VIDEO: ವಿವಾದಾತ್ಮಕ ತೀರ್ಪಿಗೆ ಯಶಸ್ವಿ ಜೈಸ್ವಾಲ್ ಔಟ್; ಮೆಲ್ಬೋರ್ನ್ ಟೆಸ್ಟ್​ ಗೆಲ್ಲಲು ಆಸೀಸ್​ಗೆ ನೆರವಾದರೇ ಅಂಪೈರ್?

ಬಾರ್ಡರ್ ಗವಾಸ್ಕರ್ ಟ್ರೋಫಿಯಲ್ಲಿ ಆಸ್ಟ್ರೇಲಿಯಾ ವಿರುದ್ಧದ ನಾಲ್ಕನೇ ಟೆಸ್ಟ್​ ಪಂದ್ಯದಲ್ಲಿ ಕಳಪೆ ಬ್ಯಾಟಿಂಗ್​ಗೆ ಬೆಲೆ ತೆತ್ತ ಟೀಮ್ ಇಂಡಿಯಾ, 184 ರನ್​ಗಳ ಹೀನಾಯ ಸೋಲಿಗೆ ಶರಣಾಗಿದೆ. ಐಕಾನಿಕ್ ಮೆಲ್ಬೊರ್ನ್ ಕ್ರಿಕೆಟ್ ಮೈದಾನದಲ್ಲಿ ಜರುಗಿದ ಪಂದ್ಯದಲ್ಲಿ ಕನಿಷ್ಠ ಡ್ರಾ ಸಾಧಿಸುವಲ್ಲಿಯೂ ವಿಫಲವಾದ ರೋಹಿತ್ ಬ್ರಿಗೇಡ್ ಈಗ ಸರಣಿಯಲ್ಲಿ 2-1 ಅಂತರದಲ್ಲಿ ಹಿನ್ನಡೆ ಸಾಧಿಸಿದೆ. ಆದರೆ ಭಾರತ ತಂಡವನ್ನು ಸೋಲಿನಿಂದ ಪಾರು ಮಾಡಲು ದಿಟ್ಟ ಹೋರಾಟ ನಡೆಸುತ್ತಿದ್ದ ಯಶಸ್ವಿ ಜೈಸ್ವಾಲ್ 84 ರನ್ ಗಳಿಸಿದ್ದಾಗ, 3ನೇ ಅಂಪೈರ್ ಕೊಟ್ಟ ವಿವಾದಾತ್ಮಕ ತೀರ್ಪಿಗೆ ಬಲಿಯಾದರು. ಇದು ವ್ಯಾಪಕ ಚರ್ಚೆಗೆ ಕಾರಣವಾಗಿದ್ದು, ಭಾರತ ತಂಡದ ಸೋಲಿಗೆ ಮತ್ತು ಆಸೀಸ್​ ಗೆಲುವಿಗೆ ಅಂಪೈರ್​ಗಳು ನೆರವಾಗಿದ್ದಾರೆ ಎಂಬ ಟೀಕೆ ವ್ಯಕ್ತವಾಗಿದೆ.

ಬಾಕ್ಸಿಂಗ್ ಡೇ ಟೆಸ್ಟ್ ಪಂದ್ಯದಲ್ಲಿ ಗೆಲುವಿಗೆ 340 ರನ್​ಗಳ ಗುರಿ ಪಡೆದ ಟೀಮ್ ಇಂಡಿಯಾ ಆರಂಭಿಕ ಆಘಾತಕ್ಕೆ ಒಳಗಾಯಿತು. ರೋಹಿತ್​ ಶರ್ಮಾ (9), ವಿರಾಟ್ ಕೊಹ್ಲಿ (5), ಕೆಎಲ್ ರಾಹುಲ್ (0) ಅವರನ್ನು ಬೇಗನೇ ಕಳೆದುಕೊಂಡಿತು. ಕೇವಲ 33 ರನ್ ಗಳಿಸುವಷ್ಟರಲ್ಲಿ ಟಾಪ್​-3 ಬ್ಯಾಟರ್​ಗಳನ್ನು ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು. ಈ ಹಂತದಲ್ಲಿ ಟೀಮ್ ಇಂಡಿಯಾಗೆ ನೆರವಾಗಿದ್ದೇ ಯಶಸ್ವಿ ಜೈಸ್ವಾಲ್. ಮೊದಲ ಇನ್ನಿಂಗ್ಸ್​​ನಲ್ಲೂ 82 ರನ್​ ಸಿಡಿಸಿ​ ತಂಡದ ಕೈ ಹಿಡಿದಿದ್ದ ಜೈಸ್ವಾಲ್, ಎರಡನೇ ಇನ್ನಿಂಗ್ಸ್​​ನಲ್ಲೂ ಅರ್ಧಶತಕ ಸಿಡಿಸಿ ಗೆಲುವು ಅಥವಾ ಡ್ರಾ ಮಾಡುವ ಭರವಸೆ ಮೂಡಿಸಿದ್ದರು. ಅವರಿಗೆ ರಿಷಭ್ ಪಂತ್ 30 ರನ್ ಗಳಿಸಿ ಸಾಥ್ ಕೊಟ್ಟರು. ಬಳಿಕ ರೋಹಿತ್​ ಪಡೆ ಮತ್ತೆ ನಾಟಕೀಯ ಕುಸಿತ ಕಂಡಿತು.

ಇದನ್ನೂ ಓದಿ: ಕಳಪೆ ಬ್ಯಾಟಿಂಗ್‌ಗೆ ಬೆಲೆ ತೆತ್ತ ಭಾರತ; ಕನಿಷ್ಠ ಡ್ರಾ ಸಾಧಿಸುವಲ್ಲೂ ವಿಫಲ, ಬಾಕ್ಸಿಂಗ್ ಡೇ ಟೆಸ್ಟ್‌ನಲ್ಲಿ ಹೀನಾಯ ಸೋಲು

ಮತ್ತೊಂದೆಡೆ ಸತತ ವಿಕೆಟ್ ಪತನವಾಗುತ್ತಿದ್ದರೂ ಮತ್ತೊಂದು ಎಂಡ್​ನಲ್ಲಿ ಬಂಡೆಗಲ್ಲಿನಂತೆ ನಿಂತು ವಾರಿಯರ್​ನಂತೆ ಹೋರಾಡಿದ ಜೈಸ್ವಾಲ್ ಸತತ 2ನೇ ಅರ್ಧಶತಕ ಸಿಡಿಸಿದರು. ಅಲ್ಲದೆ, ತಂಡವನ್ನು ರಕ್ಷಿಸುವ ಕಾರ್ಯದ ಜೊತೆಗೆ ಸೆಂಚುರಿಯತ್ತಲೂ ಮುನ್ನುಗ್ಗಿದರು. ಆದರೆ 208 ಎಸೆತಗಳಲ್ಲಿ 8 ಬೌಂಡರಿ ಸಹಿತ 84 ರನ್ ಬಾರಿಸಿದ್ದ ಎಡಗೈ ಆಟಗಾರ ವಿವಾದಾತ್ಮಕ ತೀರ್ಪಿಗೆ ಬಲಿಯಾದರು. ಪ್ಯಾಟ್ ಕಮಿನ್ಸ್​ ಎಸೆದ 71ನೇ ಓವರ್​ನ 5ನೇ ಎಸೆತದಲ್ಲಿ ಪುಲ್ ಮಾಡಲು ಯತ್ನಿಸಿದರು. ಆದರೆ ಚೆಂಡು ಬ್ಯಾಟ್ ತಪ್ಪಿಸಿ ವಿಕೆಟ್ ಕೀಪರ್​ ಕೈ ಸೇರಿತು. ಈ ವೇಳೆ ಆಸೀಸ್ ಆಟಗಾರರು, ಅಂಪೈರ್​ಗೆ ಬಲವಾದ ಮನವಿ ಸಲ್ಲಿಸಿದರು. ಆದರೆ ಮೈದಾನದ ಅಂಪೈರ್​​ ನಾಟ್​ಔಟ್ ಎಂದು ತೀರ್ಪು ಕೊಟ್ಟರು. ಹೀಗಾಗಿ, ತಂಡದ ಆಟಗಾರರೊಂದಿಗೆ ಚರ್ಚಿಸಿದ ಕಮಿನ್ಸ್, ಆನ್​ಫೀಲ್ಡ್​ ಅಂಪೈರ್​ ತೀರ್ಪಿನ ವಿರುದ್ಧ ಮೂರನೇ ಅಂಪೈರ್​ಗೆ ಮೇಲ್ಮನವಿ ಸಲ್ಲಿಸಿದರು.

ಗ್ಲೌಸ್​​ಗೂ ತಾಗಲಿಲ್ಲ, ಬ್ಯಾಟ್​ಗೂ ತಾಗಲಿಲ್ಲ…

ಮೂರನೇ ಅಂಪೈರ್ ಆಗಿದ್ದ ಬಾಂಗ್ಲಾದೇಶದ ಶರ್ಫುದ್ದೌಲಾ, ಅಲ್ಟ್ರಾ ಎಡ್ಜ್​ ಪರಿಶೀಲನೆ ನಡೆಸಿದರು. ಚೆಂಡು ಬ್ಯಾಟ್ ಪಕ್ಕದಲ್ಲೇ ಹಾದು ಹೋಗುತ್ತದಾದರೂ ಎಲ್ಲೂ ತಾಗದೇ ಇರುವುದು ಕಂಡು ಬಂತು. ಬ್ಯಾಟ್ ಅಥವಾ ಗ್ಲೌಸ್​ಗೆ ಚೆಂಡು ಟಚ್​ ಆಗಲಿಲ್ಲ ಎನ್ನುವುದು ಅಲ್ಟ್ರಾ ಎಡ್ಜ್​​ನಲ್ಲಿ ಸ್ಪಷ್ಟವಾಗಿ ಕಾಣುತ್ತದೆ. ಚೆಂಡು ಹಾದು ಹೋದಾಗ ಸ್ನೀಕೊ ಮೀಟರ್​ನಲ್ಲಿ ತಾಗಿರುವ ಸ್ಪೈಕ್​ ಕಾಣಲೇ ಇಲ್ಲ. ಇದನ್ನು ಹಲವು ಬಾರಿ ಪರಿಶೀಲನೆ ನಡೆಸಿದರೂ ಒಂದೇ ರೀತಿ ಕಾಣುತ್ತಿತ್ತು. ಅದಾಗಿಯೂ ಚೆಂಡು ಬ್ಯಾಟ್​ಗೆ ಸವರಿ ದಿಕ್ಕು ಬದಲಿಸಿರಬಹುದು ಎಂದು ಅಂದಾಜಿಸಿ ಮೂರನೇ ಅಂಪೈರ್​ ಔಟ್ ಎಂದು ತೀರ್ಪು ನೀಡಿದರು. ಮೈದಾನದಲ್ಲೇ ಇದ್ದ ಜೈಸ್ವಾಲ್ ಅಚ್ಚರಿ ಜೊತೆ ಡ್ರೆಸ್ಸಿಂಗ್​ ರೂಮ್​ನಲ್ಲಿದ್ದ ಭಾರತೀಯ ಆಟಗಾರರು ಅಚ್ಚರಿ ವ್ಯಕ್ತಪಡಿಸಿದರು. ಇದರೊಂದಿಗೆ ಅವರ ಏಕಾಂಗಿ ಹೋರಾಟ ಅಲ್ಲಿಗೆ ಅಂತ್ಯಗೊಂಡಿತು.

ಸೌರವ್ ಗಂಗೂಲಿ ಆಕ್ರೋಶ

ಇದೀಗ ಈ ಔಟ್ ಚರ್ಚೆಗೆ ಗ್ರಾಸವಾಗಿದೆ. ಟೀಮ್ ಇಂಡಿಯಾ ಮಾಜಿ ನಾಯಕ ಸೌರವ್ ಗಂಗೂಲಿ ಅಂಪೈರ್ ನಿರ್ಧಾರಕ್ಕೆ ಪ್ರತಿಕ್ರಿಯಿಸಿ, ಇದು ಒಪ್ಪುವಂತಹ ತೀರ್ಪು ಅಲ್ಲ. ಸ್ಪಷ್ಟವಾಗಿ ಚೆಂಡು ತಾಗದೇ ಇರುವುದು ಕಂಡರೂ ಔಟ್ ನೀಡಿರುವುದು ಎಷ್ಟು ಸರಿ ಎಂದು ಪ್ರಶ್ನಿಸಿದ್ದಾರೆ. ಗಂಗೂಲಿ ಮಾತ್ರವಲ್ಲ, ಬಹುತೇಕ ಮಾಜಿ ಕ್ರಿಕೆಟಿಗರು ಮೂರನೇ ಅಂಪೈರ್ ನೀಡಿರುವ ನಿರ್ಧಾರದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಚೆಂಡು ದಿಕ್ಕು ಬದಲಿಸಿದ ಮಾತ್ರ ಔಟ್ ಎಂದು ತೀರ್ಪು ನೀಡಲು ಹೇಗೆ ಸಾಧ್ಯ? ಚೆಂಡು ಸ್ವಿಂಗ್ ಆಗಿರಬಹುದು ಎಂದು ಅನೇಕರು ಪ್ರಶ್ನಿಸಿದ್ದಾರೆ. ಅಭಿಮಾನಿಗಳು ಆಸೀಸ್ ನೆಲದಲ್ಲಿ ಭಾರತ ತಂಡಕ್ಕೆ ಪದೇ ಪದೇ ಮೋಸ ಆಗುತ್ತಿದೆ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಕಿಡಿಕಾರಿದ್ದಾರೆ. ಇದೇ ವೇಳೆ ಬಾಲ್ ಟ್ಯಾಂಪರಿಂಗ್ ಹಗರಣವನ್ನು ನೆನಪಿಸಿರುವ ಕ್ರಿಕೆಟ್ ಫ್ಯಾನ್ಸ್, ಅಂಪೈರ್​ ಜೊತೆ ಫಿಕ್ಸಿಂಗ್ ಮಾಡಿಕೊಂಡಿದ್ದೀರಾ ಎಂದು ಕಿಡಿಕಾರಿದ್ದಾರೆ.

ಜೈಸ್ವಾಲ್ ಔಟಾದ ವಿಡಿಯೋ ಇಲ್ಲಿದೆ…

ಹೊಸ ವರ್ಷ ಹೇಗಿರುತ್ತೆ? ಇಲ್ಲಿದೆ 2025 ರ ರಾಶಿವಾರು ಮಾಹಿತಿ

2025 ನಿಮಗೆ ಏನೆಲ್ಲಾ ಶುಭಫಲಗಳನ್ನು ನೀಡಲಿದೆ? ಹೊಸ ವರ್ಷದಲ್ಲಿ ಬದಲಾವಣೆಗಳು, ಉದ್ಯೋಗ ಪ್ರಗತಿ, ವಿದ್ಯಾಭ್ಯಾಸ, ಪ್ರೀತಿ, ದಾಂಪತ್ಯ ಸೇರಿದಂತೆ ನೀವು ತಿಳಿಯಬಯಸುವ ಸಮಗ್ರ ಮಾಹಿತಿ ಇಲ್ಲಿದೆ. ಪ್ರತಿ ರಾಶಿಯ ಸಮಗ್ರ ವಿವರ ಇಲ್ಲಿ ಲಭ್ಯ. ನೀವು ಈವರೆಗೆ ನೋಡಿಲ್ಲ ಅಂತಾದ್ರೆ ಬೇಗ ನೋಡಿ. ಈಗಾಗಲೇ ನೋಡಿದ್ದರೆ ನಿಮ್ಮ ಆಪ್ತರಿಗೂ ಈ ಬಗ್ಗೆ ತಿಳಿಸಿ. https://kannada.hindustantimes.com/astrology/yearly-horoscope