112 ವರ್ಷಗಳ ನಂತರ ಚರಿತ್ರೆ ಸೃಷ್ಟಿಸಿದ ಭಾರತ; ಆಸ್ಟ್ರೇಲಿಯಾ, ಇಂಗ್ಲೆಂಡ್ ನಂತರ ಈ ಸಾಧನೆ ಮಾಡಿದ ವಿಶ್ವದ 3ನೇ ತಂಡ

ಐದನೇ ಹಾಗೂ ಅಂತಿಮ ಟೆಸ್ಟ್​​ ಪಂದ್ಯದಲ್ಲಿ ಇಂಗ್ಲೆಂಡ್ ತಂಡವನ್ನು ಇನ್ನಿಂಗ್ಸ್ ಮತ್ತು 64 ರನ್‌ಗಳಿಂದ ಸೋಲಿಸಿದ ಭಾರತ ಐದು ಪಂದ್ಯಗಳ ಸರಣಿಯನ್ನು 4-1ರಿಂದ ವಶಪಡಿಸಿಕೊಂಡಿದೆ. ಈ ಸೀರೀಸ್​ನ ಮೊದಲ ಟೆಸ್ಟ್​​​ನಲ್ಲಿ 28 ರನ್​ಗಳಿಂದ ಸೋತಿದ್ದ ರೋಹಿತ್​ ಶರ್ಮಾ ನೇತೃತ್ವದ ಭಾರತ ಉಳಿದ 4 ಪಂದ್ಯಗಳನ್ನೂ ಗೆದ್ದು ಐತಿಹಾಸಿಕ ದಾಖಲೆ ಬರೆದಿದೆ. ಗುರುವಾರ ಶುರುವಾದ ಟೆಸ್ಟ್​ ಕೇವಲ ಮೂರೇ ದಿನಕ್ಕೆ ಮುಗಿಯಿತು.

ಬೃಹತ್ ದಾಖಲೆ ನಿರ್ಮಿಸಿದ ಭಾರತ

ಈ ಜಯದೊಂದಿಗೆ ಭಾರತ ಬೃಹತ್ ದಾಖಲೆಯೊಂದನ್ನು ನಿರ್ಮಿಸಿದೆ. 112 ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ಭಾರತ ಈ ದಾಖಲೆ ಬರೆದಿದೆ. 112 ವರ್ಷಗಳಲ್ಲಿ ಸರಣಿಯ ಮೊದಲ ಟೆಸ್ಟ್‌ ಸೋಲಿನ ಬಳಿಕವೂ 4-1 ರಿಂದ ಟೆಸ್ಟ್ ಸರಣಿಯನ್ನು ಗೆದ್ದ ಮೊದಲ ತಂಡ ಎಂಬ ಐತಿಹಾಸಿಕ ದಾಖಲೆಗೆ ಒಳಗಾಗಿದೆ. ಐದು ಪಂದ್ಯಗಳ ಟೆಸ್ಟ್ ಸಿರೀಸ್​ನ ಮೊದಲ ಪಂದ್ಯದಲ್ಲಿ ಸೋತ ನಂತರ ಸರಣಿಯನ್ನು 4-1ರಿಂದ ಜಯಿಸಿದ್ದು ಎರಡು ತಂಡಗಳು ಮಾತ್ರ (ಈ ಸರಣಿಗೂ ಮುನ್ನ).

ಭಾರತಕ್ಕೂ ಮುನ್ನ ಇಂಗ್ಲೆಂಡ್ ಮತ್ತು ಆಸ್ಟ್ರೇಲಿಯಾ ತಂಡಗಳು ಈ ದಾಖಲೆ ನಿರ್ಮಿಸಿದ್ದವು. 1897/98 ಮತ್ತು 1901/02ರಲ್ಲಿ ಆಂಗ್ಲರ ವಿರುದ್ಧ ಆಸೀಸ್​ ಈ ಸಾಧನೆ ಮಾಡಿತ್ತು. 1912ರಲ್ಲಿ ಕಾಂಗರೂ ಪಡೆ ವಿರುದ್ಧ ಬ್ರಿಟಿಷರು ಈ ದಾಖಲೆ ಬರೆದಿದ್ದರು. ಅಂದಿನಿಂದ ಈವರೆಗೂ ಯಾರೂ ಸಾಧನೆ ಮಾಡಿರಲಿಲ್ಲ. ಇದೀಗ ಭಾರತ 112 ವರ್ಷಗಳ ನಂತರ ಈ ದಾಖಲೆಯನ್ನು ತನ್ನ ಹೆಸರಿಗೆ ಬರೆದುಕೊಂಡಿದೆ.

ಇದನ್ನೂ ಓದಿ: ಬೆನ್ ಸ್ಟೋಕ್ಸ್ ಅವರೇ ನೇರ ಕಾರಣ; ಇಂಗ್ಲೆಂಡ್​ ಸರಣಿ ಸೋಲಿಗೆ ಕಾರಣ ತಿಳಿಸಿದ ಬಿಸಿಸಿಐ ಅಧ್ಯಕ್ಷ ರೋಜರ್ ಬಿನ್ನಿ

ಸಂಕ್ಷಿಪ್ತ ಸ್ಕೋರ್ ವಿವರ

ಆರ್ ಅಶ್ವಿನ್ ಮತ್ತು ಕುಲ್ದೀಪ್​ ಯಾದವ್ ಐದನೇ ಟೆಸ್ಟ್‌ನಲ್ಲಿ ಭಾರತಕ್ಕೆ ಸ್ಟಾರ್ ಆಗಿದ್ದು, ಇಬ್ಬರು ತಲಾ ಒಂದೊಂದು ಇನ್ನಿಂಗ್ಸ್‌ನಲ್ಲಿ 5 ವಿಕೆಟ್​ ಗೊಂಚಲು ಪಡೆದು ಮಿಂಚಿದರು. ಅಶ್ವಿನ್​ ಅಬ್ಬರಿಸಿದ ಪರಿಣಾಮ ಇಂಗ್ಲೆಂಡ್ 2ನೇ ಇನ್ನಿಂಗ್ಸ್​​​ನಲ್ಲಿ 195 ರನ್‌ಗಳಿಗೆ ಆಲೌಟ್ ಆಯಿತು. ಕುಲ್ದೀಪ್​ ಸ್ಪಿನ್ ಮೋಡಿಗೆ ಆಂಗ್ಲರು ಮೊದಲ ಇನ್ನಿಂಗ್ಸ್​​ನಲ್ಲಿ 218 ರನ್​ಗಳಿಗೆ ಪತನ ಕಂಡಿತ್ತು. ಚೈನಾಮೆನ್ ಸ್ಪಿನ್ನರ್ 5 ವಿಕೆಟ್ ಪಡೆದಿದ್ದರು.

ರೋಹಿತ್ ಶರ್ಮಾ-ಶುಭ್ಮನ್ ಗಿಲ್ ಅವರ ಶತಕದ ನೆರವಿನಿಂದ 477 ರನ್ ಗಳಿಸಿ ಭಾರತ ತಂಡ 259 ರನ್​ಗಳ ಬೃಹತ್​ ಮುನ್ನಡೆಗೆ ಕಾರಣರಾದರು. ಇಂಗ್ಲೆಂಡ್ 2ನೇ ಇನ್ನಿಂಗ್ಸ್​​ನಲ್ಲಿ ಜೋ ರೂಟ್​ ಏಕಾಂಗಿ ಹೋರಾಟ ನಡೆಸಿದರು. ಅವರು 84 ರನ್​ಗಳಿಸಿ ಕೊನೆಯವರೆಗೂ ಕ್ರೀಸ್​​ನಲ್ಲಿದ್ದರು. ಕೊನೆಯಲ್ಲಿ ರೂಟ್​ ಔಟಾಗುತ್ತಿದ್ದಂತೆ ಇಂಗ್ಲೆಂಡ್​​​ ಇನಿಂಗ್ಸ್​ ಮುಕ್ತಾಯಗೊಂಡಿತು. ಅಶ್ವಿನ್ ಈ ಸರಣಿಯಲ್ಲಿ 9 ವಿಕೆಟ್ ಕಿತ್ತು ತಮ್ಮ 100ನೇ ಟೆಸ್ಟ್ ಪಂದ್ಯವನ್ನು ಸ್ಮರಣೀಯಗೊಳಿಸಿದರು.

ಇದನ್ನೂ ಓದಿ: ಐದನೇ ಟೆಸ್ಟ್​ ಗೆದ್ದು ಕೊಹ್ಲಿ, ಧೋನಿ, ಗಂಗೂಲಿ ಸಾಲಿಗೆ ಸೇರಿದ ರೋಹಿತ್ ಶರ್ಮಾ; ಭಾರತದ ಐದನೇ ಯಶಸ್ವಿ ಕ್ಯಾಪ್ಟನ್ ಪಟ್ಟ

ನಾಯಕನಾಗಿ ರೋಹಿತ್ ದಾಖಲೆ

ಐದನೇ ಟೆಸ್ಟ್​ ಪಂದ್ಯವನ್ನು ಜಯಿಸಿದ ಬೆನ್ನಲ್ಲೇ ನಾಯಕ ರೋಹಿತ್ ಶರ್ಮಾ ವಿಶೇಷ ದಾಖಲೆಯೊಂದನ್ನು ಹೆಸರಿಗೆ ಬರೆದುಕೊಂಡರು. ಭಾರತದ ಪರ ನಾಯಕನಾಗಿ ಅತಿ ಹೆಚ್ಚು ಪಂದ್ಯಗಳನ್ನು ಗೆದ್ದ 5ನೇ ಕ್ಯಾಪ್ಟನ್ ಎಂಬ ದಾಖಲೆಗೆ ಒಳಗಾದರು. ರೋಹಿತ್​ ಈವರೆಗೂ 16 ಟೆಸ್ಟ್​ಗಳನ್ನು ಮುನ್ನಡೆಸಿದ್ದು, 10ರಲ್ಲಿ ಜಯದ ನಗೆ ಬೀರಿದ್ದಾರೆ. ಆ ಮೂಲಕ ಟಾಪ್​-5 ಕ್ಯಾಪ್ಟನ್​​ಗಳ ಪಟ್ಟಿಗೆ ಸೇರ್ಪಡೆಗೊಂಡರು. ವಿರಾಟ್ ಕೊಹ್ಲಿ, ಎಂಎಸ್ ಧೋನಿ ಅಗ್ರಸ್ಥಾನದಲ್ಲಿದ್ದಾರೆ. ಸೌರವ್ ಗಂಗೂಲಿ ಮತ್ತು ಮೊಹಮ್ಮದ್ ಅಜರುದ್ದೀನ್ 3 ಮತ್ತು 4ನೇ ಸ್ಥಾನದಲ್ಲಿದ್ದು, ರೋಹಿತ್​ 5ನೇ ಸ್ಥಾನದಲ್ಲಿದ್ದಾರೆ.

ಇದನ್ನೂ ಓದಿ: ಶುಭ್ಮನ್ ಗಿಲ್-ಜಾನಿ ಬೈರ್​​ಸ್ಟೋ ನಡುವೆ ಜಗಳ; ಸ್ಲೆಡ್ಜಿಂಗ್​​ನಲ್ಲೂ ಕಿಂಗ್ ಕೊಹ್ಲಿ ಸ್ಥಾನ ತುಂಬಿದ ಪ್ರಿನ್ಸ್ ಗಿಲ್, VIDEO