ಐಪಿಎಲ್‌ನಲ್ಲಿ ವರ್ಣಭೇದ ವಿವಾದ; ಜೋಫ್ರಾ ಆರ್ಚರ್‌ರನ್ನು ಕಪ್ಪು ಟ್ಯಾಕ್ಸಿಗೆ ಹೋಲಿಸಿದ ಹರ್ಭಜನ್ ಸಿಂಗ್ ಬ್ಯಾನ್‌ಗೆ ಆಗ್ರಹ

ವರ್ಣಭೇದ, ಜನಾಂಗೀಯ ನಿಂದನೆ ಕ್ರೀಡೆಯನ್ನೂ ಬಿಟ್ಟಿಲ್ಲ ಎಂಬುದು ಹಲವು ವರ್ಷಗಳಿಂದ ಮತ್ತೆ ಮತ್ತೆ ಸಾಬೀತಾಗುತ್ತಿದೆ. ಇದೀಗ ಈ ಪಟ್ಟಿಗೆ ಭಾರತ ಕ್ರಿಕೆಟ್‌ ತಂಡದ ಮಾಜಿ ಸ್ಪಿನ್ನರ್‌ ಹರ್ಭಜನ್‌ ಸಿಂಗ್‌ ಸೇರ್ಪಡೆಯಾಗಿ ಹೊಸ ವಿವಾದಕ್ಕೆ ಕಾರಣರಾಗಿದ್ದಾರೆ. ಐಪಿಎಲ್‌ 2025ರಲ್ಲಿ ರಾಜಸ್ಥಾನ್‌ ರಾಯಲ್ಸ್ ಪರ ಆಡುತ್ತಿರುವ ಇಂಗ್ಲೆಂಡ್‌ ಕ್ರಿಕೆಟಿಗ ಜೋಫ್ರಾ ಆರ್ಚರ್‌ ಅವರನ್ನು ಲಂಡನ್‌ನ 'ಕಪ್ಪು ಟ್ಯಾಕ್ಸಿ'ಗೆ ಹೋಲಿಸುವ ಮೂಲಕ ಹರ್ಭಜನ್‌ ಟೀಕೆ ಹಾಗೂ ಭಾರಿ ವಿರೋಧದ ಕೇಂದ್ರಬಿಂದುವಾಗಿದ್ದಾರೆ.

ಭಾನುವಾರ (ಮಾ.23) ಹೈದರಾಬಾದ್‌ನ ರಾಜೀವ್‌ ಗಾಂಧಿ ಸ್ಟೇಡಿಯಂನಲ್ಲಿ ಸನ್‌ರೈಸರ್ಸ್ ಹೈದರಾಬಾದ್ ಹಾಗೂ ರಾಜಸ್ಥಾನ್‌ ರಾಯಲ್ಸ್‌ (SRH vs RR) ತಂಡಗಳ ನಡುವೆ ಪಂದ್ಯ ನಡೆಯಿತು. ಈ ವೇಳೆ ಹಿಂದಿ ಕಾಮೆಂಟರಿ ಪ್ಯಾನೆಲ್‌ನ ಭಾಗವಾಗಿದ್ದ ಹರ್ಭಜನ್‌, ವಿವಾದಾತ್ಮಕ ಪದ ಬಳಕೆ ಮಾಡಿ ವರ್ಣಭೇದ ಮಾಡಿದ್ದಾರೆ ಎಂದು ಸೋಷಿಯಲ್‌ ಮೀಡಿಯಾದಲ್ಲಿ ಭಾರಿ ಆಕ್ರೋಶ ವ್ಯಕ್ತವಾಗುತ್ತಿದೆ.

ಪಂದ್ಯದಲ್ಲಿ ಎಸ್‌ಆರ್‌ಎಚ್‌ ತಂಡ ಮೊದಲು ಬ್ಯಾಟಿಂಗ್‌ ಮಾಡಿತು. ಈ ಇನ್ನಿಂಗ್ಸ್‌ನ 18ನೇ ಓವರ್‌ ವೇಳೆ ಈ ಸನ್ನಿವೇಶ ನಡೆದಿದೆ. ಇಶಾನ್ ಕಿಶನ್ ಮತ್ತು ಹೆನ್ರಿಚ್ ಕ್ಲಾಸೆನ್ ಬ್ಯಾಟಿಂಗ್‌ ಮಾಡುತ್ತಿದ್ದಾಗ ಆರ್ಚರ್ ಬೌಲಿಂಗ್ ಮಾಡುತ್ತಿದ್ದರು. ಆರ್ಚರ್ ಓವರ್‌ನ ಎರಡನೇ ಮತ್ತು ಮೂರನೇ ಎಸೆತದಲ್ಲಿ ಸತತ ಬೌಂಡರಿಗಳನ್ನು ಬಾರಿಸಿದ ಸಮಯದಲ್ಲಿ ಹರ್ಭಜನ್ ಅವರ ವಿವಾದಾತ್ಮಕ ಹೇಳಿಕೆ ಬಂದಿದೆ.

ಹಿಂದಿಯಲ್ಲಿ ಕಾಲಿ ಟ್ಯಾಕ್ಸಿ ಎಂದ ಹರ್ಭಜನ್

“ಲಂಡನ್ ಮೇ ಕಾಲಿ ಟ್ಯಾಕ್ಸಿ ಕಾ ಮೀಟರ್ ತೇಜ್ ಭಾಗ್ತಾ ಹೈ, ಔರ್ ಯಾಹಾ ಪೆ ಆರ್ಚರ್ ಸಾಹೇಬ್ ಕಾ ಮೀಟರ್ ಭಿ ತೇಜ್ ಭಾಗಾ ಹೈ” ಎಂದು ಹಿಂದಿಯಲ್ಲಿ ಹರ್ಭಜನ್ ಹೇಳಿದ್ದಾರೆ.

"ಲಂಡನ್‌ನಲ್ಲಿ ಕಪ್ಪು ಟ್ಯಾಕ್ಸಿಗಳ ಮೀಟರ್‌ನಂತೆ, ಐಪಿಎಲ್‌ನಲ್ಲಿ ಆರ್ಚರ್‌ ಅವರ ಮೀಟರ್‌ ಕೂಡಾ ಬೇಗನೆ ಓಡುತ್ತಿದೆ" ಎಂದು ಹರ್ಭಜನ್‌ ಹೇಳಿದ್ದಾರೆ. ಆರ್ಚರ್‌ ಹೆಚ್ಚು ರನ್‌ ಸೋರಿಕೆ ಮಾಡುವುದಕ್ಕೆ ಈ ರೀತಿ ಹರ್ಭಜನ್‌ ಹೇಳಿದ್ದಾರೆ. ಇಲ್ಲಿ ಆರ್ಚರ್‌ ಅವರನ್ನು ಕಪ್ಪು ಟ್ಯಾಕ್ಸಿಗೆ ಹೋಲಿಸಿದ್ದು ಈಗ ವಿವಾದದ ಕೇಂದ್ರಬಿಂದು. ಈ ಹೇಳಿಕೆ ಹೊರಬರುತ್ತಿದ್ದಂತೆಯೇ ಸಾಮಾಜಿಕ ಮಾಧ್ಯಮದಲ್ಲಿ ವ್ಯಾಪಕ ಆಕ್ರೋಶ ವ್ಯಕ್ತವಾಗುತ್ತಿದೆ. ಐಪಿಎಲ್ 2025ರ ಕಾಮೆಂಟರಿ ಪ್ಯಾನೆಲ್‌ನಿಂದ ಹರ್ಭಜನ್‌ ಅವರನ್ನು ತಕ್ಷಣ ವಜಾ ಮಾಡಬೇಕೆಂದು ಹಲವರು ಒತ್ತಾಯಿಸಿದ್ದಾರೆ.

ಹೈದರಾಬಾದ್ ವಿರುದ್ಧದ ಪಂದ್ಯದಲ್ಲಿ ಜೋಫ್ರಾ ಆರ್ಚರ್‌ ಬಲು ದುಬಾರಿ ಎನಿಸಿಕೊಂಡರು. ಒಂದೂ ವಿಕೆಟ್ ಪಡೆಯದೆ 76 ರನ್ ಬಿಟ್ಟುಕೊಡುವ ಮೂಲಕ, ಬಲಗೈ ವೇಗಿ ಐಪಿಎಲ್‌ ಇತಿಹಾಸದಲ್ಲೇ ಅತ್ಯಂತ ದುಬಾರಿ ಬೌಲರ್‌ ಎನಿಸಿಕೊಂಡರು. ಪಂದ್ಯದಲ್ಲಿ ಹೈದರಾಬಾದ್‌ ತಂಡ 44 ರನ್‌ಗಳ ಅಂತರದಿಂದ ಭರ್ಜರಿ ಜಯ ಸಾಧಿಸಿತು.

ಇದನ್ನೂ ಓದಿ | ಧೋನಿ ಚಾಣಾಕ್ಷ ಸ್ಟಂಪಿಂಗ್‌ಗೆ ದಂಗಾದ ಸೂರ್ಯಕುಮಾರ್; ಅಂಪೈರ್ ಔಟ್ ಘೋಷಿಸುವ ಮುನ್ನವೇ ಕ್ರೀಸ್‌ನಿಂದ ಹೊರನಡೆದ ಮುಂಬೈ ನಾಯಕ