ಕನ್ನಡ ಸುದ್ದಿ  /  ಕ್ರಿಕೆಟ್  /  ಹಾಲಿ ಚಾಂಪಿಯನ್​​ಗೆ ಮತ್ತೊಂದು ಸೋಲು; ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಸನ್​ರೈಸರ್ಸ್​ ಹೈದರಾಬಾದ್​ಗೆ ಭರ್ಜರಿ ಜಯ

ಹಾಲಿ ಚಾಂಪಿಯನ್​​ಗೆ ಮತ್ತೊಂದು ಸೋಲು; ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಸನ್​ರೈಸರ್ಸ್​ ಹೈದರಾಬಾದ್​ಗೆ ಭರ್ಜರಿ ಜಯ

SRH vs CSK Highlights: 17ನೇ ಆವೃತ್ತಿಯ ಐಪಿಎಲ್​ನ 18ನೇ ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಸನ್​ರೈಸರ್ಸ್ ಹೈದರಾಬಾದ್ 6 ವಿಕೆಟ್​ಗಳ ಭರ್ಜರಿ ಗೆಲುವು ಸಾಧಿಸಿತು.

ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಸನ್​ರೈಸರ್ಸ್​ ಹೈದರಾಬಾದ್​ಗೆ ಭರ್ಜರಿ ಜಯ
ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಸನ್​ರೈಸರ್ಸ್​ ಹೈದರಾಬಾದ್​ಗೆ ಭರ್ಜರಿ ಜಯ (PTI)

ಸಂಘಟಿತ ಹೋರಾಟದ ನೆರವಿನಿಂದ ಚೆನ್ನೈ ಸೂಪರ್ ಕಿಂಗ್ಸ್​ ವಿರುದ್ಧ ಸನ್​ರೈಸರ್ಸ್ ಹೈದರಾಬಾದ್ ಭರ್ಜರಿ ಗೆಲುವು ಸಾಧಿಸಿದೆ. ಯಲ್ಲೋ ಆರ್ಮಿಯನ್ನು 6 ವಿಕೆಟ್​ಗಳಿಂದ ಆರೆಂಜ್ ಆರ್ಮಿ ಸೋಲಿಸಿದೆ. ಸಿಎಸ್​ಕೆ ಟೂರ್ನಿಯಲ್ಲಿ 2ನೇ ಸೋಲು ಅನುಭವಿಸಿದರೆ, ಎಸ್​ಆರ್​​ಹೆಚ್​ ಎರಡನೇ ಜಯದ ನಗೆ ಬೀರಿದೆ. ಪ್ರಸ್ತುತ ಅಂಕಪಟ್ಟಿಯಲ್ಲಿ ಋತುರಾಜ್​ ಗಾಯಕ್ವಾಡ್ ನೇತೃತ್ವದ ತಂಡ 3ನೇ ಸ್ಥಾನದಲ್ಲಿದೆ. ಕಮಿನ್ಸ್ ಪಡೆ 5ನೇ ಸ್ಥಾನದಲ್ಲಿದೆ. ಪ್ರಸಕ್ತ ಆವೃತ್ತಿಯಲ್ಲಿ ಐದು ಬಾರಿ ಚಾಂಪಿಯನ್​ ಆಗಿರುವ ಮುಂಬೈ ಮತ್ತು ಚೆನ್ನೈ ಎರಡೂ ತಂಡಗಳನ್ನು ಎಸ್​ಆರ್​​ಹೆಚ್​ ಸೋಲಿಸಿದೆ.

ಟ್ರೆಂಡಿಂಗ್​ ಸುದ್ದಿ

ಹೈದರಾಬಾದ್​ನ ರಾಜೀವ್ ಗಾಂಧಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಮೈದಾನದಲ್ಲಿ ನಡೆದ ಹೈವೋಲ್ಟೇಜ್ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ ಚೆನ್ನೈ, ನಿರೀಕ್ಷಿತ ಪ್ರದರ್ಶನ ನೀಡಲಿಲ್ಲ. ಶಿವಂ ದುಬೆ ಸಿಡಿಸಿದ 45 ರನ್​ಗಳ ಫಲವಾಗಿ 20 ಓವರ್​ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 165 ರನ್ ಗಳಿಸಿತು. ಈ ಸ್ಪರ್ಧಾತ್ಮಕ ಮೊತ್ತ ಬೆನ್ನಟ್ಟಿದ ಹೈದರಾಬಾದ್​ 11 ಎಸೆತಗಳು ಬಾಕಿ ಇರುವಂತೆಯೇ ಗೆದ್ದು ಬೀಗಿತು.

ಹೈದರಾಬಾದ್ ಸಂಘಟಿತ ಹೋರಾಟ

ಸ್ಪರ್ಧಾತ್ಮಕ ಗುರಿ ಬೆನ್ನಟ್ಟಿದ ಹೈದರಾಬಾದ್, ಭರ್ಜರಿ ಆರಂಭ ಪಡೆಯಿತು. ಮೊದಲ ವಿಕೆಟ್​ಗೆ 46 ರನ್ ಹರಿದು ಬಂತು. ಆದರೆ ಅಭಿಷೇಕ್ ಶರ್ಮಾ 12 ಎಸೆತಗಳಲ್ಲಿ 4 ಸಿಕ್ಸರ್​, 3 ಬೌಂಡರಿ ಸಹಿತ 37 ರನ್ ಚಚ್ಚಿ ಔಟಾದರು. ಆರಂಭಿಕ ಆಘಾತದ ಬಳಿಕ ಆರ್ಭಟಿಸಿದ ಟ್ರಾವಿಸ್ ಹೆಡ್ ಮತ್ತು 3ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಏಡನ್ ಮಾರ್ಕ್ರಮ್​ ಎರಡನೇ ವಿಕೆಟ್​ಗೆ 60 ರನ್ ಪೇರಿಸಿದರು. ಅಲ್ಲದೆ, ಪವರ್​ ​ಪ್ಲೇಗೆ 78 ರನ್​​ಗಳು ಹರಿದು ಬಂದವು.

ಆದರೆ ಮಾರ್ಕ್ರಮ್​ಗೆ ಸಾಥ್ ನೀಡುತ್ತಿದ್ದ ಹೆಡ್ 24 ಎಸೆತಗಳಲ್ಲಿ 3 ಬೌಂಡರಿ, 1 ಸಿಕ್ಸರ್​ನೊಂದಿಗೆ 31 ರನ್ ಗಳಿಸಿ ಮಹೀಶಾ ತೀಕ್ಷಾಣ ಬೌಲಿಂಗ್​​ನಲ್ಲಿ ಔಟಾದರು. ಮತ್ತೊಂದೆಡೆ ಅರ್ಧಶತಕ ಸಿಡಿಸಿದ ಮಾರ್ಕ್ರಮ್ ತಂಡಕ್ಕೆ ಆಧಾರವಾದರು. 36 ಎಸೆತಗಳಲ್ಲಿ 4 ಬೌಂಡರಿ, 1 ಸಿಕ್ಸರ್​​ನೊಂದಿಗೆ 50 ರನ್ ಕಲೆ ಹಾಕಿದರು. ಉತ್ತಮ ಪ್ರದರ್ಶನ ನೀಡಿ ಗೆಲುವನ್ನು ಸನಿಹಕ್ಕೆ ತಂದಿಟ್ಟು ವಿಕೆಟ್​​ ಒಪ್ಪಿಸಿದರು.

ಬಡ್ತಿ ಪಡೆದು 4ನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿದ ಶಹಬಾಜ್​ ಅಹ್ಮದ್, ನೀರಸ ಪ್ರದರ್ಶನ ನೀಡಿದರು. 19 ಎಸೆತಗಳಲ್ಲಿ 18 ರನ್ ಗಳಿಸಿದರು. ಮಾರ್ಕ್ರಮ್ ಮತ್ತ ಶಹಬಾಜ್​ಗೆ ಮೊಯಿನ್ ಅಲಿ ಗೇಟ್​ಪಾಸ್ ಕೊಟ್ಟರು. ಆರಂಭದಲ್ಲಿ ರನ್​ ಲೀಕ್ ಮಾಡಿದ ಸಿಎಸ್​ಕೆ ಕೊನೆಯ ಹಂತದಲ್ಲಿ ಟೈಟ್ ಬೌಲಿಂಗ್ ನಡೆಸಿತು. ಆದರೆ ಕೊನೆಯಲ್ಲಿ ಕ್ರೀಸ್​ನಲ್ಲಿದ್ದ ಹೆನ್ರಿಚ್ ಕ್ಲಾಸೆನ್-ನಿತಿಶ್ ರೆಡ್ಡಿ ಗೆಲುವು ತಂದುಕೊಟ್ಟರು. ಮೊಯಿನ್ ಅಲಿ 2 ವಿಕೆಟ್, ದೀಪಕ್ ಚಹರ್, ಮಹೀಶಾ ತೀಕ್ಷಣ ತಲಾ ಒಂದು ವಿಕೆಟ್ ಪಡೆದರು.

ಸಿಎಸ್​ಕೆ ನೀರಸ ಬ್ಯಾಟಿಂಗ್​

ಮೊದಲು ಬ್ಯಾಟಿಂಗ್ ನಡೆಸಿದ ಸಿಎಸ್​ಕೆ ಕೆಟ್ಟ ಆರಂಭ ಪಡೆಯಿತು. ರಚಿನ್ ರವೀಂದ್ರ (12) ಮತ್ತು ಋತುರಾಜ್ ಗಾಯಕ್ವಾಡ್ (26) ಬೇಗನೇ ಔಟಾದರು. ಮತ್ತೊಂದೆಡೆ ಚೇತರಿಕೆ ನೀಡುವ ಪ್ರಯತ್ನಿಸಿದ ಅಜಿಂಕ್ಯ ರಹಾನೆ 35 ರನ್​ಗಳಿಗೆ ಸುಸ್ತಾದರು. ನಿಧಾನವಾಗಿ ಬ್ಯಾಟ್ ಬೀಸಿ ತಂಡದ ಸ್ಕೋರ್ ಏರಿಸಲು ವಿಫಲವಾದರು. ಆದರೆ ಶಿವಂ ದುಬೆ ಮತ್ತೆ ಸಿಡಿದರು. 24 ಎಸೆತಗಳಲ್ಲಿ 4 ಸಿಕ್ಸರ್​, 2 ಬೌಂಡರಿ ಸಹಿತ 45 ರನ್ ಚಚ್ಚಿದರು.

ಚೆನ್ನೈ ಬ್ಯಾಟರ್​​ಗಳ ಆರ್ಭಟಕ್ಕೆ ಕಡಿವಾಣ ಹಾಕಿದ ಎಸ್​ಆರ್​ಹೆಚ್​, ಯಾವ ಓವರ್​​ನಲ್ಲೂ ರನ್​ ಸೋರಿಕೆ ಮಾಡಲಿಲ್ಲ. ಡ್ಯಾರಿಲ್ ಮಿಚೆಲ್ (13) ಮತ್ತೊಮ್ಮೆ ನಿರಾಸೆ ಮೂಡಿಸಿದರು. ರವೀಂದ್ರ ಜಡೇಜಾ ತನ್ನ ಹಳೆಯ ಖದರ್ ತೋರುವಲ್ಲಿ ವಿಫಲರಾದರು. ಕೊನೆಯವರೆಗೂ ಕ್ರೀಸ್​ನಲ್ಲಿದ್ದರೂ 23 ಎಸೆತಗಳಲ್ಲಿ 31 ರನ್​ಗಳಿಸಲಷ್ಟೇ ಶಕ್ತವಾಯಿತು. ಧೋನಿ ಅಜೇಯ 1 ರನ್ ಸಿಡಿಸಿದರು. ಭುವನೇಶ್ವರ್, ನಟರಾಜನ್, ಕಮಿನ್ಸ್, ಶಹಬಾಜ್, ಉನಾದ್ಕತ್ ತಲಾ 1 ವಿಕೆಟ್ ಪಡೆದರು.

IPL_Entry_Point