಲಿದ್ದಾರೆ. ಪಾಕ್​ನ ಹೊಸ ಟೆಸ್ಟ್ ಮುಖ್ಯ ಕೋಚ್​ ಆಗುವ ಮೊದಲು ಗಿಲ್ಲೆಸ್ಪಿ ಅವರು ಯಾರ್ಕ್‌ಷೈರ್, ಸಸೆಕ್ಸ್ ಮತ್ತು ದಕ್ಷಿಣ ಆಸ್ಟ್ರೇಲಿಯಾದ ಮುಖ್ಯತರಬೇತುದಾರರಾಗಿ ಸೇವೆ ಸಲ್ಲಿಸಿದ್ದಾರೆ.

ಗಿಲ್ಲೆಸ್ಪಿ ಆಸ್ಟ್ರೇಲಿಯಾ ತಂಡದ ಪರ 71 ಟೆಸ್ಟ್, 97 ಏಕದಿನ ಮತ್ತು ಒಂದು ಟಿ20ಐ ಆಡಿದ ಅನುಭವ ಹೊಂದಿದ್ದಾರೆ. ಕ್ರಮವಾಗಿ 259, 142 ಮತ್ತು 1 ವಿಕೆಟ್ ಪಡೆದಿದ್ದಾರೆ. ಬ್ಯಾಟಿಂಗ್​​ನಲ್ಲಿ ದ್ವಿಶತಕವನ್ನೂ ಸಿಡಿಸಿದ್ದಾರೆ ಗಿಲ್ಲೆಸ್ಪಿ. ಕರ್ಸ್ಟನ್ ಮತ್ತು ಗಿಲ್ಲೆಸ್ಪಿ ಜೊತೆಗೆ ಪಾಕಿಸ್ತಾನದ ಮಾಜಿ ಆಲ್‌ರೌಂಡರ್ ಅಜರ್ ಮಹಮೂದ್ ಅವರನ್ನು ಪಾಕಿಸ್ತಾನದ ಮೂರು ಫಾರ್ಮೆಟ್​ನ ಸಹಾಯಕ ಕೋಚ್ ಆಗಿ ದೃಢಪಡಿಸಲಾಗಿದೆ.

ಇದನ್ನೂ ಓದಿ: KL Rahul: ವಿರಾಟ್ ಕೊಹ್ಲಿ ಹಿಂದಿಕ್ಕಿ ಐಪಿಎಲ್​ನಲ್ಲಿ ಮತ್ತೊಂದು ಮೈಲಿಗಲ್ಲು ತಲುಪಿದ ಕೆಎಲ್ ರಾಹುಲ್

ಇನ್ನಷ್ಟಯ ಕ್ರಿಕೆಟ್ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.