ಮುಂದಿನ 12 ತಿಂಗಳಲ್ಲಿ 39 ಪಂದ್ಯ; ಏಷ್ಯಾಕಪ್, ಟಿ20 ವಿಶ್ವಕಪ್ ಸೇರಿ ಭಾರತದ ಒಂದು ವರ್ಷದ ಸಂಪೂರ್ಣ ವೇಳಾಪಟ್ಟಿ ಇಲ್ಲಿದೆ

2025ರ ಚಾಂಪಿಯನ್ಸ್ ಟ್ರೋಫಿ ಗೆದ್ದಿರುವ ಭಾರತ ತಂಡದ ಆಟಗಾರರು ಮಾರ್ಚ್​ 22ರಿಂದ ಮೇ 25ರ ತನಕ 18ನೇ ಆವೃತ್ತಿಯ ಐಪಿಎಲ್​ನಲ್ಲಿ ನಿರತರಾಗಿರಲಿದ್ದಾರೆ. ಎರಡು ತಿಂಗಳ ಕಾಲ ನಾನ್​ಸ್ಟಾಪ್ ಮನರಂಜನೆ ಬಳಿಕ ಭಾರತ ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ಮರಳುವುದು ಜುಲೈನಲ್ಲಿ. ನಂತರ ಟೀಮ್ ಇಂಡಿಯಾ ಆಟಗಾರರು ನಿರಂತರವಾಗಿ ಟೆಸ್ಟ್, ಒಡಿಐ, ಟಿ20ಐ ಕ್ರಿಕೆಟ್​ನ ಭಾಗವಾಗಲಿದ್ದಾರೆ. ಭಾರತ ತಂಡದ ಮುಂದಿನ 12 ತಿಂಗಳ ವೇಳಾಪಟ್ಟಿ ಹೇಗಿದೆ? ಇಲ್ಲಿದೆ ವಿವರ.

ಭಾರತ ತಂಡದ ಮುಂದಿನ ನಿಯೋಜನೆಯು ಇಂಗ್ಲೆಂಡ್ ವಿರುದ್ಧದ ಐದು ಪಂದ್ಯಗಳ ಟೆಸ್ಟ್ ಸರಣಿಯಾಗಿದೆ. ಇದು 2025-27ರ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್‌ನ ನಾಲ್ಕನೇ ಆವೃತ್ತಿಯ ಮೊದಲ ಪಂದ್ಯ. ಮೊದಲ 2 ಆವೃತ್ತಿಗಳಲ್ಲಿ ಫೈನಲ್ ಪ್ರವೇಶಿಸಿದ್ದ ಭಾರತ, 3ನೇ ಆವೃತ್ತಿಯಲ್ಲಿ ಪ್ರಶಸ್ತಿ ಸುತ್ತಿಗೆ ಪ್ರವೇಶಿಸಲು ವಿಫಲವಾಗಿತ್ತು. ಹಾಗಾಗಿ 4ನೇ ಆವೃತ್ತಿ ಭಾರತದ ಪಾಲಿಗೆ ಅತ್ಯಂತ ಅತ್ಯಂತ ಮುಖ್ಯವಾಗಿತ್ತು. ಇದೀಗ ಫೈನಲ್ ತಲುಪುವ ಗುರಿಯೊಂದಿಗೆ ಕಣಕ್ಕಿಳಿಯಲು ಭಾರತ ಸಜ್ಜಾಗಿದೆ.

2021-22ರಲ್ಲಿ ತನ್ನ ಕೈಯಲ್ಲಿದ್ದ ಪಟೌಡಿ ಟ್ರೋಫಿಯನ್ನು ಕೈಚೆಲ್ಲಿದ್ದ ಭಾರತ ಈ ಸಲ ಇಂಗ್ಲೆಂಡ್ ನೆಲದಲ್ಲಿ 18 ವರ್ಷಗಳ ನಂತರ ಸರಣಿ ಜಯದ ಬರ ನೀಗಿಸಲು ಸಜ್ಜಾಗಿದೆ. ಸದ್ಯ ಭಾರತಕ್ಕೆ ಚಾಂಪಿಯನ್ಸ್ ಟ್ರೋಫಿಯನ್ನು ಗೆದ್ದುಕೊಟ್ಟ ನಾಯಕ ರೋಹಿತ್​ ಶರ್ಮಾ ಅವರೇ ಈ ಐದು ಪಂದ್ಯಗಳ ಸರಣಿಗೆ ನಾಯಕತ್ವ ವಹಿಸಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಬಾರ್ಡರ್-ಗವಾಸ್ಕರ್ ಟ್ರೋಫಿ ಸೋತ ನಂತರ ಟೆಸ್ಟ್ ನಾಯಕತ್ವ ಬದಲಾಗಲಿದೆ ಎಂದು ಬಿಸಿಸಿಐ ಮೂಲಗಳೇ ತಿಳಿಸಿದ್ದವು. ಇದೀಗ ಉಲ್ಟಾ ಹೊಡೆಯುತ್ತಿದೆ ಎನ್ನಲಾಗಿದೆ.

ಮುಂದಿನ ಟಿ20 ವಿಶ್ವಕಪ್​​, ಈಗಿನಿಂದಲೇ ಗಮನ

2026ರಲ್ಲಿ ಐಸಿಸಿ ಟಿ20 ವಿಶ್ವಕಪ್​ ನಡೆಯಲಿದೆ. ಹಾಲಿ ಚಾಂಪಿಯನ್ ಪಟ್ಟ ಉಳಿಸಿಕೊಳ್ಳಲು ಭಾರತ ತಂಡ ಈಗಿನಿಂದಲೇ ಸಿದ್ಧತೆ ನಡೆಸುವ ಅಗತ್ಯ ಇದೆ. ಮುಂದಿನ ವರ್ಷ ಫೆಬ್ರವರಿ ಮತ್ತು ಮಾರ್ಚ್‌ನಲ್ಲಿ ಭಾರತ ತನ್ನ ತವರು ನೆಲದಲ್ಲಿ ತನ್ನ ಪ್ರಶಸ್ತಿ ಉಳಿಸಿಕೊಳ್ಳುವ ಗುರಿ ಹೊಂದಿದೆ. ಆದರೆ ಈ ಟೂರ್ನಿಗೆ ಶ್ರೀಲಂಕಾ ಸಹ-ಆತಿಥ್ಯ ವಹಿಸಲಿದೆ.

ಇದನ್ನೂ ಓದಿ: ಏಕದಿನ ಕ್ರಿಕೆಟ್ ರ್‍ಯಾಂಕಿಂಗ್​ನಲ್ಲಿ ರೋಹಿತ್​ ಶರ್ಮಾ ಮತ್ತೆ ಏರಿಕೆ, ಕುಸಿದ ವಿರಾಟ್ ಕೊಹ್ಲಿ; ಗಿಲ್ ಸ್ಥಾನ ಭದ್ರ

ಮುಂದಿನ 12 ತಿಂಗಳ ಭಾರತ ಕ್ರಿಕೆಟ್ ತಂಡದ ವೇಳಾಪಟ್ಟಿ

• ಭಾರತ vs ಇಂಗ್ಲೆಂಡ್ ನಡುವೆ 5 ಟೆಸ್ಟ್​ ಪಂದ್ಯಗಳ ಸರಣಿ (ಪಟೌಡಿ ಟ್ರೋಫಿ) - ಇಂಗ್ಲೆಂಡ್ ಆತಿಥ್ಯ - 2025ರ ಜೂನ್ 21 ರಿಂದ ಆಗಸ್ಟ್ 4ರ ತನಕ
• ಬಾಂಗ್ಲಾದೇಶ vs ಭಾರತ ನಡುವೆ 3 ಏಕದಿನ ಪಂದ್ಯಗಳು, 3 ಟಿ20 ಪಂದ್ಯಗಳು - ಬಾಂಗ್ಲಾದೇಶ ಆತಿಥ್ಯ - ಆಗಸ್ಟ್ 2025
• ಏಷ್ಯಾ ಕಪ್ 2025 (ಟಿ20 ಸ್ವರೂಪ) - ದಿನಾಂಕ ಘೋಷಣೆಯಾಗಿಲ್ಲ - ಸೆಪ್ಟೆಂಬರ್ 2025
• ವೆಸ್ಟ್ ಇಂಡೀಸ್ vs ಭಾರತ ನಡುವೆ 2 ಟೆಸ್ಟ್​ ಪಂದ್ಯಗಳು - ಭಾರತ ಆತಿಥ್ಯ - ಅಕ್ಟೋಬರ್ 2025
• ಭಾರತ vs ಆಸ್ಟ್ರೇಲಿಯಾ ನಡುವೆ 3 ಏಕದಿನ, 5 ಟಿ20ಐ ಪಂದ್ಯಗಳು - ಆಸ್ಟ್ರೇಲಿಯಾ ಆತಿಥ್ಯ - ಅಕ್ಟೋಬರ್/ನವೆಂಬರ್ 2025

ಇದನ್ನೂ ಓದಿ: ಐಸಿಸಿ ತಿಂಗಳ ಪ್ರಶಸ್ತಿ ಜಯಿಸಿ ಬಾಬರ್ ಅಜಮ್ ವಿಶ್ವದಾಖಲೆ ಸರಿಗಟ್ಟಿದ ಶುಭ್ಮನ್ ಗಿಲ್; ಅಪರೂಪದ ಸಾಧನೆಗೈದ ಮೊದಲ ಭಾರತೀಯ

• ದಕ್ಷಿಣ ಆಫ್ರಿಕಾ vs ಭಾರತ ನಡುವೆ 2 ಟೆಸ್ಟ್ ಪಂದ್ಯಗಳು, 3 ಏಕದಿನ ಪಂದ್ಯಗಳು, 5 ಟಿ20ಐಗಳು - ನವೆಂಬರ್/ಡಿಸೆಂಬರ್ 2025
• ಭಾರತ vs ನ್ಯೂಜಿಲೆಂಡ್ ನಡುವೆ 3 ಏಕದಿನ ಪಂದ್ಯಗಳು, 5 ಟಿ20 ಪಂದ್ಯಗಳು - ಜನವರಿ 2026
• ಟಿ20 ವಿಶ್ವಕಪ್ 2026 - ಭಾರತ/ಶ್ರೀಲಂಕಾ ಜಂಟಿ ಆತಿಥ್ಯ - ದಿನಾಂಕ ಘೋಷಣೆಯಾಗಿಲ್ಲ - ಫೆಬ್ರವರಿ/ಮಾರ್ಚ್ 2026

ಒಟ್ಟು 39 ಪಂದ್ಯಗಳು

ಮುಂದಿನ 12 ತಿಂಗಳಲ್ಲಿ ಭಾರತ 9 ಟೆಸ್ಟ್ ಪಂದ್ಯ, 12 ಏಕದಿನ ಪಂದ್ಯಗಳಲ್ಲಿ ಕಣಕ್ಕಿಳಿಯಲಿದೆ. ಸೂರ್ಯಕುಮಾರ್ ಯಾದವ್ ನೇತೃತ್ವದ ತಂಡವು ಏಷ್ಯಾಕಪ್ ಮತ್ತು ವಿಶ್ವಕಪ್ ಸೇರಿದಂತೆ 18 ಟಿ20 ಪಂದ್ಯಗಳಲ್ಲಿ ಸೆಣಸಾಟ ನಡೆಸಲಿದೆ.

ಇದನ್ನೂ ಓದಿ: ಅಮೀರ್ ಖಾನ್ ತಿರಸ್ಕರಿಸಿ ರಣಬೀರ್ ಜೊತೆ ಫೋಟೋ ಬೇಕೆಂದ ರಿಷಭ್ ಪಂತ್; ಕುಹಕ ನಗೆ ಬೀರಿದ ರೋಹಿತ್​ ಶರ್ಮಾ, ವಿಡಿಯೋ ವೈರಲ್