‘ಸನ್’​ ಆಗದ ರೈಸ್, ಎಸ್​ಆರ್​ಹೆಚ್ ಪ್ಲೇಆಫ್ ಹಾದಿ ಬಹುತೇಕ ಅಂತ್ಯ; 38 ರನ್ನಿಂದ ಗೆದ್ದ ಗುಜರಾತ್ 2ನೇ ಸ್ಥಾನಕ್ಕೆ ಲಗ್ಗೆ

ಶುಭ್ಮನ್ ಗಿಲ್ ಮತ್ತು ಜೋಸ್ ಬಟ್ಲರ್ ಅವರ ಸ್ಫೋಟಕ ಬ್ಯಾಟಿಂಗ್ ಮತ್ತು ಪ್ರಸಿದ್ಧ್ ಕೃಷ್ಣ ಅವರ ಅದ್ಭುತ ಬೌಲಿಂಗ್ ಬಲದಿಂದ ಸನ್​ರೈಸರ್ಸ್ ಹೈದರಾಬಾದ್ ವಿರುದ್ಧ ಗುಜರಾತ್ ಟೈಟಾನ್ಸ್​​ 38 ರನ್​ಗಳ ಭರ್ಜರಿ ಗೆಲುವು ಸಾಧಿಸಿದೆ. ಈ ಜಯದೊಂದಿಗೆ ಜಿಟಿ ಪ್ಲೇಆಫ್ ಸನಿಹಕ್ಕೆ ಬಂದಿದ್ದು, 10 ಪಂದ್ಯಗಳಲ್ಲಿ 7 ಗೆಲುವು, 3 ಸೋಲಿನೊಂದಿಗೆ 14 ಅಂಕ ಪಡೆದು ಎರಡನೇ ಸ್ಥಾನಕ್ಕೆ ಲಗ್ಗೆ ಹಾಕಿದೆ. ಎಸ್​ಆರ್​​ಹೆಚ್ ಕೂಡ ಅಷ್ಟೇ ಪಂದ್ಯಗಳಲ್ಲಿ ಕಣಕ್ಕಿಳಿದಿದ್ದು, 7 ಸೋಲು, 3 ಗೆಲುವಿನೊಂದಿಗೆ 6 ಅಂಕ ಪಡೆದಿದೆ. ಸದ್ಯ ಪ್ಲೇಆಫ್ ಪ್ರವೇಶಿಸಲು ಸಾಸಿವೆ ಕಾಳಿನಷ್ಟು ಅವಕಾಶ ಇದ್ದರೂ ತಂಡದ​ ಕನಸು ಬಹುತೇಕ ಅಂತ್ಯಗೊಂಡಿದೆ ಎಂದರೂ ತಪ್ಪಾಗಲ್ಲ. ಕಳೆದ ವರ್ಷದ ರನ್ನರ್​ಅಪ್ ತಂಡ ಇಷ್ಟು ಹೀನಾಯ ಪ್ರದರ್ಶನ ನೀಡುತ್ತದೆ ಎಂದು ಯಾರೂ ಊಹಿಸಿರಲಿಲ್ಲ.

ಅಹ್ಮದಾಬಾದ್​ನ ನರೇಂದ್ರ ಮೋದಿ ಕ್ರಿಕೆಟ್ ಮೈದಾನದಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಗುಜರಾತ್ ತಂಡವು ಅತ್ಯುತ್ತಮ ಪ್ರದರ್ಶನ ನೀಡಿತು. ಮೊದಲ ವಿಕೆಟ್​ಗೆ 41 ಎಸೆತಗಳಲ್ಲಿ 87 ರನ್ ಹರಿದು ಬಂತು. ಶುಭ್ಮನ್ ಗಿಲ್ (76) ಮತ್ತು ಜೋಸ್ ಬಟ್ಲರ್ (64)​ ಆಕ್ರಮಣಕಾರಿ ಅರ್ಧಶತಕಗಳು ಸಿಡಿಸಿದ ಪರಿಣಾಮ ತಂಡದ ಮೊತ್ತವು 200ರ ಗಡಿ ದಾಟಲು ಸಾಧ್ಯವಾಯಿತು. ನಿಗದಿತ 20 ಓವರ್​ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 224 ರನ್ ಪೇರಿಸಿತು. ಈ ಗುರಿ ಬೆನ್ನಟ್ಟಿದ ಎಸ್​ಆರ್​​ಹೆಚ್​ ಆರಂಭದಲ್ಲಿ ಗೆಲ್ಲುವ ಭರವಸೆ ಮೂಡಿಸಿತ್ತು. ಆದರೆ ಜಿಟಿ ಬೌಲರ್​ಗಳ ಮಾರಕ ದಾಳಿಯನ್ನು ಎದುರಿಸುವಲ್ಲಿ ವಿಫಲವಾಯಿತು. ಪರಿಣಾಮ ನಿಗದಿತ 20 ಓವರ್​​ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 186 ರನ್ ಗಳಿಸಿತು. ಅಭಿಷೇಕ್ ಶರ್ಮಾ (74) ಏಕಾಂಗಿ ಹೋರಾಟ ನಡೆಸಿದರಾದರೂ ಗೆಲುವು ದಕ್ಕಲಿಲ್ಲ.

ಇದನ್ನೂ ಓದಿ: ಕಣ್ಣಿನ ಮೇಲೆ 7 ಹೊಲಿಗೆ ಬಿದ್ದರೂ ಮೈದಾನಕ್ಕೆ ಇಳಿದು ಧೂಳೆಬ್ಬಿಸಿದ ಹಾರ್ದಿಕ್ ಪಾಂಡ್ಯ; ಕ್ರಿಕೆಟ್ ಜಗತ್ತೇ ಸಲಾಂ!

ಜಿಟಿ, ಎಸ್​​ಆರ್​​ಹೆಚ್ ಪ್ಲೇಆಫ್ ಲೆಕ್ಕಾಚಾರ ಹೇಗಿದೆ?

18ನೇ ಆವೃತ್ತಿಯ ಐಪಿಎಲ್​ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ರಾಜಸ್ಥಾನ್ ರಾಯಲ್ಸ್ ತಂಡಗಳು ಪ್ಲೇಆಫ್​​ ರೇಸ್​​ನಿಂದ ಅಧಿಕೃತವಾಗಿ ಹೊರಬಿದ್ದಿದೆ. ಆದರೆ ಈ ಸರದಿಗೆ ಸನ್​ರೈಸರ್ಸ್​ ಹೈದರಾಬಾದ್ ಕೂಡ ಸೇರಿದೆ. ಆದರೆ ಅಧಿಕೃತವಾಗಿ ಇನ್ನೂ ಹೊರಬಿದ್ದಿಲ್ಲ. ಏಕೆಂದರೆ ಪ್ರಸ್ತುತ 6 ಅಂಕ ಪಡೆದಿದ್ದು, ಉಳಿದ 4 ಪಂದ್ಯಗಳನ್ನೂ ಗೆದ್ದರೆ 14 ಅಂಕಗಳೊಂದಿಗೆ ಅಗ್ರ-4ರೊಳಗೆ ಪ್ರವೇಶಿಸುವ ಸಾಧ್ಯತೆ ಇದೆ. ಇದು ಅಸಾಧ್ಯವಾದರೂ ಗಣಿತ-ಅಂಶಗಳ ಪ್ರಕಾರ ಸಾಧ್ಯ. ಏಕೆಂದರೆ ಪ್ಲೇಆಫ್​ಗೆ ಇನ್ನು ಯಾವ ತಂಡವೂ ಅಧಿಕೃತವಾಗಿ ಪ್ರವೇಶಿಸದ ಹಿನ್ನೆಲೆ ಎಸ್​ಆರ್​ಹೆಚ್​ಗೆ ಅದೃಷ್ಟ ಒಲಿಯುತ್ತದೆಯೇ ಎನ್ನುವ ಕಾತರತೆ ಇನ್ನೂ ಹಾಗೆಯೇ ಉಳಿದಿದೆ. ಮತ್ತೊಂದೆಡೆ 14 ಅಂಕ ಸಂಪಾದಿಸಿರುವ ಗಿಲ್ ಪಡೆ, ಇನ್ನೊಂದು ಪಂದ್ಯ ಗೆದ್ದರೂ ಅಧಿಕೃತವಾಗಿ ಪ್ಲೇಆಫ್​ಗೆ ಲಗ್ಗೆ ಹಾಕಲಿದೆ. ಜೊತೆಗೆ ಆರ್​ಸಿಬಿ, ಮುಂಬೈ ಸಹ ಇಷ್ಟೇ ಅಂಕ ಪಡೆದಿದ್ದು, ಅವುಗಳಿಗೂ ಒಂದು ಗೆಲುವು ಸಾಕಿದೆ.

ಇದನ್ನೂ ಓದಿ: ಶಿಖರ್​ ಧವನ್ ಹೊಸ ಗೆಳತಿ ಸೋಫಿ ಶೈನ್ ಯಾರು; ಐರಿಷ್ ಲೇಡಿಯೊಂದಿಗೆ ಗಬ್ಬರ್ ಲವ್ವಲ್ಲಿ ಬಿದ್ದಿದ್ಹೇಗೆ?

ಎಸ್​ಆರ್​​ಹೆಚ್​ ವಿರುದ್ಧ ಜಿಟಿ ಸತತ 5ನೇ ಗೆಲುವು

ಈ ಗೆಲುವಿನೊಂದಿಗೆ ಸನ್​​ರೈಸರ್ಸ್​ ಹೈದರಾಬಾದ್ ವಿರುದ್ಧ ಜಿಟಿ ಸವಾರಿ ಮಾಡಿದೆ. ಉಭಯ ತಂಡಗಳು ಒಟ್ಟು 6 ಬಾರಿ ಮುಖಾಮುಖಿಯಾಗಿವೆ. ಈ ಪೈಕಿ ಸತತ ಐದು ಪಂದ್ಯಗಳಲ್ಲಿ ಜಿಟಿ ತಂಡವೇ ಗೆಲ್ಲುತ್ತಾ ಬಂದಿದೆ. ಇನ್ನು ಈ ಪಂದ್ಯದಲ್ಲಿ ಎರಡು ವಿಕೆಟ್ ಉರುಳಿಸಿದ ಪ್ರಸಿದ್ಧ್ ಕೃಷ್ಣ ಮತ್ತೆ ಪರ್ಪಲ್ ಕ್ಯಾಪ್ ಗೆದ್ದುಕೊಂಡರು. ಈಗವರ ಖಾತೆಯಲ್ಲಿ 19 ವಿಕೆಟ್​ಗಳಿವೆ. ಅದರಂತೆ ಸಾಯಿ ಸುದರ್ಶನ್​ 504 ರನ್​​ಗಳೊಂದಿಗೆ ಮತ್ತೆ ಆರೆಂಜ್ ಕ್ಯಾಪ್ ಪಡೆದಿದ್ದಾರೆ. ಈ ಪಂದ್ಯಕ್ಕೂ ಮುನ್ನ ಸೂರ್ಯಕುಮಾರ್ ಯಾದವ್ ಅವರ ಬಳಿ ಇತ್ತು. ಅಲ್ಲದೆ, ಅತಿ ಹೆಚ್ಚು ರನ್ ಗಳಿಸಿದವರ ಪಟ್ಟಿಯಲ್ಲಿ ಅಗ್ರ ಮೂರು ಸ್ಥಾನಗಳಲ್ಲಿ ಗುಜರಾತ್ ತಂಡದ ಆಟಗಾರರೇ ಇರುವುದು ವಿಶೇಷ.

ಇದನ್ನೂ ಓದಿ: ಆರ್‌ಸಿಬಿ ಸ್ಟಾರ್‌ ಪ್ಲೇಯರ್‌ ವಿರಾಟ್‌ ಕೊಹ್ಲಿ ಸಮಯ ಸಿಕ್ಕಾಗಲೆಲ್ಲ ಹೆಚ್ಚು ಕೇಳುವ ಇಷ್ಟದ ಹಾಡು ಇದೇ ನೋಡಿ