ಲಕ್ನೋ ಗೆಲುವಿನ ರಥ ನಿಲ್ಲಿಸುವುದೇ ಚೆನ್ನೈ, ಶಿಷ್ಯನ ಎದುರಾದರೂ ಗೆಲ್ಲುತ್ತಾರಾ ಗುರು; ಎಲ್​ಎಸ್​ಜಿ vs ಸಿಎಸ್​ಕೆ ಕದನದ ಅಂಶಗಳು!

ಲಕ್ನೋ: ಐಪಿಎಲ್ 2025ರ 30ನೇ ಪಂದ್ಯ ಇಂದು ಲಕ್ನೋದ ಭಾರತ ರತ್ನ ಶ್ರೀ ಅಟಲ್ ಬಿಹಾರಿ ವಾಜಪೇಯಿ ಏಕನಾ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆಯಲಿದೆ. ಲಕ್ನೋ ಸೂಪರ್ ಜೈಂಟ್ಸ್ ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ನಡುವೆ ಪಂದ್ಯ ಸಂಜೆ 7:30ಕ್ಕೆ ಶುರುವಾಗಲಿದೆ. ಲಕ್ನೋ ಗೆಲುವಿನ ರಥ ನಿಲ್ಲಿಸಲು ಚೆನ್ನೈ ಸಜ್ಜಾಗಿದೆ. ಪ್ರಸ್ತುತ ಎಲ್​ಎಸ್​ಜಿ ಪ್ರಸ್ತುತ 6 ಪಂದ್ಯಗಳಲ್ಲಿ 4 ಗೆಲುವುಗಳೊಂದಿಗೆ 4ನೇ ಸ್ಥಾನದಲ್ಲಿದೆ. ಆದರೆ ಧೋನಿ ಪಡೆ ಆಡಿರುವ 6ರಲ್ಲಿ 1 ಗೆಲುವು, ಸತತ ಐದು ಸೋಲುಗಳೊಂದಿಗೆ ಕೊನೆಯ ಸ್ಥಾನದಲ್ಲಿದೆ.

ಎಂಎಸ್ ಧೋನಿ ನಾಯಕತ್ವದಲ್ಲಿ ಚೆನ್ನೈ ಕಂಬ್ಯಾಕ್ ಮಾಡುವ ನಿರೀಕ್ಷೆಯಲ್ಲಿದೆ. ಆದರೆ ಕಳೆದ ಪಂದ್ಯದಲ್ಲಿ ತವರಿನಲ್ಲೇ ಕೆಕೆಆರ್​ ವಿರುದ್ಧ ಮಣಿದಿತ್ತು. ಧೋನಿ ನಾಯಕತ್ವದಲ್ಲಿ ಸಹ ಉತ್ಸಾಹ ಕುಂದಿರುವಂತೆ ಕಂಡು ಬಂದಿತ್ತು. ಮತ್ತೊಂದೆಡೆ ಲಕ್ನೋ ತಂಡವು ಹೊಸ ಪ್ರತಿಭೆಗಳಿಗೆ ಅವಕಾಶ ನೀಡುವ ಮೂಲಕ ಗಮನ ಸೆಳೆದಿದೆ. ಬೌಲರ್​ಗಳ ಮೇಲೆ ದಂಡಯಾತ್ರೆ ನಡೆಸುವ ಮೂಲಕ ಬೃಹತ್ ಸ್ಕೋರಿದ್ದರೂ ಗುರಿ ಮುಟ್ಟುವ ವಿಶ್ವಾಸ ನೀಡಿದ್ದಾರೆ. ಅದರಲ್ಲೂ ನಿಕೋಲಸ್ ಪೂರನ್ ಬ್ಯಾಟಿಂಗ್ ವೈಭವ ಅದ್ಭುತವಾಗಿದೆ.

ಎಲ್‌ಎಸ್‌ಜಿ ಮೊದಲ ಎಸೆತದಿಂದಲೇ ಗುರಿಯಿಟ್ಟು ಆಡಿದ್ದು, ಸತತ 3 ಪಂದ್ಯಗಳಲ್ಲಿ ಪವರ್‌ಪ್ಲೇನಲ್ಲಿ ವಿಕೆಟ್ ಕಳೆದುಕೊಳ್ಳದೆ ಮುಂದುವರಿದಿದೆ. ಆದರೆ ಸಿಎಸ್‌ಕೆ ತಂಡವು ಅಗ್ರಸ್ಥಾನದಲ್ಲಿ ಆವೇಗ ಮತ್ತು ಸ್ಥಿರತೆಗಾಗಿ ಹೋರಾಡುತ್ತಲೇ ಇದೆ. ಸಿಎಸ್​ಕೆ ಬ್ಯಾಟಿಂಗ್ ವಿಭಾಗದಲ್ಲಿ ಧಮ್ಮೇ ಇಲ್ಲದಂತೆ ಕಾಣುತ್ತಿದೆ. ಈವವರೆಗೂ ಆಡಿದ 6 ಪಂದ್ಯಗಳಲ್ಲಿ ಯಾವ ಬ್ಯಾಟ್ಸ್​​ಮನ್ ಕೂಡ 150 ರನ್​ಗಳ ಗಡಿ ದಾಟಿಲ್ಲ. ಈ ಹಿಂದೆ 2014ರಲ್ಲಿ ಕೆಕೆಆರ್ ಇಂತಹದೊಂದು ಸಾಧನೆ ಮಾಡಿತ್ತು.

ನಿಕೋಲಸ್ ಪೂರನ್ ಅವರು ಸಿಎಸ್​ಕೆ ತಂಡ ಗಳಿಸಿದ್ದಕ್ಕಿಂತ (32) ಹೆಚ್ಚು ಸಿಕ್ಸರ್‌ (31) ಬಾರಿಸಿದ್ದಾರೆ. 3ನೇ ಕ್ರಮಾಂಕದಲ್ಲಿ ಪೂರನ್ ವೇಗದ ಜೊತೆಗೆ ಏಡನ್ ಮಾರ್ಕ್ರಾಮ್ ಫಾರ್ಮ್‌ಗೆ ಮರಳಿರುವುದು, ಮಿಚೆಲ್ ಮಾರ್ಷ್ ಆಕ್ರಮಣಕಾರಿ ಬ್ಯಾಟಿಂಗ್ ಎಲ್​ಎಸ್​ಜಿಗೆ ದೊಡ್ಡ ಬಲವಾಗಿದೆ. ಲಕ್ನೋ ಪವರ್‌ಪ್ಲೇನಲ್ಲಿ 10.3 ರನ್​ರೇಟ್​ನಲ್ಲಿ ಸ್ಕೋರ್ ಮಾಡಿದರೆ, ಕಿಂಗ್ಸ್​ 7.5ರಂತೆ ಸ್ಕೋರ್ ಮಾಡಿದೆ. ಇದು ಋತುವಿನ ಅತ್ಯಂತ ಕಡಿಮೆ. ವಾಸ್ತವವಾಗಿ ಸಿಎಸ್​ಕೆಯ ಒಟ್ಟು ಸ್ಟ್ರೈಕ್ ರೇಟ್ 124.23 ಅತ್ಯಂತ ಕೆಟ್ಟದಾಗಿದೆ.

ಸೂಪರ್ ಜೈಂಟ್ಸ್ ಕೊನೆಯ ಐದರಲ್ಲಿ 4 ಗೆಲುವು, 1 ಸೋಲು ಕಂಡಿದೆ. ಆದರೆ ಚೆನ್ನೈ 5ಕ್ಕೆ ಐದೂ ಸೋತಿದೆ. ಮಿಚೆಲ್ ಮಾರ್ಷ್ ತನ್ನ ಮಗಳು ಅನಾರೋಗ್ಯದಿಂದ ಬಳಲುತ್ತಿದ್ದ ಕಾರಣ ಹಿಂದಿನ ಪಂದ್ಯವನ್ನು ತಪ್ಪಿಸಿಕೊಂಡಿದ್ದರು. ಈ ಪಂದ್ಯಕ್ಕೆ ಮರಳಬಹುದು. ಸಿಎಸ್​ಕೆ ಪರ ಮತೀಶಾ ಪತಿರಾಣ ಇಂಪ್ಯಾಕ್ಟ್ ಪ್ಲೇಯರ್ ಆಗಬಹುದು. ಪತಿರಾಣ ಐದು ಇನ್ನಿಂಗ್ಸ್‌ಗಳಲ್ಲಿ 4 ಬಾರಿ ಪೂರನ್ ಅವರನ್ನು ಔಟ್ ಮಾಡಿದ್ದಾರೆ, ಸರಾಸರಿ ಕೇವಲ 6.3.

ಲಕ್ನೋ ಸಂಭವನೀಯ XII: ಏಡನ್ ಮಾರ್ಕ್ರಾಮ್, 2 ಮಿಚೆಲ್ ಮಾರ್ಷ್/ಹಿಮ್ಮತ್ ಸಿಂಗ್, ನಿಕೋಲಸ್ ಪೂರನ್, ರಿಷಭ್ ಪಂತ್ (ನಾಯಕ, ವಿಕೆಟ್ ಕೀಪರ್), ಆಯುಷ್ ಬಡೋನಿ, ಡೇವಿಡ್ ಮಿಲ್ಲರ್, ಅಬ್ದುಲ್ ಸಮದ್, ಶಾರ್ದೂಲ್ ಠಾಕೂರ್, ಆಕಾಶ್ ದೀಪ್, ರವಿ ಬಿಷ್ಣೋಯ್, ದಿಗ್ವೇಶ್ ಸಿಂಗ್ ರಾಠಿ.

ಸಿಎಸ್​ಕೆ ಸಂಭವನೀಯ XII: ಡೆವೊನ್ ಕಾನ್ವೆ, ರಚಿನ್ ರವೀಂದ್ರ, ರಾಹುಲ್ ತ್ರಿಪಾಠಿ, ವಿಜಯ್ ಶಂಕರ್, ಶಿವಂ ದುಬೆ, ರವೀಂದ್ರ ಜಡೇಜಾ, ಎಂಎಸ್ ಧೋನಿ (ನಾಯಕ, ವಿಕೆಟ್ ಕೀಪರ್), ಆರ್​ ಅಶ್ವಿನ್, ಅನ್ಶುಲ್ ಕಾಂಬೋಜ್, ನೂರ್ ಅಹ್ಮದ್, ಖಲೀಲ್ ಅಹ್ಮದ್, ಮತೀಶಾ ಪತಿರಾಣ.

ಸುಮಾರು ಒಂದು ದಶಕದ ನಂತರ ಆರ್ ಅಶ್ವಿನ್ ಸಿಎಸ್‌ಕೆ ಜೊತೆ ಮತ್ತೆ ಒಂದಾದರೂ ನಿರೀಕ್ಷೆಗೆ ತಕ್ಕಂತೆ ಪ್ರದರ್ಶನ ಬರುತ್ತಿಲ್ಲ. 6 ಪಂದ್ಯಗಳಲ್ಲಿ 3ರಲ್ಲಿ ತಮ್ಮ ಪೂರ್ಣ ಕೋಟಾವನ್ನು ಬೌಲಿಂಗ್ ಮಾಡಿದ್ದಾರೆ. ಆದರೆ ಅವರು ಬಯಸಿದಷ್ಟು ವಿಕೆಟ್‌ (ಐದು) ಪಡೆದಿಲ್ಲ. ಪವರ್‌ಪ್ಲೇ ಮತ್ತು ಡೆತ್‌ನಲ್ಲಿ ಅವರು ದುಬಾರಿಯಾಗಿದ್ದಾರೆ (ಓವರ್‌ಗೆ 15 ರನ್ ಬಿಟ್ಟುಕೊಟ್ಟಿದ್ದಾರೆ). ಆದರೆ ಪೂರನ್ ವಿರುದ್ಧ ಉತ್ತಮ ದಾಖಲೆ ಹೊಂದಿದ್ದಾರೆ. 8 ಇನ್ನಿಂಗ್ಸ್‌ಗಳಲ್ಲಿ 3 ಬಾರಿ ಅವರನ್ನು ಔಟ್ ಮಾಡಿದ್ದಾರೆ. ನೂರ್ ಅಹ್ಮದ್ ಮಾತ್ರ ಸಿಎಸ್​ಕೆ ಪರ ಮಿಂಚುತ್ತಿದ್ದಾರೆ.

ಪಿಚ್ ವರದಿ

ಲಕ್ನೋದ ಎಕಾನಾ ಕ್ರೀಡಾಂಗಣದಲ್ಲಿ ಋತುವಿನ ನಾಲ್ಕನೇ ಪಂದ್ಯವಾಗಿದೆ. ಕೆಂಪು ಜೇಡಿಮಣ್ಣಿನ ಪಿಚ್​​ನಲ್ಲಿ ಪಂಜಾಬ್ ಕಿಂಗ್ಸ್​​ಗೆ ಆತಿಥ್ಯ ನೀಡಿದ್ದ ಎಲ್ಎಸ್​ಜಿ, ಮುಂಬೈ ಇಂಡಿಯನ್ಸ್ ಮತ್ತು ಗುಜರಾತ್ ಟೈಟಾನ್ಸ್ ವಿರುದ್ಧ ಕಪ್ಪು ಮಣ್ಣಿನಲ್ಲಿ ಆಡಿತ್ತು. ಇಂದಿನ ಲಕ್ನೋ, ಚೆನ್ನೈ ಪಂದ್ಯವು ಮಿಶ್ರ ಮಣ್ಣಿನ ಮೇಲ್ಮೈಯಾದ ಪಿಚ್ ಸಂಖ್ಯೆ -5 ರಲ್ಲಿ ನಡೆಯಲಿದೆ. ಇದು ಬ್ಯಾಟರ್ಸ್ ಮತ್ತು ಬೌಲರ್ ಇಬ್ಬರಿಗೂ ಸಮಾನವಾಗಿ ಸಹಾಯ ಮಾಡುತ್ತದೆ. ಹೀಗಾಗಿ ಹೈವೋಲ್ಟೇಜ್​ ಪಂದ್ಯ ನಿರೀಕ್ಷಿಸಬಹುದು. ಲಕ್ನೋದಲ್ಲಿ ಆಡಿದ ಮೂರು ಪಂದ್ಯಗಳಲ್ಲಿ ಚೇಸಿಂಗ್ ತಂಡ ಎರಡರಲ್ಲಿ ಗೆದ್ದಿದೆ.

ಲಕ್ನೋ vs ಸಿಎಸ್​ಕೆ ಮುಖಾಮುಖಿ ದಾಖಲೆ

ಲಕ್ನೋ ಸೂಪರ್ ಜೈಂಟ್ಸ್ ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ಐಪಿಎಲ್​ನಲ್ಲಿ ಒಟ್ಟು 5 ಬಾರಿ ಮುಖಾಮುಖಿಯಾಗಿದ್ದು, ಎಲ್​ಎಸ್​ಜಿ ಮೂರರಲ್ಲಿ ಗೆದ್ದು ಪ್ರಾಬಲ್ಯ ಸಾಧಿಸಿದೆ. ಆದರೆ ಸಿಎಸ್​ಕೆ 1ರಲ್ಲಿ ಮಾತ್ರ ಗೆದ್ದಿದೆ. ಆದರೆ ಒಂದು ಪಂದ್ಯ ರದ್ದಾಗಿದೆ.

ಎಕಾನಾ ಸ್ಟೇಡಿಯಂ ಐಪಿಎಲ್ ದಾಖಲೆಗಳು ಮತ್ತು ಅಂಕಿಅಂಶಗಳ

ಒಟ್ಟು ಪಂದ್ಯಗಳು - 17

ಮೊದಲು ಬ್ಯಾಟಿಂಗ್ ಮಾಡಿದ ತಂಡಗಳ ಗೆಲುವು - 8 (47.06%)

ಚೇಸಿಂಗ್ ಮಾಡುವಾಗ ಗೆದ್ದ ತಂಡಗಳ ಸಂಖ್ಯೆ - 8 (47.06%)

ಟಾಸ್ ಗೆಲ್ಲುವ ಮೂಲಕ ಗೆದ್ದ ಪಂದ್ಯಗಳು - 10 (58.82%)

ಟಾಸ್ ಸೋತು ಗೆದ್ದ ಪಂದ್ಯಗಳು - 6 (35.29%)

ಫಲಿತಾಂಶವಿಲ್ಲದ ಪಂದ್ಯ - 1 (5.88%)

ಗರಿಷ್ಠ ಸ್ಕೋರ್ - 235/6

ಕನಿಷ್ಠ ಸ್ಕೋರ್ - 108/10

ಚೇಸಿಂಗ್​​ನಲ್ಲಿ ಗರಿಷ್ಠ ಸ್ಕೋರ್ - 177/2

ಪ್ರತಿ ವಿಕೆಟ್​ಗೆ ಸರಾಸರಿ ರನ್ - 26.10

ಪ್ರತಿ ಓವರ್​ಗೆ ಸರಾಸರಿ ರನ್ - 8.43