ಕ್ರಿಸ್ ಗೇಲ್ ದಾಖಲೆ ಮುರಿದ ಸಾಯಿ ಸುದರ್ಶನ್; ಈ ಸಾಧನೆ ಮಾಡಿದ ಏಕೈಕ ಭಾರತೀಯ

ಗುಜರಾತ್ ಟೈಟಾನ್ಸ್ ಆರಂಭಿಕ ಆಟಗಾರ ಸಾಯಿ ಸುದರ್ಶನ್ 2025ರ ಐಪಿಎಲ್​ನಲ್ಲಿ ಅದ್ಭುತ ಲಯ ಮುಂದುವರೆಸಿದ್ದಾರೆ. ಪ್ರಸಕ್ತ ಟೂರ್ನಿಯಲ್ಲಿ ಮತ್ತೊಂದು ಶ್ರೇಷ್ಠ ಇನ್ನಿಂಗ್ಸ್ ಆಡಿದ್ದಾರೆ. ಏಪ್ರಿಲ್ 9ರ ಬುಧವಾರ ರಾಜಸ್ಥಾನ್ ರಾಯಲ್ಸ್ ವಿರುದ್ಧ ನಡೆದ ಪಂದ್ಯದಲ್ಲಿ ಸುದರ್ಶನ್ 53 ಎಸೆತಗಳಲ್ಲಿ 82 ರನ್ ಗಳಿಸಿದರು. ಅಹ್ಮದಾಬಾದ್​​ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ಜರುಗಿದ ಈ ಪಂದ್ಯದಲ್ಲಿ ಅವರ ಇನ್ನಿಂಗ್ಸ್​​ನಲ್ಲಿ 8 ಬೌಂಡರಿ, 3 ಸಿಕ್ಸರ್​ಗಳಿದ್ದವು.​ ಇದು ಸುದರ್ಶನ್ ಅವರ ಐಪಿಎಲ್ ವೃತ್ತಿಜೀವನದ 30ನೇ ಪಂದ್ಯ. ಚೆನ್ನೈ ಕ್ರಿಕೆಟಿಗ 'ಸೂಪರ್ 30' ಕ್ಲಬ್​ಗೆ ಪ್ರವೇಶಿಸುವ ಮೂಲಕ ಕ್ರಿಸ್ ಗೇಲ್ ದಾಖಲೆ ಮುರಿದಿದ್ದಾರೆ.

ಐಪಿಎಲ್​ನ 30 ಇನ್ನಿಂಗ್ಸ್​​ಗಳಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರರ ಪಟ್ಟಿಯಲ್ಲಿ ಸುದರ್ಶನ್ 2ನೇ ಸ್ಥಾನದಲ್ಲಿದ್ದಾರೆ. ಸದ್ಯ ಅವರ ಖಾತೆಯಲ್ಲಿ 1307 ರನ್ ಇದೆ. 30 ಐಪಿಎಲ್ ಇನ್ನಿಂಗ್ಸ್​​ಗಳಲ್ಲಿ 1141 ರನ್ ಗಳಿಸಿದ್ದ ಗೇಲ್ ಅವರನ್ನು ಮೂರನೇ ಸ್ಥಾನಕ್ಕೆ ತಳ್ಳಿದ್ದಾರೆ. ಇಷ್ಟು ಇನ್ನಿಂಗ್ಸ್​​ಗಳಲ್ಲಿ 1,000 ಕ್ಕೂ ಹೆಚ್ಚು ರನ್ ಗಳಿಸಿದ ಏಕೈಕ ಭಾರತೀಯ ಎಂಬ ಹೆಗ್ಗಳಿಕೆಗೂ ಸುದರ್ಶನ್ ಪಾತ್ರರಾಗಿದ್ದಾರೆ. ಒಟ್ಟಾರೆ ಪಟ್ಟಿಯಲ್ಲಿ ಆಸ್ಟ್ರೇಲಿಯಾದ ಶಾನ್ ಮಾರ್ಷ್ ಮಾತ್ರ ಸುದರ್ಶನ್​ಗಿಂತ ಮುಂದಿದ್ದಾರೆ. ಮಾರ್ಷ್ 30 ಇನ್ನಿಂಗ್ಸ್​​ಗಳಲ್ಲಿ 1338 ರನ್ ಗಳಿಸಿದ್ದರು.

ಐಪಿಎಲ್‌ನಲ್ಲಿ 30 ಇನ್ನಿಂಗ್ಸ್‌ಗಳ ನಂತರ ಅತಿ ಹೆಚ್ಚು ರನ್‌ ಸಿಡಿಸಿದವರು

1338 - ಶಾನ್ ಮಾರ್ಷ್

1307 - ಸಾಯಿ ಸುದರ್ಶನ್

1141 - ಕ್ರಿಸ್ ಗೇಲ್

1096 - ಕೇನ್ ವಿಲಿಯಮ್ಸನ್

1082 - ಮ್ಯಾಥ್ಯೂ ಹೇಡನ್

1064 - ಮೈಕೆಲ್ ಹಸ್ಸಿ

1058 - ಜಾನಿ ಬೈರ್‌ಸ್ಟೋ

977 - ರಿತುರಾಜ್ ಗೈಕ್‌ವಾಡ್

975 - ಸಚಿನ್ ತೆಂಡೂಲ್ಕರ್

ಇದನ್ನೂ ಓದಿ: ಸಾಯಿ ಸುದರ್ಶನ್ ಮತ್ತೆ ಮಿಂಚು; ರಾಜಸ್ಥಾನ್ ವಿರುದ್ಧ 58 ರನ್ನಿಂದ ಗೆದ್ದು ಅಗ್ರಸ್ಥಾನಕ್ಕೇರಿದ ಗುಜರಾತ್

ಗುಜರಾತ್​ಗೆ ಗೆಲುವು

ಇನ್ನು ಪಂದ್ಯದ ಚಿತ್ರಣ ನೋಡುವುದಾದರೆ, ಮೊದಲು ಬ್ಯಾಟಿಂಗ್ ನಡೆಸಿದ ಗುಜರಾತ್, ಸುದರ್ಶನ್ ಅವರ ಅರ್ಧಶತಕದ ನೆರವಿನಿಂದ 6 ವಿಕೆಟ್ ನಷ್ಟಕ್ಕೆ 217 ರನ್ ಗಳಿಸಿತು. ಜೋಸ್ ಬಟ್ಲರ್ (36) ಅವರೊಂದಿಗೆ ಎರಡನೇ ವಿಕೆಟ್​​ಗೆ 80 ರನ್ ಮತ್ತು ಶಾರುಖ್ ಖಾನ್ (36) ಅವರೊಂದಿಗೆ 3ನೇ ವಿಕೆಟ್​ಗೆ 62 ರನ್​ ಜೊತೆಯಾಟ ಸೇರಿಸಿದರು. ಸುದರ್ಶನ್ 10ನೇ ಓವರ್​ನಲ್ಲಿ 32 ಎಸೆತಗಳಲ್ಲಿ ತಮ್ಮ 9ನೇ ಐಪಿಎಲ್ ಅರ್ಧಶತಕ ಪೂರೈಸಿದರು. ಇದು ಪ್ರಸಕ್ತ ಋತುವಿನಲ್ಲಿ ಅವರ 3ನೇ ಅರ್ಧಶತಕದ ಇನ್ನಿಂಗ್ಸ್ ಆಗಿದೆ. ಐದು ಪಂದ್ಯಗಳಲ್ಲಿ 54.60ರ ಸರಾಸರಿಯಲ್ಲಿ 273 ರನ್ ಗಳಿಸಿದ್ದಾರೆ.

19ನೇ ಓವರ್​ನಲ್ಲಿ ಸುದರ್ಶನ್ ತುಷಾರ್ ದೇಶಪಾಂಡೆಗೆ ಬಲಿಯಾದರು. ವಿಕೆಟ್ ಕೀಪರ್ ಸಂಜು ಸ್ಯಾಮ್ಸನ್​ಗೆ ಕ್ಯಾಚ್ ನೀಡಿದರು. ಸಾಯಿ ಸುದರ್ಶನ್​ (82) ಅವರ ಸೊಗಸಾದ ಆಟದ ಬಲದಿಂದ ರಾಜಸ್ಥಾನ್ ರಾಯಲ್ಸ್ ವಿರುದ್ಧ ಗುಜರಾತ್ ಟೈಟಾನ್ಸ್ 58 ರನ್​ಗಳಿಂದ ಭರ್ಜರಿ ಗೆಲುವು ದಾಖಲಿಸಿದೆ. ಇದು ಜಿಟಿ ತಂಡದ ಸತತ ನಾಲ್ಕನೇ ಗೆಲುವು. ಆದರೆ ಹ್ಯಾಟ್ರಿಕ್ ಗೆಲುವಿನ ಕನಸಿನಲ್ಲಿದ್ದ ಆರ್​ಆರ್​ಗೆ ನಿರಾಸೆಯಾಗಿದೆ. ಈ ಜಯದೊಂದಿಗೆ ಶುಭ್ಮನ್ ಗಿಲ್ ನಾಯಕತ್ವದ ಗುಜರಾತ್ 8 ಅಂಕ ಸಂಪಾದಿಸಿ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿದೆ.

ಇದನ್ನೂ ಓದಿ: ತವರಿನಲ್ಲಿ ಆರ್​ಸಿಬಿಗೆ ಸೋಲೇ ಕಾಣದ ಡೆಲ್ಲಿ ಕ್ಯಾಪಿಟಲ್ಸ್ ಸವಾಲು; ಇಂದಿನ ಹೈವೋಲ್ಟೇಜ್ ಕದನದ ಪ್ರಮುಖ ಅಂಶಗಳು