ಇಂಗ್ಲೆಂಡ್ ವಿಶ್ವದಾಖಲೆ, 147 ವರ್ಷಗಳ ಟೆಸ್ಟ್ ಕ್ರಿಕೆಟ್​ನಲ್ಲಿ 5 ಲಕ್ಷ ರನ್ ಪೂರೈಸಿದ ಆಂಗ್ಲರು; ಸನಿಹದಲ್ಲಿ ಆಸ್ಟ್ರೇಲಿಯಾ, ದೂರದಲ್ಲಿ ಭಾರತ!

147 ವರ್ಷಗಳ ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲಿ ಇಂಗ್ಲೆಂಡ್ ಕ್ರಿಕೆಟ್ ತಂಡ ವಿಶೇಷ ಮೈಲಿಗಲ್ಲೊಂದನ್ನು ನೆಟ್ಟಿದೆ. ವೆಲ್ಲಿಂಗ್ಟನ್​ನಲ್ಲಿ ನ್ಯೂಜಿಲೆಂಡ್ ವಿರುದ್ಧ ಎರಡನೇ ಟೆಸ್ಟ್ ಪಂದ್ಯವನ್ನಾಡುತ್ತಿರುವ ಬ್ರಿಟಿಷ್ ತಂಡ, ದೀರ್ಘ ಸ್ವರೂಪದ ಕ್ರಿಕೆಟ್​ನಲ್ಲಿ ಬರೋಬ್ಬರಿ 5 ಲಕ್ಷ ರನ್ ಪೂರೈಸಿದೆ. ಆಂಗ್ಲರನ್ನು ಹೊರತುಪಡಿಸಿ ಬೇರೆ ಯಾವ ತಂಡವೂ ಸಾಧನೆ ಮಾಡಿಲ್ಲ. ಹೀಗಾಗಿ ಟೆಸ್ಟ್​ 5 ಲಕ್ಷ ರನ್ ಪೂರ್ಣಗೊಳಿಸಿದ ವಿಶ್ವದ ಮೊದಲ ತಂಡ ಹೆಗ್ಗಳಿಕೆಗೆ ಪಾತ್ರವಾಗಿದೆ.

ಇತಿಹಾಸದಲ್ಲಿ 1,082ನೇ ಟೆಸ್ಟ್ ಆಡುತ್ತಿರುವ ಇಂಗ್ಲೆಂಡ್, ದೀರ್ಘ ಸ್ವರೂಪದ ಕ್ರಿಕೆಟ್​ನಲ್ಲಿ 5,00,000 ರನ್ ಗಳಿಸಿದ ಮೊದಲ ತಂಡ ಎಂಬ ವಿಶ್ವದಾಖಲೆ ನಿರ್ಮಿಸಿದೆ. ನ್ಯೂಜಿಲೆಂಡ್ ವಿರುದ್ಧ ನಡೆಯುತ್ತಿರುವ ವೆಲ್ಲಿಂಗ್ಟನ್ ಟೆಸ್ಟ್ ಪಂದ್ಯದ ಎರಡನೇ ದಿನದಾಟದಲ್ಲಿ ಇಂಗ್ಲೆಂಡ್ ಬೃಹತ್ ಮೈಲುಗಲ್ಲು ಸಾಧಿಸಿದೆ. ಪ್ರತಿ ವರ್ಷ ಅತಿ ಹೆಚ್ಚು ಟೆಸ್ಟ್​ ಪಂದ್ಯಗಳನ್ನು ಆಡುವ ಕ್ರಿಕೆಟ್ ಜನಕರ ತಂಡ ಬ್ಯಾಟ್‌ನಿಂದ ಗಳಿಸಿದ ಅರ್ಧ ಮಿಲಿಯನ್ ರನ್‌ಗಳ ಪರ್ವತ ತಲುಪಿದೆ.

ಸನಿಹದಲ್ಲಿ ಆಸ್ಟ್ರೇಲಿಯಾ, ದೂರದಲ್ಲಿ ಭಾರತ!

ಆಸ್ಟ್ರೇಲಿಯಾ ಕ್ರಿಕೆಟ್ ತಂಡ 2ನೇ ಸ್ಥಾನದಲ್ಲಿದ್ದರೂ 5 ಲಕ್ಷ ರನ್ ಮುಟ್ಟಲು ಇನ್ನೂ 70 ಸಾವಿರ ರನ್​ಗಳ ಅಗತ್ಯ ಇದೆ. ಇದು ಸನಿಹವಾದರೂ 70 ಸಾವಿರ ರನ್ ಗಳಿಸಲು ಹಲವು ವರ್ಷಗಳು ಬೇಕಾಗಬಹುದು. ಮತ್ತೊಂದೆಡೆ ಟೀಮ್ ಇಂಡಿಯಾ ಮೂರನೇ ಸ್ಥಾನದಲ್ಲಿದ್ದು, 5 ಲಕ್ಷ ರನ್ ಪೂರೈಸಲು ಬಹುದೂರಲ್ಲಿದೆ. ಇದುವರೆಗೂ 2 ಲಕ್ಷ 79 ಸಾವಿರ ರನ್ ಗಳಿಸಿದೆ. ಇಂಗ್ಲೆಂಡ್ ತಂಡ ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲಿ ಅತ್ಯಧಿಕ ಪಂದ್ಯಗಳನ್ನಾಡಿರುವ ಕಾರಣ ಈ ದಾಖಲೆ ಬರೆಯಲು ಸಾಧ್ಯವಾಯಿತು.

ಇದನ್ನೂ ಓದಿ: ಶತಕವೀರ ಟ್ರಾವಿಸ್​ ಹೆಡ್​ಗೆ ನಿಂದಿಸುತ್ತಾ ಸೆಂಡ್ ಆಫ್ ಕೊಟ್ಟ ಮೊಹಮ್ಮದ್ ಸಿರಾಜ್; ತರಾಟೆ ತೆಗೆದುಕೊಂಡ ಗವಾಸ್ಕರ್, VIDEO

ನ್ಯೂಜಿಲೆಂಡ್ ವಿರುದ್ಧದ ಸರಣಿಯ ಎರಡನೇ ಟೆಸ್ಟ್ ಪಂದ್ಯದಲ್ಲಿ ಇಂಗ್ಲೆಂಡ್, ಮೊದಲ ಇನ್ನಿಂಗ್ಸ್​​ನಲ್ಲಿ 280 ರನ್, ಎರಡನೇ ಇನ್ನಿಂಗ್ಸ್​ 378 ರನ್ ಗಳಿಸಿ ಮೂರನೇ ದಿನದಾಟಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡಿದೆ. ಒಟ್ಟಾರೆ 658 ರನ್ ಸಿಡಿಸಿ ಈ ದಾಖಲೆ ಬರೆದಿದೆ. ಇಂಗ್ಲೆಂಡ್ ಮೊದಲ ಟೆಸ್ಟ್​​ನಲ್ಲಿ 603 ರನ್ ಪೇರಿಸಿತ್ತು. ಎಲ್ಲಾ ತಂಡಗಳಿಗಿಂತ ಇಂಗ್ಲೆಂಡ್ ಅತ್ಯಧಿಕ ಪಂದ್ಯಗಳಲ್ಲಿ ಕಣಕ್ಕಿಳಿದಿದೆ. ಭಾರತ ತಂಡದ ಇದರಲ್ಲಿ ಅರ್ಧದಷ್ಟು ಪಂದ್ಯಗಳನ್ನಾಡಿದೆ.

ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ತಂಡಗಳು

5,00,126 - ಇಂಗ್ಲೆಂಡ್ (1082 ಪಂದ್ಯಗಳು, 18,954 ಇನ್ನಿಂಗ್ಸ್)

4,29,000 - ಆಸ್ಟ್ರೇಲಿಯಾ (868 ಪಂದ್ಯಗಳು, 15,183 ಇನ್ನಿಂಗ್ಸ್)

2,78,751 - ಭಾರತ (586 ಪಂದ್ಯಗಳು, 10,119 ಇನ್ನಿಂಗ್ಸ್)

ಪ್ರಸ್ತುತ ವೆಲ್ಲಿಂಗ್ಟನ್‌ನಲ್ಲಿ ಆಡುತ್ತಿರುವ ಇಂಗ್ಲೆಂಡ್ vs ನ್ಯೂಜಿಲೆಂಡ್ ಟೆಸ್ಟ್ ಮತ್ತು ಅಡಿಲೇಡ್‌ನಲ್ಲಿ ಆಡುತ್ತಿರುವ ಭಾರತ vs ಆಸ್ಟ್ರೇಲಿಯಾ ಟೆಸ್ಟ್- ಎರಡೂ ಟೆಸ್ಟ್‌ಗಳಲ್ಲಿ ಗಳಿಸಿದ ರನ್‌ಗಳು ಇದಕ್ಕೆ ಸೇರ್ಪಡೆಯಾಗುತ್ತವೆ.

ಇದನ್ನೂ ಓದಿ: ಅಬ್ಬಬ್ಬಾ 181.6 ಕಿಮೀ ವೇಗದಲ್ಲಿ ಚೆಂಡೆಸೆದ ಮೊಹಮ್ಮದ್ ಸಿರಾಜ್; ಕ್ರಿಕೆಟ್ ಚರಿತ್ರೆಯಲ್ಲೇ ಇದು ವೇಗದ ಬಾಲ್, ಆದರೆ ಅಸಲಿಯತ್ತೇ ಬೇರೆ!

ನ್ಯೂಜಿಲೆಂಡ್ ವಿರುದ್ಧ ಇಂಗ್ಲೆಂಡ್ ಮೊದಲು ಬ್ಯಾಟಿಂಗ್ ನಡೆಸಿದ್ದು, 280 ರನ್​ ಗಳಿಸಿತು. ಇದಕ್ಕೆ ಉತ್ತರವಾಗಿ ಕಿವೀಸ್ 125 ರನ್‌ಗಳಿಗೆ ಆಲೌಟ್ ಆಯಿತು. ಇಂಗ್ಲೆಂಡ್ ಎರಡನೇ ಇನಿಂಗ್ಸ್ ನಲ್ಲಿ 5 ವಿಕೆಟ್ ನಷ್ಟಕ್ಕೆ 378 ರನ್ ಗಳಿಸಿದೆ. ಇದೇ ವೇಳೆ ಜೋ ರೂಟ್ 36ನೇ ಶತಕದತ್ತ ದಾಪುಗಾಲಿಟ್ಟಿದ್ದಾರೆ. ಒಟ್ಟು 533 ರನ್​ಗಳ ಮುನ್ನಡೆಯಲ್ಲಿದೆ ಇಂಗ್ಲೆಂಡ್.

ಇದನ್ನೂ ಓದಿ: ಬಿಟ್ಟೂ ಬಿಡದೆ ಕಾಡುತ್ತಿರುವ ಟ್ರಾವಿಸ್ ಹೆಡ್; ಸೋಲಿನ ಭೀತಿಗೆ ಸಿಲುಕಿದ ಭಾರತ, ಆಸೀಸ್ ಹಿಡಿತದಲ್ಲಿ ಪಿಂಕ್ ಬಾಲ್ ಟೆಸ್ಟ್