302 ರನ್​ಗಳ ವಿಶ್ವದಾಖಲೆಯ ಜಯದೊಂದಿಗೆ 8ನೇ ಬಾರಿಗೆ ವಿಶ್ವಕಪ್ ಸೆಮಿಫೈನಲ್​​​ ಪ್ರವೇಶಿಸಿದ ಭಾರತ; ಲಂಕಾ ಬಹುತೇಕ ಔಟ್

ಐಸಿಸಿ ಏಕದಿನ ವಿಶ್ವಕಪ್ ಟೂರ್ನಿಯಲ್ಲಿ ಟೀಮ್ ಇಂಡಿಯಾ ಗೆಲುವಿನ ನಾಗಾಲೋಟ ಮುಂದುವರೆಸಿದೆ. ಶ್ರೀಲಂಕಾ ವಿರುದ್ಧವೂ ಗೆದ್ದ ಭಾರತ ಸತತ 7 ಪಂದ್ಯಗಳಲ್ಲಿ ಜಯದ ನಗೆ ಬೀರಿದೆ. ಆ ಮೂಲಕ ವಿಶ್ವಕಪ್​​ನಲ್ಲಿ ಮೊದಲ ತಂಡವಾಗಿ ಸೆಮಿಫೈನಲ್​​ ಅಧಿಕೃತ ಪ್ರವೇಶ ಪಡೆದಿದೆ. ಅಲ್ಲದೆ, 14 ಅಂಕಗಳೊಂದಿಗೆ ಅಂಕಪಟ್ಟಿಯಲ್ಲೂ ಮತ್ತೆ ಅಗ್ರಸ್ಥಾನಕ್ಕೆ ಏರಿದೆ. ಮತ್ತೊಂದೆಡೆ ಸೋತ ಲಂಕಾ ಬಹುತೇಕ ಸೆಮೀಸ್​​ ರೇಸ್​ನಿಂದ ಹೊರಬಿದ್ದಿದೆ.

ಸಿಂಹಳೀಯರ ವಿರುದ್ಧ 302 ರನ್​ಗಳ ಗೆಲುವು ದಾಖಲಿಸಿದ ರೋಹಿತ್ ಪಡೆ, ಸತತ ನಾಲ್ಕನೇ ಬಾರಿ (2011, 2015, 2019 ಮತ್ತು 2023) ಹಾಗೂ ಒಟ್ಟು 8ನೇ ಸಲ ಏಕದಿನ ವಿಶ್ವಕಪ್​ ಸೆಮಿಫೈನಲ್​ಗೆ ಪ್ರವೇಶಿಸಿದ ದಾಖಲೆ ಬರೆದಿದೆ. 302 ರನ್​ಗಳಿಂದ ಲಂಕಾವನ್ನು ದಹನ ಮಾಡಿ, ಟೀಮ್ ಇಂಡಿಯಾ ವಿಶ್ವದಾಖಲೆ ಬರೆದಿದೆ. ವಿಶ್ವಕಪ್ ಇತಿಹಾಸದಲ್ಲಿ ಭಾರಿ ದೊಡ್ಡ ಅಂತರದ ಗೆಲುವನ್ನು ತನ್ನದಾಗಿಸಿಕೊಂಡಿದೆ.

ಮುಂಬೈನ ವಾಂಖೆಡೆ ಮೈದಾನದಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ ಟೀಮ್ ಇಂಡಿಯಾ, ಭರ್ಜರಿ ಬ್ಯಾಟಿಂಗ್ ನಡೆಸಿತು. ನಿಗದಿತ 50 ಓವರ್​​​ಗಳಲ್ಲಿ 8 ವಿಕೆಟ್​ ನಷ್ಟಕ್ಕೆ 357 ರನ್ ಗಳಿಸಿತು. ಶುಭ್ಮನ್ ಗಿಲ್ 92, ವಿರಾಟ್ ಕೊಹ್ಲಿ 88, ಶ್ರೇಯಸ್ ಅಯ್ಯರ್ 82 ರನ್ ಸಿಡಿಸಿದರು. ಈ ಗುರಿ ಬೆನ್ನತ್ತಿದ ಶ್ರೀಲಂಕಾ, ಭಾರತೀಯ ಬೌಲರ್​​ಗಳ ದಾಳಿಗೆ ತತ್ತರಿಸಿ ಹೋಯಿತು. 19.4 ಓವರ್​​​ಗಳಲ್ಲಿ 55 ರನ್​ಗಳಿಗೆ ಸರ್ವಪತನ ಕಂಡಿತು.

ಲಂಕಾ ದಹನ ಮಾಡಿದ ಭಾರತೀಯ ವೇಗಿಗಳು

358 ರನ್​ಗಳ ಬೃಹತ್ ಗುರಿ ಬೆನ್ನಟ್ಟಿದ ಶ್ರೀಲಂಕಾ, ಜಸ್ಪ್ರೀತ್ ಬುಮ್ರಾ, ಮೊಹಮ್ಮದ್ ಶಮಿ, ಮೊಹಮ್ಮದ್ ಸಿರಾಜ್​ ದಾಳಿಗೆ ತತ್ತರಿಸಿತು. ಮೂವರು ವೇಗಿಗಳು ಜಿದ್ದಿಗೆ ಬಿದ್ದವರಂತೆ ವಿಕೆಟ್ ಪಡೆದರು. ಇನ್ನಿಂಗ್ಸ್​ ಆರಂಭದ ಮೊದಲ ಎಸೆತದಲ್ಲೇ ಪಾತುಮ್ ನಿಸ್ಸಾಂಕಗೆ ಬುಮ್ರಾ, ಶಾಕ್ ನೀಡಿದರೆ, ಸಿರಾಜ್, 2ನೇ ಓವರ್​​ನಲ್ಲಿ ದಿಮುತ್ ಕರಣರತ್ನೆ, ಸದೀರ ಸಮರವಿಕ್ರಮಗೆ ಗೇಟ್​ಪಾಸ್ ನೀಡಿದರು. ಮತ್ತೊಂದು ಓವರ್​​​ನಲ್ಲಿ ಕುಸಾಲ್ ಮೆಂಡಿಸ್​ರನ್ನು ಕ್ಲೀನ್​ ಬೋಲ್ಡ್ ಮಾಡಿದರು.

ಬುಮ್ರಾ, ಸಿರಾಜ್​​ ಬಳಿಕ ದಾಳಿಗಿಳಿದ ಶಮಿ, ಲಂಕಾಗೆ ಮತ್ತಷ್ಟು ಆಘಾತ ನೀಡಿದರು. ಚರಿತ್ ಅಸಲಂಕ (1), ದುಶಾನ್ ಹೇಮಂತ (0), ದುಷ್ಮಂತಾ ಚಮೀರಾಗೆ (0), ಆ್ಯಂಜಲೋ ಮ್ಯಾಥ್ಯೂಸ್​​ (12), ಕಸುನ್ ರಜಿತ (14) ಶಾಕ್​ ನೀಡಿದರು. ಶಮಿ 5 ವಿಕೆಟ್ ಕಬಳಿಸಿ ಭಾರತದ ಪರ ಏಕದಿನ ವಿಶ್ವಕಪ್​ನಲ್ಲಿ ಅಧಿಕ ವಿಕೆಟ್​ ಪಡೆದ ಆಟಗಾರ ಎನಿಸಿದರು. ಆ ಮೂಲಕ ಜಹೀರ್ ಖಾನ್ ದಾಖಲೆ ಮುರಿದರು. ರವೀಂದ್ರ ಜಡೇಜಾ ಕೊನೆಯ ವಿಕೆಟ್​ ಪಡೆದರು.

ಭಾರತ ಭರ್ಜರಿ ಬ್ಯಾಟಿಂಗ್​​

ಮೊದಲು ಬ್ಯಾಟಿಂಗ್ ನಡೆಸಿದ ಭಾರತ, ಉತ್ತಮ ಆರಂಭ ಸಿಗಲಿಲ್ಲ. ರೋಹಿತ್​ ಬೇಗನೇ ಔಟಾದರೂ, ಶುಭ್ಮನ್ ಗಿಲ್, ವಿರಾಟ್ ಕೊಹ್ಲಿ ಮತ್ತು ಶ್ರೇಯಸ್ ಅಯ್ಯರ್ ಭರ್ಜರಿ ಬ್ಯಾಟಿಂಗ್ ನಡೆಸಿದರು. ರೋಹಿತ್​ 4 ರನ್ ಗಳಿಸಿ ಔಟಾದರೆ, ಗಿಲ್-ಕೊಹ್ಲಿ 2ನೇ ವಿಕೆಟ್​​ಗೆ 179 ರನ್​ ಜೊತೆಯಾಟವಾಡಿದರು. ಆದರೆ ಇಬ್ಬರೂ ಶತಕ ವಂಚಿತರಾದರು. ಗಿಲ್ 92 ಎಸೆತಗಳಲ್ಲಿ 11 ಬೌಂಡರಿ, 2 ಸಿಕ್ಸರ್ ಸಹಿತ 92 ರನ್ ಗಳಿಸಿದರು.

ಮತ್ತೊಂದೆಡೆ ಕೊಹ್ಲಿ 94 ಎಸೆತಗಳಲ್ಲಿ 11 ಬೌಂಡರಿ ನೆರವಿನಿಂದ 88 ರನ್ ಸಿಡಿಸಿ ವಿಕೆಟ್ ಒಪ್ಪಿಸಿದರು. ಆ ಮೂಲಕ 49ನೇ ಏಕದಿನ ಶತಕ ತಪ್ಪಿಸಿಕೊಂಡರು. ಬಳಿಕ ಶ್ರೇಯಸ್ ಸಿಡಿಲಬ್ಬರದ ಬ್ಯಾಟಿಂಗ್ ನಡೆಸಿದರು. 56 ಎಸೆತಗಳಲ್ಲಿ 3 ಬೌಂಡರಿ, 6 ಸಿಕ್ಸರ್​ ಸಹಿತ 82 ಚಚ್ಚಿದರು. ಕೆಎಲ್ ರಾಹುಲ್ 21, ರವೀಂದ್ರ ಜಡೇಜಾ 35 ರನ್ ಸಿಡಿಸಿದರು. ಬ್ಯಾಟಿಂಗ್ ಆರ್ಭಟದ ನಡುವೆಯೂ ಲಂಕಾ ಪರ ದಿಲ್ಶಾನ್ ಮಧುಶಂಕ 5 ವಿಕೆಟ್ ಪಡೆದರು.