ಸಿಎಸ್ಕೆ ವಿರುದ್ಧ ಸೇಡಿಗೆ ಕಾದು ಕುಳಿತ ಆರ್ಸಿಬಿ; ಗೆಲುವಿನ ಗೇಮ್ಪ್ಲಾನ್ ಏನು, ಅಖಾಡದಲ್ಲಿ ಗೆಲ್ಲೋದ್ಯಾರು?
RCB vs CSK Preview: ಐಪಿಎಲ್ನ 68ನೇ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ತಂಡಗಳ ನಡುವಿನ ಹೈವೋಲ್ಟೇಜ್ ಕಾದಾಟಕ್ಕೆ ಬೆಂಗಳೂರಿನ ಎಂ ಚಿನ್ನಸ್ವಾಮಿ ಕ್ರಿಕೆಟ್ ಮೈದಾನ ಸಜ್ಜಾಗಿ ನಿಂತಿದೆ.
ಐಪಿಎಲ್ನ 68ನೇ ಪಂದ್ಯ, ಸೇಡಿನ ಸಮರಕ್ಕೆ ಸಾಕ್ಷಿಯಾಗುತ್ತಿದೆ. ಅಂದು ಚೆಪಾಕ್ ಅಂಗಳದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಸೋಲು ಕಂಡಿದ್ದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಇಂದು ತವರಿನ ಎಂ ಚಿನ್ನಸ್ವಾಮಿ ಅಂಗಳದಲ್ಲಿ ಸೇಡಿಗಾಗಿ ಕಾದು ಕುಳಿತಿದೆ. ಇದಕ್ಕಾಗಿಯೇ ಪ್ರತ್ಯೇಕ ಗೇಮ್ಪ್ಲಾನ್, ಸ್ಟ್ರಾಟಜಿ ರೂಪಿಸಿಕೊಂಡಿದೆ. ಆದರೆ ಈ ಪಂದ್ಯಕ್ಕೆ ಶೇ 80 ರಿಂದ 90 ರಷ್ಟು ಮಳೆ ಸುರಿದು ಅಡ್ಡಿಪಡಿಸುವ ಸಾಧ್ಯತೆ ಇದೆ ಎಂದು ಹವಾಮಾನ ಇಲಾಖೆ ಹೇಳಿದೆ.
ದಿನಾಂಕ ಮಾರ್ಚ್ 22. ಸ್ಥಳ-ಚೆನ್ನೈನ ಚೆಪಾಕ್ ಮೈದಾನ. ಈ ದಿನ ನೆನೆಪಿದೆಯಾ? ಪ್ರಸಕ್ತ ಐಪಿಎಲ್ ಟೂರ್ನಿಯಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು, ಹೀನಾಯವಾಗಿ ಸೋಲುಪ್ಪಿಕೊಂಡಿದ್ದ ದಿನ. ಯೆಲ್ಲೋ ಆರ್ಮಿ ಅಬ್ಬರಕ್ಕೆ ಮಂಕಾಗಿ ಕುಳಿತ್ತಿದ್ದ ದಿನ. ಅಂದು ಉದ್ಘಾಟನಾ ಪಂದ್ಯದಲ್ಲಿ ಶರಣಾಗಿತ್ತು. ಆದರೀಗ ಪುಟಿದಿದ್ದಿರುವ ಫಾಫ್ ಪಡೆಯ ಲಕ್ ಆ್ಯಂಡ್ ಟೈಮ್, ಬದಲಾಗಿದೆ.
ಸಿಎಸ್ಕೆ ವಿರುದ್ಧ ಉದ್ಘಾಟನಾ ಪಂದ್ಯದಲ್ಲಿ ಸೋತಿದ್ದ ಆರ್ಸಿಬಿ ತಂಡದ ಸಮಯ ಬದಲಾಗಿದೆ. ಟೂರ್ನಿಯ ಕೊನೆಯ ಹಂತದಲ್ಲಿ ಸೇಡು ತೀರಿಸಿಕೊಳ್ಳುವುದರ ಜೊತೆಗೆ ಪ್ಲೇಆಫ್ ಪ್ರವೇಶಿಸುವ ಸಮಯ ಕೂಡ ಬಂದಿದೆ. ಅದರಲ್ಲೂ ಸುಮ್ಮನೆ ಸೋಲೊಪ್ಪಿಕೊಳ್ಳದ ವಿರಾಟ್ ಕೊಹ್ಲಿ, ಪ್ರತೀಕಾರಕ್ಕಾಗಿ ಕಾಯುತ್ತಿರುವುದು ಪಂದ್ಯದ ರೋಚಕತೆಗೆ ಸಾಕ್ಷಿಯಾಗಿದೆ. ಪ್ರಸ್ತುತ ಸತತ ಗೆಲುವಿನ ಟ್ರ್ಯಾಕ್ನಲ್ಲಿರುವ ರೆಡ್ ಆರ್ಮಿ ಸಿಎಸ್ಕೆ ಬೇಟೆಗೆ ಸನ್ನದ್ಧವಾಗಿದೆ.
ಋತುರಾಜ್ರನ್ನ ಆರಂಭದಲ್ಲೇ ಕಟ್ಟಿಹಾಕಲು ಪ್ಲಾನ್
ಗೆಲ್ಲುವ ಛಲದಲ್ಲಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು, ಭರ್ಜರಿ ಗೇಮ್ಪ್ಲಾನ್ ರೂಪಿಸಿಕೊಂಡಿದೆ. 13 ಪಂದ್ಯಗಳಿಂದ ಬೊಂಬಾಟ್ ಪ್ರದರ್ಶನ ನೀಡುವ ಮೂಲಕ ಆರೆಂಕ್ ಕ್ಯಾಪ್ ರೇಸ್ನಲ್ಲಿರುವ ಋತುರಾಜ್ ಗಾಯಕ್ವಾಡ್, ಇದೀಗ ಆರ್ಸಿಬಿ ವಿರುದ್ಧವೂ ರನ್ ಬೇಟೆಗೆ ಸಜ್ಜಾಗಿದ್ದಾರೆ. ಹಾಗಾಗಿ ಈತನ ಆರ್ಭಟಕ್ಕೆ ಆರಂಭದಲ್ಲೇ ಕಡಿವಾಣ ಹಾಕಿದರೆ, ಸಿಎಸ್ಕೆ ವಿರುದ್ಧ ಅರ್ಧ ಪಂದ್ಯ ಗೆದ್ದಂತೆ. ಹಾಗಾಗಿ ಆತನ ವಿಕೆಟ್ಗೆ ಸ್ಪಿನ್ ಅಸ್ತ್ರವನ್ನು ಪ್ರಯೋಗಿಸಲು ಆರ್ಸಿಬಿ ಮುಂದಾಗಿದೆ.
ಕಿವೀಸ್ ಆಟಗಾರರ ಮೇಲೆ ಕಣ್ಣು
ಸಿಎಸ್ಕೆ ಪರ ರನ್ ಗಳಿಸಲು ಕಿವೀಸ್ ಆಟಗಾರರಾದ ರಚಿನ್ ರವೀಂದ್ರ ಮತ್ತು ಡ್ಯಾರಿಲ್ ಮಿಚೆಲ್ ಪರದಾಡುತ್ತಿದ್ದಾರೆ. ಆದರೆ ಇವರು ಚಿನ್ನಸ್ವಾಮಿ ಪಿಚ್ನಲ್ಲಿ ಉತ್ತಮ ರೆಕಾರ್ಡ್ ಹೊಂದಿದ್ದಾರೆ. ಹಾಗಾಗಿ ಇವರನ್ನು ಕಟ್ಟಿ ಹಾಕಲು ಆರ್ಸಿಬಿ ಸಿದ್ಧವಾಗಿದೆ. ಇಬ್ಬರನ್ನೂ ಬೇಗನೇ ಔಟ್ ಮಾಡಿಸಿದರೆ, ತಂಡದ ಮೊತ್ತ ಕುಸಿಯಲು ಕಾರಣವಾಗಲಿದೆ.
ಶಿವಂ ದುಬೆ ಅಬ್ಬರಕ್ಕೆ ಬ್ರೇಕ್ ಹಾಕಲು ಸ್ಟ್ರಾಟರ್ಜಿ..!
ಸಿಎಸ್ಕೆ ಸ್ಪೋಟಕ ಬ್ಯಾಟ್ಸ್ಮನ್ ಶಿವಂ ದುಬೆ, ಎಂತಹ ಬೌಲರ್ಗಳ ವಿರುದ್ಧವಾದರೂ ಚಿಂದಿ ಉಡಾಯಿಸ್ತಾರೆ. ಹಾಗಾಗಿ ಪೂರನ್ ಅಬ್ಬರಕ್ಕೆ ಕಾಡಿವಾಣ ಹಾಕಲು, ಆರ್ಸಿಬಿ ಸ್ಟ್ರಾಟಜಿ ರೂಪಿಸಿದೆ. ಸ್ಪಿನ್ನರ್ಗಳಿಗೆ ಬೆಂಡೆತ್ತುವ ದುಬೆಯನ್ನು ಅವರಿಂದಲೇ ಔಟ್ ಮಾಡಿಸುವ ಪ್ರಯೋಗಕ್ಕೆ ಫಾಫ್ ಪಡೆ ಚಿಂತಿಸಿದೆ.
ಪ್ರಮುಖ ಬೌಲರ್ಗಳೇ ಔಟ್
ಉದ್ಘಾಟನಾ ಪಂದ್ಯದಲ್ಲಿ ಮಿಂಚಿದ್ದ ಮುಸ್ತಫಿಜುರ್, ಉಳಿದ ಪಂದ್ಯಗಳಲ್ಲಿ ಮಿಂಚಿದ್ದ ದೀಪಕ್ ಚಹರ್ ಮತ್ತು ಮತೀಶಾ ಪತಿರಾಣ ಅವರು ಗಾಯದಿಂದ ಹೊರಗುಳಿದಿದ್ದಾರೆ. ಮೊಯಿನ್ ಅಲಿ ತವರಿಗೆ ಹೋಗಿದ್ದಾರೆ. ಇದು ಆರ್ಸಿಬಿಗೆ ಲಾಭ ತಂದುಕೊಟ್ಟಿದೆ. ಆದರೆ ಅವರ ಅಲಭ್ಯತೆಯಲ್ಲಿ ತುಷಾರ್ ದೇಶಪಾಂಡೆ ಅಬ್ಬರದ ಬೌಲಿಂಗ್ ಮಾಡುತ್ತಿದ್ದು, ಆರ್ಸಿಬಿ ಬ್ಯಾಟರ್ಗಳನ್ನು ಕಟ್ಟಿಹಾಕಲು ಯೋಜನೆ ರೂಪಿಸುತ್ತಿದ್ದಾರೆ.
ಚೆಪಾಕ್ನಲ್ಲಿ ನಡೆದ ಮೊದಲ ಪಂದ್ಯದಲ್ಲಿ ಸೋಲು ಅನುಭವಿಸಿದ್ದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು, ಇದೀಗ ಎಲ್ಲಾ ವಿಭಾಗಗಳಲ್ಲಿ ಬಲಿಷ್ಠವಾಗಿ ರೂಪುಗೊಂಡಿದೆ. ಸತತ ಐದು ಗೆಲುವು ಸಾಧಿಸಿ ಪ್ಲೇಆಫ್ ಸನಿಹಕ್ಕೆ ಬಂದು ನಿಂತಿದೆ. ಇದೇ ಸಮಯ ಬಳಸಿಕೊಂಡು ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ, ಸೇಡು ತೀರಿಸಿಕೊಳ್ಳಲು ಫಾಫ್ ಸೇನೆ ಸೇನೆ ರನ್ಭೂಮಿಗೆ ಇಳೀತಿದೆ. ಈ ಮದಗಜಗಳ ಕಾದಾಟ ಹೇಗಿರಲಿದೆ ಎಂಬುದನ್ನು ಕಾದುನೋಡಬೇಕಿದೆ.
(ಕನ್ನಡದಲ್ಲಿ ಕ್ರಿಕೆಟ್, ಎಚ್ಟಿ ಕನ್ನಡ ಬೆಸ್ಟ್. ಐಪಿಎಲ್, ಟಿ20 ವರ್ಲ್ಡ್ಕಪ್ ಸೇರಿದಂತೆ ಕ್ರಿಕೆಟ್ ಲೋಕದ ಸಮಗ್ರ ಮಾಹಿತಿ, ತಾಜಾ ವಿದ್ಯಮಾನ, ರನ್-ವಿಕೆಟ್, ಪ್ಲೇಆಫ್, ಟೀಮ್ ಸ್ಟಾಟ್ ವಿಶ್ಲೇಷಣೆಗಳಿಗಾಗಿ kannada.hindustantimes.com/cricket ಕ್ಕೆ ಭೇಟಿ ನೀಡಿ.)
