ಭಾರತೀಯ ಕ್ರಿಕೆಟ್ ಇತಿಹಾಸದಲ್ಲಿ ಇದೇ ಮೊದಲು; ಕೆಟ್ಟ ದಾಖಲೆ ಜೊತೆಗೆ ಹೊಸ ಇತಿಹಾಸವನ್ನೂ ನಿರ್ಮಿಸಿದ ಹರ್ಷಿತ್ ರಾಣಾ!

ಇಂಗ್ಲೆಂಡ್ ವಿರುದ್ಧ ಕಣಕ್ಕಿಳಿದ ತನ್ನ ಚೊಚ್ಚಲ ಏಕದಿನ ಪಂದ್ಯದಲ್ಲಿ ಒಂದೇ ಓವರ್​ನಲ್ಲಿ 26 ರನ್ ಬಿಟ್ಟು ಕೊಟ್ಟು ಅನಗತ್ಯ ದಾಖಲೆ ಬರೆದಿರುವ ವೇಗಿ ಹರ್ಷಿತ್​ ರಾಣಾ, ಇದೀಗ ಮೂರು ವಿಕೆಟ್ ಉರುಳಿಸಿ ಭಾರತೀಯ ಕ್ರಿಕೆಟ್​ನಲ್ಲಿ ಯಾರೂ ಮಾಡಲು ಸಾಧ್ಯವಾಗದ ದಾಖಲೆಯೊಂದನ್ನು ತನ್ನ ಹೆಸರಿಗೆ ಬರೆದುಕೊಂಡಿದ್ದಾರೆ. ನಾಗ್ಪುರದ ವಿದರ್ಭ ಕ್ರಿಕೆಟ್ ಅಸೋಸಿಯೇಷನ್ ಮೈದಾನದಲ್ಲಿ ನಡೆದ ಮೊದಲ ಏಕದಿನ ಪಂದ್ಯದಲ್ಲಿ 7 ಓವರ್​ಗಳಲ್ಲಿ 53 ರನ್ ನೀಡಿ 3 ವಿಕೆಟ್ ಉರುಳಿಸಿದ ರಾಣಾ ಭಾರತೀಯ ಕ್ರಿಕೆಟ್ ಪರ ಹ್ಯಾಟ್ರಿಕ್ ಪೂರೈಸಿದ್ದಾರೆ. ಆದರೆ ಇದು ಹ್ಯಾಟ್ರಿಕ್ ವಿಕೆಟ್ ಅಲ್ಲ!

ಫೆಬ್ರವರಿ 6ರಂದು ಇಂಗ್ಲೆಂಡ್ ವಿರುದ್ಧ ಏಕದಿನ ಕ್ರಿಕೆಟ್​ಗೆ ಪದಾರ್ಪಣೆ ಮಾಡುವ ಮೂಲಕ ಕೇವಲ 2 ತಿಂಗಳು 15 ದಿನಗಳು ಅಂದರೆ ಒಟ್ಟಾರೆ 76 ದಿನಗಳಲ್ಲಿ ಕ್ರಿಕೆಟ್​ನ ಮೂರು ಸ್ವರೂಪಗಳ ಅಂತಾರಾಷ್ಟ್ರೀಯ ಕ್ರಿಕೆಟ್​​​ಗೆ ಪದಾರ್ಪಣೆ ಮಾಡಿರುವ ಹರ್ಷಿತ್ ರಾಣಾ, ತಾನು ಡೆಬ್ಯೂ ಮಾಡಿದ ಮೂರೂ ಮಾದರಿಗಳ ಮೊದಲ ಪಂದ್ಯದಲ್ಲಿ ಮೂರು ಮೂರು ವಿಕೆಟ್ ಪಡೆಯುವ ವಿಶೇಷ ದಾಖಲೆ ನಿರ್ಮಿಸಿದ್ದಾರೆ. ಭಾರತೀಯ ಕ್ರಿಕೆಟ್​ನ ಇತಿಹಾಸದಲ್ಲಿ ಇಂತಹದ್ದೊಂದು ಸಾಧನೆಯನ್ನು ಮಾಡಿರುವ ಮೊದಲ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.

ಇಂಗ್ಲೆಂಡ್ ಬ್ಯಾಟಿಂಗ್ ನಡೆಸುವ ವೇಳೆ ಆರನೇ ಓವರ್​ನಲ್ಲಿ ಹರ್ಷಿತ್ ರಾಣಾ 26 ರನ್ ಬಿಟ್ಟುಕೊಟ್ಟರು. ಇದು ಬೌಲರ್​ವೊಬ್ಬರು ತಮ್ಮ ಚೊಚ್ಚಲ ಪಂದ್ಯದಲ್ಲಿ ತಮ್ಮ ಬೌಲಿಂಗ್​ನಲ್ಲಿ ಬಿಟ್ಟುಕೊಟ್ಟ ಭಾರತದ ಮೊದಲ ಬೌಲರ್​ ಎಂಬ ಕುಖ್ಯಾತಿಗೆ ಪಾತ್ರರಾಗಿದ್ದಾರೆ. ಅದಾಗಿಯೂ ಕಂಬ್ಯಾಕ್ ಮಾಡಿದ ರಾಣಾ, ಬ್ಯಾಕ್ ಟು ವಿಕೆಟ್ ಕಬಳಿಸಿ ಮಿಂಚಿದರು. ಬೆನ್ ಡಕೆಟ್, ಹ್ಯಾರಿ ಬ್ರೂಕ್ ಜೊತೆಗೆ ಲಿಯಾಮ್ ಲಿವಿಂಗ್​ಸ್ಟನ್​ ಅವರನ್ನು ಬಲಿ ಪಡೆದರು. ಈ ಮೂರು ವಿಕೆಟ್ ಪಡೆದ ಬಳಿಕ ದಾಖಲೆ ಬರೆದಿದ್ದಾರೆ. ಮೂರು ಸ್ವರೂಪಗಳಲ್ಲಿ ತಮ್ಮ ಚೊಚ್ಚಲ ಇನ್ನಿಂಗ್ಸ್‌ನಲ್ಲಿ 3+ ವಿಕೆಟ್ ಪಡೆದ ಮೊದಲ ಭಾರತೀಯ ಬೌಲರ್ ಎನಿಸಿದ್ದಾರೆ.

ಇದನ್ನೂ ಓದಿ: ಒಂದೇ ಓವರ್​ನಲ್ಲಿ 26 ರನ್; ಪದಾರ್ಪಣೆ ಪಂದ್ಯದಲ್ಲೇ ಸಾರ್ವಕಾಲಿಕ ಕೆಟ್ಟ ದಾಖಲೆ ನಿರ್ಮಿಸಿದ ಹರ್ಷಿತ್ ರಾಣಾ

ಪದಾರ್ಪಣೆ ಪಂದ್ಯಗಳಲ್ಲಿ ಮೂರು ಮೂರು ವಿಕೆಟ್

• 2024ರ ನವೆಂಬರ್​ 22ರಂದು ಆಸ್ಟ್ರೇಲಿಯಾ ವಿರುದ್ಧ ಪರ್ತ್​​ನಲ್ಲಿ ಭಾರತದ ಪರ ಟೆಸ್ಟ್​ ಕ್ರಿಕೆಟ್​ಗೆ ಪದಾರ್ಪಣೆ ಮಾಡಿದ್ದರು. ಆ ಪಂದ್ಯದ ಮೊದಲ ಇನ್ನಿಂಗ್ಸ್​​ನಲ್ಲಿ 48 ರನ್ ನೀಡಿ 3 ವಿಕೆಟ್ ಪಡೆದಿದ್ದರು.
• 2025ರ ಜನವರಿ 31ರಂದು ಜರುಗಿದ ಇಂಗ್ಲೆಂಡ್ ವಿರುದ್ಧದ 4ನೇ ಟಿ20ಐ ಪಂದ್ಯದಲ್ಲಿ ಭಾರತದ ಪರ ಚುಟುಕು ಕ್ರಿಕೆಟ್​ಗೆ ರಾಣಾ ಪದಾರ್ಪಣೆ ಮಾಡಿದರು. ಈ ಪಂದ್ಯದಲ್ಲಿ 33 ರನ್ ನೀಡಿ 3 ವಿಕೆಟ್ ಕಿತ್ತಿದ್ದರು.
• ಇದೀಗ 2025ರ ಫೆಬ್ರವರಿ 6ರಂದು ಇಂಗ್ಲೆಂಡ್ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ 50 ಓವರ್​​ಗಳ ಕ್ರಿಕೆಟ್​ಗೆ ಪದಾರ್ಪಣೆ ಮಾಡಿದ ಹರ್ಷಿತ್​ 53 ರನ್ ನೀಡಿ 3 ವಿಕೆಟ್ ಕಿತ್ತರು.

ಇದನ್ನೂ ಓದಿ: ಶುಭ್ಮನ್ ಗಿಲ್, ಅಯ್ಯರ್, ಅಕ್ಷರ್ ಬೊಂಬಾಟ್ ಆಟ; ಇಂಗ್ಲೆಂಡ್ ವಿರುದ್ಧ ಭಾರತಕ್ಕೆ ಗೆಲುವಿನ ಶುಭಾರಂಭ